السلام عليكم و رحمه الله و بركاته

كل سنه و انتم طيبين

و رمضان كريم



بصراحه انا دايما بحتاس في المنتدي عشان الاقي اكلات مصريه

لان مش دايما بتناسبنا وصفات الاخوات من الدول الاخرى الله يجزيهم خير

و طبعا معظم الستات بتكون محتاسه و بتفكر اطبخ ايه النهارده

طيب اجهز ايه للسحور

وآه بقي لو في عزومه فطار

اتمني التفاعل من الاخوات المصريات

انا بقالي يومين حيرانه اطبخ ايه اول يوم رمضان
طيب تاني يوم و اللي بعده و اللي بعده
يا تري يا ستات مصر الشاطرين

ايه افكاركم لاول يوم


في انتظاركم

تحياتي و رمضان كريم

كل سنة و كل المسلمين بألف خير و كل المصريين بكل خير
احلى سلام و احلى تحية من ام ميادة الاسكندرانبة
بصى بقى اول يوم رمضان عندنا هنا فى الاسكندرية هنا اسمه الرفرافة و دة لان لازم ناكل اول يوم طير بيرفرف بط مثلا او رومى او فراخ بلدى طبعا و بيكون جنبها اما رز باللخلطه او رقاق و طبعا شوربة و اى صنف خضار ملوخية مثلا او بامية و طبعا المخللات الجامدة بتاعتنا من لمون و زتون و جزر و خيار و الحلو طبعا كنافة و قطايف او بقلاوة و بسبوسة و العصير طبعا ع الفطار قمر الدين و بعد الفطار خروب او كركدية او تمر هندى
ده الطبيعى عندنا هنا و التقليدى بس لو مش عايزة التقليدى ممكن تعملى مكرونه نجرسكو و فراخ و بطاطس محمرة او اى اكل من العادى , بس نصيحة لازم اول يوم رمضان يكون مميز عشان اللمه و العيلة هو دة اللى اتعودنا علية
و كل سنة و انتى طيبة

اولا ياقمر كل سنة وانت طيبة يا جميلة
ويتعاد عليكي وعلى كل المسلمين بالف خير

انا لية وجهة نظر عن الافطار في رمضان السنة دي لاننا في حرررررررر
انا حاسة ان الواحد على ما يشرب العصير
هيبقى عطشااااااان قوي
فنركز على الشوربة
والسلطات
وممكن نواشف يعني سمبوسك ، صينية جلاش كدة يعني
على ما ناكل دة مش هيبقى فيه مكان
ولذلك ممكن بقى البروتين اي حاجة فراخ لحمة يعني اللي موجود يعني خفايف ونواشف
بس اول يوم لو مش هتتعزمي عند حماتك ولا والدتك
يبقى فعلا حاجة مميزة
بط، حمام، اي حاجة من دي
وشوربة وسلطة وسمبوسك
واللي ييجي جنب البروتين اللي هتعمليه ويبقى متماشي معاه

ازيكم ياحلوين وكل عام وانتم بخير رمضان عموما حتي لو مش في الحر بيحتاج اكلات تكون شهيه وخفيفه
ان شاء الله اول يوم في رمضان هنعمل محشي ورق عنب وسمبوسك وفراخ محشيه وسلطه خضار وشوربه واكيد العصير قبل الفطار
ورمضان كريم

السلام عليكم
أنا مصرية بس عايشة في الخليج بس تحديدا بالسعودية وبصراحة أحنا هنا مش حاسين برمضان خالص لكن ده ما يغنيش عن أن بعمل الأكلات المصرية طبعا وهعمل إن شاء الله أول يوم رمضان ورق عنب وكرنب وممبار وفراخ مشوية وشوربة طبعا والعصير لما تمر هندي أو قمرالدين بالجزر الحلو كنافة أو قطايف أو لقمة القاضي حاجة من التلاتة مش كلها طبعا وكل سنة وأنتم طيبين

السلام عليكم
كل سنه وانتى طيبه ياراندا وكل البنات يارب
اول يوم انشاء الله لسه مقررتش بالظبط ههههههههههههه
كل شويه اغير رايى

اول يوم عازمه حماتى على الفطار ومحتاره اعمل بط بالبرتقال فى الفرن وجنبه محشى وشوربه وسمبوسه او اعمل حمام محشي وشوربه وسمبوسه وطبعا عصير قمرالدين

كل سنه و انتم طيبين جميعا

ان شاء الله يكون شهر خير علينا و علي جميع المسلمين


انا برضو محتاره بين الحمام و البط

و احيانا اقول اعمل صينيه خضار مع لحمه و رز معمر

طبعا اكيد الشوربه و قمر الدين و كمان الخشاف مجبتوش سيرته ليه ( اوعوا تكونوا ناسينه )

و انا متعوده دايما اول يوم رمضان اعمل قطايف بمووووووووت فيها

ام مياده الاسكندرانيه (اجدع ناس ) منوره

انا حاليا عايشه في اسكندريه بس انا من القاهره

كل سنه وانتى طيبه يارب وينعاد عليكم ياكل المصريين انا مصريه ومغتربه في السعوديه بس عمري ماقضيت رمضان زى اللي قضيته في بيت اهلى حتى بعد مااتجوزت المهم انا لسه مش مستقرة بس اساسي العصير قمر الدين وفيمتو والخشاف وسمبوسة جبنه ومحتاره اعملى محشي ورق عنب ولا مكرونه باشميل وجلاش باللحمه والسلاطه فتوش وشوربة لسان عصفور وممكن شويه ملوخية وكل ده وانا وجوزى اتنين بس بس الواحد عاوز يحسس نفسه بجو العيله اللي كان عايشها يارب ما يكتب على حد الغربه واكيد ده احساس كل مغتربه عن بلدها كل سنه وانتو بالف خير يارب وياريت منتقلش عشان نقدر نصلي وياريت نشرب عصير الاول ونصلي المغرب ونرجع نفطر دة بيكون احسن

انا معزومة عند حماتى ونفسى اكل اول يوم رقاق وبط قولى يارب