*موضوع متميز*محشي ورق عنب وملوخيه من مطبخ ام الحلوين
السلام عليكم
بمناسبه بدء موسم ورق العنب
وفأول طبخه ليه
حبيت تشاركوني
النهارده
طبعا هنجيب الورق ننضفه ونغسله
بعدين نحط ميه تغلي على النار ونسقطه فيه ادوب يطرى ونطلعه
بعدين نحضر الحشو
النهارده الحشو هيكون على الطريقه المصريه
نجيب بصلتين كبار ونقطعهم نقلبهم على النار مع سمنه وزيت
ولما يدبل خالص
نحط عليه عصير 7 حبات طماطم كبيرة
ونسيبهم يتسبكوا على النار
نجيب شبت وبقدونس وكزبرة ونعناع ونغسلهم ونفرمهم صغير
حبتين فلفل رومي او حار الي تحبوه
ونقطعه مع الخلطه
ورز مصري مغسول ومنقوع
نقلبهم سوا ونحط عليهم الصلصه بعد متكون ميتها تقريبا نشفت
ونحط معاه ملح وفلفل اسود وشويه بهار
طبعا دي مش الكميه كلها بس انا باخد شويه شويه فطبق صغير
نحشي الورق بالطريقه المعروفه
وانا اتبقى حشوه حشيت معاها فلفل رومي
انا هنا مسلقتش فراخ كان عندي شوربه كتير من قبلها بيوم فعملت بيها
غليت الشوربه وحطيتها على المحشي وعالنار علشان يستوي
جنبه طبعا لازم الملوخيه
قطفت الملوخيه وغسلتها وسبتها تنشف
وبعدين فرمتها
وحطيتها فشويه شوربه بارده
وحطيت شوربه تانيه على النار ولما غليت نزلت عليها الملوخيه
فالوقت ده ببقى محضرةالطشه
توم مدقوق وكزبرة
ونقدح السمنه
او الزيت
ونحطها عليها واما تغلي الملوخيه نشيل الريم الابيض
ونحط الطشه وتغلي غلوتين
ونطفي
طبعا مبنغطيش الحله ابدا الالما تبرد
جنبها طبعا لازم يكون في فراخ وبما ان عندي شوربه
فعملت الفراخ فالفرن
والطريقه دي طريقه والدتي الغاليه
نجيب الفراخ نغسلها ونصفيها ونقطعها
التتبيله
معلقتين معجون طماط
عصير ليمونه
م ص بهارات فراخ
نص م ص فلفل اسود
نص م ص كركم
رشه قرفه وحبهان او هيل
ملح
نقلبهم سوا ونحطهم على الفراخ
وساعه السوا نغطيها بفويل وعالفرن ولما تستوي
نشيل الفويل
ونحمرها
التتبيله دي تحفه بجد
والله مفيش حد بيدوقها الا وبياخد طريقتها
ودلوقتي الاكل بعد السوا
اعذروني كنت بصور وانا بجري لانهم كانوا واقعين من الجوع
اعذروني لاني ملحقتش ازبط طبق الحشي لانه كان سخن جدا وكنت مستعجله
ولاتنسوا اولادي من الدعاء
.
رد مع الاستدلال
الروابط المفضلة