شكرا على الايضاح حنين
أنا عاد لازم أنام ليلة العيد ولو ساعة ونصف
عشان أكون مصحصحة لصلاة العيد ، واستقبال اخواني وأولادهم
وبعد صلاة الظهر أنام لي ساعتين ، وبعدين أروح للقاء العائلي الكبير في بيت الوالدة
والوالدة الله يعطيها الصحة والعافية نكون مارين عليها الصبح ومودينها المصلى
يعني تكون أول من أعيد عليه
وهكذا ما أحلم أسوي الخروف صبح العيد
لكن اللي يكون جاهز صبح العيد هو الهريس اللذيذ من بيت الوالدة
وأنا والشغالة من الليل نجهز الخبز والبلاليط واحيانا الحمص والفول ( يعني دنغو وباجلة )
والحلويات والفطائر ، هذا إضافة للحلويات الجاهزة ، ولازم أحط طبق باتشي كبير ويفضل يكون ثلاث طبقات في وسط الطاولة
وكل شي يكون جاهز على سفرة العيد على الساعة 2 او 3 بالليل
ما عدا الهريس والاشياء اللي تحتاج تسخين
عاد غدانا يوم العيد في دبي لازم يكون مالح ، وعادة يكون في بيت العائلة
ومرة ثانية ، أهنئج على هذا الانجاز ، وكل عام وانت بخير
الروابط المفضلة