الاكلة دى يا جماعة بعملها كل ما اتزتق و ما الاقيش حاجة اعملها لأنها سهلة جداااااا و سريعة و ممكن تنفع عشا و ممكن تعمليها سندوتشات للاولاد للمدرسة
انا كنت نزلتها قبل كده بس المرة دى بالصور
هى عبارة عن كبد او قلوب او قوانص الفراخ او كلهم مع بعض (نص كيلو)
بصلة متوسطة مبشورة
فصين توم مفرومين (اختيارى)
ملح و فلفل اسود
رشة قرفة صغيرة
4 ملاعق كبيرة زيت
2 معلقة كبيرة صلصة طماطم جاهزة
ننضف الكبد و نقطعها قطع صغيرة و نحطها فى مصفاة و نغسلها بالخل و تحت الماء الجارى و نسيبها تتصفى
نبشر البصلة و نحطها فى الحلة
التوم لو حطيناه بيدى طعم حلو لكن لومش بتحبيه بلاش منه, ممكن نبشره, او تحطيه صحيح و بعد كده تشيليه
نحط على البصل و التوم الزيت و الملح و افلفل و القرفة
نولع النار و نقلب المكونات شوية لغاية ما البصلة تصفر و تدبل شوية
نضيف الكبد
و نقلب لغاية ما لونها يتغير
نوطى النار و نسيبها 10 دقايق
الكبدة هتنزل ماء نحط الصلصة و نقلبها كويس و ندوبها فى ماء الكبدة و لو حسينا ان الماء قليل نزود ربع كوب ماء
نسيبها على النار كمان 10 دقايق و بالهنا و الشفا
ممكن ناكلها بالعيش او جنب رز ابيض او رز بالكركم
لو بنحب الحراق ممكن نضيف فى السواء شطة
ممكن كمان بعد ما تستوى نكسر عليها بيضتين و نقليهم بتبقى حلوة اوى
ممكن تتعمل بنفس الطريقة من غير صلصة و ممكن بدل الصلصة نحط معلقة دقيق عشان يتقل الصوص بتاعها شوية
الروابط المفضلة