السلام عليكم و رحمة الله و بركاته:
كيفكن يا حلوين
اليوم الأكلة مو غريبة و مو اختراع بس الجديد بالطريقة على ماااااا اعتقد
الكل بيعرف البامية ، و لكل طريقته بالتحضير و هي بتحتاج لدهون كتير .
تعالوا نعملها بهالطريقة و نتخلص من الدهون الضاااارة:
بما أنو الآن شتاء فاستخدمت البامية الناشفة ( عملناها بالصيف و نشفناها ...بعيدا" عن الشمس حتى ما يصير لونها أصفر...و خبيناها بمكان جاف و بارد لأيام الشتا )
ننقعها من قبل بيوم بماء ساخن لليوم التاني ، نصفيها و تصير جاهزة للاستخدام.
نحتاج أيضا":
لحمة هبرا (مكعبات متوسطة الحجم)
راس كبير توم
ضمة كزبرة خضراء
حمض حصرم أو ليمونة متوسطة الحجم
نص كوب معجون طماطم
ملح...فلفل...بهارات
ملعقة سمن حيواني أو زيت زيتون
الطريقة:
*نضع وعاء على النار فيه ماء و نتركه حتى يغلي ، نضع فيه قطع اللحمة و نتركها تغلي مدة 5 دقائق.
* نرفع الوعاء و نصفي اللحمة بالمصفاية و نغسلها بالماء البارد. الماء السابق نرميه بتكون فيه كل الزفرة و الأوساخ تبع اللحمة.
*نحضر صينية الفرن و نضع فيها المواد السابقة:
البامية....اللحمة...نص كمية التوم بعد تقطيعه شرائح صغيرة...نص كمية الكزبرة بعد ما نغسلها و نفرمها...القليل من الملح...البهارات... معجون الطماطم.
*طبعا" نضيف كوبين من الماء و نغطيها بورق الألمنيوم و ندخلها لفرن متوسط الحرارة.
*الآن روحوا عالسوق....أو عند الجيران ....أو ناااموا.... المهم غيبوا مدة ساعة و نص و بعدين بتطلعوها من الفرن بتكون استوت.
* نضيف عصير الليمونة أو ملعقة كبيرة حمض الحصرم، و نرجعها للفرن تغلي مع بعض شي 10 دقائق.
* نهرس باقي كمية التوم و نضيفها للبامية.
* كمان نخليها تغلي مرة واحدة و نضيف الكزبرة الخضرا المتبقية.
* كمان منخليها تغلي لآخر مرة و ندوق الملح و نظبط الطعمة و نطالعها من الفرن....و خلااااص.
* نضيف ملعقة السمنة الحيواني أو ملعقتين زيت زيتون.
* طبعا" منكون عملنا الرز بالشعيرية و نقدمه بجانب البامية و لو في فليفلة خضرا كتيير طيبة معها:
ألف صحة و هناااا يا رب
أتمنى أن تعجبكم ... جربوا و شوفوا********
الروابط المفضلة