السلام عليكم و رحمة الله و بركاته:
أخواتي حبيباتي، مبارح كنت عاملة حراء بأصبعو فشو قلت لحالي ، ما بيصير لازم أحسب حساب الصبايا و اعزمهن، دايما هنن بيعملوا أكلات طيبة و هاد يلي صار بلا طول سيرة تفضلوا ***
و مشان تعرفوا شو عم تاكلوا رح خبركن شو عملت***
المقادير:
كوب عدس أحمر مسلوق،كوب طحين للعجين، بصل، توم ، كزبرة خضرا، رغيف خبز مقطع مربعات و مقلي، ملعقتين كبار حمض حصرم..اذا ما في حطوا تمر هندي ..اذا ما في حطوا دبس رمان..لاتقولوا ما في .. اذا حطيتوا ليمون ما رح يعطي نفس الطعم بس شو تعملوا أمركن لالله...
زيت زيتون لقلي البصل و التوم و الكزبرة. ملح ، ملعقتين زيت نباتي للعجينة.
الطريقة:
* نعجن كوب الطحين مع رشة ملح و الزيت النباتي و ماء كافي شي ربع كاسة ، نتركها ترتاح شوي و بعدين نرقها و نقطعها مربعات و نتركها على جنب .
*بعد ما سلقنا العدس ، نضيف الحمض و الملح حسب الذوق ، لازم يكون حامض شوي منضيف قطع العجين حتى تستوي داخل المرق، و نتركها على نار هادئة ، بتاخد شي نص ساعة و شوي.
*منكون قلينا الخبز، بزيت الزيتون نقلي البصل المقطع جوانح، بنفس الزيت نقلي التوم و الكزبرة الخضرا ما بيصير يابسة بكل مكان في كزبرة خضرا.
* استوى العجين..كتيير منيح...جيبوا جاط السكب و اسكبوا العدس و العجين(على فكرة في ناس بيحطوا معها قطع صغيرة كوسا ، أنا ما حطيت لأنو ما كان عندي)
* افردوا عليه الخبز المحمص و فوقو البصل و فوقو التوم و الكزبرة.
* و تفضلوا مع ألف صحة و هنا و بالعافية***
نصيحة أخوية:
بعد ما تخلصوا و تشربوا الشاي المعتبر، اشربوا كمون و بابونج أنو هالأكلة تقيلة بسبب العجين و الزيت المقلي يللي فيها و بتنفخ بعيد عنكن، و سلامتكن.
أكيد عم تقولوا شو هالعزيمة ..كلوا و ديروا بالكن..لاتزعلوا عم نهز الورد لنشموا*** صحيييين***
بالهنا و الشفا ****
الروابط المفضلة