هادي طريقتي في عمل المفتول اللي اخذتها من كذا طريقة وكونتها
المقادير:
دجاجة 1كيلو
2 حبة بصل
بهارات مشكلة ( ملعقة صغيرة ) ياريت تستخدمي مسحوق البهارات المشكلة اللي في السوبرماركت جامع كل البهارات الطيبة
كسكسي حوالي ربع كيلو
3 حبات بطاطس متوسطة مقطعة قطع كبيرة نوعا ما
حبة باذنجان متوسطة ومقطعة قطع كبيرة نوعا ما
3 حبات فلفل اخضر متوسطة الحجم ومقطعة قطع كبيرة نوعا ما
2 حبة طماطم مقطعة بنفس الطريقة
نصف كاس حمص مسلوق ( يمكن استخدام نص علبة من الحمص المعلب )
ملح - فلفل اسود – هيل مطحون – قرفة _ كزبرة ناشفة
ملعقة كبيرة صلصة طماطم
الطريقة :
نظفي الدجاجة كويس واسلقيها بالملح والفلفل والهيل والكزبة والقرفة وبصلة مقطعة شرايح وشوية زيت وخليها تستوي
اغسلي الكسككسي بشوية موية وخليه على جنب ..
تفرمي البصلة التانية ناعم شوية وتحطي عليها ملعقة البهارات المشكلة وافركي البصلة كويس بالبهار وحطيه على الكسكسي وارفعيه على النار في الحلة المخصصة للكسكسي ( اللي بتكون زي المصفى وتحتيها حلة ..بنحط االموية في الحلة اللي تحت ولما تبدا تغلي تحطي المصفا اللي فيها الكسكسي فوقيها وتخليه يستوي بالبخار مع التقليب كل شوي عشان ما يخبص ويلزق ببعضه وما تغطي المصفى اللي فوق )
بس تستوي الدجاجة انشليها من الشوربة وحطي البطاطس والفلفل الاخضر والباذنجان والطماطم وملعقة الصلصة وخلي الخضار يستوي على المرقة وتتقل شوية بعد ما يستوي الخضار اضيفي الحمص المسلوق ورجعي الدجاج عشان ياخد نكهة الصلصة والمرقة وخليها تغلي شوية ..
بس تستوي حبات الكسكسي حطيها على الصينية واسقيها بالمرقة وحطي عليها الدجاج ورصي الخضار معاه وبالهنا والشفا
ياريت تعجبكم ..
الروابط المفضلة