السلام عليكم اخواتي الكريمات والغاليات عواشركم مباركة و الله يدخل علينا هدا الشهر باليمنى و البركة على امة سيدنا محمد و يبلغنا ليلة القدر ان شاء الله.
شكرا كثير على الردود الجميلة و دعواتكم الكريمة لتوامين :ياسين وياسمين بالصحة وطول لعمر والسعادة.
انا جبتليكم لمقادير ديال الرفيسة لوجدنا نهار 3 قبل من السبوع
نخليكم مع المقادير:
-مقادير لعجين:
- كيلو دقيق فورص ممتاز+شوي ديال لقمح
-قبصة ملح+شوي ديال سنيدة بش تيجي لمسمن حلو و حمر
-ماء دافئ للعجن
مقادير الحشو:
-دجاجة متوسطة الحجم من الافضل تكون بلدية و لعندو لحمام يديرو تيجي بنين
3 كيلو بصل منقية و مغسولة ومشنفة
-قسبور مفروم
-250غ عدس منقي و مغسول
-توابل:اسكنجبير+ابزار+ملح+خرقوم+زعفران+قاع قلة+بسيبيسة+راس الحانوت+السمن البلدي ضروري+زيت عود+قرفة+حامض مرقد+نصف عصير حامضة
-قليل من الثوم مهروس
الطريقة:
تنعجن لمسمن هو الاول و نخليوه يرتاح مزيان ومن بعد نديرو كويرات في حجم البيضة ونبسطوهااى نفرقوها بالزبدة والزيت بش تتجي رطبة و نطبخوها على واجههتين بحال ورقة بسطيلة غير هي تتجي رطبة و طيب مزيان في مقلاة وجدةونخليهم في قصعة ونديرو وحدة على وحدة بش يرطب و نغطيوهم بميك و زيف.
ناخدو طنجرة ونديرو فيها ابزار+ملح+زعفران حر لعندو+سكينجبير+خرقوم+قاع قلة+بسيبيسة+اشوي ديال راس الحانوت+نصف عصير حامضة+قسبور مفروم+ثوم مهروس ونخلطو لمقادير مزيان ونزيدو شوي ديال لماء و ندهنوا بها الدجاجة مزيان ونخليوها ترقد تقريبا 20دقيقة
-ملاحظة:ناخد الدجاجة ونحكوها بالخل و الملح بش تزول من ريحة الزفورة و ملى تقطر نشرملوها في الليل من الافضل و نخلوها للثلاجة حتى لغدا عاد نطيبها
-نديرو الطنجرة فوق النار من بعد ما زادنا الحامض مصير و عويد قرفة و نخليوها تتقلى.ملى تقلى مزيان نزيدو السمن البلدي ونخليوه يدخل شوي في الدجاج ومرقوا ونخليو الدجاج يطيب.
في طنجرة الضغط ناخد زلافة ديال مرق ديال الدجاج ونزيدو عيها لعدس و البصل مشنف+ماء ونخليوها تطيب حت البصل الحمراء تتشد الوقت بزاف في الطيب الله وما نطيبوها في الكوكوط حسن.نزيدو لعطرية الا كانت قليلة.

ناخد لمسمن ونقطعه بيدين و ونوضعه في كسكاس يتبخر لمدة قليلة و من بعد نحطوها في قصعة و ندير حفرة في الوسط و نزيدو الدجاجة مكتفة و نصب عليه لمرق+لعدس و البصل ونمرقوا حتى تشرب الرفيسة.
نزيونها بالبيض مسلوق
بصحة و الراحة.
نرجس82

تسلمي عزيزتي على الوصفه الطيبه بس لو ممكن توضيح بعض المفردات التي بالمقادير باللغه الفصحى لتكون واضحه لأخواتكِ العضوات مع شكري الجزيل

صحه وهنا علي قلوبكم يارب

تسلم دياتك

بارك الله فيك على الوصفة يا غالية

ومثل ما قالت الغالية حنان

لو ممكن توضيح بعض المفردات التي بالمقادير باللغه الفصحى لتكون واضحه لأخواتكِ العضوات

والطريقة ايضا

تسلم الايادي

تسلمي
مثل طريقة الفتات في ليبيا