السلام عليكم ورحمة الله وبركاته
اخواتى فى الله..
كيف حالكم ,,, ان شاء الله تكونوا كلكم بخير ...
اللطف شن هالكساد ... وينكم .. لا رد و لا حد ؟؟؟؟؟؟؟؟؟؟؟؟؟؟؟
يلا خلى انشطوكم شويه
.انى من هواة الاكلات الزمنية العتيقة اللى تكاد تكون انقرضت . يعنى حشيشتى التعب .
مرة اندير طماطم حوش (طبعا ما فيش وين ننشر الطماطم . هنى لا شمس ولا هواء .. الحكاية مطر فى مطر اغلب ايام السنة.)
و طماطم الحوش نشرى فيه نصف جاهز من السبورماركت (و هو عبارة عن طماطم مجفف فى الشمس) .
و نقلى مقدار باهى من البصل . و بعدين نرحيهم مع بعض ,
و نطيب بيه الرشتة الجارية و الا البازين و ما فى حكمهما.
و على هذا الاساس من مدة و انى بالى فى اللوسة ...
لوسة حارة ناشطة و زمنية طبعا هنى وين بنلقى الفلفل المبلبل.؟
هنى ما تحصلى فلفلتين حمر الا مع ثلاثة خضر فى كويس نايلو صغير ..
وبالشئ الفلانى. يا حسرة على صناديق فلفل سوق الثلاث.
شوى مرة بو الصغار رفعنا لسوق بعيد خارج المدينة و يبيع بالجملة . و فجاءة ...........
تطيح عينى على كيس امتع ربع كيلو فلفل امبلبل ....
وقفت من هول المفاجاءة ...
و قريب حتى اغمى عليا .
اول مرة نشوف كيس فلفل امبلبل بهذا الحجم الخيالى فى هذه البلد التعسة .
طبعا ما تسالونيش شنو صار ...
اختكم فى الله .. انطلقت (و كانها كانت مربوطة ) صوب الفلفل .
و قعدت اندور .. للاسف ماكانش فيه الا كيسين .
من هذاكا الحجم و اللون .
توكلنا على الله و ستفناهم فى الكروسة ...
و اختكم رواد .. خلاص .. معادش عندى نية فى شئ ..
نبى غير انروح و نطبق المخطط الرهيب ..
و لا يفارق خيالى شكل اللوسة بذلك اللون الاحمر القانى الشهى , و ذلك الطعم الحار اللذيذ.
..... دفع زوجى ثمن المشتريات و هو يلمح لغلاء الفلفل ...
طبعا .. انى ما يهمنيش الثمن فى سبيل الحصول على مرادى ... اللوسة .
عينى لم تفارق كيس الفلفل و نحن منطلقين صوب السيارة ..
فى السيارة... ابنتى ذات الاربع سنوات ..
تقول لى .. : (ماما رد) يعنى احمر و هى تشير الى الفلفل .
وانا اجيبها : ايه يا بنيتى رد ... هذا (الرد) بنديروا بيه اللوسة.
و زوجى غارقا فى الضحك.
رجعنا الى البيت ...
و لكن للاسف كانت هناك مفاجاءة فى انتظارى.....................
تابعونا...........
@))*** هذرزة ليبية.... صفحه خاصة ...نرحب بالجميع***((@(موضوع متميز)
اخواتى فى الله..
لاحظت من خلال اطلاعى على ملف الاكلات الليبية ..ان هناك شغف من الليبيات و المغتربات بالذات بتلك الصفحة و ذلك للحنين للهجة الليبيةو العادات و الاكلات و غيرها ... عليه... <<خلوا بالكم من الفصحى>>عليه فكرت فى فتح صفحة فى منتدى ملائم يتمكن الجميع من ارتياده. .
نتشارك فى الاراء و نجيب اسئلة بعضنا البعض و نتناصح فى الله و نستفسر عن معانىبعض الاشياء الغامضة لنا و التى ترد فى بغض المواضيع باللهجاتالاخرى و غيرها من الفوائد المترتبة على اللقاءات المفيدة ..طبعا هذا لا ينسينا اننا مسلمون و طبعنا حب الخير للجميع ..فنحن و ان كان لهذا الموضوع خصوصية ليبيةالا اننا نرحب جدا بالغير ليبين لتبادل الخبرات و الاستفسار عن معانى الكلمات اولمعرفة العادات الليبية فى مناسبات معينة و تبادل الاراء و وجهات النظر .ذلك يشمل ايضا السؤال عن بعض الاكلات الليبية القديمة مثلا ..او الاوانى القديمة و التراث الليبى القديم . و ما الى ذلك من الامور التى تتعلق بالشأن الليبي.
...
... موضوع رائع سيساهم في تعريفنا أكثر بليبيا المسلمة
...
الروابط المفضلة