كتبت بواسطة omaesha

السلام عليكم ورحمة الله وبركاته
جزاك الله خيرا يا اختى على الموضوع انا مصريه مقيمه فى السعوديه عندى عائشه سنتين ومصطفى 6 شهور
ان شاء الله بننزل اجازه فى شهر 8 سعيده جدا بالتعرف عليكم جميعا

اهلا وسهلا بيكي يا ام عائشة نورت ياقمر ومتنظرينك تنوري مصر كلها في اقرب وقت ويارب يارب يخلي عائشة ومصطفى ويكبرهم لك يارب وانا واثقة ان اي واحدة معانا بتقولك دلوقتي امين
وياجميل لو انتي برة مصر بقالك مدة ومحتاجة تعرفي معلومات عن اي حاجة اؤمري واحنا كلنا تحت امرك

الاخت الكريمة خادمة القران
اخبارك ايه وانتي ياحبيبتي الالطف والاجمل واكيد بنوتك هتكون جميلة وابنك بسوم زي مامتهم ربنا يحفظم يارب قولوا امين
ياريت يكون فيه طريقة تساعدي بيها اي اخت محتاجة تتعلم التلاوة .. بس انا للاسف الكمبيوتر بتاعي مافهوش ساوند ولاسماعات لانه عندي بقاله فترة وفي حاجات كدة الشركة ساعات بتعصلج في انها تضيفها خصوصا لما تكون مش مؤثرة على الشغل
انا عموما اشتريت حافظة فيها 18 شريط شامل كل اجزاء المصحف وباسمعه على اد ما اقدر على طول وانا في المطبخ ودا مساعدني لاني بعد فترة بقيت لو سمعت حد بيتلو غلط على طول باحس ان فيه نشاذ وودني مش مستريحة.. اهو احسن من مافيش بس انا فعلا جادة في موضوع اتقان التجويد دا بس ربنا يعيني على الشغل والاولاد ومسئولياتهم

مريوما
انتي فين ياجميل ظهرتي وقلتي اول المشتركات وعرفتينا بيكي وهب غطستي في المالح
اخبار اسكندرية ايه وخالد بن الوليد وميامي وبير مسعود وياترى بتعملي ايه في الصيف والا بتسيبي اسكندرية خالص علشان الزحمة
مستنيين اخبارك

السلام عليكم ورحمة الله

موضوع جميل ...مأخدش بالى منه الا الان

ماشاء الله نشاط جميل يا ام سلمى ..

طيب يا ستى انا كمان مصريه جداااا جداااااا

من القاهرة وعندى بنوته وولد وبايننين في توقيعي ...شكلى مش هقول سنى لحسن يتفضح امرى
انت عارفه طول عمرنا عندنا 20 سنة

تابعت الردود جميعها ولدى استفسار لاخت خادمة القران ...اين تسكن في مصر ...لانى اريد تحفيظ اولادى القران فلو كانت قريبه يكون لقاءنا سهل


العصير اللى تحدثتى عنه لم اصادفه صراحة ابدااا ....ولكن ان شاء الله احاول ادور عليه
الصيف يتطلب المشروبات الباردة يوميا

الخروب وعرق السوس و التمر هندى و الكركرديه ....وهذه افضل من المنتجات المعلبه

سؤال بقه بس يارب الاقى الاجابه ...سمعت ان هناك مناطق يباع فيها السيراميك الخاص بالحمامات والارضيات وباسعار اقل كثيراااا من المعارض الكبيرة ...فهل يستطيع احد منكم مساعدتى ؟؟؟؟

بي هابي
سعيدة جدا انك اخيرا قراتي الموضوع وهو منور بيكي وباولادك .. ومين جاب سيرة ال20 سنة احنا فين والكلام دا فين ربنا يخلي لك اولادك يارب
بصي ياسيتي انا من الجيزة اساسا وساكنة في اكتوبر
وبالنسبة لوضوع السيراميك فيه منطقة اسمها سوق فكيهة لو انتي عارفة شارع الهرم وانتي نازلة من اكتوبر على الجيزة على ايدك اليمين محطة الطالبية هتلاقي زحمة كدة وشارع يمين بس اتاكدى ان دا الطلبية مش اي محطة تانية وادخلي في الشارع دا لو معاكي عربية هو الشارع زحمة شوية لانه منطقة شعبية جدا بس يعني العربية بتفوت مافيش مشاكل هتمشي فيه واسالي وانتي ماشية على سوق فكيهة بتاع السيراميك .. بصي انتي لو وصلتي للمكان دا تبقى خلاص وصلتي لانه قريب جدا من المكان دا
ويارب اكون افدتك ويابنات اللي عارفة المكان وتعرف توصف احسن مني تقول لاني خايبة في الوصف جدا
عموما ياجميل هتلاقي هناك سيراميك فرز اول وتاني والوزرة انتي عارفاها اصل انا ماعرفتهاش الا لما جيت اركب سيراميك في شقتي بس خلى باللك كل كرتونة تفتحيها وتهزي السيراميك بايدك وتتاكدة انه مش مكسر وياحبذا لو فرزتيه واحدة واحدة اقصد سيراميكة سيراميكة مش كرتونة كرتونة وابقى قولليلي عملتي ايه

بي هابي نسيت اقولك اسالي اكتر من محل لان الاسعار بتكون متفاوتة وحاولي تصممي على اللي انتي محتاجاه وبس لتلاقي نفسك ادبستي في حاجات انتي مش عايزاها وخصوصا انك هتلاقي الاسعار رخيصة جدا عن المعارض ودا هيخليكي تشتري على اعتبار ان اللي انتي بتشتريه ب 50 هتلاقية ب 20 فممكن تلاقي نفسك بتشتري وتقولي مش مهم طالما السعر كويس عارفة انا باقولك كدة عن تجربة لاني اشتريت سيراميك من هناك بس بصراحة زهقت البياع لحد ماخلصت بس اشتريت اكتر من اللي انا محتاجاه ودلوقتي عامل لي ازمة في الشقة هاوديه فين
وبما انك مبدعة في تصميم الديكور ياريت تقولي لنا على كام فكرة ممكن بيها استغلال السيراميك دا بس تكون الخامات متوفرة في مصر لاني باشوف افكار كتير بس فيها حاجات مش من مصر او غالية فانا لسه مبتدئة مش هاشتري حاجة ب 50 جنيه علشان بلاطة ب 2 جنيه
كمان ممكن وانتي هناك هتقابلي ناس من اللي بيبيعوا القلل القناوي عارفاها طبعا انا كنت اشتريت من هناك كام واحدة اولا للميه حلوين اوي وغير كدة انا ناوية اعمل فيهم فكرة الكتاب بالاسبري الفضي بتاع احلام النجدي بس على القلل فاهمة قصدي

تسلميلي يا قمر ...انا قلت لزوجي على هذه المنطقة وقالى انه فعلا سمع قبل كدا عليها

شرحك للمكان وافى فعلا ...صراحة انا لما عملت سيراميك الحمام في شقتى رحت للجوهرة المعرض الرئيسي وطبعا اشتريته غالي جدااااا

بعد فترة ذهبت لاصدقاء ومعارف ولفيتهم جايبين سيراميك الحملامات والمطابخ رخيص كثيراااا و نفس اللى عندى ويمكن افضل كمان

بس هم قاله في الفجاله ...و صراحة انا ذهبت هناك مرة ولم يعجبنى الاشكال التى هناك ...بس ان شاء الله اروح للمكان اللى اقترحتيه واعمل بتصيحتك


بالنسبه للسيراميك الزائد فيه افكار كثيرة ممكن تتنفذ به هجبهالك وارجع على طوووووول

ازايكم يا بنات مصر مين لسه على وعد العزومه اصل ظروفى اتغيرت وان شاء المولى ح اكون فى مصر يو 1/8 وحشتونى

والله يا بنات مصر الواحد بيستفيد كل يوم منكم وتسلمى يا ام سلمى على المكان الجديد بتاع السيراميك انا اول مره اسمع عنه انا شاء المولى اول ما انزل مصر ح اذهب اليه

النهارده اول يوم اسجل في المنتدي
كويس اني شوفت موضوعك الجميل يا ام سلمي
انا من القاهرة و ام لثلاثة اولاد