السلام عليكم ورحمه الله
تفريغ الدرس
لسماعه
http://www.way2allah.com/media/khota...kdmt_lhyaty.rm
السلام عليكم ورحمة الله وبركاته ، الحمد لله وكفى وصلاة وسلاما على عباده الذين اصطفى ،
ثم أما بعد

قبل ما ابدأ كنت عايز أسأل االشباب راحوا فين ،هل بيتفرجوا على كأس العالم ولا هنُحسن الظن بهم مبدأيا ونقول انهم صايمين 13,14,15 من الشهر العربى عموما خلال ربع ساعة هنعرف ،لو كان السبب الصيام يبقى هييجوا ان شاء الله ، لكن لو السبب حاجة تانية يبقى .نلتقى بعد شهر ان شاء الله....الله المستعان
كنت فى زيارة قريبة للقاهرة ،فنزلت منطقة من الى بيقولوا عاليها ستايل ، فلما نزلت المنطقة أنا اتهيقلى أنها منطقة سياح من المناظر الى أنا شفتها فيها ،فبُهرت بشباب مصر المحروسة لما صحبى قالى أن كل دول مصريين ، بقولوا طب عاملين كده ليه قالى أصلها منطقة راقية شوية(طيب ياعم ربنا يزيد مصر عمار) المقصد ياجماعة أن كل ما الواحد بينزل مصر بيرجع وقلبه بيتقطع على شباب الاسلام ، أحنا مش عايزين طبعا نبدأها من أولها كده غم لأن المناسبة السعيدة بتاعة النهاردة (السعيدة جدا) الى شباب مصر كله وشباب العالم الاسلامى بيحتفل بيها مناسبة كأس العالم ، الى االشباب المصرى أثبت أنهم مش لو شفروه على الدش لو شفروه على القمر هيطلعوا يتفرجوا عليه والشباب كله طبعا مستنى يعرف ياترى مين الى هيكسب فى كأس العالم ياترى انجلترا الى حطت ايدها فى ايد أمريكا فى احتلال العراق ولا الى هيكسب فرنسا الى وقفت مع الدنمارك فى نشر الصور المسيئة لرسول الله(صلى الله عليه وسلم) ،مأساه والله ياجماعة ، احنا وصلنا لغاية فين ، احنا وصلنا لدرجة أن فتاه زنت مع أربع شباب وبتعرض مشكلتها بتقول أنا حامل وعايزة أعرف أن حامل من مين فى الأربعة ،وصلنا لدرجة أن واحد وواحدة زنوا وبكل بجاحة يطلعوا ادام الفضائيات كلها هية تقول انا اتجوزته عرفى وهو يقول لالا أنا زنيت فيها -ولعياذ بالله- شاب مسلم يقول الكلمة دى وأبو االبنت يطلع بكل بجاحة يقول أنا بنتى متربية كويس جدا ولا يممكن تحمل الا من جواز عرفى ويطلع أبو الولد يقول انا ابنى مربيه كويس أوى أنا ابنى مايتجوزش عرفى من ورايا ،الواحد لما يشوف الى وصلنا له ،ويشوف الناس وهيه بتتقلب فى معصية الله وهيه فرحانة ،يذكر قول الله_ سبحانه وتعالى:- (قُتل الانسان ماأكفره) قُتل االانسان مين الى بيقول كده الله ، الله الى أرحم بيه من أمه وأبوه ، الله الىرحمة أمك بيك ما تجيش ذرة من جزء من ميت جزء من رحمة ربنا بيك، ربنا الى لما الملائمة قالت :يارب لما كل هذا الحلم عليهم ،يارب أؤمر الجبال تتهد عليهم يارب أؤمر البحر يغرقهم ، قال لو خلقتموهم لرحمتموهم ،الله الى رحيم بعبده كل الرحمة دى بيقول قُتل الانسان...، ده لما البشر يحكم على بشر بالقتل ،يبقى أكيد عمل جريمة بشعة ،طب لما يصدر الحكم من الله على البشر يبقى عمل جريمة شكلها ايه ، هوه فعلا ارتكب أبشع جريمة فى حق الله سبحانه وتعالى_ وهى الإعراض عن الله والجحود بنعمة الله سبحانه وتعالى ، واسمع باقيت الأيه (ما أكفره) ،ياااااااااه بعد كل الستر ده وكل النعم دى وكل الرحمة دى وكل المغفرة دى وكل الصبر ده يقابل مولاه بالجحود والنكران ، ويقول الله تعالى:- (وما وجدنا لأكثرهم من عهد وإن وجدنا أكثرهم لفاسقين) ،والله آية تقطع القلب ، ياما عاهدوا ربنا وقالوا رجعينلك يارب ، ياما عاهدوا ربنا وقالوا ندمانين على الى عملاناه ومش هنرجعله تانى ، ياما عاهدوا ربنا وقالوا معدناش هنبعد عنك تانى يارب ، شهر اتنين ثلاتة وتفاجأ أن الشاب ساب السكة كلها من أولها لأخرها ، ربنا ضمنلى وضمنلك سكة الدنيا يقول سبحانه وتعالى :- (وما من دآبة فى الأرض إلا على الله رزقها ويعلم مستقرها) ، ولكن طلب منى ومنك سكة الدين ، يقول الله سبحانه وتعالى:- ( وأن ليس للانسان إلا ما سعى ) ، لكن الانسان ساب الأخرة الى ربنا طلبها منه علشان الدنيا الى ربنا ضمنهاله ، قال تعالى:- (قُتل الانسان ما أكفره *من أى شئ خلقه) ، أنت أصلك ايه؟؟ هو أنت كنت ايه؟ ده أنت أصلك حيوان منوى ،ده أنت أصلك ماء الى خلقه هو الى قال عليه مهين...علشان كده ربنا سبحانه وتعالى فى آية يفكرك أن انت أصلك نطفة وفى آية تانية يفكرك أن انت أصلك تراب وفى آية يفكرك أن أنت أصلك علقة ،التراب ده أكتر حاجة موجودة فى الأرض بدون قيمة ، حتى لما حاجة تبقى رخيصة أوى يقولك ده رخص التراب .. شوف أنت من غير ربنا كنت رخيص أد ايه ،ولما اترقيت من مرحلة التراب بقيت نطفة ،ايه النطفة دى؟ يعنى لما يجيبوا جردل ميه ويكبوا كل الميه الى فيه يتبقة كام نقطة ميه النقطة تتسمى نطفة ، ولما اترقيت كمان بقيت علقة، ايه العلقة دى؟ يعنى دودة عايشة على مص دم ، يعنى كل واحد فينا كان حوالى 2 ميلى متعلق فى جدار رحم الأم وبيمص دم الأم ، منظر بيوحى بقمة الفقر ، ايه الى غرك بعد ما خرجت من بطن أمك؟؟ ايه الى حسسك انك قوى؟؟ عارفين لما واحد يعد يتكبر يقوم واحد تانى يقولوا لا تعالى لما أوريك أنت أصلك ايه ده أنت فقير جدا أبوك فقير جدا ،ربنا بيعمل معانا كده ، بيقولك انت متكبر على ايه؟؟ ده انت ابن علقة ابن نطفة ابن تراب سلسلة النسب دى ربنا يذكرها لينا فى القرآن مرارا وتكرارا علشان نفتكر احنا كنا ايه ، قال تعالى:- (من نطفة خلقه فقدره) ، شوف كلمة فقدره ، حط الصورة أدام عنيك واقسمها جزئين ،الجزء الأول شوية تراب ،والجزء التانى كبد وكلى ومشاعر ومخ وعقل وحب وكره ، شوف ربنا رفعك من ايه لايه ، قال تعالى:- (ثم السبيل يسره) ، الواحد فينا عامل زى الى طلع من بلاعة وبعدين بص لنفسه كده وقام منفض هدومه ولا غاسلها واستحمى كده لقى نفسه نضف فقال ده أنا باشا ، اسمع كلمة الحسن البصرى .. كيف تتكبر عليها وأنت أولك نطفة ندرة وأخرك جيفة قذرة وأنت بين هذا وذاك تحمل البول والعذرة .. كيف تتكبر عليها وأنت أولك تراب وأخرك تراب ..قال تعالى:- (أكفرت بالذى خلقك من تراب ثم من نطفة ثم سواك رجلا) .

قال تعالى:- (ثم أماته فأقبره) ربنا بيفكرنا بقدرة الله المطلقةعلينا ، موعد مجيئك الدنيا وموعد خروجك منها هو الذى قدره ، موتك ودفنك تحت الأرض ربنا هو الى قدره عليك لايمكن أنك تتنصل منه ، لو اديت أهلك مليون جنيه علشان ميدفونكش ، هيدفنوك برده وهمة الى بيبكوا عليك لكن لازم يدفنوك أصل ريحتك هتقلب البلد كلها لو مادفنتش تحت الأرض ،قال تعالى:- (ثم إذا شاء أنشره) ،لما ربنا يشاء هتقوم من قبرك ، ممكن واحد يكون مات غريق فى البحر ومليون سمكة كلت منه ،والسمك ده الناس اصطادوه وكلوه ، ولما ربنا يقول كن فيكون ، يعنى أنت تحت سيطرة الله وأمره يعنى أنت من من أول حياتك لغاية موتك تحت هيمنة الملك القدير سبحانه وتعالى ،قال تعالى:- (كلا لما يقضى ما أمره) ربنا بيقولى وبيقولك فوق ،الى فاكر أنه مش هيتسأل على كل ذنب عمله وكل تقصير قصره فى السكة الى احنا ماشيين فيها يبقى مش فاهم السكة الى احنا ماشيين فيها ،زى لما يكون طريق عليه حملة تفتيش والكل هيتفتش لا مفر ، أهو انت هتتعرض لخمس حملات تفتيش ولازم تعدى من الخمسة مينفعش يتقبض عليك فى ولا واحدة ، أول حملة فى القبر هيتفتش على عقيدتك (من ربك؟ما دينك؟من نبيك؟) ،تانى حملة على الميزان تفتيش على صحيفتك (سيئاتك وحسناتك) ،تالت حملة تفتيش العرض على الله سبحانه وتعالى تفتيش على قلبك (على كل نقطة سودة فى قلبك نتيجة شهوة أو معصية) ،رابع حملة تفتيش على الصراط (الصراط ده طريق يوصل الى الجنة ) ،هيقيس أنت كانت وجهتك ايه فى الدنيا ، وكنت منطلق الى الله بسرعة أد ايه؟ ، خامس حملة على القنطرة .. حملة تفتيش على حقوق الناس عليك ،تفتكر الى له حق عليك فى يوم زى ده هيسيبك والله تبقى ساذج لو تخيلت أنه هيسيبك . دول خمس حملات تفتيش لازم هتعدى عليهم وعلشان تنجو وتدخل الجنة لازم تعدى من الخمس حملات مينفعش يتقبض عليك فى واحدة منهم.
ربنا بيقول :- (كلا لما يقضى ما أمره)، كلا تعنى غضب الملك سبحانه وتعالى ، ياترى ايه الى أغضب الملك ذنوبنا ولا غفلتنا ، قال تعالى:- (قل من يرزقكم من السماء والأرض أمن يملك السمع والأبصار ومن يُخرج الحى من الميت ويُخرج الميت من الحى ومن يدبر الأمر فسيقولون الله فقل أفلا تتقون) اتقى الله منتاش خايف ياخد منك سمعك ولا بصرك منتاش خايف يقطع رزقك منتاش خايف يقبض روحك.
علشان كده مفيش نعمة ربنا اداها الى انسان كتب عليه أنه من أصحاب النار إلا وهيخدها منه قال تعالى :- (ونحشرهم يوم القيامة على وجوههم عميا وبكما وصما مأواهم جهنم ) طب ليه يارب؟ أصل البصر نعمة معدتش يستاهلها وكذلك السمع والنطق.
قال تعالى :- (كلا لما يقضى ما أمره) ربنا بيفكرك أد ايه أنت مقصر فى حقه سبحانه وتعالى ،ربنا أنعم عليك بالبصر كام بصة بصيتها حرام وكام بصة بصيتها فى كتاب الله ؟،وأنعم عليك بالسمع كام آية قرآن سمعتها وكام مرة سمعت ما حرم الله؟ ،وأنعم عليك بلسانك كام كلمة نطقتها بلسانك حرام وكام كلمة نطقتها بلسانك حلال؟ ، كام أمر من أوامر الله أنت مكسره فى حياتك؟ كام ذنب عملته ومتبتش منه؟ كام أمر أنت منفذتوش وبسبب تقصيرك أنت متعرفش أصلا أنه أمر من أوامر الله؟ كام مرة شفت منكر ومغيرتوش؟
تخيل لو جبت صحيفتك وأعدت تعد كل سيئة أتكتبت عليك هتلاقى ايه؟؟ قال تعالى:- (لا يزال بنيانهم الذى بنوا ريبة فى قلوبهم إلا أن تقطع قلوبهم) المعاصى الى اتزرعت فى قلوبنا ملهاش حل غير أن احنا نندم عليها ندم قلوبنا تتقطع منه علشان ربنا يتوب علينا .

قال تعالى :- (فلينظر الإنسان الى طعامه *أنا صببنا الماء صبا*ثم شققنا الأرض شقا*فأنبتنا فيها حبا*وعنبا وقضبا*وزيتونا ونخلا*وحدائق غلبا*وفاكهة وأبا) ربنا بيقولك قبل ما تأكل فكر ،شوف الأكل ده على موصلك ايه الى حصل ، الأول الماء ينزل من السماء فى قطرات المطر ، وبعدين يسير فى الأنهار ويروى الأرض ، ثم الأرض تتشقق ويخرج منها الزرع ، والزرع أنواع كتيرة ، أنت عايز تأكل ايه حبوب موجود (حبا) عايز حاجة مالحة موجود (زيتونا) عايز حاجة حلوة (فاكهة) ، ده مش كده بس ده فى زرع علشان الزينة وابهاج النظر ، وبعد كل ده يجحد الإنسان بنعمة الله ..... يعنى تخيل كده أن أنا كل يوم أعدى على واحد وأديله 10 جنيه ، وتانى يوم أديله 10 جنيه برده وهكذا وجيت فى يوم ومدتلوش العشرة جنيه ، قالى العشرة جنيه بتاعتى فين؟ العشرة جنيه بتاعتك أنت!! أنت ليك عندى ايه أصلا ؟ انت ليك عندى جنيه ولا شلن حتى؟ .. هو ده البنى أدم مع ربنا .
قال رسول الله (صلى الله عليه وسلم):- (يأتى الله يوم القيامة برجل ويأمر الملائكة أن تذكر له صغار سيئاته ولا تخبره بكبارها ويأمرهم الله أن يقولوا له أن قد بدلت سيئاته حسنات فيقول أى يارب إن لى ذنوب لم تذكر ولم أرها ) طمع ابن أدم مش مكفيه أن الكبائر اتحجبت عنه لأ ده عايزها تتبدل حسنات كمان ،قال رسول الله (صلى الله عليه وسلم) :- (ولا يملأ فم ابن أدم إلا التراب ) .
قال تعالى :- ( فإذا جاءت الصاخة *يوم يفر المرء من أخيه* وأمه وأبيه* وصاحبته وبنيه*لكل امرئ يومئذ شأن يغنيه) أنت جاى تفر اليوم ده ؟؟ ما ربنا قالك فى الدنيا فروا الى الله ، كلمة فر الى الله ، يعنى ايه الفرار؟ يعنى الخطر قريب منك جدا ياتلحق يا متلحقش ، وبعدين الفرار كمان معناه أن الخطر عظيم ، يعنى أنا مش هقولك فر من القطة ولكن أقولك فر من الأسد.
قال تعالى :- ( أيحسب الإنسان ألن نجمع عظامه بلى قادرين على أن نسوى بنانه) أنت كنت فاكر نفسك جاى الدنيا تتفسح ولا ايه؟ ده ربنا هيجمع عظام كل انسان ومش كده بس ده حتى بصمة الايد ، (بل يريد الإنسان ليفجر أمامه ) البنى أدم مش عايز كده خالص لا عايز دين ولا عايز أمر ولا نهى ده عايز يفجر والعياذ بالله ، الفجور مش واحد تسيطر عليه شهوة لأ ده واحد شهوته أنه يعصى الملك سبحانه وتعالى ، (يسأل أيان يوم القيامة) امتى يوم القيامة ده حلنى على اما يجى ،( أفرأيت إن متعناهم سنين* ثم جاءهم ماكنوا يوعدون*ما أغنى عنهم ما كانوا يمتعون) لو دخلت قبرك والزاد بتاعك فلوس مش هتعملك حاجة ، عايز تعرف امتى يوم القيامة؟؟ يقول الله :- (فإذا برق البصر *وخسف القمر *وجمع الشمس والقمر يقول الانسان يومئذ أين المفر ) هروح فين المكان كله محاصر ، (كلا لا وزر ) مفيش نجاه ولا حتى تموت ،(الى ربك يومئذ المستقر) ربك الى أنت عصيته ، والى أنعم عليك ومشكرتش ،(ينبأ الإنسان يومئذ بما قدم وأخر) لما الانسان يموت هينبأ بالى هوة عمله والى كان ناوى يعمله ، يبقى لازم نحسبها صح يا جماعة .
أنت يوم القيامة لازم هتكون واحد من اتنين مالهمش تالت ،اما (وجوه يومئذ مشرقة ) ، واما وجوه يومئذ عليها غبرة ،تخيل لو كنت من الى وجوههم مشرقة ، هيكون وجههم نور ازاى ،نور الدنيا لما يتحلل يطلع سبع ألوان لكن نور الأخرة شكله ايه؟ لكن الحالة التانية بقى (وجوه يومئذ عليها غبرة )، لما أجيب شوية تراب وأحته على واحد يبقى وجهه عليه غبار لكن لما أجيب تراب المنصورة كله وأحته على وجه واحد يبقى وجهه عليه غبرة ، (ترهقها قترة) ظلمة الوجه من الحسرة أصلها مش حسرة واحد دى حسرات ، من أول حسرة الموت الى حسرة الدخول الى النار ، هيقول الانسان فى هذا اليوم يارتنى ما فرت فى جنب الله ، بس مش هتنفع ياريتنى .. ( بلى قد جاءتك آياتنا) ، الآيات دى نازلة على كل واحد فينا تفوقه .

هذه الآيات أطرقت 6 طرقات على أبواب قلوبنا وهى
1-) افتكر مدى حقارة أصل الانسان ومدى فقره واحتياجه الى الله
2-) افتكر مدى قدرة الله عليك
3-) افتكر مدى تقصيرك فى حق الله سبحانه وتعالى
4-)افتكر مدى نعمة ربنا عليك
5-)افتكر الله يقدر ينعمك نعيم شكله ايه لو أطعته فى الدنيا
6-)افتكر ربنا يقدر يعذبك عذاب شكله ايه لما تعصاه فى الدنيا

روشته مكونة من 6 أدوية ربانيه الى هيعالج قلبه بواحدة منها حتى يقينا حياته بإذن الله

افتكر مرة وأنا بطوف حول الكعبة لقيت فوج ماشى وواحد رأس للفوج ده بيدعى بدعاء وهمة بيأمنوا وراه ، دعاء جميل جدا ( اللهم إنى أعدت لكل كرب حسبى الله ونعم الوكيل ، وأعدت لكل هم وغم لا حول ولا قوة إلا بالله ، وأعدت لكل عدو وكيد نعم المولى ونعم النصير ، وأعدت لكل هول من أهوال الأخرة حسبى الله لا اله الا هو عليه توكلت وهو رب العرش العظيم ، وأعدت لكل نعمة أنعمت بها على يارب لك الحمد كما ينبغى لجلال وجهك وعظيم سلطانك ، وأعدت لكل آية من آياتك سبحان الله وبحمده سبحان الله العظيم )

مرة من ذات المرات كنت مع أحد المشايخ فدخلنا نصلى وراه فصلى يجى بأربع أو خمس أجزاء ، وبعد الصلاة سألنى أنت ايه أكتر آية أثرت فى قلبك فى الصلاة فبصيت كده آيات كتير يعنى ، فقال أكتر آية أثرت فية هى ( وأخرى لم تقدروا عليها قد أحاط الله بها وكان الله على كل شئ قدير) يعنى كل واحد فينا له أحلام فى حياته ومفيش حد فينا يملك أنه يحقق أحلامه لأنك معندكش الأسباب الى توصل بيها للى أنت عايزه فى الدنيا ، مهما كان فى ايدك أسباب لو ربنا مش هو الى وصلك للى أنت عايزه عمرك ما هتوصل .
قال رسول الله صلى الله عليه وسلم :- (إن الله عز وجل يقول يوم القيامة يا ابن أدم مرضت ولم تعدنى ، قال يارب كيف أعودك وأنت رب العالمين أما علمت أن عبدى فلانا مرض فلم تعده، أما علمت أنك لو عدته لوجدتنى عنده ، يا ابن أدم استطعمتك فلم تطعمنى قال يارب وكيف أطعمك وأنت رب العالمين ، أما علمت أنه استطعمك عبدى فلان فلم تطعمه أما علمت أنك لو أطعمته لوجدت ذلك عندى ، يا ابن أدم استسقيتك فلم تسقنى ، قال يارب كيف أسقيك وأنت رب العالمين، قال استسقاك عبدى فلان فلم تسقه أما إنك لو سقيته لوجدت ذلك عندى) لما تسمع لوجدت ذلك عندى هيكون شعورك ايه والله هتقول يارتنى أطعمت كل فقير قابلته فى حياتى ، يارتنى سقيت كل من سألنى فى حياتى ، والأهم من كده الكلمة الى قلبك هيتشق نصين لما تسمعها _لوجدتنى عنده_ هتقول يارتنى زرت كل مريض أعرفه ، طب ليه المريض الى ربنا قال _لوجدتنى عنده_أصل المريض مكسور اوى ومحتاج ربنا أوى وربنا جنب المكسورين ، لو عايز تقرب من ربنا أوى انكسر لله وافتقر الى الله وقوله يارب مليش غيرك ، احنا عايزين نحس احنا محتاجين الى الله أد ايه؟
الهى إن أتيت بكل ذنب .. فلا أولى بعفو منك عنى
الهى قد جنيت وأى عبد .. ضعيف الخلق مثلى ليس يجنى
الهى من سواك يزيل همى .. ومن أدعوه مضطرا يجرنى
اسمع قول الله :- (ألا بذكر الله تطمئن القلوب ) عارف زى ما تبقى مقبوض عليك وشوية وتسمع العقيد فلان الفلانى وصل (والعقيد ده قريبك) هتحس بايه؟؟ شوف بقة لما تفتكر أن الله سبحانه وتعالى معاك .
إذا كنت فى كل كرب معى .. فعن حمل زادى أنا فى غنى
يقول الامام ابن القيم
وأعجب الأشياء أن تعرفه ثم لا تحبه ،وأن تسمع داعيه ينادى عليك ثم تتأخر عن اجابته، وأن تعلم قدر الربح فى معاملته ثم لا تعامله ، وأن تعلم قدر غضبه ثم تتعرض له ، وأن تذوق ألم الوحشة فى معصيته ثم لا تفر منها الى الأنس بطاعته ،وأن تذوق عذاب تعلق القلب بغيره ثم لا تهرب الى نعيم الاقبال عليه ، وأعجب من هذا أنك أحوج شئ اليه وأنك لابد لك منه ، وفيما يبعدك عنه نار.
تخيلوا فى ناس علاقتها بالله وصلت لغاية ايه؟ تخيلوا سعد بن معاذ وصلت علاقته بالله لدجة أنه لما مات اهتز عرش الرحمن ، تخيلوا أن أمى بن كعب وصلت علاقته بالله لدجة أن رسول الله (صلى الله عليه وسلم) قال له إن الله أمرنى أن أقرأ عليك سورة البينة فقال له يارسول الله :: الله ذكر اسمى قال نعم ، تخيولوا أن سيدنا حنظلة وصلت علاقته بالله لدرجة أنه لما مات ربنا نزله ملائكة تغسله ، وعبد الله بن حرام لما مات ربنا كلمه بذاته سبحانه وتعالى بدون حجاب ، أنت علاقتك بالله وصلت لغاية فين ؟؟؟؟؟ يعنى تقدر تقول أن علاقتى بالله قوية بدليل كذا؟؟ وسؤال تانى أنت عملت ايه للاسلام؟؟؟ يعنى الاسلام كسب من وراك ايه؟؟ يعنى واحد زى أسيد بن حدير الملائكة نزلت لتلاوته للقرآن وأسلم على ايده سعد بن معاذ الى اهتز له عرش الرحمن ، ها أنت بقة عملت ايه ؟؟؟؟؟
تخيل واحد زى أبو موسى الأشعرى الأشاعرة بتوع أهل اليمن كلهم أرق أهل الأرض أفئدة أتربوا والتزموا على ايديه ، أنت عملت ايه ؟؟؟؟

فى حاجة تانية مهمة ، أنت مش خايف من عاقبة ذنوبك؟؟ عاقبة ذنوبى ايه يعنى؟؟ هو ايه الى حول ابليس من طاووس العبادة الى قواد لكل فاسق وفاجر إلا الذنوب والمعاصى!! وايه الى خرج أدم من الجنة إلا الذنوب والمعاصى؟! وايه الى أخر سن الجواز إلا الذنوب والمعاصى ؟ ده مش انا وأنت بس الى نخاف من الذنوب والمعاصى ده الأنبياء خافوا منها ، ده رسول الله(صلى الله عليه وسلم)مفيش حركة من حركات الصلاة إلا وأثنى فيها على الله وخشوع وخضوع بين ايدين الله ،وأول ما يخلص كل صلاة يقول استغفر الله ، رسول الله صلى الله عليه وسلم الى فضل 23 سنه فى خدمة دين الله وبذل فيها مجهود مفيش بنى أدم على وجه الأرض بذله لله ربنا ينزله فى أخر حياته :- ( إذا جاء نصر الله والفتح ورأيت الناس يدخلون فى دين الله أفواجا فسبح بحمد ربك واستغفره إنه كان توابا) الله بيحب الانكسار بين ايديه ، علشان كده أقرب ما يكون العبد من الله وهو ساجد ،طب ليه؟؟ لأنه بيبقى أكتر موقف منكسر فيه لله جبهته دى فى التراب ومنخيره دى فى التراب علشان ربنا سبحانه وتعالى

كان أحد السلف يطوف حول الكعبة ويقول يارب يارب أما لك عذاب غير النار تعذب به عبادك ، شايف الانكسار لله والخوف من الله ، علشان كده ربنا بيقول كانوا قليلا من الليل ما يهجعون) ده كان بيروح بعد العشاء على طول ينام ساعة ولا حاجة نوم خفيف ويقوم مفذوع على ذكر الدار الأخرة يفضل يصلى لغاية الفجر 6ولا 7 سعات كل ليله وفى الأخر وبالأسحار هم يستغفرون ، الصالحين كل ما يعبدوا ربنا ينكسروا الى الله أكتر وكل ما يقربوا من ربنا يحسوا بالنقص والضعف أكتر ، من الآيات العجيبة قول الله وقال اركبوا فيها بسم الله مجراها ومرساها إن ربى لغفور رحيم ) سيدنا نوح بيقولهم احنا لو على ذنوبنا كنا غرقنا مع الى غرقوا ، لكن لولا رحمة الله ومغفرته مكناش نجينا ،ويقول تعالى وإن يمسسك الله بضر فلا كاشف له إلا هو وإن يردك بخير فلا رآد لفضله يصيب به من يشاء من عباده وهو الغفور الرحيم) ، انسى ان حد هيساعدك إلا الله ، أصل لو على ذنوبنا والله ما ستاهل أعد فى المكان الى أنا أعد فيه ده ولا أنتم تستاهلوا تسمعوا عن ربنا ، والله لو بذنوب البشر ما بقى عليها من دابه بما فيها احنا أو الى بره الجامع .

سيدنا ابراهيم بيقول والذى أطمع أن يغفر لى خطيئتى يوم الدين ، طمعان أنك تغفرلى يارب ، شايفين الانكسار بين ايدن ربنا وصل لغاية فين ، شوف نعمةربنا عليك أد ايه ؟ افتكر كده نعمة العافية ، أحد الحكماء زمان الناس راحوا له كل واحد فيهم يقول أن مبتلى ، قالهم كل واحد منكم يكتب البلاء بتاعه فى ورقة ويحطها فى الصندوق ده وبعد أسبوع تعالوا ، فراحوا بعد اسبوع قالهم كل واحد يمد ايده ويطلع أى ورقة من الصندوق ، كل واحد خد ورقة فكل واحد بص فىالورقة لقى فيها بلاوى غيره فقاله أنا عايز الورقة بتاعتى ، انا راضى بالأنا فيه . أحد الناس اتصل بيا بيقولى أنا أخويا مريض وعايز أى مساعدة طبية ، فبيحكى عن مرضه ، فبيقول الأعصاب الى واصلة بين المخ وباقى الأعضاء بتموت فجأة بدون سبب معروف ، وطبعا لما العصب مات العضلات كمان بتموت ن فأول حاجة عضلات أطرافه ماتت فاتشل وبقى قعيد فى السرير ،والمتوقع بعد كده أن عضلات لسانه تقف فيفقد القدرة على النطق ،تالت مرحلة أنه يفقد القدرة على البلع أنه يبلع ريقه حتى ، بعد كده هيموت لأن ريقه هيتجمع فى الرئة لأنه مش قادر يتحكم فيه ، حد قدر نعمة البلع دلوقتى أو نعمة الصحة ؟ ده أنتم عايشين فى نعيم والله ، تخيل واحد إداك لمبة هدية هتشكروا أد ايه ؟ طب الى اداك شمس بقة ؟؟؟ لو واحد اداك كباية مايه هدية هتشكروا أد ايه ؟؟طب الى اداك نهر هبة ؟؟حد فينا دفع ثمن الاسلام ؟؟ المبرمج الى بيدى برنامج لشركة علشان ينظم لها شغلها بيدوله فلوس أد ايه ؟؟ طب الى اداك قرآن ينظملك حياتك كلها مش شغلك بس؟؟

افتكر الأخرة ، افتكر إذا جاءت الصاخة ، افتكر إذا جاءت الطامة ، افتكر إذا جاء يوم التناد ، افتكر اليوم ده وأنت هتكون واقف فى اليوم ده ، افتكر هتكون حالتك ساعتها ايه ، شوف رسول الله (صلى الله عليه وسلم) وهو بيموت فبنته بتبكى وبتقول وا كرب أبتاه ، يقول لها رسول الله(صلى الله عليه وسلم) لا كرب على أبيك بعد اليوم ، فى ناس هتستريح أوى فى الاخرة ، وفى ناس استريحت فى الدنيا بس للأسف هتتعب اوى فى االأخرة ، لذلك أكبر تلت مشاكل كل الخلق هيتعرضوا ليها ، أول حاجة مشكلة العطش هيجروا على رسول الله صلى لله عليه وسلم والملائكة ورسول الله هيقولهم سحقا سحقا ، والمشكلة التانية مشكلة الظلام قال تعالى (يوم يقول المنافقون والمنافقات انظرونا نقتبس من نوركم قيل ارجعوا وراءكم فالتمسوا نورا فضرب بينهم بسور له باب باطنه فيه الرحمة وظاهره من قبله العذاب) ،كان أدامك انك تتلتمس نور ينور أرض المحشر كلها ، مشكلة الحر يقول تعالى (انطلقوا الى ظل ذى ثلاث شعب لا ظليل ولا يغنى من اللهب إنها ترمى بشرر كالقصر )

أحد الشباب كان فى بداية التزامه وكان بيفكر يشد فى الطريق ولا يرجع ولا يمشى واحدة واحدة ، فكان فى واحد مريضة فراح يكشف عليها ، فبيحط السماعة سمع صوت الحشرجة بتاعة الروح وهية خارجة ، وكان أول مرة يشوف حد بيموت ، طبعا حياته اتقلبت تماما ، فى رمضان الى فات كان بيدى دروس فى الجامع والله ، علشان كده بقول كل واحد لازم يمشى ورا جنازة ويروح المقابر على الأقل مرة فى الأسبوع ، انتوا عارفين ليه لازم تبقى ماشى ساكت فى الجنازة ، علشان توقف لسانك ده شوية وتشغل مخك بقه ، وتشوف ايه الكفن ده وايه القبر ده ؟ ويا ترى أنا هاجى هنا امتى؟ روح مقابر العيلة بتاعتكوا وشوف االقبر المفتوح فيهم الى لو انت مت النهارده هتتدفن فيه ؟؟؟

قال تعالى يود المجرم لو يفتدى من عذاب يومئذ ببنيه *وصاحبته وأخيه *وفصيلته التى تؤويه ومن فى الأرض جميعا ثم ينجيه ) ، أشد حاجة فى الآيات دى انهيار العواطف البشرية ، كل واحد عصيت ربنا بسببه هتنقطع العواطف بينكم يوم القيامة ، هتكره مراتك أو الى أنت بتحبها لو كانت سبب فى بعدك عن الله ، مش هتكره مراتك ده أنت هتكره نفسك (إن الذين كفروا ينادون لمقت الله أكبر من مقتكم أنفسكم إذ تدعون الى الإيمان فتكفرون) هيكره نفسه لما يلاقى نفسه مقفول عليه فى جهنم ، هيكره أصحابه ( الأخلاء يومئذ بعضهم لبعض عدو ) ، لما هيمسكوا فى بعض يوم القيامة ربنا هيقولهم مكانكم أنتم وشركائكم ، حسيتوا بالآيات ياجماعة ، حد حس بالغامدية وهى رايحة لرسول الله (صلى الله عليه وسلم) بعد ما وقعت فى الزنا وهى بتقول طهرنى يارسول الله ، فيقول لها رسول الله اذهبى لعلك حامل ، وفعلا تطلع حامل وتروح تانى بعد تسع شهور شوف حرقة الذنب عندها ، وتقول طهرنى يارسول الله قالها افطميه وتعالى ، رجعت بعد سنتين ليقام عليها الحد ، فضلت 3 سنين وحرقة الذنب فى قلبها زى ماهى ، حد فينا فاكر الذنوب الى عملها امبارح؟؟ ولا حاسس بيها ؟؟ ، تخيل لو بتتكلم فى الموبيل والمكالمة دى مهمة جدا والموبيل فصل منك هيكون شعورك ايه؟؟ طب لو واقف بين يدى الله فى الصلاة وقلبك فاصل منك يبقى الموقف شكله ايه؟؟ عايزين نربى قلوبنا بقة ، عايزين قلوبنا تنضف شوية ، احنا بنسمع القرآن ونقرأه ومبيأثرش فى قلوبنا ليه؟ ده واحد زى الطفيل بن عمرو أسلم بقل هو الله أحد وقل أعوذ برب الفلق ، وأسلم على ايده قبيلة دوس كلها الى كان منهم سيدنا أبو هريرة ، واحد زى عمرو بن الجموح أسلم لما سمع سورة الفاتحة ، الفضيل تاب الى الله لما سممع أية ( ألم يأن للذين أمنوا أن تخشع قلوبهم لذكر الله) ، جت أخت من الكامرون الجامع هنا من كذا أسبوع وأسلمت بتقول أنا أكتر سورة أثرت فى قلبى سورة الممتحنة ، عمرك خدت بالك من سورة الممتحنة ؟ ايه الآيات الى أثرت فى قلبك؟؟ مين فينا بيبكى فى سورة البقرة أو النساء ؟؟ .. أخت لسة لبسة نقاب جديد بتقول لزميلتها أنا حاسة أنى عروسة والدنيا كلها بتذفنى ، شوف حلاوة الطاعة ، عايزين نقاوم الشهوات الى فى قلوبنا كل شهوة فى قلبك عاملة زى شجرة واقفة فى طريقك الى الله ، لو قلت إن شاء الله هعالجها السنة الجاية الشجرة هتفرع أكتر وجذورها هتثبت أكتر ، لازم نواجه كل شهوة بجدية ياجماعة

فى النهاية عايز أقول أن الصيف الى جاى ده نخدها شغل على قلوبنا ، عايزين من اليلة نصلى قيام ليل بسورة عبس ، طبعا هتقول أصلى قيام اليل بعبس بس؟؟ ما احنا قولنا بقة عايزين نحس بمعانى القرآن ، رسول الله (صلى الله عليه وسلم) بيقول على المرطبتين بالقرآن أهل القرآن وايه كمان ده أهل القرآن دول هم أهل الله وخاصته ، أهل القرآن يعنى عمره ما يترك القرآن

عايزين إن شاء الله نقتلع كل جذور الشهوات من قلوبنا فى الأجازة الجاية دى ، أو بلاش أجازة دى الصيف الجاى ، لأن احنا مش هيبقى عندنا أجازة احنا هنشتغل شغل بجدية إن شاء الله ، كل واحد كده يروح يكتب ذنوبه فى ورقة الذنوب القديمة والذنوب الجديدة أكتب ولو بالرموز ، واستغفر الله عليها من قلبك ، وأكتب الشهوات الى فى قلبك وليل نهار تدعى ربنا يعافيك منها ، أكتب تقصيرك فى حق الله واشتغل بقة ، توصية الليله أنك تكتب ذنوبك وتقصيرك والشهوات الى فى قلبك وتستغفر ربنا ، تقول السيدة عائشة إن استغفارنا يحتاج الى استغفار

التوصيات فى نقاط
1-) الإكثار من الاستغفار
2-) الأربع حجات بتوع سيدنا أبو بكر الصوم والصدقة وزيارة المريض والمشى فى الجنازة فى يوم واحد
3-) قيام اليل بسورة عبس

قبل ما أنهى الدرس لازم أتكلم على مقتل أو شهادة الله أعلم أبو مصعب الزرقاوى ، أنا مش زعلان على موت أبو مصعب لأن زى ما بنقول ما نقص مال من صدقة ، بقول ما نقص الصف الاسلامى من شهداء ، لو شهيد أكيد ربنا هيعوضنا بغيره غن شاء الله ، يعنى منزعلش ، أصل فى ناس بتقول أمريكا شمتت فينا لا والله ياجماعة ،قيل لرسول الله (صلى الله عليه وسلم) فلان مات بالمدينة فقال هل ولد فيها إن المرأ ليكتب له ما بين مكان موته ومكان موته فى الجنة . مش مهم أنه مات كده كده هيموت ، المهم مات ازاى؟؟ أبو مصعب كانت أميركا عارضة 25 مليون دولار للى يلاقيه ، أنت ثمنك كام عند أهل الباطل ؟؟ ليك قيمة؟؟ انا مش زعلان على أنه مات لأن الله يقول (إن الله اشترى من المؤمنين أنفسهم وأموالهم بأن لهم الجنة يقاتلون فى سبيل الله فيقتلون ويقتلون) ، الواحد زعلان علشان الأقلام المسمومة الى مننا الى بيصوروا المقاومة العراقية أنهم شياطين ، لكن الرصاص الأمريكانى زى العسل على قلوبهم ، الذل والاهانة مش مشكلة ، والتنظيمات بتاعة الشيعة الى بتصفى السنة مش مشكلة كل دى جهود من أجل احلال السلام ، لكن المقاومة السنية يتمسكلها على الغلطة ، مش عايزين نتخذع بالاعلام ده يا جماعة ، عايزين دفعوا فيهم دم قلبهم لغاية لما نفقرهم ، عايزين الكره الجاية تبقى لينا إن شاء الله.

سبحانك اللهم وبحمدك أشهد أن لا اله إلا أنت أستغفرك وأتوب اليك

السلام عليكم ورحمة الله وبركاته

اخى ممكن تقولى اسم ملقى المحاضرة او الدرس

شكرا

كتبت بواسطة Noor Al Islam

السلام عليكم ورحمة الله وبركاته

اخى ممكن تقولى اسم ملقى المحاضرة او الدرس

شكرا

وعليكم السلام
المحاضر الدكتور الشيخ حازم شومان

السلام عليكم ورحمة الله وبركانه
جزاك الله خيرا اخي الكريم على نقلك هذه المحاضرة للاستفادة منها
ويارب يغفرلنا ويجعلنا من عباده الصالحين اميييين يارب

جزاكم الله كل خير