ست خطوات لتكوني مليارديره ..
اختي الغالية هاي أول مشاركة لي فالمنتدى مع اني مشاركه من زمان بس مكتفية باني اشوف الجو العام واستفيد بس عقب ما قرييت طلبات اخوات واايد يسالون فيها كيف يستثمرون واقبال الاغلبيه على عالم المال والاعمال حبيت افيد من واقع دراستي وشغلي وخبرتي البسيطه فهالدنيا وانشالله اقدر افيد
طبعا لدخول هالعالم لازم يتوافر فيج حبيبتي التاجره كذا شرط وحبيت اذكرج لج شوي منهم
اولا :
التوكل على الله سبحانه وتعالى والاستخاره قبل كل شي تسوينه وتذكرين انه شو ما حصلتي من ورا البيزات وحتى لو وصلتي القمر بفلوسج انه كل هذا بفضله سبحانه وتذكؤينه وتشكرينه فكل وقت وتحطين في بالج حتى لو ضاقت بج الدنيا وخسرتي وصرتي مديونه لا قدر الله انه الفلوس وسخ دنيا وانه ربنا قادر انه يعوضج اذا خليتيه جدام عينج
ثانيا
الفكره
يعني يااامااا ناس عندهم ملايين بس مب عارفين ويين يودون هالبيزات وياماا ناس ما عندهم شي بس عندهم افكار لو تطبقت على ارض الواقع بيربحون منها اكثر من ملايين اخوانا اللي فووق ههه
ثالثا
الشخصيه
يعني يا حبيبتي اذا حبيتي تدخلين عالم المال والأعمال لازم تكونيين واثقه من نفسج مليون بالمية وتكون شخصيتج قويه وتتحملين اي صدمه طبعا هالشي ما ينخلق من عدم بس الشخص نفسه هو اللي لازم ينميه ويصقله وفوووق كل ها واهم شي لازم تكونين سياسية وصبوره وعندج اسلوب يسحر البايع والشاري وصدقييني احسن اسلوب هو الكلام بالصوت الهادئ والنبرة الرزينة وتضيفي لكل كلامج الدعاء للي تكلمينه وبهالطريقه بتكونين احسن تاجره لانه ما فيه شي يقرب الناس من بعض غير الدعاء بالخير وذكر الله دايما
رابعا
حسن الإداره يعيني انا عن نفسي اذا بفتح مشروع افضل التفرغ التام وهذا على حسب المشروع يعني اذا داخله مشروع ربحه قوي ومضمون ويحتاج مني الوقت والجهد بتفرغ له تفرغ تام بس فالبدايه نصيحتي لنفسي قبل ما تكون لج اذا كنتي موظفه ممكن تاخذين اجازه سنويه تفضين نفسج للمشروع وتحاولين خلال هالفتره تكونيين واثقه انه لو رجعتي شغلج هالشي ما راح يضر مشروعج يعني حاولي مثلا بعد ما تقررين شو بيكن المشروع انج تسوين الأشياء اللي ما يبالها وقت قبل الإجازه وخاصه موضوع اختيار الموظفين ومقابلاتهم اذا كان المشروع محتاج موظفين لانه فالإجازه انتي بتكونين مشغوله بأوراقهم ومعملاتهم وشركات ومحلات لازم تحددين لها مواعيد وقد ما تقدرين افصلي بيتج عن شغلج ومشروعج ونصيحه مني حاولي قد ما تقدرين تفصلين بين علاقات العمل والعلاقات الخاصه حتى لو كان الشخص واحد يعني مثلا وما راح اعطيج مثال بعيد انا لما اكلم زوجي عن الشغل وهو اقرب الناس لي احاول قد ما اقدر يكون في وقت خاص ومش فالبيت وما احاول بعد ما اخلص اتكلم عن مشاكلنا او اي شي يتعلق فالبيت الا بعد ما اروح بعيد عنه لو ربع ساعه وبعدها ارجع زوجته ودلوعته وكل شي غير الشغل وهالشي يا اختي صدقيني بيريحج واااااايد حتى على مستوى الاهل والاخوان واخر نصيحه في نقطه الاداره نصيحه غريبه شوي بس اللي بتدخل عالم التجاره بتعرف قيمتها اكثر
اياكي ثم اياكي ثم اياكي مشاركه الاهل فالمشاريع التجاريه يعني لو شو ما تكون علاقتج باهلج او صديقتج او اي حد قريب منج لا تخربينها وتدخلين الشغل بينكم وهذا لأسباب واااايد منها مفيد ومنها ضار
المفيد انه لو طحتي روحج لا قدر الله بتحصلين اللي يشيلج ويوقف وياج من اهلج وربعج اللي يبون يشاركونج بس اذا تشاركتو وطحتو كلكم منو بيشيلكم وبيساعدكم
والضار انه يا حبيبتي لو شو ما كان التعامل بين الشركاء وضاح زصريح ونظيف و لو شو ما كانت علاقتج قويه باللي مشاركنج لازم مع الأيام بتصير مشاكل بسبب المال او الإداره او اي شي من هالقبيل و هالمشاكل لو كانت بينج وبين غريب تراها بتكون سحابه صيف بس اذ كانت بينج وبين قريب اقل كلمه بتنقال انه صحيح انه الفلوس تغير النفوس او اي شي انتي ممكن تتحملينه من الغريب لانه ما يعني لج شي وما بينج وبينه غيرها بس من القريب بتكون صعبه وبتكون اول خطوه فدرب الفشل
رابعا
ادارة الوقت وتجميع الافكار
انتي لهالشي تحتاجين نوته صغيره بعد ما تقررين شو بتسوين تكتبين فهالنوته كل شي المحلات او الشركات اللي بتزورينها , المبالغ المصروفه ، الارقام ، المواعيد وكل خطوه تسوينها يعني مثال اذا بتفتحين محل خياطه مثلا
_ تبدين اول شي بزياره محلات الخياطه الكبيره والصغيره المشهوره والمضموره وتسألين اصحابها أو العاملين فيها عن الربح والخساره عن السوق وشو يحتاجه عن أسماء المحلات اللي يتعاملون وياها وتعالي لهم بأي طريقه يعني ممكن تقولين انج حابه تفتحين محل مثلهم او انج طالبه وتبين تسوين استبيان او اي شي ولو حصلتي صد من بعضهم صدقيني الاغلب بيفتح لج قلبه ومحله وبيساعدج لانه الرزق من الله سبحانه .
- بعدين تروحين تدورين موقع مناسب للمحل وهذا اهم شي والموقع المناسب مش بس شارع عام ومبنى جديد وبس لا يا حبيبتي الموقع لازم تهتمين بادق تفاصيله من اول المحلات المجاوره ونشاطاتهم وكم محل خياطه ممكن يكون منافس ولازم تشوفين كل محل بشو يتميز اذا كان نشاطه نفس نشاطج وبعد لازم تعرفين نوع السكان يعني طبقة السكان الموجودين وهل الموقع ممكن يجلب زباين من اماكن وحتى ادق تفاصيل الشوروم لازم تكونين على علم فيها عشان ما يصير اي شي بسيط بعدين يكون سببه سوء التخطيط والاختيار السيء
ادري اني اقرقع واااايد بس تحمليني
_وبعدين تشوفين المحلات اللي بتتعاملين وياها للشغل وتسوين كوتيشن من كل محل وتشوفين شو احسن شي عندهم وقبل ما تشترين لازم تكون العماله جاهزه وتخلين موظفينج يساعدوج بالاختيار لانه كل واحد ادرى بتخصصه بس ركزي انج لازم تكونين وياهم في كل خطوه وتسمعين منهم ومن اي حد له نفس الاختصاص تعرفينه بنفس المجال ومن صاحب المحل اللي بتاخذين منه البضاعه وحاولي قبل اي شي يكون عندج ولو فكره بسيطه عن الالات والمواد وركزي عالأشياء المهمه يعني الأساسيات بس ولا تسمعين كلام اصحاب المحلاات اللي بيقولون لج ها اختراع ايطالي جديد وها اول مره ينزل او يسوون لج من شي كمالي شي ييب لج ذهب ترى كلهم يبون يربحون
وبعد ما تزهبين محلج يبالج دعايه قويه قويه فيها عروض واشياء تجلب لج الزباين حتى لو استفدي شوي بالبدايه وقللتي السعر او سويتي عروض مجانيه او اي شي خلي الشغل اللي ياب لج زباين العروض يرجع لج ياهم بدون عروض وييب لج زباين الشغل
طبعا انا ذكرت محل الخياطه كمثال بس
رابعا هذا اذا كنتي مكمله وياي وما بندتي الاب ولاعت جبدج من الهذره
التميز
صح هو اهم شي بس انا خليته للأخير لانه اللي مالها خلق تسمع اللي قبل اكيد ما لها خلق على هالسوالف والاحلام والافكار
وبالنسبه للتميز واللي هو منهج ابويه ومعلمي الشيخ محمد بن راشد الله يحفظه
لازم تحاولين تخلين مشروعج مميز يعني اول ما ينقال اسمج او اس محلج او اي بتسوينه يذكرون لج شي مميز راسخ فذهون اللي سمعو عنج مثل لوغو حركه اسم غريب اسم حلو او اي شي بس مش ها التميز ها بس مجرد شي للسمعه
التميز انج تسوين شي غير كل الناس لا تضحكين انا بعدني ما كملت ادري انج تعرفين هالمعنى من زمان بس انا قصدي انه حتى لو بتفتحين مشروع فيه مثله 100 واحد فالبلاد لازم تفكرين كيف مشروعج يكون فيه شي زياده او غير عن غيره يعني مثلا وبنرجع لمحل الخياطه
كلنا نعرف الخياط اللي يفصل ثياب وعبي وغيره وغيره بس نادر ما نسمع فستان عرس بأسبوع او فستان خلال 48 ساعه او 24 ساعه او مثلا نادر ما نسمع عن مشغل خياطه للموهوبات يعني اللي تبا تفصل فستان وتشارك بادق تفاصيله منها تكون زبونه ومنها تكون مثل اللي سوت الفستان بايدها واشيااا واايده كثيير وللعلم انا ارجع اقول ترى ذكر محل الخياطه مش تمويه او تشجيع على انج تفتحين محل خياطه بس ها مثال
خامسا
الموهبه والهوايه والرغبه
يعني لا تفكرين تدخلين في اي شي الا اذا حسيتي انج تحبين هالشي وانج ما راح تملين منه وانج بتبدعين فيه حتى لو بمجرد افكار تطوره يوم ورا يوم وبما انه كل واحد فينا عطا ربنا هوايه وموهبه فلا تسهينين فموهبتج وترى كل فالدنيا ممكن يتسوى منه مشروع ناجح اذا كنا صج نحبه
سادسا واخيرا
راس المال
انا هااا خليته للآخر مش لانه مهم ولا لشي بس عشان اقول انه راس المال مب اهم شي فالمشروع صج مثل ما قلت قبل يا ما ناس عندهم ملايين بس ما يعرفون شو يسون فيها فراس المال صح انه لازم يكون موجود بس المخ النظيف والمشروع الناجح والموهبه والابداع ما ينشرون بملاين الدنيا بس طبعا بعد الفكره وكل هالأشياء لازم نرد لأرض الواقع وندور على راس المال ونوفره واهم شي ما نصرفه كله ابدا لو شو ما كانت الظروف لازم ننسى جزء منه ليوم احنا ما نعرف شو ممكن يصير ويانا لا قدر الله وترى اللي عنده 100 الف مثل اللي عنده مليون لا تستغربين لانه مش المهم المبلغ قد ما يهم انتي كيف بتقسمينه وكيف راح تتفقين على الدفع مع الشركات واخر شي بعد ما ربنا يوفقج انشالله وتجنين الارباح لازم تفتحين حساب جاري او توفير تحطين فيه كل مبلغ يطلع ربح حتى لو 100 درهم وقد ما تقدرين اول سنه او سنتين هالمبلغ اللي تحصلينه شو ما كان بسيط حطيه فوديعه بالبنك منها تكونين ضامنه انج ما راح تلعبين فيه لانج اذا فكرتي تسحبين بتطرين تكسرين الوديعه وما بيكون منها فايده وما بتحصلين ربح يعني بتيودين روحج وبتخليه بس طبعا افصلي بين الباقي من راس المال والارباح يعني الباقي من راس المال لا تحاولين تسوين به اي شي لانج ما تعرفين القدر شو خاش لج وفيه طريقه ثانيه للارباح ممكن تدخلينى فيها الصكوك الوطنيه لانه ربحها مضمون يعني اذا ما ربحتي وما حصلتي شي ما بتكونين خسرتي ... وفيه اشياء ثانيه انتي فكري تدخرين فيها الارباح غير مشروع ثاني وغير الاسهم ترى يقولك وش لك فالبحر واهواله دام رزق الله عالسيف يعني اللي ما يعرف الصقر يشويه واذا الاسهم مب مجالج لا تركضين وراها تراها تعور الراس للي بيزاته شوي وممكن يحتاجها بس انشالله يوم بتكبرين وبتستوي 100 الف مليون هاذيج الساعه سيري ونحن خلفك لانج عادي بترومين تصبرين عالسهم وللأسهم حلقه ثانيه انشالله
اتمنى ما اكون قرقعت زياده عن اللزوم بدون فايده وادري انه خير الكلام ما قل ودل بس شو اسوي ملقوفه من زمان ما دخلت منتدياات
منقول
الروابط المفضلة