سامحك الله أخي على هدا الطبق المقرف اللي يسد النفس أنا دخلت بالصدفة من شدة حبي للطبخ ظننت أني سأجد مفاجأة و استغربت ان يكون في هدا القسم طبخ، فكانت أفظع مفاجأة.

كتبت بواسطة الفقير إلى الله

عقبال مانجتمع أنا وانت وأخونا أبو مهند

على الضب اللي سويته لنا

في القريب العاجل بإذن بالله

يعطيك العافية

الله يعافيك أخي الفاضل
الفقير إلى الله
وأشكر لك تكرمك بالمرور والتعقيب
والساعه المباركه يوم نتشرف بزيارتكم
ولك مني أحلى طبخة ضب بإذن الله
لكن مو تجون بالشتاء
ترا الضبان عندها بيات شتوي
تطلع بس بوقت الربيع والصيف

كتبت بواسطة صديقة الزهور

شفتوا راس الضب اللي ماسكته يد لابسه ساعة

عندي إحساس انه مسكون بسم الله !

مسكت ولعبت بكم ضب لكن مثل راس هالضب ماشفت !

أختي الفاضلة صديقة الزهور
أشكرك لتكرمك بالمرور والتعقيب
والسر في الرقبه السوداء العريضه ( والله أعلم )
هي أن الضبان تبيت طول الشتاء في جحورها لا تتحرك نهائيا ولذلك فإن من الخطأ اصطياد الضب في أول وقت الربيع إذ لا يزال جسمه مسود وجلده مترهل ويبدو والله أعلم أن تورم الرقبه بسبب قرب عهده بالبيات الشتوي لذك أهل الخبره لا يصطادونه إلا في أواخر الربيع بعد أن يأخذ حاجته من أكل النباتات والحشائش

طبعا الكلام اللي ذكرته عن ضعفه وعدم طيب لحمه في أول الربيع هذا كلام علمي من أصحاب الخبره في الضبان
أما الكلام عن الرقبه اللي كأنها باذنجانه خربانه فهذا اجتهاد مني. ودليلي في هالإجتهاد أني..
ا
ا
ا
ا
ا
ا
ا
ا
ا
ا
ا
قسته على الإنسان إذا نام وايد . مو ينتفخ ويهه؟؟

كتبت بواسطة (سمو المجد)

حتى تتكبب الخلطه على الطباخ وتسد فتحات الغاز
وتنطفي النار بروحها
رهيـــــــــــــــــــــــــــب

هههههههههههههههه
عاجبتك هذي ؟
أشكرك أخي سمو الأمير عفوا قصدي سمو المجد على متابعتك الحثيثه
شكلك تجيد الطبخ وتحب المطبخ
آنه أحب الطبخ لكن ما أعرف إلا طبختين كويتيتين
( مطمط ) = رز وطمام و ( معدس)= رز وعدس
وطبعا البيض بأنواعه
وأعرف أقلي برغر وأفرم بصل بعد
يعني تقدر تسميني ( الشيف الكويتي )

كتبت بواسطة مواكب الشهداء

شنو هذا شنو هذا ....ماشاء الله ...طبخة واضح انه متعوب عليها ...

نعم نعم
بدليل أن الشيف حاطله مساعدين يقطعون البصل ويجهزون الذبايح

يمكن بالمستقبل أجرب طعمها من باب الفضول ......يمكن ......

فكره ممتازه
والحياة تجارب وخبرات

بس اللي جربوا طعمها ...بغيت أسأل شلون طعمها ....قريب من الدجاج والا اللحم والا السمك ....أنتظر الرد

احم احم
في واحد جرب أكله لما كان صغير
وطعمه كان قريب من لحم الدجاج أو هو بين الدجاج واللحم
تدرون منو هذا الشخص؟؟
ا
ا
ا
ا
ا
ا
ا
ا
ا
ا
ا
ا
إنه محدثكم كويتي

أختي الفاضلة
فتاة القمر
أشكرك لتكرمك بالمرور والتعقيب

كتبت بواسطة ~ فتاة القمر~

وووووع

لا لا لا تراها نعمة الله
طيب كلمة (معمول ديناصورات أو معمول بالديناصور ) ما حسيتي أن اللي وراها شي يخررررررع؟

قسم بالله ما قدرت أشوف الصور !!

عيل شلون عرفتي إنه ووع؟!
متأكد أنكِ كنتي تريدين قول ( ما قدرت أشوف الصور كلها )

يا الله شلون تحملت تحفظها في جهازك !!

لا . وأخذتلي تقريباً 3 ساعات أضبط فيها وأحملها على مركز تحميل المنتدى للصور ومن ثم إدراجها بالمنتدى
يعني مثل ما قالت الإخت مواكب الشهداء ( طبخه متعوب عليها )

ما شاء الله عليها أختي يوم شافتني اصرخ لّمن شفت الصور جتني تضحك وتطاااالع وتضحك !

إن شاء الله لها مستقبل باهر في هالنوع من الطبخات

شكراً لك على الطبق اللي مستحيل اسويه

.
مو مهم تسوينه
لكن السؤال المهم
عقب هالطبخه الإبداعيه ما ودج تاكلينه؟
عالأقل غمسي خبز بهالمريقه اللذيذه
ا
ا
ا
ا
ا
ا
ا
ا

يااااااااااااااااااويلي ويلااااااااااااااااااااااااااااااااااه

وش الضبان اللي جايبها عزالله ليتني مادخلت لاومع هذا كله في كل صفحه ضب افجع من الثاني

سديت نفسي عن الاكل اخاف احلم في الليل ضبان ساعتها مدري وش اقول ؟؟

الله يهديييييييييييك ياكويتي فجعت ولد اخوي الصغير خليته يبكي والحين اش اللي يسكته .

دمت في حفظ الله

اخي الفاضل كويتي ...........
صراحة صور مقرفة
صدق من سماها ديناصورات قزمة
اسم على مسمى
لا وبعدين متحفنا في كل رد صورة
ايش هذا النشاط – ما شاء الله –
على العموم ترى اتسلينا كثير من ردودك
ومداخلات الإخوة الأعضاء
مجهودك واضح في وضع الصور وترتيبها
يعطيك العافية............ بس لا عاد تعيددددددددددددددها

أختي وحبيبتي الغالية مواكب الشهداء ,

بل تصدقين ....انني افرح عندما يجمعنا موضوع واحد..

والله نفس شعوري , وأفرح أكثر لما نتبادل الحوار سوياً ..

لا اظن انها اكلة كويتيه ولكن ربما خليجية او بدويه ((وللعلم انا بدوية))

أنا اللي أعتقده إن أهل الخليج اهم اللي ياكلونه لكن من وين هي بالضبط مدري؟
بس لا تطلع سعودية وأنا مدري !!!!!
ههههه,
ياكلون الضب هني بالسعودية, لكن أصل الأكلة من وين مدري؟

ولكن اترك الاجابة لسموالمجد وكويتي فممكن يفيدونا في أصل هذه الطبخة ..

ناطرة توضيح ..


.

وأنا ما ابي أكله اكله بس بجرب طعمه

شلون بتجربين طعمه بدون ما تاكلينه ؟
إلا اذا كان قصدج أسأل عن ماهية طعمه ..
وهو أسلم لج من التجربة الشخصية ..
ههههههه,

....وللعلم يا اختي انا لا احب السمك فقط التونة

أنا والسمك مو وايد أصحاب , الوالدة الله يحفظها يوم تسوي السمك آكله فقط مجاملة لها ,
لكن مو حباً في السمك ..
والتونة بعد نص نص مو وايد أصحاب ..

....والجمل .ماعمري جربته ...

ولا أنا , لكن كنت أبي اعرف ياكلونه عندكم بالكويت ولا لأ؟

بس معلومة جديدة عن طعم الارنب ...انه شبيه بطعم الدجاج

هههههههه,
هذا اللي اذكره من هذيك الوجبة ..



***********************************

أختي الغالية صدو ( صدى الذكريات )

أولا أعتذر من صاحب الموضوع لاني دخلت عرض

وأنا بعد أعتذرمن الكاتب عن دخولي عرض,,

الصراحة نفس الرسول عليه الصلاة والسلام عافت أكل الضب وأنا بعد مثله تعافه نفسي ..


سبحان الله

ما دام أن الأمر ليس حرام فلا مانع من أكله

أخي الموقر سمو المجد ,

الوجبة شهية والله العظيم بالرغم اني شفت كل الصور اثناء الذبح والتكتيف والاستسلام وعناد بعض الضحايا
الحمد لله نفسي ماتعيف اي شيء ابد الا المحرم

أنا ما قصدت بتعافه نفسي انه حرام لكن مثلي مثل رسول الله حين عافت نفسه أكل الضب,

عن ابن عباس أن رسول الله عليه الصلاة والسلام سئل عنه لما قُدم إليه , وامتنع من أكله : أحرام هو؟
فقال : لا , ولكن لم يكن بأرض قومي , فأجدني أعافه , وأُكل بين يديه وعلى مائدته وهو ينظر )

وفي الصحيحين , من حديث ابن عمر عن النبي عليه الصلاة والسلام قال ( لا أحله ولا أحرمه )


أختي الغالية صدو,

لقد جربت لحم الأرنب - أمقت لحم الارنب مقتا شديدااااااااا لان أي خطأ في الطبيخ يخلي مذاقه مو حلو - لحم و الحمام و لحم الحصان أيضا

والله هي مرة وحدة فقط في عمري ,
ومو عاد أنا اللي كنت طابخة ,
يعني مدري عن أسرار طهي ( الارنوب )
هههههههه,
أنا حدي الايدامات أو الصالونة مثل مايسميها البعض,, ومو كلها بعد فقط اللي احب آكلهم ,
أما المجابيس والهريس والمندي والمرقوق ووووو >>>>>>>>> ما أعرف أطبخهم بروحي ..

أمي أكلت الجراد حين كانت طفلة - مع العلم أنه يحتوي على نسبة بروتينات كبيرة -

تصدقين صدو اني سامعة عن ناس هني ياكلون الجراد المجفف مثل المكسرات ,
يعني تسالي وقت شوفة التلفزيون ..
وسعر هالنوع من المكسرات النادرة غااااااااااااااالي , يمكن القرطاس الواحد منه بألف ريال !!!
والله مدري على شنو؟؟!!!!!!

عندنا الصحراويين ياكلون الجمل بس عمري ما ذقته

نحنا بعد أهل الصحرا هم اللي ياكلونه ..

لكن هناك أكلات شعبية قد يعافها البعض مثل الحلزون و امعاء الخروف لكنها تكون لذيذة جداااااااااااااااااااااااااااا

هذه أمعاء الخروف -الدوارة أو التقلية -


لكنها أرحم بكثير من الحشرات - بنات وردان و العقارب - التي يأكلها الصينيين

كلام سليم لكل منطقة عجايب خاصة فيهم,
لكن الله يخليك عاد إلا الصينين هذولي عالم ثاني , ما خلوشي حتى القطاوةو الكلاب اكلوها..


طيب آخر سؤال شنو يعني ( بنات وردان ) ؟
ماعرفتهم اللي قلتي عنهم ,,


وأكرر أسفي من صاحب الموضوع , للاطالة ..

كتبت بواسطة مواكب الشهداء

ولكن اترك الاجابة لسموالمجد وكويتي فممكن يفيدونا في أصل هذه الطبخة ...

لاشك أن أكلة الضب هي من الأكلات الخليجية الغير مرتبطة بدولة معينة بل هي من تراث وأكلات الباديه على مستوى دول الخليج عامة فمتى ما وجدت الصحراء وجدت (الضبان) ومتى ما وجدت الضبان وجد آكلها
وربما تشتهر هذه الوجبة أكثر في المملكة العربية السعودية والكويت وقطر والإمارات وهي أقل في سلطنة عمان وأندر بل لا تكاد تعرف في مملكة البحرين