وعليكم السلام ورحمة الله وبركاته ....
من كم سنة ما دخلت الملتقى؟؟...
ليمو.. مبروك الإجازة
وحياك الله في جدة...من الحين شغّلنا النافورة وحجزنا لك مكان قدامها..
وبالنسبة للحفلة ترى أنا كنت مارة من جنب كات وأبلة غدو.. والظاهر كانوا يضحكون من قلبهم فطاح منهم كم صحن وشلتهم معاهم.. ولحقت كات تحطهم
عمومًا عشان ما أكثر هرج << اللي يسمع يقول بس سطر واحد فوق!!
الأماكن التي يجب ويتحتم وينبغي ويستحسن أن تزوريها في عروس البحر هي:
1- مخيم البحر "ملتقى البحر الصيفي" رابطه وكل معلوماته وأخباره وأحواله وأخبار جيرانه في توقيعي
<<بتسوي دعاية بشكل غير مباشر لزحمة توقيعها
2- النافورة.. لازم تتعشي قدام النافورة.. عندك كذا مطعم.. عمو حمزة مثلاً.. قدام النافورة على طول
3- ملاهي الشلال.. خطييييييييرة من جد روعة.. حاولي تروحيلها على 6 العصر ولاتفوتي منظر الغروب.. شي خيااااااااالي
ولو معاكم أطفال روحوا الفن تايم.. أكلهم لزييييييييز.. أحلى بيتزا وأحلى بطاطس مقلية عندهم.. بدون مبالغة
4- إذا تبغي أسواق عندك سلطان مول في شارع الأمير سلطان.. ولا مول في شارع التحلية .. وحراء معروف برضه قريب على سلطان مول.. وفيه غيرهم كثيييييير..
5- شيء أساسي وضروري ولازم لازم تجربيه.. مطعم البيك.. هذا موعندكم أبدًا.. بس في الغربية.. أفضل مطعم بروست في العاااااااالم بدون مبالغة
فرعهم في المساعدية فيه قسم عوائل..
6- مممم اش في كمان؟؟ آه افتكرت.. أنصحك الساعة 6 الصباح تروحي المنطقة التاريخية في البلد.. يسموها جدة القديمة.. أحلى شي في الصبح.. ولو تتجولوا فيها مشيًا على الأقدام أحلى وأحلى.. خليك تشوفي البيوت القدييييييمة والرواشين والمشربيات والمركاز وووو أشياء روعة تحسسك بجو ثاااااااااااني
وعلى فكرة يا ليمو الجو في جدة الأيام هذي في الليل مرررررررة حلو.. طبعًا في النهار حرّ يسلق البيض لو حطيتيه في الشمس
كتبت كلام كثير؟؟ هذا من غياب سنة عن الملتقى صار كذا.. أجل لو سنتين اش حيصير؟
رد مع الاستدلال
كتبت بواسطة مرارة البحر
الله يجعل أيامنا كلها مرح و فرح 
الروابط المفضلة