يا بنت نابلس الله يهونها علينا وعليكم اجمعين انتي ما بتعرفي انه الحلم العربي اختي التوام اه والله كنا .... واحد معا اه حتى اسالي امي ( بمزح ها )
بس انا بعدت وتزوجت لالطيبه وهي من منطقه بقرب يافا فهمتي ........... هل تعرفين اح في مخيم بلاطه من دار سمحه

أختي بنت نابلس الصمود
اهلا فيك
انا بنت غزه و مولوده في غزه منذ اجداد اجدادي
بس امي الله يرحمها كانت عايشه في يافا و هي قدسيه اصلا
كل البلاد خير وبركه
انا بحب غزه و بموت في بحرها وخصوصا متل اليوم الجو حلو
و تلعبي على رملها رغم الاوضاع القاسيه اللي بنعيش فيها
بس لازم نتأقلم عليها لان ما في أغلى منها
صحيح انا من سكان الرمال وين صحبتك ساكنه

تسلمي يا بنت نابلس
والله بتمنى أروح فلسطين وأعرف كيف بيكون شعوري وأنا هناك.. والدي راح مرة واحدة في حياته حتى "يتعرف" على أخته.
ما قدر يروح حتى صار معه جنسية كندية.. فعلاً كان فرحان كثير وهو بيتجول بأنحاء القرية اللي ولد فيها، واحنا تأثرنا لمجرد مشاهدة الصور.
حتى زوجي حابب كثير يزور فلسطين، مع أنه لبناني، ولكن فلسطين للمسلمين جميعاً

ما بعرف كيف شعوري رح يكون وأنا شايفة الوحوش رايحة جاي في بلادنا؟!
الله يقلعهم منها قريباً يارب.

ايمان حبيبتي ان شاء الله يتحقق حلمك وتشوفي فبسطين بس تكون نظفت منهم
انتي بتقولي وانتي بعيده وكيف احنا هون كل يوم تقريبا بنشوف دلهم تخيلي في بلد يهوديه عندما ندخل أي مؤسسه يطلبون البطاقه واللي يقهر انه اللي يطلبها منك يكون واحد سكن البلاد من كم سنه واحنا هون الأساس وهو عينه اقوى منا
لدلك عندما اكون ببلد عربي كالسعوديه أو الاردن اشعر بارتياح لأني ادخل أي مكان بدون استفسارات ولا عرض البطاقه نشعر كباقي الناس

اهلا ببنت نابلس
شو هالجمعة الحلوة ان شالله نجتمع بالاقصى يا رب ( قولي آمين انت و هي )
انا يا ستي من شويكة قضاء طولكرم و للاسف عمري ما زرتها و لا شفتها الا بالصور و بتمنى من كل قلبي ازورها
و الحمدلله ربنا عوضنا ببلد تستقبلنا و تعطينا جنسيتها و تعاملنا متل اهل البلد و الحمدلله بس طبعا ما في شي بيغني الواحد عن بلده و بلد اجداده
اكتر اكلات بحبها المقلوبة و المسخن

و عود ::: مبارح طبخت عكوب ببصل و زيت زيتون .. يا ريتك كنت معنا

طيران راح اخبر وعووود..
صحتين وعافية
طبعا ما عندي جديد
انا من غزة وساكنة في غزة
والماما اردنية من اصل فلسطيني..
وبحب المسخن والمنسف والصفيحة واقراص السبانخ الفلاحي واقراص الزعتر بالجبنة
وربنا كرم يجمعنا في الأقصى يا دندون...

السلام عليكم يا احلى واروع اخوات
الأخت Dandoon بعرف ناس كتير من شويكة وعلى فكرة كتير بحب هالقرية لإنو إلي معاهم عشرة عمر .. بس ياريت تروحي وتشوفي بلادي ما أحلاها ... وعلى فكرة مع إني بعرف أعمل كل الأكلات الفلسطينية بامتياز ما عدا المفتول بس العكوب بزيت ما بعرف أعملها علميني عشان أحبه لإني بكره من يوم يومي .

الأخت ايمان علي والله بتمنالك من كل قلبي انت والأخوات انكم تشوفوا فلسطين وترى لو حصلتي على الجنسية بتقدري تدخليها فحاولي أذا انت في بلد اجنبي انك تاخدي الجنسية انت وزوجك وساعتها تفضلوا وبيتي مفتوح لغلكم بنابلس (حياكم الله ) بحكي جد والله وياريت نفضل على اتصال ما بتعرفي يمكن تنزلي في يوم من الأيام واشوفك.

الفتاة الطويلة .. منورة حبيبتي وانت وتأمك والله اول مرة بعرف إنكم توأم شوفي ما أصعبها توأم وفي بلد واحد ومو قادرين يشوفوا بعض ... بس الله كريم ويجمع شملكم على خير يارب .. وبالنسبة لدار سمحة والله أنا ما بعرف حدا لسة بالضفة غير اهل قريتي وشوية من نابلس بس حسألك جوزي لإنو كتير منهم كانوا يشتغلوا عندو بالمشغل عن بدك تسألي بالضبط وأنا بسألك إياه .

رندوش يا رندوش من علمنا المرفرف طبعاً واضحة انك فلسطينية بس كنت بستنى مشاركتك الطيبة يا بنت غزة الصمود ... حماكم الله من كل مكروه .. على فكرة انا كتير مبسوطة كتير كتير عشان زادوا صديقاتي كمان في غزة... غير اللي أنا بسأل عنهم صرتوا انتوا كمان صديقاتي ... الحمد لله إذا بتسمحولي .. طبعاً ..
رندوش حموت وآكل صفيحة وأقراص السبانخ الفلاحي مع إنو أهلي (عماتي وأجدادي ) فلاحين بس ولا واحد فيهم عملي فطاير فلاحية (شو البخل)هههههههههه بس انشالله لما أنزل حطلب منهم يعملولي بإذن الله وما راح أعدّيها.

ما تتصوروا أديش أنا فرحانة عشان صارلي عيلة جديدة هون وأنا كتير بحبكم وبحب فلسطين اللي جابتكم وبموت في ترابها .... يالله لو تشوفوا ما اصعبها لما شفت اليهود عالجسر بس الأصعب لما شفتهم بنابلس وكانت أيام تسليم الاراضي للسلطة وكنت رايحة عمحلات السيراميك أختار سيراميك لأهلي فشفت دورية اسرايلية وحكيت لعمي نزلني جنبها وأنا بقطع الشارع نفسي اشوفهم عن قريب شكلهم زي التلفزيون فضحك عمي ونزلني والله يا بنات لما شفتهم انقبض قلبي وضليتني أدعي عليهم لحد ما بعّدت عنهم شعور غريب اول مرة بشعر فيه .. حزن وألم وقهر sid وشغلات كتير مع بعض طبعاً اللي عايش بفلسطين أدرى بالمرارة اللي بشعر فيها الفلسطيني معاهم صح .؟؟؟؟
اللهم انصر بلادنا وطهّرها واجمعني مع حبيباتي للصلاة في الاقصى الطاهر الشريف والسامع يحكي آمييييييين...

بسم الله الرحمن الرحيم
السلام عليكم ورحمة الله وبركاته
هلا والله باهل نابلس جبل النار
انا من فلسطنية ابا عن جد
اسكن في الوقت الحالي في غزة
لكن انا اصلي من المغار وهي بلدة موجودة قضاء الرملة لكن عمري ما شفتها (الله يحرم الي حرمني منها)
انا ما بعرف الا موقعها على الخريطة وبس ونفسي ازورها
انا مولودة في غزة في حي الزيتون الصامد

وانا سعيدة اكتير بمعرفتك (على فكرة الى صديق من نابلس عبر الماسنجر)

كنت حكيتي انو في اللك صاحبة في غزة هي وين ساكنة


واخيرا تقبلي مني خالص التحيات

مرحبا" بنات،

أنا نابلسية ولكن بتسدقوا عمري ما شفتها، كنت عايشة بالكويت وهلأ بالأردن، ونفسي كثير أزور بلدي وأرضي وأبوس ترابها، صورتها في خيالي حلوة كتير من حكي أبوي وأمي، إنشاء الله يا بنات تجمع في الأقصى ونصلي مع بعض.

أكثر أكله بحبها ورق العنب والكوسا، الملوخية، الشاكرية وأشياء أخرى ...... كثير

يسلمولي كل بنات فلسطين ..

وكتير حلو أنو اتعرفنا على هالفلسطينيات بالمنتدى والكل خير وبركة

أنا صفدية بس ما بعرف شي عنها شفتها بالصور وبشريط فيديو بس وجوزي مجدلاوي - عسقلان وامنيتنا نرجع يوم على فلسطين .. هو سكان الأردن وانا سكان سورية..

وما بعرف شو هي أكلاتنا المشهورة .. ويارت الخوات الصفديات يعرفوني فيها ..