السلام عليكم يا احلى اخوات
اول شي بدي اطمنكم على احمد هو الحمدلله احسن من اول وبدي اشكر كل اللي سألو عنو وعني وبشكر ام ملك وأدهم كتير كتير كتير وبشكر سما ورندودا وام سهيل على اتصالهم الله لا يحرمني منكم يارب
انا رح احكيلكم عن معاناتي مع ابني الله يحميه من يوم ولادتو
ابني من يوم ما اتولد كان مريض كتير وباميركا شخصو حالتو على انه عندو مرض اسمو osteogenisis imperfecta وهاد المرض زي هشاشة العظام بس اصعب ومن يوم ولادتو طلع عندو اكتر من كسر بالفخد والرسغين
المهم بحمد الله الكسور التئمت وانا بهالوقت كانت نفسيتي كتير تعبانة على وضع ابني لانو كمان عندو مشكلة بالقلب خلقية بس حكولنا انها ما بتخوف وممكن ينعملها عملية لما يصير 18 سنة ان شاء الله
المهم الحمدلله ربنا صبرني على هالوضع وما بنكر اني عانيت انا وزوجي ومرينا بأوقات كتير عصيبة خاصة انو كنا بغربة لحالنا
وبعدها قررنا انو نرجع بلدنا بعد ما تأكدنا انو العلاج موجود وقبل سفرنا باسبوع صار حمودي يستفرغ بشكل مو طبيعي واخدنا على الطوارىء وحكولنا انو عندو ارتداد مريئي والحليب بيرجع على الرئة وبعد عدة فحوصات اتفقو الدكاترة انو يحطولو زي انبوب يوصل للامعاء مشان يريحو المعدة وحاليا لهلأ محطوط الانبوب لحتى يقدر يرضع عادي ونتأكد انو الحليب ما يدخل الرئة
وضل ابني اسبوع بالمستشفى وطلع يوم سفرنا
جبناه من المستشفى للمطار
وتوكلنا على الله وسافرنا وكانت الرحلة كتير سهلة
وما بقدر اوصفلكم كيف كان شعوري لما شفت امي واهلي وهم كمان كتير انبسطو بولادي
تاني يوم كنت قاعدة عم العب حمودي وفجأه صار عندو حرارة وصار نفسو يضيق وحسيت انو عم ياخد نفسو بصعوبة
اخدتو على الطوارىء وعملولو دخول وبعد الفحوصات طلع عندو التهاب رئوي ومن كتر الالتهاب عامل انسداد على الشريان الرئوي وعامل مشكلة بالقلب
وطبعا كان ابني بحالة الله اعلم فيها
وكان ما عم يقدر يفتح عيونه وصار يطلع منو زي الزبد وكل ما ارفعلو ايديه ينزلو
طبعا انا بهالوضع فقدت اعصابي وضليت ادعي ربنا انو يخليه وما يحرمني منو
اجا دكتور القلب عمل زي ايكو لقلبه وبعدها طلع وصار يحكي مع زوجي واجا زوجي فحكيتله انو ابني عم يروح مني حاسة انو خلص
فصار زوجي يبكي ويحكيلي عن اجر الصابرين انا بوقتها عرفت انو الدكتور حاكيلو شي وبالفعل طلع الدكتور حاكيلو انو ابنا عم ينازع
انا بهاللحظة اغمى علي وما قدرت اوقف على رجلي وزوجي على طول حكا مع امي واخوي واجو طلعوني من عندو انا وآية
وزوجي بهالليلة حمل ابني وضل يقرأ قرآن ويستغفر وانا كمان عند بيت اهلي ضليت استغفر واحكي اللهم اجرني في مصيبتي واخلفني خيرا منها وكنت كل شوية احكي مع زوجي وانا ميتة من الخوف اني اسمع انو خلص ابني راح الله يحميه
وبعدها اتصل زوجي فيني حكالي انو حمودي فتج عينيه وصار احسن
وانا طبعا طار عقلي من الفرحة ولله الحمد
ورحت على المستشفى لقيتو كتير احسن وبعدها ضل بالمستشفى يومين وطلع
وهو هلأ احسن من اول بس لسه تعبان شوية
الله يشفيه ويعافية وما يحرمني منو
بعرف طولت عليكم بس حبيت افضفض شوية واحكيلكم عن معاناتي من يوم ولادة احمد حبيبي
وبدي احكيلكم كمان انو مافي احسن من الدعاء والاستغفار
والله اني شفت ابني عم ينازع وبفضل الدعاء ربنا سلمو وخلاه
شكرا الكم كتير على دعائكم
والله يخليكم يارب
وما تنسو ابني من دعائكم هو رح يكون دايما بحاجة الدعاء لحتى ربنا يشفيه شفاء تام
اختكم
ام احمد وآية
الروابط المفضلة