ازيكم اخواتى فى الله يارب تكونوا كلكم بالف خير و بصحة و بسعادة يارب العالمين
ان شاء الله النهاردة هنعمل سوا اطعم و اسهل عيش و كمان فى فرن البوتجاز
و ان شاء الله انا متاكده انه هيعجبكم
و عيش النهاردة من اهم مكوناته هو اللبن الرايب عشان بيدىا طعم حلو اوى للعيش
يالا نبتدى بسم الله
المقادير
** 3 كوب دقيق ابيض او اسمر( انا عملت شويه ابيض وشويه اسمر)
و ممكن كمان تعملى خليط من نوعين الدقيق
** 3معالق كبيرة زيت
** نص معلقة صغيرة ملح
** معلقة صغيرة خميرة او قظعة خميرة فى حجم عقلة الاصبع او الزتونه و رشة صغيرة سكر لاذابه الخميرة
فى ربع كوب من الماء الدااااااااافئ
** لبن رايب للعجن
و لو مفيش لبن رايب امامك اختيارين
1- علبة زبادى و كملى عجن باللبن او بالميه (بفضل اللبن طلبعا)
اوووو
2- اغلى اللبن بتاعك و بعد ما تطفى عليه حطى كمية من اللبن فى كوب و حطى عليه معلقة كبيرة خل
و ماتحركيش الكوباية و اقل من 3 ق هتلاقى لبن رايب
الطريقة
الاول هندوب الخميرة مع رشة السكر و ربع كوب ماء داااااااافئ و نغطيها تخمر اما لو خميرة فورية
فمش محتاجة تتدوب و بتتحط مع الدقيق علاطول
** هننخل الدقيق بتاعنا و نحط عليه الملح و الزيت و تقلب الدقيق فى بعضه
** هنجيب الخميرة و اللبن الرايب و نحطهم على الدقيق و نعجن وياريت لو نحط اللبن الرايب بالتدريج
لان بعض انواع الدقيق بتختلف عن بعضها فى امتصاصها للسوائل
** هتعجن لحد ما نوصل لعجينة تكون بتلزق فى الايد خفيف جداااااااا و هنسبعا تخمر و ترتاح ساعة
او لحد ما يتضاعف حجمها
دول بالدقيق الفاخر الابيض
و دا بالدقيق الاسمر
** هنقرص العجين بالشكل دا و بعدين نسيبهم يرتاحوا 10 دقايق عشان يكونوا سهلين معايا فى الفرد
** هنرش دقيق على السطح اللى هنفرد عليه العيش و نفرد العجين بالنشابة كدا و نجيب صنية
او تاربيزة و نرشها دقيق و نفرد عليها العيش اللى احنا فردناه لحد مانخلصه
** هنشغل الفرن بتاعناعلى نار عالية جدا لمدة 10 دقايق و بعدين نجيب العيش بتاعنا و نحاول
بالفرشاة نمسح الدقيق الزيادة من اسف الرغيف و بعدين هنحطه على الصاجة اللى تحت النار علاطول
زى كدا
** و بعد ما يرتفع او ينتفخ الرغيف كدا و تلاقيه احمر من تحت اقلبيه على وشه عشان بحمر
** و لما يحمر الوش علاطول تخدى العيش فى فطوطة جوا كيس عشان يحتفظ بطراوته
**ما شاء الله تبارك الله
دا العيش الابيض من تحت
و دا العيش الاسمر من تحت
و دا قلب العيش من جوا ما شاء الله خفيف و طرى و يحته ممممم
الرغيف يتاكل حاااف و الله انا ابنى يحيى مدوخنى فى الاكل ( اقوله تعالى افطر يا يحيى يقولى انا كلت امبارح )
هههههههههه
يحيى لما شاف الرغيف و الله خده من ايدى و كله حااااااف و قالى انا عايز تانى يا ماما
و الله كان متهيألى ازرغط من الفرحة
هههههههههههههههه
يا رب موضوعى البسيط الخفيف يكون عجبكم و اوعو تنسو اختكم ام يحيى و مازن بدعوة حلوة
فى رعايةالله و حفظه
بحبكم فى الله
الروابط المفضلة