عيش القرص الطرى **الكل افتكروه جــــــاهـــــز .... و طبعا بالصور
ازيكم يا اخواتى
يا رب تكونوا كلكم بخير
انا النهاردة جيبالكم طريقةعيش جامدة و جميلة
و لذيذة جدااااااااا
و كل اللى داقوه و شافوا و الله افتكروه جاهز
و الوصفة دى انا و اخدتها هنا من اخت ربنا يبارك فيها
و ربنا يكرمها لانى لما اخدت طريقتها و عملتها لاقتها انها
بتجمع ما بين العيش و القرص الطرية دا غير انه ساهل
جدا جدا و مش مكلف خالص و ان شاء الله اما هتجربوا
هتعملوه علاطول
يالا بسم الله نبتدى
المقادير
4 كوب دقيق
3 معالق كبيرة سكر
نصف معلقة صغيرة ملح
ربع كوب زيت
ماء للعجن ( من كوب و ربع الى كوب و نص ماء دافئ )
خميرة ( انا استخدمت خميرة بيرة فى حجم الليمونة المتوسطة )
الطريقة
1- هنجيب الخميرة مع معلقة سكر من اللى فى المقادير
و نضيف عليها شويه ماية دافيين من المقادير بردوه
و نقلبهم و نغطيها تخمر لحد ما نحضر الباقى
2- هننخل الدقيق و نحط عليه الملح و باقى السكر
و الزيت و الخميرة و الميه و نعجن
3- اعجنى لمدة عشر دقايق و هتلاقيها بتلزق
بسيط فى الايد متخافيش
4- غطى العجينة و سبيها تخمر لمدة ساعة
URL=http[/URL]
5- لما تخمر قرصيها زى اللى فى الصور و ابدئى بططى
بايدك واحدة واحدة تحت سطح مرشوش عليه دقيق
و رصيه فى صنية مدهونة زيت و لما تخلصى
غطيهم بقماشة و سبيهم ساعة و نص او ساعتين
يخمرواانا كنت بسيبهم فى الشتاء 3 ساعات
6- و بعدين شغالى الفرن الاول مدة ربع ساعة
على تار متوسطة و حطى الصنية فى الرف اللى
فى النص و مش بتغيب الصنيه بتقعد فى الفرن ربع ساعة
7- اول ما تطلعى الصوانى من الفرن غطيها بقماشة
عشان تفضل طرية و لما تبرد حطيه كيس و الزياده
شليه فى كيس فى الفريزر و طلعى حسب احتياجك
دا شكل العيش من تحت
انا الكيلو عندى 5 كوبيات دقيق ... انا عملت اربع كوبايات تعرفوا عملو كم رغيف
عملوا 36 رغيف *** ماشاء الله لا قوة الا بالله
يعنى شوفى انتى هتوفرى اد ايه** دا غير الطعم الحلو و النظافة المضمونة
و الله يا جماعة تحفة و جميل جدااااااااااااا و ان شاء الله هيعجبكوا
و اسيبكم فى رعاية الله مع الف سلامة
الروابط المفضلة