جايبالكم النهارده عجينه من اختراعى وحقوق الطبع محفوظه لو سمحتو
انا بقالى شهور طويله جدا معملتش معجنات والنهارده الصبح جه على بالى اعمل معجنات بس للأسف مكنش عندى حليب بودره لانى معتمده عجينة العشر دقايق فى الفطاير
رحت اخترعت عجينه وقلت يلا زى ما تيجى
فكرت وفكرت ثم فكرت ورحت دخلت المطبخ وبدأت الاختراعات
والحمدلله كانت النتيجه رائعه جدا وجميله وكأنها عجينة العشر دقايق طريه وهشه وطعمها رائع ولا نشفت منى خالص مع انى عاملاها من الصبح بدرى ولحد دلوقتى سايباها فى المطبخ ولا نشفت وده المهم
طولت عليكم معلش بس حبيت اشرح بالتفصيل للتوضيح
المقادير
ربع كوب حليب
ربع كوب زيت
3 معالق صغيره زبادى
نص ملعقه صغيره باكينج باودر
ملعقه كبيره خميره مذوبه فى ربع كوب ماء دافئ وملعقه صغيره سكر وتترك لترتفع ربع ساعه تقريبا
نص فنجان سكر
ملعقه صغيره ملح
كل المقادير السابقه تضرب فى خلاط العصير
وتوضع على
2 كوب دقيق وتعجن جيدا بشرط تكون مش ملزقه
ولو حسيتى انها ملزقه شويه ضيفى رشة دقيق
اتركيها على جمب على ما تحضرى الحشوه اللى تحبيها
انا حشيتها بالجبنه الرومى المبشوره
والجبنه البيضا بالنعناع
والزعتر
اترككم مع الصور
ده شكل العجينه
وهنا شكل الفطاير بعد ما خرجت من الفرن
وهنا شكل الفطاير من الداخل
شوفو من جوه هشه وطريه ازاى
وهنا صوره تانيه اقرب
ويارب تعجبكم
أتمنى تجربوها
الروابط المفضلة