السلام عليكم ورحمة الله وبركاته
ممممممن زمان عن هالقسم الدايت يخلي الواحد يبتعد عن هالاماكن الحلوة المهم يالغاليات انا باكتب بعض حشوات الساندوتشات بدوري واتمنى ان كل وحدة تدخل تكتب لنا كم طريقة من عندها ومو لازم بالتفصيل المهم المكونات وياليت تكون طرق جديدة وحلوة ومو شرط قليلة السعرات انا اي طريقة تعجبني باخليها قليلة السعرات لأني ماشية على نظام السعرات واكلي كله يعتمد على الساندوتشات فياليت نفيد بعض المهم
1- سمك بالزبدة المارجرين :
شريحة سمك 100 جرام او بحجم كف اليد + ملعقة شاهي زبدة مارجرين مازولا + شوية ثوم مفروم وفلفل حار + ربع فلفل رومي اخضر وربع فلفل رومي أحمر وربع فلفل رومي أصفر مقطعين شرائح طولية + 1 ملعقة طعام جبنة كاسات أنكور لايت + خبز صامولي حب
الطريقة : جيبي الزبدة وشوحي فيها الثوم والفلفل الحار وضيفي السمك وقلبي ولمن يقرب يستوي اضيفي الملح والفلفل الاسود والأعشاب العطرية وقلبي واضيفي الفلفل الرومي واي بهار تحبينه لو تبي تزيدين انا اضفت بابريكا وقلبيه بس لاتخلي الفلفل الرومي يذبل بعدين افرمي شوي بقدونس فريش واضيفي عليه وبالنهاية ضيفي الجبنةةةةة وواحشيه بالساندوتش : ) ووممكن نفس الطريقة بالدجاج
2- ساندوتش جبنة المرعى
جيبي جبنة المرعى اللي مثل القريش + بقدونس شوي ( تراني ادخل البقدونس بكل المواضيع مو لشئ بس لأني قريت عنه وعن فوايده كثير وتراني نسيت فوايده بس المهم ان له فوايد ) + خيار وطماطم + زبدة مارجرين + خبز صامولي حب
الطريقة :
ادهني الخبز بالزبدة وبعدين ادهني جبنة المرعى رشي شوي بقدونس وبعدين اضيفي شرائح الخيار والطماطم
3 - ساندوتش زبدة الفول السوداني :
موزة + زبدة الفول السوداني + خبز صامولي
ادهني الخبز بزبدة الفول السوداني وقطعي الموز لشرائح واضيفيه عليه وحطي شوي بقدونس ( تراني امزح ) لا تحطون بقدونس
4 - ساندوتش التونة بالطيحنة :
علبة تونة صفيها من زيتها واضيفيها في زبدة وفتتيها بالشوكة وبعدين جيبي طماطم قطعيها صغير صغير جداً بعدين فلفل رومي وبعد قطعيه صغير جداً وشوي بقدونس وافرمية ناعم واضيفي كل هالمقادير على التونة وجيبي الطحينة وصبي منها على التونة وقلبي واحشيها في الساندوتشات الصامولي تجنن اموت عليها
5- سامدوتش تونة بالجبنة والمايونيز :
جيبي زبدية واخلطي فيها جبنة كاسات وشوي مايونيز وملح وفلفل أسود وشوي أعشاب لو تحبين المهم وشوي جبنة موزاريلا مفرومة سايحة حطي الخلطة على جبنة جيبي التونة وفتتيها بالشوكة واحشيها بالساندوتش وصبي عليها هالخلطة كمية طيبة بعدين ضيفي شوي بقدونس ودخليها الفرن ولمن تسيح الجبن كليها
6- الدجاج مع المايونيز والجبن
اسلقي صدر أو فخذ دجاج ويفضل الصدر ولمن يستوي قطعيه صغير صغير أنا عن نفسي افرمه واريح قلبي وبعدين جيبي المايونيز والجبمة الكاسات والموزاريلا واخلطيهم مع بعض وبهريهم وصبيهم على الدجاج وفي الفرن يعني نفس طريقة التونة
7- دجاج بيتززززا
صدر دجاجة قطعيه صغير صغير بعدين جيبي بصل قطعي صغير صغير وثوم وحمسيه في قليل من المارجرين أو الزيت اللي ترشينه وبعدين لمن يذبل اضيفي اليه الطماطم تكوني مقطعتها صغير جداً جداً وتضيفي عليها الدجاج وتقلبي لمن يستوي بهريه بالبهار اللي تحبينه اوكي ولا تنسين بهار البيتزا وبعدين احشيه بالساندوتش وغطيه بجبنة الموزاريلا ودخليه الفرن لمن تسيح الجبنة قدميه ولا تنسي رشيه بشوية بقدددونس
الجبنة الشيدر مع الفلفل الملون
جيبي جبنة شيدر وجبنة موزاريلا وقطعي فلفل ملون أصفر وأحمر وأخضر مربعات صغيرة وقلبيه مع الجبنة وضيفي معاه اعشاب واحشيه في الساندوتش ودخليه الفرن علشان تسيح الجبنة
ساندوتشات الجمبري :
زبدة ملعقة شاهي مارجرين وحطيها في طاوة تيفال لين تسيح شوحي شوي ثوم وشوي فلفل حار وبعدين اضيفي الجمبري وشوحيه وبهريه ملح وفلفل أسود واللي تبينه من البهارات على مزاجك وبعدين احشيه في الساندوتش واضيفي له جبنة مربعات بعدين دخليه الفرن لين تسيح الجبنة ولمن يطلع اضيفي لو تحبين شرائح خس ولو تحبين تضيفين اي شرائح ثانية على راحتك
بعد ساندوتشات سلطة الجمبري
جيبي جمبري 6 حبات كفاية لشخص واحد اسلقيه وبهريه ملح وفلفل أسود وجيبي جبنة حمراء مبشورة وموزاريلا وخس مقطع وذرة ولخبطي الخس والذرة والأجبان والجمبري مع بعض وبعدين ادهني الساندوتش بالزبادي والمايونيز واحشي فيه السلطة ممكن نفس الطريقة دجاج
ساندوتش البيض والتونة
اسلقي البيض ولمن ينضج اطحنيه في فرامة البيض ومعاه علبة تونة ومعاه كل أنواع الخضار اللي عندك وملعقة طعام مايونيز وملعقة طعام جبنة كاسات واخلطيهم جيداً بعدين بهريه بالملح والفلفل الأسود واحشيه في الخبز الصامولي
وهذي بعض الوصفات بس هذي الوصفتين ( ماخذتها من موقع طبخ )
طريقة كنز القراصنة للأطفال
المقادير: ربع خبز فرنسي، نصف كوب ذرة مسلوقة، نصف كوب جبن مبشور، بيضة، 2 ملعقة كبيرة دقيق، شرائح طماطم، أوراق خس.
طريقة الاعداد : اقطعي الخبز الى نصفين متساويين ليكونان صندوق الكنز وافرغي لب الخبز وضعي اللب في وعاء ثم اضيفي له الذرة والجبن والبيضة والدقيق ثم اعجني حتى تتكون عجينة متجانسة وقومي بتكويرها الى كرات ضعيها في صينية الفرن المدهونة وادخليها الفرن في حرارة 200 درجة لمدة 10 دقائق، جهزي الخبز واحشيه بالطماطم والخس واخيرا لاتنسي كرات الذرة وبذلك تحصلين على كنز القراصنة وبالعافية
خلاص تعبت انتظر الحين طرقكم بليز
إشارة المرور:
المقادير: ثلاثة شرائح خبز توست، بيضة عيون، شريحة طماطم، شريحة خيار.
طريقة الاعداد : اقطعي الخبز على شكل دوائر متساوية، ضعيها في الطبق على شكل اشارة المرور، ضعي الطماطم على الشريحة الأولى والبيضة على الثانية والخيار على الثالثة، وبذلك تحصلين على اشارة مرور وبالعافية
الروابط المفضلة