السلام عليكم ورحمه الله
كل عام وانتم بخير
وربنا يجعل كل ايامنا هدى وتقى يارب
النهارده جيت بمشاركه صغيرة لخالتو ام شادي حبيبة قلبي
عملت الفول وقدمته بطريقتين
اشهر الطرق الي بعملها الفول بزيت الزيتون
والفول بالبيض
والفول بالصلصه
اولا الفول
لسه نازل من على النار
بنقع الفول من بليل
بمعدل كل كوب فول حب عليه ربع كوب فول مدشوش
وتاني يوم احطه على النار مع بعض حبات الطماطم المهروسه
او صلصه طماطم بيتي
وبعد ساعه بضيف معلقتين عدس اصفر
واسيبه على النار براحته بياخد حوالي اربع خمس ساعات
الفول بزيت الويتون
نجيب فلفل اخضر وفص توم وملح وندقهم فالهون
بعدين نهرس الفول كويس ونقلب معاه الفلفل والتوم ونحط ملح وليمون
وفالاخر نحط زيت الزيتون وشويه فلفل على الوش
ودي الطريقه المفضله عندي بحبها جدااااااا
الفول بالبيض
وده لزوجي بيحبه جدا حتى كل اهل زوجي بيعشقوه
نحط سمنه فالطاسه ونسيبها تقدح شويه بعدها
نحط عليها بيضتين ونقلبها مع ملح وفلفل
اول ميبتدي يستوي
نجيب الفول ونحطه عليه من غير هرس
او هرس حاجه بسيطه جدا
ونقلب لغايه البيض ميستوي
نرش على الوش كمون وزيت نباتي
يمكن يكون غريب شويه
بس اهل زوجي مغرمين فيه
اتمنى مشاركتي الصغيره تنال اعجابكم
ولاااتنسوا اولادي من الدعاء
ادعو لصديقتي والدها توفى ربنا يصبر قلبها اصبحت وحيده لا ام ولا اب
ربنا يصبرها
الروابط المفضلة