السلام عليكم ورحمة الله وبركاته
اليوم رح قدملكم برغل ببندورة ومنسميها مغمومة ولا تشوفو غم بس ما بعرف ليش بيقولولها مغمومة يمكن لانو الواحد بياكل منها كتير وبعد ما ياكل بيتذكر الوزن وزيادته بيقوم بينغم
طبعا قدمتها مع مخلل باذنجان ومخلل لفت وسلطة خس بلبن (هي المفروض تكون خيار بلبن بس ما كان عندي خيار فاستبدلتو بخس اما افكار تحفة )
وهاي سفرتنا اليوم
طبعا لسا ماكنت منزلة الصحون والملاعق لو كنت منزلتهم ما كنت قدرت اصور
المقادير
كوبين برغل خشن (نفس برغل المجدرة )
حبتين بندورة كبار
حبة بصل
حبة فليفلة حمرا
ملعقة دبس بندورة (صلصة طماطم )
ممكن اضافة حبة لكل من (باذنجان – كوسا – قرع اخضر )كمان بيعطو طعم اطيب واطيب ولو كانت فصيلة القرعيات زكية هون ما كنت قصرت بس ما استعملتها ولكن بالعادة بستعملها في موسمها
ملح
كوب زيت
شايفين المقادير حلوة وسهلة
الطريقة
تقشر البندورة وتفرم خشن ممكن تخلطيها بالخلاط بس انا بحسها هيك ازكى
تقطع البصل ايضا خشن
يقطع الفلفل
في طنجرة الطبخ (انا استعمل طاهية الارز بلاقيها اسهل ) يسكب الزيت مع البندورة والبصل والفليفلة والملح ويترك حتى يغلى ثم يضاف دبس البندورة ويسكب كوبين ماء ويحرك الخليط وتترك حتى تتسبك
في هذه الاثناء يغسل البرغل ويصفى
يسكب في الطنجرة ويحرك برفق حتى يتناسق ولا يحتاج اكتر من عشر دقائق وتكون الطبخة جاهزة
وهذه الصورة النهائية للطبق
هاي الاكلة من الاكلات الي بموت فيها وسبحان الله شهودة طالعتلي بتحب هيك اكلات
جربوها طيبة كتير وان ما عجبتكن ابعتولي الصحن انا باكلو
والسلام
الروابط المفضلة