ان شالله تكونوا كلكم بخير

طبعا بعد ما شفت موضوع الاخت الكريمه والجميله ام مريم العراق والحبوبه شهيره الخاص بالجبنه فحسيت ان موضوع تصنيع الجبنه سهل وان العائق الوحيد هو المنفحه ومكان تواجدها

فقامت اختكم الشملوله اللى تملى مشمره ومشلقيه حد ينزلى اكمامى

المهم جمعت معلومات من موضوعين الجبنه اللى فاتوا ودخلت النت ادعبس شوية دعابيس واتلقيت ملف لعمل انواع الجبن

وقلت حلاوه يا ولاد ده انا حفتح معمل جبنه عندى فى البيت انا عارفه انى مغلسه عليكوا وطولت فى الحكاوى

المهم دورت على المنحه واتلقيتها موجوده فى منطقه اسمها بحر البقر قريبه من الاسماعيليه فقلت مشمهم طريق السفر وبعت اشتريت منها فاللى جابلى اشترالى 2 لتر الله يسمحه

وطبعا اتلقيت المنفحه عندى بالهبل فقلت اشتغل شويه فى الملف

ونويت العب فى

1. الجبنه البيضه
2. الجبنه الرومى
3. الجبنه الحلوم
4. الجبنه المودزريلا
5. الجبنه القريش
6. الجبنه الكيرى
7. الجبنه الريكوتا
8. اللبن المحلى المكثف

طبعا الكلام جميل لكن التنفيذ

يالا نبدأ بسم الله

اولا الجبنه البيضه

وهى نفس خطوات الاخوات الغاليات جزاهم الله كل خير

http://www.lakii.com/vb/showthread.php?t=536407

بعد مادفيت اللبن وكانوا 3 لتر قطعت فلفل شطه وقلبته مع اللبن وضعت م منفحه فى 1/2 كوب ماء مثلج واضفتها للبن مع التقليب وغطتها وادخلتها الفرن بعد تدفئته مع حله مليئه بالماء المغلى وتركتها ساعه

وشققته بالطول والعرض مع التقليب الخفيف لطرد الشرشه وطبعا سبت الشرشه على جنب

ووضعت الجبنه فى مصفى لمده ساعه ودخلته التلاجه لتانى يوم بعد ما رشيت عليها قليل من الملح وتانى يوم قطعتها واحضرت شوية شرشه صغيرين فيها ملح زياده شويه حسب استساغتك ووضعت فيها الجبنه لحين الاستخدام

ثانيا الجبنه الحلوم

دفيت اللبن 1 لتر فى حله استنلس وحطيت المنفحه المذوبه فى الماء المثلج وقمت بالتقليب الخفيف وتركتها فى مكان دافىء وبعد ساعه صفتها فى مصفى عليها توله لكن تركت المصفى وما بها من جبنه فى شرشتها لمدة 3 ساعات وبعد ذلك قطعتها بالطول والعرض لتصفى بقية الشرشه وغليت الشرشه واسقط قطع الجبنه بها الى ان ترتفع على السطح وقمت بهذه العمليه عدة مرات لغيت لما وصلت لمرحله ان الجبنه تزيق بين الاسنان عند الاكل

انتم فهميت يعنى ايه كلمة تزيق

وده تانى نوع ينجح والحمدلله ولسه فى كماله

ثالثا الجبنه المودزريلا


وانا لعبت فى 2 لتر وده سخنتها لدرجة 90 ليه معرفش بس الكتاب قال كده ووضعت م ك خل وعند التماسك للبن قلبتها بمضرب السلك جيدا فى شكل دائرى ووضعت المنفحه وتركتها 4 ساعات مغطاه وبعد ذلك صفتها فى شاش او توله ووضعتها فى الثلاجه مضغوط عليها لمده 12 ساعه وتانى يوم اخدتها بربطة المعلم بشاشتها ووضعتها فى الشرش بعد الغلى لمدة د او 2د ثم نخرجها ونكرر هذه العمليه عدة مرات ونقطعها لكن بعد ما تبرد ولازم تبرد الاول

طبعا لازم تسمعوا تعليقى

بعد ما قمت بعمل هذا النوع من الجبنه واخدت منى وقت ومجهود لكن للاسف موصلتش للنتيجه المطلوبه وهى على الاقل الخصائص الشكليه وهى انها تمط عند تسخينها والاكل

بل بالعكس كانت قريبه جدا جدا من الحلوم مع عدم التزيقه يعنى كمان مزيقتش فجريت على ام مريم وبعتلها رساله والله يرضى عليها ردت عليا سريعا وقالتلى انها ناقصه ماده اسمها البادىء ولها طريقة اعداد معينه وصحيح سألت على الماده ده وعرفت انها موجوده فى معامل الجبنه لكن مشللبيع وده التجربه التالته




رابعا الجبنه الرومى

ومن غير ما اقولكم على خطوات وهارية قلبى حقولكم على النتيجه علطول

وهى نفس المشكله وهى البادىء ولكن مع فارق بسيط انى اضفت لللبن فلفل اسود حب

وده كانت اخرتها جنب اختها اللى بالفلفل الاخضر فى الشرشه

خامسا الجبنه القريش



ولعبت فى 4 لتر وتركته خارج التلاجه لمدة 3 ايام علشان اجمع القشطه ووضعت عليها المنفحه ووضعتها فى طبق غويط بلاستك وغطتها باشارب خفيف ابيض ووضعتها فى مكان فيه شمس 3 ايام وكانت اجبنت ووضعتها فى شاشه ولفتها جيدا فى فوطه مع الضغط لطرد الماء وعلقتها بالشاش وقد نجحت الحمدلله

سادسا الجبنه الكيرى


2 لتر لبن وبعد التسخين لدرجة 90 اضف لتر كريمه لبانى واقلبه وهو على النار حتى يصل الى ما قبل الغليان نضع كوب زبادى ونقلبه جيدا ويرجح يكون بمضرب كهربه على سرعه ضعيفه وبعد ذلك نضيف المنفحه مع التقليب وتترك 8ساعات ثم تقطع وتترك 18 ساعه مع التغليف بشاشه وانا وضعتها فى قالب التلج علشان تكون قطع

اتهيأتلى أظاهر المهم كانت النتيجه وهى بعيده تماما عن طعم الجبنه الكيرى وكان طعمها قشطى اكثر

سابعا الجبنه الريكوتاااااااا


وهو انى جمعت الشرشه اللى طلعت من 12 لتر لبن وسبتها على نار هادئه اكثر من 6 ساعات لغيت ما اتخنققققققققت و ده الكميه اللى طلعت طبعا مفيش كلام على طعمها لانه يجنن لكن حجمها يمهل ولا يهمل

ثامنا اللبن المكثف المحلى


4 كوب لبن بعد الغليان والتبريد يوضع عليهم 2 ونصف كوب سكر مع التقليب جيدا وتترك نصف ساعه بعيده عن النار وارجعها للنار لمده ساعه على نار هادئه

وده رحلتى الشيقه مع 7 انواع جبن

وبلاد تحطنى وبلاد تودينى

ولو فى جديد لا تقلقوا

اختى برنسس..... هو موضوع متعوووووووووووووووب عليه فعلا ....شكرا ليكى ولامانتك انك بتذكرى كل شئ الخطوات المفصلة وحتى الطعم ......جوزيتى الخير والسعادة
واخر كلامى سلام

ما شاء الله الله يعطيكي العافيه تسلم ايديك

بالنسبه للجبنه موزريللا هي لازم بعد الغلي تلبسي جونتي وتمططي فيها وتلفيها وهكذا وهي ساخنه

تسلم ايدك والله يعطيكي العافيه

تسلمى يا عسل أنتى كده شجعتينى أبدأ مشورك
يله محوله كمان و قليلى أيه الأخبار
بس على فكره أسلوبك شيق ودمك خفيف
دمتى بحب

كتبت بواسطة el-haboba

اختى برنسس..... هو موضوع متعوووووووووووووووب عليه فعلا ....شكرا ليكى ولامانتك انك بتذكرى كل شئ الخطوات المفصلة وحتى الطعم ......جوزيتى الخير والسعادة
واخر كلامى سلام

جبوبه الف شكر حبيبتى
مأنا لازم اقول الصراحه علشان كل حاجه تكون على بينه

والله ماقصرتي ويعطيك الف عافيه

ويارب اكون مثلكم بالنشاط وتالحيويه وكل شئ اسويه بالبيت بس الكسل

لمين اتركه

ما شاء الله تسلم ايدك

برنسس ايه الجمال ده
موضوع راااااااااااااااااااااااااااائع بكل معنى الكلمه
يعطيكي الف عافيه

انا لو عامله اللي عاملتيه كان بيغمى علي لو حد قال جبنه قدامي هههههه