لو هالزمان بكيفي لأسيره بدون قيود
وأعلم هالبشر حولي وشو معنى الحريه
بيديني أرفع صوتي وبديني أعلن جحود
وأتهاوش مع كل الخلق بروحه وإلا بجيه
بيديني أقدر أعاند وأعدي كل الحدود
ما تركته ضعف وعجز كله والله بيديه
بإختياري والشاهد الله والناس حولي شهود
ما قد أذيت أحد أو عليه تعمدت الخطيه
ولا قد جرحت أحد بالقول أو حتى بصدود
مهما جاني من وراه خير أو شر العطيه
لا زمت الصمت وسعة الصدر لا إندفاع ولا برود
وحبيت الكل من قلبي والبسمه ميزه وسجيه
أروح أقابل العالم لو الهم يشعل وقود
وأضحك بأعلى صوتي والله العالم فيّه
ماهي مواتتة قلب حتى لو حمرت الخدود !!
لكل مقام ظروفه .. والناس تكره النكديه
أعطي حب صادق ماعرف المنه يوم أجود
ما أحب أحكي عن نفسي ولا أمدح الشخصيه
لكن ياقصيدي ماجاني غير الهم والكبت زود
والحيره اللي بسببها هلت الدموع النديه
الحيره سكنت فيني وغدى بالي دوماً شرود
مادري من بيدري عن دمعة عيني المنسيه
خلق الله تنام الليل وأنا ما أذوق طعم الرقود
يلتقي الوليف بوليفه وتبدأ السهره الهنيه
وأنا وليفي الدمع سيل يهل بليا ركود
يواسيني يسليني ودوم يهونها عليـّه
كلما برت طعنة جرح ذاك الوقت المنكود
جاء من طعني عليها وبدال الطعنه ميه
درب الهم يا أم جراح دربه طويل وممدود
قدامك الحزن وااافر ويعين رب البريه
ليت الماضي يرجع وترجع المبخره والعود ؟!
والمواويل الصوت الرخيم والأنغام الشجيه
ليت الماضي يرجع ولو مره زماني يعود
أحضن الذكرى بقلبي ومعها الأطياف البهيه
لو هالزمان بكيفي لأسيره بدون قيود
وأعلم هالبشر حولي وشو معنى الحريه
لو هالزمان بكيفي ما ضاع الحلم المنشود
بين طيات العذاب سبع سنين هجريه !!!
كلمة لو .. لو .. لو .. تفتح عمل المقرود
وتفتح هالكلمه الف باب للهموم الأبديه
لكنها بقصيدي همسه مرت داخل وجود
وأسرجت خيل الفكر وأهدتها هذي الهديه ..
الروابط المفضلة