السلام عليكم ورحمة الله وبركاته
اليوم حبيباتى هقدم لكم طريقة عمل الكيكة الاسفنجية وان شاء الله تعجبكم
ندخل على المقادير
بسم الله
7 بيضات مفصولين
3 باكو فانيليا
كوب ونصف سكر ناعم
ملعقة صغيرة ممسوحه بيكينج بودر
رشة ملح
كوب ونصف دقيق
عصير نصف ليمونه
ربع كوب ماء
والطريقة
1-نخفق الصفار لحد ما ينفش ويعلى ثم نضيف عليه السكر ملعقة ملعقة مع الاستمرار فى الخفق
وإذا تقل الخليط مننا جدا ومش عارفين نضربه نضيف الماء شويه شويه بالتناوب مع السكر إلى ان ينتهى المقدار من الماء والسكر.
2- نكون مجهزين الدقيق المنخول 3 مرات مع البودر ورشة الملح ونضيفهم شوية شويه على خليط الصفار ونقلب بملعقة خشب أو بلاستيك من تحت لفوق حتى لا يخرج الهواء الذى تم إدخاله أثناء عملية الخفق
وإذا كان القوام تقيل جدا ومش عارفة تخفقى أكتر اتركى شوية دقيق نضيفه عند إضافة المارينج على خليط الصفار (بس ما يكون كتير خدى بالك يادوب كم ملعقة بس مش كتير)
3-نبدأ بخفق البياض فى وعاء أخر إلى ان تتكون رغوة عااااالية ويتضاعف حجم البياض نضيف عصير نصف الليمونه ونستمر فى الخفق وهنا سيكون قد تكون لدينا المارينج ويكون أبيض اللون
4- نضيف شوية مارينج على الخليط السابق (الصفاروالدقيق) شويه شويه مع التقليب بالملعقة الخشبية بخفففففففة تقريبا على 3 مرات بينهم شوية الدقيق اللى تبقوا مننا
على ان يكون أخر شئ يضاف هو المارينج
وفى صنية مدهونه زيت ومبطنة بورق الزبده نصب الخليط
ونضعها فى الفرن على درجة 180 ولمدة تتراوح ما بين 30 إلى 40 دقيقة حسب فرنك ولضمان عدم هبوطها اتركيها بالفرن الدافئ ولا تخرجيها لتصطدم بالهواء البارد فتهبط
وإليكم الصور بعد خروجها من الفرن
وخلااااااااااااااص الحمد لله
وهذه بعد تزيينها
وأتمنى تكون عجبتكم الكيكة
وفى انتظار الردود الجميلة وأهم منها دعوااااااااااااااااااتكم
استودعكن الله حبيباتى
والسلام عليكن ورحمة الله وبركاته
الروابط المفضلة