السلام عليكم
لو سمحتم يا اخواتى
كنت عاوزة عجينة تارت تكون هشة وطرية زى الكيك
لان العجينة الى اعرفها بتكون ناشفة زى البسكويت بالظبط
وانا نزلت وصفة ليها وان شاء الله هانزل وصفة تانية بعجينتى الى زى البسكويت

فياريت لو سمحتو تفيدونى بعجينة طرية شوية
جزيتم خيرا

وعليكم السلام ماعندى فكرة يفيدونك الاخوات إنشاء اللة...؟

باستا فلورا بالاسكندرانى !!








باستا فلورا اختراع سكندرى مستوحى و محرف من الاختراع الايطالى الاصل "pasta frolla و بالدراسه و البحث و التقصى رغم ان اختكم نص نص فى الايطالى لقيت ان الباستا فرولا هى نفسها عجينه الشورت بريد او التارت بالايطالى طيب ايه حكايه الباستا فلورا الاسكندرانى دى و اللى لا هى كيكه و لا هى تارت.....يعنى حاجه وسط بين الاتنين..الاسكندرانيه الافذاذ لما نقلوها من طنط ماريا الايطاليه غيروا مكان الحرف من باستا فرولا الى باستا فلورا... لا كمان تخنوا الكراست لدرجه تجعله ينتقل من مجرد انه تارت او كراست لتارت الى انه يكون شئ اشبه بين الكيك و كمان التارت...طيب خدوا المقادير دى و جربوا و افردوا العجينه رفيع..هتحصلوا على عجينه تارت....طيب افردوا تخين اوى هتطلع المخلوق السكندرى اللى اسمه باستا فلورا..بحثى وراها كان لسبب وجيه انى حبيتها و حبيتها اوى و اعتقد مش انا لوحدى دليل طلبات الناس ليا دايما انى انزل طريقتها....

المقادير
2 كوب دقيق
2 بيضه
نص كوب سمن او زبد
من نص الى تلات ارباع كوب سكر بودره
2 م.ص بيكنج باودر
فانيليا
نضرب السمن او الزبد مع السكر حتى يصير كريمى القوام..يضاف البيض بيضه بيضه بالتناوب مع الفانيليا او بشر الليمون او البرتقال او القرفه حسب نوع المربى اللى حابه تضيفيها
كونى مبدعه حيث لم ينزل فى الكتب السماويه اننا نعملها بمربى مشمش او حتى فراوله..ممكن توت ..ممكن تفاح ممكن برتقال و جزر و ممكن كمان بلح انتى او انت و دماغك العاليه و نكهه العجينه كمان مخمخ لها.
هنضيف الدقيق المخلوط و المنخول مع البيكنج باودر. و نخلط هنلاقى عجينه دبقه ممكن نشكلها بايدينا....نحط تلتين العجينه فى صينيه و نفرشها بايدينا و ننزل عليها المربى و نحط تلت العجينه الباقى فى قمع و نعمل الاشكال اللى حابينها ممكن تتخنى العجينه باضافة المزيد من الدقيق لها و تتلجيها و تبشريها على الوش..يعنى افكار كتير و انتى برضه و دماغك العاليه.
تخبز فى فرن متوسط الحراره 180 حتى تاخد لون دهبى متميز.

أنا جبتلك الوصفة من على لسان صاحبتها
وأنا جربتها مرتين إن شاء الله هي ده طلبك بالضبط أنا المقدار ده عمل معايا صينية مقاس 26 تقريبا
على العموم خللي سمكها في الصينية زي العقلة عشان هي بتزيد بعد السوا

شكرا حبيبتى فراشة الربيع ان شاء الله اجربها
هى شبة المقادير الى انا اعرفها بس يمكن دى لما اعملهاتكونطرية شوية
لان انا التارت بعملة بس بيكون زى البسكوت
الف شكر حبيبتى تعبتك معايا

حبيبتى الموضوع بيتوقف على شكل العجينة
العجينة اللي بتحصلي عليها هنا عجينة تشبه عجينة بتيفور الكيس يعني بتنفرد بمعلقة أو تدهني إيديكي سمن وتفرديها في الصينية مش عجينة متماسكة تنفرد بالنشابة
حتى الجزء اللي بشيله للوجه شكلته بكيس الكريما لأنه بيكون طري مش جامد زي العجائن المعروفة للتارت

لو إلتزمتى بالسمك اللي قلتلك عليه ومقللتيش عنه هتطلع زي ماانتى عايزة بالضبط وده عن تجربة خصوصا لما بتبات
أصل أنا كمنت زيك كده بدور على عجينة بالمواصفات ده والحمد لله العجينة ده طلعت بالضبط زي ماأنا عايزة

عملتها مرتين بالمربى
وكنت مقررة إني لما أعملها تاني أعملها ببالكاكاو يعني أقلل جزء من الدقيق وابدلة كاكاو
وأحشيها بدل المربى كراميل ومكسرا وشوكولا قطع
حسيت إنها هتبقى روعة بس للأسف لسة مجربتهاش تاني

خلاص ياقمر ان شاء الله هاجربها
واى وصفة منك اكيد هاتطلع جميلة