كتبت بواسطة
روني الحلوة
السلام عليكم
بصراحة انهنيكم على المل اللي فتحتوه على خاطر الاكلات الليبية الحلوة والحارة مش معروفة هلبة وهيا زي ما قلتوا بنه وصنه
واني مشاركة معاكم ونبي نعطيكم طريقة سويسرول الدجاج وفي نوعين منه واحد بلحم الدجاج المفروم والتاني بشرائح الدجاج
النوع الاول تاخدي صدور دجاج ومعاهم بصل وجبنة مثلثات مش هلبة غر للبنه ومعاهم ثومة تحطيحهم وف الفود بروسسر وافرميهم كويس وبعدين تبليهم بالدباير زي الحرارات وجوزة الطيب والزنجبيل والفلفل الاسود معاهم بيض وخبزة مرحية تخلطيهم كويس ويكونوا زي العجينة وبعدين تاخدي سلفر ولا نايلوا الاكل وتطرحيه على الطاولة ولا الرخامة وتفردى عليه الخليط السابق ويكون سمكة حوالي نص صبع وبعدين تطرحي عليه جبنة شرائح وفي النص بالزبط ديري صف من الفستق وبعدين لفي زي السوسرول ولفي عليه السلفر ولا النايلو وصكري عليه كويس وبعدين بوخيه في الكسكاس ولا طيبيه في الميه انى نفضله مبوخ نظمن المية ما تخلشاش وبعد مايطيب طلعيه من السلفر وحطيه في الدحي والخبزة المرحيه واقليه في الزيت وبعدين قصيه جرار زي السويسرول صدقوني بنته حلوة
اما النوع التاني اسهل وحتى هوا يهبل تاخدي شريحة صدر الدجاج وتخبطيها بمطرقة اللحم بدون ما تتهرا وبعدين حطيها في تتبيلة عبارة عن ثومة وبصل وزيت زيتزن وليم عصري وفلفل اخضر وهريسة عربية وحرارات وفلفل اكحل وزنجبيل وكان تحبي الحبهان وزعتر وكليل واللي يحب الخل يزيده وكنهذا حتى الليم ساد حطيهم في الخلاط المالقي يعنى البلندر وافرميهم كويس وبعدين صبيهم علي شرائح الدجاج وخليهم يتنقعوا مزبوط حتى ساعتين وبعدين تكوني موتية ورق سلفر قاصيتيه مربعات تسدك للف الدجاج فيهم وتحطى على كل ورقة سلفر شريحة دجاج وتحطي فوقها ورقة سباناخ ولا سلك ممكن تبوخية ولا حتى اخضر لانه حيذل في الكوشه اني عن نفسي مجرباته مبوخ لكن جربوا الزوز وعلى ورقة السلك حطي جبنة اللي تبيها موزريلا ولا شرائح ولا اي نوع تحبوه المهم من النوع اللي يذوب وعليها حطى زيتون ولفي الدجاج عليهم وبعدين لفس السلفر وصكريه كويس واحسن طريقة انك تلفيه وتصكريه زى الحلوى وبعدين بوخيه وقضيه من السلفر بعد ما يبرد وحطيه في الدحى بعدين الخبزه المرحية واقليه وقدميه بدون ما تقصيه يعنى يقدم صويبعات صنه وبنه ومنظر
وكان تبوا اي شي قولولي عندى حار وحلو وعاد ماتنسونيش من صالح الدعاء ليا ولزوجي ولبناياتي
الروابط المفضلة