بسم الله الرحمن الرحيم
السلام عليكم ورحمة الله وبركاته
أنا ليلى بنت إيمان.. من أحب هواياتي الطبخ، ولو أنها ماما فوق راسي دايماً بالمطبخ، بس عادة بحب أساعدها بالطبخ .. وبحلم إني أصير شيف بيوم من الأيام ويصير عندي مطعم وبرنامج تلفزيوني لتعليم الطبخ وأكون أول واحدة محجبة تقدم برنامج طبخ
لأول مرة، ماما بتسمح لي أعمل شيء في المطبخ من غير ما هي تكون حتى جنبي، كنت أتمنى أنها تخليني ولو مرة أعمل شيء حلو، سمحت لي أخيراً، هي قعدت في الصالة جنب المطبخ وأنا عم بعمل براونيز. بعض الأغراض ما كانت عنا بالبراد، فقالتلي ماما بشو أبدلها. ولما استبدلت بعض هالأشياء بشيء آخر، صار مثل كيك طيب كثير كثير، مثل كيك السوق الاسفنجي!! يعني بطل براوني، بس بهيك تعلمنا كيك جديد!
((على فكرة، ما تتعجبوا أني عم بحكي فلسطيني مع أني لبنانية، بس متأثرة بلهجة ماما أكثر))
زائد إني عم بحكي وماما عم تكتب، والله أعلم شو عم تحكي عن لساني غير اللي عم بحكيه
معلش، بعدها ماما ما اشترت الكاميرا الأحسن، بس حتى هالوقت يصير، رح تتعبوا عيونكم بهالصور بالكاميرا التعبانة
خلينا ندخل في الموضوع
أولاً سخني الفرن على حرارة 400
المقادير:
. 2 كوب طحين
. 2 كوب سكر
. نص كوب زبدة أو مارجرين (استعملنا بداله نص كوب زيت عادي)
. نص كوب شورتننج (استعملنا بداله نص كوب زيت عادي أيضاً، يعني المجموع كوب كامل)
. 1 كوب قهوة قوية الطعم أو ماء (استعملنا ماء بس)
. ربع كوب بودرة كاكاو
. نص كوب بتر ميلك (استعملنا بداله نص كوب حليب مع 2 م ص حامض)
. 2 بيض
. 1 م ص بيكنج صودا
. 1 ملعقة صغيرة فانيلا
الطريقة:
. أنا خلطت الأشياء الجافة مع بعضها، وبعدين أضفت عليها الأشياء السائلة وخلطت حتى تعبت إيدي.
. رشيت صينية مستطيلة بزيت وصبيت الخليط
. وبعدين حطيتها بالفرن 20 دقيقة، وحسب الفرن ممكن أكثر، بعد ما رن جرس الفرن، حطيت قشة أسنان بنص الكيك ولما لقيتها ناشفة عرفت أنه استوى (علمتني إياها ماما
)
وبعدين
وهون قطعته وهاي الصورة التعبانة
كنا بدنا نعمل فروستنج بس بطلنا لأنه ماما عملتها مرة وما حبتها لأنه كمية السكر كثيرة فنشفت لما حطتها على وجه البراونيز، وعشان هيك، قلنا خليه كيك وبس..
شفتوا يا خالتو وخالتو وخالتو.. حتى الأطفال بيقدروا يشتغلوا في المطبخ، بس ثقوا فينا، وقعدوا تفرجوا على جنب
الروابط المفضلة