أنا مخنوقة جدا ومش لاقيه حد أشكيله همى
قولت أتكلم معاكم يمكن أرتاح
جوزى أتفاجئت أنه معرف أهله حاجات ومشاكل كنت بفضفض معاه فيها
وخاصة أنه كلام ومشاكل تخص أخويا الوحيد وعلى خلاف مع زوجته وأخويا كمان كان مفضفض لجوزى على أعتبار أن زى أخوه وأنا أتفقت مع جوزى أنه ميجبش سيرة الموضوع ده لأهلك عشان أخويا مش حابب إن سيرته تبقى على كل لسان شويه
وحتى رمضان كان نفسى أعزم أهلى على الفطار وطبعا أخويا قاعد عند أهلى منغير مراته وولادة فمينفعش أعزم بابا وماما وهو يفطر فى البيت لواحده
ولو جه معاهم منغير مراته وولاده أهل جوزى هيعرفوا لأنى فى بيت عيله وحماتى ساكنه الدور اللى تحتى
فروحت أخده الأكل وعزمتهم فى بيت أبويا
عشان محرجش أخويا وأعرف أهل جوزى حاجه
وبعد كل ده أتفاجئ النهارده وأنا عند حمايا وحماتى نزلتلهم أطمن على حمايا عشان تعبان شويه
وجوزى فى الشغل يعنى بنزلهم عشان صلة رحم جوزى وعشان خاطر ربنا
ألاقيه بيقولى هو أخوكى رجع بيته ولا لسه وانا تنحت وبقوله ليه هو كان سابه وعامله عبيطة وواثقه انهم ميعرفوش حاجه ألاقيه بيقولى هو مش سايب بيته من قبل رمضان أنا مبقتش عارفه أرد وللأسف أتضطريت أنى أقوله لااااااا خلااااااااااص الموضوع ده اتحل من زمان للأسف كدبت
ولو كان حد غيرهم كنت عرفت أرد وأقولهم ده موضوع خاص بأخويا ومش من حق أى حد يتكلم فيهبس مقدرتش طبعا وبلعت لسانى عشان ميتقمسوش ويزعلوا وأخدت بعضى وقولتلهم بعد أذنكوا هطلع عشان ورايا تنظيف ومكواة وطلعت هنا محروق دمى ومنهارة
لأن أنا كنت بئتمن جوزى على أسرار كتييييير تخص أهلى أو تخصنى يعنى لما بكون مخنوقة بيبان عليا وبفضفض معاه كأنى بتكلم مع نفسى
وهو كمان كذا مرة يتخنق من أخواته أو من أهله يفضفض معايا ويقولى بس الكلام ده بينى وبينك
وأقوله خلااااااص عيب تقول كده سرك فى ببببيييير وفعلا عمرى ما بقول لحد السر ده حتى لو كان ممكن الكلام اللى قالهولى ممكن يكون تبرئ ليا من موقف مع أمه وأمه زعلانه منى بس بحاول أصالحها منغير ما أستسهل وأفتش سره
وهو لما بكلمه ومتعصبه ومنهاره وبقوله انت ازاى تقول لأهلك الموضوع ده بيقولى عادى يعنى الكلام جاب بعضه وبعدين ما هو كل البيوت فيها مشاكل هو أخوكى أول ولا أخر واحد يتخانق مع مراته
ولما بقوله السر مش بصغره ولا كبره
السر بمعناه انه سر يبقى ميخرجش ما بين اتنين قالى خلاص حصل خير مش هعمل كده تانى
وأنا حاسه ان دى مش اول مرة
لأن فى كلام مكنتش بقوله لحماتى واتفاجئ انها عارفاه؟؟؟
وأسأله يقولى لأ مقولتش
وأشك فى نفسى ومكدبوش وأقول يمكن عرفت منى وأنا مش واخده بالى فى وسط الكلام
وأنا حامل ومحروق دمى وحاسه أنى جالى مغص من كتر حرقة الدم
ومخنوقه جدا من جوزى ومش هعرف أعيش معاه وهو مبيكتمش السر كده أنا اللى فى قلبى على لسانى وبتعامل معاه على الأساس ده وأنه أقرب حد ليا ولو عريانه هو يسترنى
لكن دلوقتى من بعد ما عرفت انه بيخر كل حاجه كده لأهله حاسه أنى عريانه ومش مستورة
أعمل إيه قولولى ومحدش يقولى متقوليلوش على حاجه تانى
يعنى هعيش مع جوزى وأنا مش مأتمناه على سرى ده يبقى العيشه بينا حرام
أومال لو مخنوقه أفضفض مع مين ده المفروض أنه أقرب حد ليا؟؟؟؟؟؟؟؟؟؟
الروابط المفضلة