عندي مشكلة اعتقد انها فعلاً تحتاج الى حل من الآن قبل ان تكبر (مع انها كبيرة من الأصل) .. قبل كل شي اوضح العنوان للي ما فهموه .. سلفتي بتكون زوجة أخو زوجي .. هيك احنا بنسميها .. انا من جديد صرت اعرف سلفتي من حماتي من كنتي ...
المهم ندخل بالموضوع.. اخو زوجي خطوبته الخميس القادم ان شاء الله (مع انه بالامس بس عرفنا) و انا مشكلتي بتتلخص في اني مو قادرة اتفرج بوجهه هو و لا العروس اللي هي سلفة المستقبل.. و بدي حل قبل ما فعلا اكرههم (اذا ما كنت فعلا بكرههم حالياً) و قبل ما يبين اني بكرههم و تصير حزازات و احزاب .. (و المشكلة انها كمان صايرة بالعيلة من هلا)...
طبعا انا ما بكرههم لله بدون سبب.. مو لهالدرجة يعني .. و السبب خايفة عليكم تنصدموا لما تعرفوه .. بس لازم تعرفوه عشان ما تحكوا هاي دندوش مجنونة ... (ياااااا كتر كلامك يا دندوش فوتي بالموضوع )..
القصة انه انا و زوجي سكنا من خمس اشهر تقريبا بشقة جديدة قريبة شوي من اهله .. يعني بنفس المنطقة، و باول سكنا احتجنا لمساعدة اخوته الشباب بامور مثل تركيب الثريات و البويلرات و الامور هاي .. و طبعا هالحكي ما اخد اكتر من اسبوع ... و بعدها ما حد منهم دخل البيت (او عالاقل هيك كنت بفكر) ..
لحد ما قبل فترة قصيرة (اقل من شهر) زارتني زوجة مالك العمارة و عملت معي شي بيشبه التحقيق .. سألتني مين الناس اللي بييجوا عالبيت في فترة غيابي انا و زوجي... اول شي فكرت انه سؤالها ما اله معنى و انه قصدها يا حرام في ناس بييجوا يزورونا و ما بيلاقونا . و بعدين فكرت انه زوجي بييجي و معاه ناس .... فقلت لها على علمي ما حدا بييجي بس ليش؟؟ فقالت لي انه تقريبا كل يومين تلاتة في شب و بنت بييجوا عالبيت عنا .. بمجرد ما نطلع من البيت انا و زوجي (يعني سبعة و نص الصبح تقريباً) ... و بيقعدو شي ساعتين بالبيت و بينزلوا بعدين !!!
بالله لو كنتو مكاني شو بيصير فيكم ؟ :confused
اول ردة فعل صرت بدي ابكي .. و سالتها عن مواصفاتهم و كانت واضحة انها لاخو زوجي و صديقته اللي بتزورهم دايما بالبيت و حماتي حتموت عليها و السيارة اللي بييجوا فيها بيصفوها على باب العمارة هي سيارته .. بالاول ما حكيت لها اني عرفتهم .. و قلت لها انا ما بعرف اذا في حدا بيجي .. طبعا ما بدكم تشوفو نظرات الشك و الاتهام ... حسستني انه احنا و العياذ بالله فاتحين مكان لهيك اشياء مخصوص ... بس الصدمة اللي على وجهي صدقت بعدها انه انا عالاقل (طبعا هي بقيت شاكة و الحق معها ) ما عندي فكرة عن الموضوع .. و طبعا سمعتني كلام بيسم البدن (هاي عمارة سمعتها محترمة و طول عمرنا الناس ما حكوا علينا شي).... يعين و الله العظيم ما في حدا بالدنيا بيستاهل اسمع بسببه هالكلمتين هدول..
المهم وعدتها انه رح نغير اقفال الباب و طمنتها هالشي اكيد ما حيصير .. و حكيت لزوجي اللي انصدم طبعا و عرف انه اخوه نسخ المفتاح بفترة ما كان يساعدنا بالبيت اول ما انتقلنا .... لا و اخوه بكل وقاحة بيحكي له احنا ما بنقعد غير عشر دقايق (على بالي عشر دقايق احنا عالطابق الرابع بنطلع الدرج و بننزله بنص ساعة )
طبعا هو ما حكى لاهله ما بعرف ليش و انا ما حبيت احكي كمان قلت شو دخلني بينهم .. بس و الله يومها قرفت من بيتي و غرفتي و سريري و كل شي و انا طبعا على علم باخلاقه المنحطة و هي كمان مطلقة مرتين (مع كل احترامي لاي مطلقات بس اكيد ما بيعملوا هيك) ... و العلاقة اللي بينهم شي مقزز و انا ما استحملت يكون هالشي صاير ببيتي ... لا و بطلع و برجع ما في شي بالبيت متغير .. (او من التسطيل بعد غياب 10 ساعات عن البيت اكيد ما حانتبه اذا في شي بسيط متغير)..
المهم .. وجعت لكم روسكم ؟؟؟ المهم انه من يومها انا مو طايقة اشوفهم مع العلم انها من فترة كانت معزومة على عرس لعيلة (معتبرينها من العيلة من زمان اصلا) و اجت على الطاولة اللي انا عليها سلمت عالكل الا انا ... اصلا اي وحدة محلها المفروض تكون مخزية من عملتها و ما الها عين تحكي معي .. ولا اللي زي هيك اصلا ما عندهم خجل ...
هلا انا اول شي بدي احكي لزوجي اني ما رح اروح على حفلة الخطبة .. بكون غلطانه او لا؟؟ و تاني شي هل مفروض مني اني اخبر اهله بالي صار لتبرير اني ما رحت و لا احكي اني تعبانة من الحمل و ما بقدر على الدوشة و الزحمة ؟؟ مع العلم حماتي و حماي الله يصلحهم ما رح ينكروا هالشي كتير بالعكس .....
و اخر شي كيف ممكن اتقبلهم طالما انه ربنا امر و رح تصير سلفتي و من العيلة و كيف لطريقة اللي لازم اتعامل معها فيها .. ؟
ااااااااسفة كتير طولت عليكم بس موضوع مهم و بيهمني كتتتتتتييييييير و ما في حد اسأله غيركم ...
:
الروابط المفضلة