أخواتى الحبيبات
وحشتونى جداً ، ولقد تغيبت عن المنتدى فترة طويله النت كان منقطع عندى وكذلك انشغالى ببنوتى جود وتطعيماتها لانها تمت الشهرين والحمد لله ، ولكن ما يشغلنى ويؤرق بالى هو علاقتى بزوجى فأنتم تعرفون أننا والحمد لله متزوجين منذ سنة ونصف عن قصه حب ، والحمد لله سعدء بحياتنا ولكن وجى تغير بعد ولادتى لجود احس انه زهدنى ، لم يقترب منى سوى مرة واحده بعد ان اتممت الأربعين علماً بأننى ولدت قيصرية يعنى لم يتغير شئ فى طبعاً فاهمينى وحتى ان الحمل والولادة افقدونى كثييييير من وزنى يعنى مزدتش بل بالعكس الحمد لله صرت اجمل من الأول انا تحدثت معه بصراحه فى هذا الموضوع قاللى انه نفسيتة تعبانه وانها فتره وحتعدى لانه متضايق فى شغله وعنده مشاكل بالعمل ، ورجع قاللى انا خايف يحصل حمل لما تركبى لوب حنرجع زى الأول ، انا بحاول اقرب منه دايماً وأهتم بيه زى الأول بس حاسه انه زهدنى وخايفه يكون حبه قل بعد ما خلفنا وكنت فاكره ان البيبى دى حتقربنا أوى مش عارفه ماله ، لما بندخل ننام بيقربلى وياخدنى فى حضنه بس اكتر من كده مبيحصلش ، أنا نفسيتى تعبانة وبحبه قوى وبحترمه ومليش غيره ونفسى عمره ميتغير منى تنصحونى بأيه وهل حد فيكم مر بكده قبل كده وهو جراله أيه تفتكروا؟؟؟

حبيبتي ممكن أنتي ماخذه الموضوع بحساسيه ؟؟؟ هو يمكن يشوفج تعبانه مع البيبي... ومو حاب انه يثقل عليج ويتعبج... واتفهميه حبيبتي... والعلاقه مو دليل الحب.. ومثل ما قلتي مو مقصر ياخذج جنبه الله لا يحرمكم من بعض حبيبتي وطولي بااااالج..

حبيبتى اكيد فترة وهتعدى بس حاولى تقربى اكتر واكتر من الاول يمكن بتكون مهتمه ببنتك اكتر منه او فى مشكله بينك وبين حد من اهله وممكن يكون فعلا التزامتكوا زادت وهو مش قادر عمتا استنى ردك عليه وباذن الله انا معاكى لغايه لما نحل المشكله باذن الله تعالى المهم متتكلميش فى الموضوع تانى معاه واهتمى بنفسك اكتر يرجع من الشغل خليكى مبتسمه وخلى بالك بكرة ان شاء الله عيد الحب حاولى تعملى مفاجاءة بكرة ويرجع يلاقى هديه تحفه انا هكمل معاكى بعد ردك عليه ربنا معاكى ويصلح الاحوال يارب

أختى انا متزوجه من 9 شهور و ده اول حمل لى فأنا لم امر بهذه التجربه من قبل
بس اللى انا حسيته من كلامك انه ممكن تكون فعلا فتره مؤقته و تعدى يمكن يكون فيه حاجه مضايقاه فى الشغل و مأثره عليه ... أو يكون احساسه بالمسئوليه مخليه شويه مرتبك
ان شاء الله يكون المانع خير بس لا تلحى عليه كتير و اتركيه فتره على راحته حتى لا يشعر انه مخنوق أو انه ممكن يقرب لك مخصوص علشان يرضيكى و ده يأثر فيه اكتر
اصبرى اختى و تقربى الى الله و ادعيه ان المياه ترجع الى مجاريها تانى
و ابقى طمنينا عليكى

حبيبتي عادى ولا تحطي فى بالك اولا لانه خايف يصير حمل وبعد بسبب الشغل فلا تخافي وبعدين صارت عندكم بنت يعني الوضع تغير فى مصاريف زايدة وغيرة وغيرة انا وزوجي تمر علينا أيام كثير تكون نفسيتنا تعبانة كلة بسبب الضغط انة فى بيبي يبكي ونحاول نعمل مباعدة لان حرام الاطفال يكونوا وراء بعض والام تتعب.
الله يسير زوجك وفترة وتعدي ولازم تتحملى انت الحين أم

حبيبتى شذى انا حاسه من كلامك انه عندك بوادر اكتئاب ما بعد الولاده خليها ما تسيطرش عليكى لانها فتره مش لازم تمر على كل والده وكل ما تلاقى افكارك بتاخدك لبعيد وتلاقى نفسك متشائمه على طول لانك بتكونى حساسه زياده قولى لا مش ح اخليها تسيطر عليا
وانا زيك مريت فى اول حمل بفتره كنت بفتكر انه اهتمامه قل بيا اقولك ليه لان الحامل بتلاقى الكل بيدلعها ومنتظرين البيبى ولما يشرف حضرته بتلاقى الكل مهتم بيه ( بالبيبى ) فهى بتحس ان مكانتها تراجعت عندهم لكن ده مش حقيقى

وزوجك كلامه مقنع واذا عنده ضغوطات فى الشغل حيبقى ده اخر شئ يفكر فيه وكمان بسبب خوفه من حملك دلوقتى
انتى احتويه اليومين دول وحاولى توفقى بين اهتمامك ببنتك وبينه علشان هو اللى ميغيرش
بالتوفيق حبيبتى شذى

كل ده يعتبر عادي و اعتقد ان معظم الرجاله بيمروا بالفتره دي لأكتر من سبب
اولا انتي بتقولي انك مش مانعه الحمل و طبعا ده سبب اساسي انه يخاف يقيم علاقه معاكي ينتج عنها حمل و بنتكم لسه مولوده
و طبعا زي ما انتي عارفه ان الراجل علشان يقدر يقيم علاقه مع زوجته لازم يبقي ذهنه صافي و الموضوع ده اكيد مش هايخليه صافي و هو معاكي

انتي اسرعي في انك تستعملي اي وسيله لمنع الحمل و لو علي الاقل تقترحي عليه طريقة القذف الخارجي لحد ما تستقري علي وسيله اخري دائمه زي اللولب

و السبب التاني اللي ممكن يكون مأثر علي زوجك هو ان معظم الرجاله بعد ما زوجاتهم يصبحوا امهات بيبقي صعب عليهم انهم يرجعوا لعلاقتهم قبل الولاده بسهوله لأنه بيكون لسه مش متعود علي الوضع الجديد و انه بقي اب و مسئول عن طفل و مستقبل و غير كده انتي اصبحتي ام و اكيد اختلفتي عن قبل الولاده مش بس من ناحية الوزن و مكان الولاده
لكن علي الاقل هو حاسس انك اصبحتي غير الاول من الناحية السيكولوجيه علي الاقل

انا رأيي انك تبطلي تسأليه عن الموضوع ده و تتكلمي فيه
و اعملي له مفاجأه انك تروحي لمامتك في يوم و تسيبي جود عندها و تروحي تغيري لون شعرك و قصته و تشتري ميكاب بالوان جريئه و جديده عليكي و طبعا ملابس للبيت تكون مختلفه عن استايل ملابسك

و ارجعي البيت و اهتمي بمظهرك كل يوم امامه
و خليه هو يكتشف كل التغيير ده من نفسه
يعني بلاش تفرجيه علي الحاجات اللي جبتيها و لا تسأليه عن رأيه في شعرك و لا لبسك
خليه هو اللي يفضل يبص لك و يفكر مع نفسه و يقول بينه و بين نفسه انك لسه أنثي جذابه و مغريه و ان الامومه ما اثرتش عليكي
و ان شاء الله ها تشوفي الفرق بنفسك لأن التغيير مهم جدا لكل الرجاله

اولا حمد الله على السلامة يا حبيتي ياتي ام وفعلا انا دورت عليكي كتير جدا في المنتدى عشان اعرف اخبارك، وربنل يخليلك جود يااااارب وتتربى في حنانك وعز ابوها اللهم امين.
ثانيا انا مع الاخوات في حاجة مهمة جدا، الراجل اصله مش بيحس بأطفاله مباشرة اول ما بيتولدوا اكتر حاجة بياخدوا بالهم منها هي زيادة الاعباء عليهم مع اهتمام الام بيهم، وهو عشان ربنا يخليهولك يارب بيحبك فممكن يكون مش عاوز يرهقك اكتر ما انت مرهقة، هي بتبقى اول فترة في حياة الطفل بتبقى صعبة قوي على الام والاب فانت استعيني بالله كدة وادعي كتير وخففي عنه ان الرزق بايد الله وقربيه من بنتك خليه ياخد باله منها ومن حركاتها ومن تطوراتها العمرية اشركيه معاكم عشان يحس بيها وقوليله قد ايه هي بتحبه قوي عشان هو ابوها وان هي عارفاه من وهي في بطنك لانها كانت بتسمع صوته، ودي حقيقة علمية، وانها بكرة ان شاء الله هتبقى صاحبتك وحبيبتك ومش هتسأل فيا وهتقول بابا بابا وخصوصا انه حنين زي ما انت بتقولي، اعتقد هو كمان حاسس انه دوره مش مؤثر في حياتها، حسسيه انت بقى بعكس كدة بس من غير تتقيل لان الرجالة مالهمش خلق، انا جوزي كان كدة بس لانه ماشاء الله حنين برضه وانا حاولت اقربه منها ماشاء الله حبيبة دلوقتي عندها سنتين بتموت فيه تجري عليه اول ما ييجي واما يخلع الجزمة تاخدها تشيلها منه في مكانها وهو مش بيقدر يستغنى عنها، بالليل تقوله يلله بابا ننة وتشده من ايده ويدخلوا يناموا ويسيبوني وتعد ماشاء الله عليها تاخده في حضنها بايدها الصغيرة وتقوله ننة بابا ماشاء الله لاقوة الا بالله عليها، انا بقى اخر ما غلبت قلتله انا ان شاء الله هجيب ننة تانية عشان الاقي حد يحبني، وينام معايا، وشلت اللوب ومن فضل الله حامل ادعيلي كتير ربنا يتمم لي على خير، وعلى فكرة انا جوزي برضو ولحد وقت قريب جدا ما كانش عاوز اطفال تاني دلوقتي، بس بعد كدة من نفسه غير رأييه وكله بامر الله.

حبيبتي أم جود فاكراني
عليكي بالصبر أولا ولازم تأخدي كلام زوجك على أنه صح لأنه ممكن يكون عنده مشاكل بالعمل
وما عليك الآن إلا أن تقفي بجانبه وألا تحدثيه في هذا الأمر ثانية
وفي هذه الفترة قدمي له أجمل ما لديك وإن شاء الله سوف ينتبه لذلك وترجع الأمور لأحسن مما كانت عليه
هذا رأيي وكذلك رأي اللأخوات أعجبني
وكذلك عليكي بأخذ الحيطة لعدم حدوث حمل إذا كان هذا رأيكما
والله الموفق وبوسيلي جود البوسة دي أخدتها ولا لسه أنا منتظرة بوسة منها وخليها تدعيلنا بالذرية