قصتي طويلة شوية بس معليش الله يوفقكم أقروها ودلوني على حل :
أنا متزوجة .. بعد قصة حب عنيفة دامنت لسنتين
اليوم كملت شهر .. من زواجي
قعدت من هذا الشهر بس أسبوعين ونص مع زوجي
وباقي الشهر ( أسبوع ونص ) في بيت أهلي ..
خلال الأسبوعين والنص اللي قضيتهم مع زوجي حصل الآتي :
الأسبوع الأول : كان روعة ويجنن وعمري بحياتي ماراح أنساه وقضيناه في مدينة " جدة " ( مدينتي )
الأسبوع الثاني والنص : تركت أهلي وكنت حموت من البكا ورحت معاه لمدينته ( الرياض )
وكان أسبوع ونص تعيس جداً ماعادا بعض لحظات الصفاء البسيطة
وهذا بسبب إن زوجي إنسان " عملي ، عملي ، عملي "
هو بيحاول إنه يحسّن من وضعه المادي ومافي فايدة بس الله يرزقه يارب
لكن كل تفكيره في الشغل وكيف يطوّر نفسه ومن ذاته وبسبب شغله يخرج كثير
وبعدين يسهر ساعتين برا بسبب " الشيشة " الله يلعنها ..
يعني المهم كان برنامجنا ننام الصباح أو الظهر يقوم المغرب ..
يخرج العشا ويرجع البيت الساعة 2ونص أو 3
وطبعاً يرجع يلاقيني متضايقة وبوزي شبرين _ شياكة وحلوة بس مكشرة !!_
غصب عني والله لأني أبغاه معايا بس هو طول الوقت برا
ولا تقولولي الرجال ما يحب اللي تقعدله مكشرة
أنا أكشر لأنه تأخر لو يرجع بدري والله ما أزعل !
أنا كثير مرات أقوله إنه لازم يصبر وإنه إن شالله ربنا بيفرجها وبييسرها
بس هو مرة زعلان من وضعه ..
ولما يزعل يطلّع زعله وقهره فيا بكلام بايخ مثل :
أنا حاس بتأنيب الضمير إني أخذتك !!
" وبعدين يقول لا لا أنا أمزح ويقعد يضحك من قلب عليا لما أبكي !ّ
وهالمرة مو أول مرة يقولها قالها في الملكة
أنا هالمرة يعني ما قدرت أتحملها كيف يقولي كذا في شهر العسل
قلتله شوف أحسن حل إننا نترك بعض لفترة وأروح عند أهلي ووافق !!!
تخيلوا يا جماعة إنه وافق .. ؟
أنا حسبته بيتمسك فيني ويقول لا يا حبيبتي ..
لكنه ما صدق ووافق !!
وأنا طبعاً ما قدرت أتراجع بكلمتي لأني كنت زعلانة من كلامه وكمان لأنه وافق على رجوعي لمدينتي
المهم كلمت أخويا يحجزلنا وبالفعل وصلني لحد بيتنا في جدة وسافر مرة ثانية الرياض وكان طول الطريق
يعتذر مني ويطلب مني السماح واتفقنا على إننا ما نقول إننا متخاصمين أو مختلفين
وإن سبب رجوعي هو مرض والدي لأنه وافق فعلاً مرض والدي
والحين لنا أسبوع ونص ..
يكلمني دايم ..
بس مو بنفس الحرارة والحب اللي كان أول ..
حاولت أستفهم منه يمكن السبب شي في مظهري أو سلوكي أزعجه
وهو يحلف ويتحلف إنه ما في شي مني أبداً بس هو اللي متضايق من شغله ووضعه المادي
مرة قلتله خلاص تعال يوم الجمعة على اليوم يعني
ما رضي لأنه قالي إنتي كل شوية تغيرين رأيك تعال لا لا تجي !
أصلاً أنا كمان عندي شغل وبرجع متأخر وما أبغاكي تجين هالحين وتقعدين لوحدك فترة طويلة خليها لما تبدأ الدراسة عشان ما تقعدين لحالك فترة طويلة بالبيت
بعدها كلمتني أمه ... وقلتلها إنه أصلاً مو مشتاقلي .. وإنه لو يبيني كان قالي بعدها اتصل يقولي
" إذا تبين تقعدين عند أهلك ... اقعدي ، وإذا تبين تجين أبجي آخذك اللي يريحك "
يعني حتى مو مشتاقلي .. عادي عنده جيت أو رحت ؟
انا أعرف إن الرجال يشتاق لزوجته ويقول إنه مشتاق بس تصرفاته ما تدل على كذا !!
المشتاق ما يترك زوجته في شهر العسل ..
صح يا جماعة .. ؟
المشتاق ما يقدر يستغني عن زوجته لفترة طويلة مو صح .. ؟
الحين أنا كملت شهر .. اليوم الجمعة كملته وأنا بعيدة عنه ..
وكنت مخططة تخطيط تاااااااااااااني لهاليوم بس حرمني من إني أكون معاه فيه الله يسامحه
مرة زعلانة منه وقاعدة بس أبكي .. ولما يكلمني ما أعرف أرد عليه
يعني يقلب عليا الطاولة فاهمين قصدي ..؟
يعني يطلعني أنا الغلطانة
قلتله حرمتني أكون معاك في هاليوم واحنا مكملين شهر
يقول الأيام جاية إن شالله
قلت بس هالأيام اللي راحت ما تتعوّض
يقول انتي ليش كذا ما تتفائلين .. ؟!!!!!!
قلت أي تفاؤل .. ؟ الأيام اللي راحت هادي أيام شهر عسل وصح بتجي أيام ثانية
بس مو زي الحين واحنا مكملين شهر
يقول لا لا .. الأيام جاية !!
ايش أعمل معاه ياناس .. ؟
هو فيه رجال زي كذا ... ؟؟
ولا يمكن هو ما يبغاني .. ؟؟
علماً بإنه يأكدلي حبه .. ويأكدلي إنشغاله ..
الله يوفقكم ساعدوني .. لأني والله أكتبلكم والدموع في عيوني
زعلانة زعلااااااااااااانة ومقهورة وحاسة إن كل ذاك الحب كان وهم من جد
تكفون ساعدوني
وجزاكم الله كل خير
الروابط المفضلة