ممكن اسأل سؤال للعراقيات ؟؟
انا عراقية مولودة بالامارات و ما اعرف عن عادات العراقيين في الزواج كثيرا .. فممكن وحدة عراقية تساعدني
اريد اعرف شنو هي تفاصيل المهر في الزواج ؟؟
يعني هل الشاب مجبور ان يدفع المهر كاش .. لو يطلع وي البنية للسوق و يشتريلها كل شي ؟؟
و اذا كان الولد عايش لوحده في الغربة و اهله في العراق اشلون يتصرف في هذا الموظوع ؟
و كيف ممكن البنية تطلع وي الولد و هي مو قاطعة مهر .. و اشلون تقطع مهر و هي ما مستلمة المهر بايدها ؟

ممكن تساعدوني
و شكرا

عزيزتى شوفى هذا التفاصيل تعود حسب اتفاق اهل البنت مع الشاب

مثلا يتفقون ان الشاب يعطى فلوس وهم يتصرفون

او يخرجون الى السوق الشاب والبنت والام ووحدة من معارف الشاب اذا كان عندة واذا ما عندة احد هو وحدة يكفى

وهذا ما حصل معى ذهبنا السوق انا وامى وزوجى اللى هو العريس وجهزنا

لكن انا كان مهرى القران الكريم الحاضر والغايب حجة مكة

وهذا كان طلبى والحمد للة

اتمنا ان اكون افدتك ولو بشكل بصيط

وحياج اللة اختى بنت بلادى

السلام عليكم ورحمة الله وبركاته عزيزتي مثل ماقالت الاخت على حسب الاتفاق بينكم . اما عن البنيه تطلع وي الولد هذا ميصير تقطع المهر اول (لانه محرم عليج) وتتفقون على المهر. وبعدين تطلع للتجهيز طبعا مع الاهل . اما بالنسبه اذا كان وياج بالامارات ممكن يصير اتصال بينكم وبين اهله ولاتنسين أكو هسه بالعراق الانترنت والخطوط أحسن واهلج بعد موجودين . أتمنى اني ساعدتك واي سؤال اني جاهزه . اختك من بغداد.

ماشاء الله اي طلعوا بنات بلادي

وينك شمس بازغة وسالي وبنت دجلة ودودي واسلا يلا تعالوا

تحسين انتي عراقية? من وين?
مبروك اختي الغالية لي عودة باذن الله احكي لك التفاصيل

والسلام عليكم

اختك
ام امين

اختى ام امبن يا هلا بيج يلا خلى نفتح باب تعارفانى من النجف وانتن منين

واللة فرحت من شفت اكو عراقيات

ما شاء الله .. والله متوقعت راح احصل عراقيات هواية ابهذا المتدى .. انا عراقية والدي من النجف و امي من البصرة .. بحياتي ما شايفة العراق لاني مولودة بالامارات
اتمنى اروح للعراق بس الظروف مثل ما تدرون كلش صعبة .. اتمنى اروح ازور الأئمة سلام الله عليهم ..
مادري متى تهدأ الاوظاع هناك ..والله ملينا يعني ماكو و لا خبر حاو عن العراق .. قولي الحمدلله ان بيبيتي وعمتي بخير .. دايما نخابرهم .. الله يعينهم ..

بصراحة انا حبيت اعرف شنو تفاصيل العرس عدنا بالعراق .. لان بصراحة خواتي تزوجوا على عادات الاماراتيين مع انهم متزوجات عراقيين بس امي متقبل اتقول بالعراق كلشي ميجيبون للبنية .. يعني امي تريد كلش اهواية مهر غالي و عرس فخم و ذهب هواية .. انتو تعرفون ان امكانيات الشباب العراقيين مو مثل قبل .. يعني تشوفين الشاب اشكد حلو يخبل خطيبي هيجي .. بس اتكون امكانيته مو كلش زينة .. يعني متوسطة و الحمدلله .. بس امي تقول لا انتي عايشة بعز و نعيم ميصير تتزوجين هيج واحد .. انا طرحت هاي المشكلة بالنافذة الاجتماعية بس ما حصلت ردود و رجعت خايبة الرجا ..
ممكن تساعدوني و تقلولي اشلون اتصرف وي امي ..؟ هوة ميكدر يوفر كل شروط امي بس يكدر يوفرلي نص اللي هي طالبته .. هسة مادري شسوي كلش محتارة بأمري .. والولد كلش خوش ولد متدين و محافظ و يصلي .. بس آخ من امي متقتنع كلش تعبت وياها انا ..
ممكن تفيدوني ؟؟

اختكم بنت بلدكم الجريح ..
بطة

يا اهلا بكل الاخوات العراقيات
حلو نخلي النا قسم خاص بيننا ههههههههه
عزيزتي بطه صحيح كثير من الامهات هجي شكل بس حاولي تقنعيها او تدخلين من الباب المفتوح مثل ميكولون
وان شاء الله تشوفين الخير ولي رجعه مرة ثانيه لاني مستعجله هسه
بس حبيت اكول اني من البصره يعني بطوطه بنت خالتي ( فدوه اروح لريحة العراقيه الاصيله )

زهور المحبة .. انتي بأي بلد الحين ؟؟
و النعم بأهل البصرة الطيبين ..
من وين البصرة ؟؟ هههههه علساس آنة اندل ..
بس امي من الخندق .. اعتقد الطويسة ..
مادري والله اسماء عجيبة اول مرة اسمع بيها .. ههههههه
على العموم اتمنى لو يكون بيناتنا تواصل .. لاني بصراحة افتقر للعراقيات .. اكو وايد عراقيات هنا بالامارات بس بصراحة مع احترامي للكل .. مو كل وحدة تثقين بيها .. مرات تكونين ما متأكدة من اخلاقها .. علشان جذي آنة اتجنبهم شوية ..

تحياتىلكن خواتى

شوفى بطة الفلوس مو كل شىء

اهم شىء الرجال يكون خير ويعرف ربة لان الاهل راح يعطون بنتهماللى هية قطعة منهم لانسان يعرف يقدرهة ويخاف عليهة

والفلوس تجى بعد الزواج باجتهاد من الاثنين بل محبة

وعندما يكونون نفسهم سوية يشعرون بطعم الحياة

لكن اذا البنت تزوجت واحد عندة فلوس قبل ما يتزوجها بعد الزواج من اقل مشكلة يبقى يقول انتى اخذتينى علمود فلوسى او يقول اهلج باعوج من اجل الفلوس

هاى انا اكبر تجربة اهلى وافقو على زواجى بمهر حاضرة قران والغايب جة بيت اللة

وكان زوجى حالتة المادية متوسطة لكن اهلى قالو المهم يكون نشترى رجال يكون متدين يخاف ربة حتى يقدر يقدر بنتنة

والحمد للة الان انا وزوجى مرتاحين وزوجى يشتغل والعام شترينا بيت لمستقبل لاطفالنافى العراق

وصدقينى الفلوس عمرها ما جابت السعادة

اتمنا اكون جاوبتج ولو بجزء بسيط

اللة يسعدج و يوفقج

على فكرة احنا هم من النجف والعام رحنا زيارة للعراق وزرنا اهل البيت سلام اللة عليهم ويوم الكم

زيارة مقبولة ان شاء الله ..
انا حابة يكون بيناتنا مودة عن طريق هذا المنتدى ..
احب تفيدوني بأمور مثل هاي ..
و الله انا فرحت وايد من شفت عراقيات هنا ..
يالله الله يهنيكم يا رب
لا تنسون اختكم البطة ..
بس هم عندي مشكلة ثانية بعيدة عن الزواج .. و هي السمن .. لاني سمينة شوية يرادلي اضعف و انتو تعرفون الاكل العراقي اشكد طيب و دسم .. كلة تبسي و دولمة و هاي الشغلات متت اشكد حاولت اسوي ريجيم ماكو فايدة .. الاكل عدنا كلش طيب شسوي ؟؟ متكلولي شسوي ؟؟
حتى بالليل اقول ما اتعشى اشوف امي اضعف الايمان عود هية مطابخة يعني جايبة كبة موصلية لو بتيتة جاب ..
بس هسة قررت ما اتعشى ان شاء الله اتوفق ..