السلام عليكم ورحمة الله وبركاته
كيف حالكم يابنات
قريب ننفجر من اللي طلعوا وقالو نحن شيوخ وعقلاء المنطقة الشرقية واعلنو شرق ليبيا اقليم فدرالي
خطروا عليا المؤتمرات اللي دارهم المردوم وجاب فيهم شوية شيابين اغلبهم من دار العجزة ودارو روحهم
أعيان قبائل غرب ليبيا وداروا بيان انهم ضد الثورة وانهم مع المردوم في الوقت اللي كان فيه الغرب كله ثائر ضد الدكتاتور
بالضبط التاريخ يعيد نفسه المظاهرات في مدن الشرق كلها ضد الفدرالية وضد التقسيم
وهم في وادي تاني ودايرين روحهم متحدثين باسم الناس في الشرق
حسبي الله ونعم الوكيل فيهم باي حق يتكلمو على لسان اهل برقة باي حق ينصبوا روحهم متحدثين عليهم
والا اللي اسمه أحمد الزبير السنوسي اللي ولوه علينا منو يطلع بسلامته
نبي نقوله لو معمر سجنك ثلاثين سنة ماتطلع توة وتفرض نفسك على الناس
باي حق يحطوك علينا اهل الشرق من انتخبك والا من طلب منك تحكمنا وتكون ممثلنا في المحافل الدولية
ياناس عيوني يبو يطلعو من وسط راسي من كثر الحرق
نعيط لراجلي بدري نقوله ديروها ثورة تانية ضد الفدرالية ومازال في ليبيا طلاب شهادة
مستعدين يدفعو حياتهم في سبيل ليبيا تقعد وطن واحد مش مقسم
وكيف يقولوا لا لتقسيم ليبيا نعم للفدرالية الكلمة وعكسها ياعليك حالة وخلاص
المشكلة انهم عارفين الناس ما يبوش وعارفين المجلس الانتقالي والحكومة ما يبوش وهم في عالم تانية
خاطري نعرف اي برقة اللي يحكوا عليها أنا من سكان برقة وعارفة راي الناس هنا
ااااااااااااااااااااااااااااااااااااااه ياقلبي ولك الله ياليبيا الحبيبة
الروابط المفضلة