بالنسبة لبريطانيا عنا المدارس بتبدأ من سن ٣ سنوات وبيعطو كل طفل ١٥ ساعة فري بالاسبوع بمعدل تلات ساعات كل يوم وفي ببعض المناطق فول تايم
الإيجابيات كتيرة ماشالله :
التعليم مجاني
اولها انه الطفل أولا وبيعلموه الثقة بالنفس من خلال أشياء كتير بيكافئوه على اقل شي عمله ولسانهم حلو معاه
الخرابيش والصور يلي بيرسمها بياخدو منها وبيعلقوها على الجدار واسمو جنبها لحتى يعتز بالشي يلي عملو
طرق التدريس ممتعة يعني مو صب للمعلومات وبس قدم امتحان نسيها بالعكس بيعطوهم المعلومات بطرق غير مباشرة متل القصص الاغاني بيقولولها ryhmes تجارب صور مناقشات الخ وهاد الشي بيرسخ المعلومات عندهم صغار او كبار
شغلة حلوة عندهم انو مافي رسوب واعادة سنة كاملة هاد الشي بيساعد الطالب والاهل نفسيا وعقليا على التعلم بس بيشوفو المواد يلي ضعيف فيها وبيخلوه يحضرها مع الصف اللي قبلو ومع صفو وبيتابعو تقدمو وكذلك الطالب الشاطر بيشوفو المواد اللي هو ممتاز فيها وبيخلوه يحضر مع الصف اللي اكبر منه
الكتب الموجودة اوراقها خفيفة متل القطن يعني ما بتوجع الضهر لو الطالب حملها وطبعا الكتب للمرحلة الاعدادية وما فوق
السلبيات مافي كتب للابتدائي للأهل يتابعوها بالبيت مع اولادهم بس اوراق عمل خفيفة والحلول تبعها اما من النت او من خلال المعلومات اللي عند الطالب مثلا او يتركو الحل لابداعاتو طبعا فيها قليل من الايجابيات
الاطفال اللي مولودين حتى ١ سبتمبر بتروح عليهم السنة لانو السنة بتشمل الطلاب المولودين بين 1 سبتمبر ل 31 اوغست معناها لو طالب ولد اول سبتمبر اللي بعده بيروح للسنة اللي بعدها وهي كتير مزعجة
بالنسبة لمدارس سوريا
الايجابيات ممزوجة مع السلبيات للأسف
مناهجنا مليئة معلومات قيمة من صف الاول للباكالوريا بس طريقة بعض المدرسين بتخلي الطالب يخلص السنة وما يخلص المنهاج معاه مثلا كتب اللغة الانكليزية ممتازة على الاخير وحتى الانكليز نفسهم ما بيفهمو معلوماتها لانهم ما بيدرسو قواعد ببلادهم فنحن قاعديا اقوى منهم بس للاسف الطالب بيدرس عشر سنين انكليزي وما بيقدر يعمل محادثة وحدة والسبب تركيز المدرس على القواعد والقراءة واهمال المحادثة وكذلك عدم كفاية الحصص للمنهج الموضوع
وحتى مافي مراعاه لمستويات الطلاب يعني بدهم الطالب الكسول والشاطر يكونو متل بعض وهاد الشي بيأثر على مستوى الصف بشكل عام
والتعليم مجاني والكتب مجانية وهاد شي ممتاز بيخلي الفقير والغني يدرس
اساليب التعليم فقيرة جدا والمدارس يلي فيها تعليم متل اوربا وامريكا بتكون غالية وأسعارها نار وهاد الشي بيخلي اللي احوالهم المادية وسط وما تحت ما تقدر تسجل ولادها وتكتفي بالمدارس الحكومية بس
بعض المدرسين الحديثين طبعا بيتخلو عن ضميرهم بالتدريس كرمال الاهل يطلبوهم لدروس خصوصي وهيك بيعود عليهم بالنفع المادي اكتر وهاد الشي حرام لان في طلاب ما بتقدر تدفع لدرس خصوصي وبالذات الاسعار غير طبيعية
طبعا في اساتذة مازال ضميرهم صاحي وبيحرقو حالهم كرمال الطلاب
بس الحق بكلشي على الحكومة لانهم ما بدهم يطورو طرق التعليم والتدريس بس بيغيرو المناهج بين فترة وفترة مو اكتر بس الاسلوب بالتدريس من الستينات للآن نفسه
هي بعض الاشياء يلي ببالي والي عودة ان شالله
الروابط المفضلة