اول ما قريت عنوان الموضوع تخرعت
قلت امبيه احناالكويتيين شنو مسويين
ترى احنا مو ناقصيين أحد ما يحبنا خاصة انتو
لأننا نحبكم موت
كافي ان بعد الغزو العراقي الكل كرهنا و صار ما يحبنا ، ما أدري ليش ، كأن إحنا اللي غزينا العراق مو العكس.
ما عليه دخلت عليك سياسة شوي
آسفة خرجت عن الموضوع

آسفة اختي نور بس هذا انطباعي أول ما قريت العنوان

كويتيه صغيره
وليش يكرهونكم عسى تكرههم العافيه .........ومنهم هم اللي يكرهونكم ...علميني بس فيهم وانا اشن عليهم حمله عسكريه ( ياساتر جاتكم اخت بوش)


تبين الصراحه انا كنت اسمع انه فيه بعض الحزازيات بين الكويتيين والسعوديين على مستوى الشعب والمواطنين ......لكني اكتشفت زيف هالاشاعات بنفسي .....والقصد منها انهم يوترون علاقة الأخوه اللي بين هالشعبين خاصه بعد ازمة الكويت لأن السعوديه هي اكثر بلد وقف جنب الكويت وهذا اللي غاضهم ...........لو بقولك على كرم الكويتيين معانا لما رحنا خاصه لما عرفوا انا من السعوديه الكل وده يخدم ويساعد الله يجزاهم كل خير


اقووووووووول
ياحلوووووو كلمة ( امبيـــــه ) حبيتها كثير من الكويتيات

اي والله يحليلج يا نور خرعتينا ..... عاد انا داشة بتهاوش معاج هههههه طلعت غلطانة ...


مشكورة وايد على الورد .... لا وتوليب بعد ؟؟؟؟ هذا غرامي ..... انشالله المرة الياية نستقبلج بالمطار ولا يهمج

نور خرعتينا بس ونستينا لما قلت انك كنت عندنا ما ندرى كنا فرشنالك الارض ورد بس ملحلوقه المره الجايه

واكيد ان الشعبيين الكويتى والسعودى اكثر من اخوه والدليل الانساب اللى بينا والصداقات وانت شعب اكثر من رائع والله عندى عندى صديقات من الغربع الى الان بينا اتصالات

ما تشوف شر الجده

والله انا مش من الكويت بس كان عندي فضول اعرف شوالسالفه ودخلت والموضوع عجبني وانا بعد ودي ازورالكويت للحين مارحت لها كل مااقول لخوي يقول مافيها غير المجمعات بس طلع من كلامكم انها فيها اشياءوايده وحمستوني الها،، بس اريدأسال في فرق بالاسعاربين الكويت والامارات وهل اغلى ولانفس الشي لان المئة درهم عندنا عشر دنانير كويتي نوروني يالكويتيات..
وحبيت اقول لكويتية صغيرونة ماعليج الحجي وااااااايد وكلنا عيال ادم وحواء وتراكم غالين بس يمكن حال العراق هو اللي حاز في خاطر الناس ولاانتم مالكم شغل ..تحياتي..

اصلا ا كثر شعبين يحبون بعضهم بالخليج هم السعودية والكويت
وطبعا حكوماتهم بعد 0 مرة حصلي موقف واستغربت من مدى تعاون الحكومتين ( وحدة دشت بالخطر ) خخخخ المهم كنت باسبانيا وصارت لي مشكلة وقالوا لي الاسبان اذا ماحصلتي سفاراتكم تقدرين تلجاين الى سفارة السعودية حزتها انصدمت( الاسبان واصلهم حجي )0 بس بعدين عرفت ان باي مكان بالعالم اذا لم توجد سفارة الكويت اقدلر الجا الى سفارة السعودية 0

اختي مجروحة الكويت دايما مالها دخل وما تحب الظلم لاي كان بشعبها وحكومتها كلنا ايد وحدة
وحياج الله باي وقت بديرتج نمبر2 خخخخخخخخخخ انغليزي مغلف بالعربي

الله كويت
و الله حلوه
ترى أبوي هناك بيشتغل مرات قلت له يأخذني معاه بس للأسف الظروف ماتخلي


تحياتي

يا حليلج يا نور ترى انتي على حسب كلامج الى الحين ما شفتي شي ترى طافتج شغلات وااااااااااااااااااااااااااااااااااااااااايد

اما اختي مجروحه أأأأأأأأأأأأه ه ه ه ه ه بس لو امسك اخوج جان اعطيه جم بوكس عشان يتأدب ويجيبج عندنا عشان مره ثانيه ما يقول ان الكويت ما فيها الا المجمعات لا تزعلين ترى اتغشمر

أشكركم جميعا يااخواتي على مشاعركم الطيبه

ومعليش على هالتخويفه والرجه المعتبره ........

مافيه داعي اعيد وأأكد على العلاقات الثنائية والمشتركه بين البلدين الشقيقين (طلعت وزيرة خارجيه هههههه)
**************
بس انا قلتلكم في البدايه اني راح اقولكم على قصة صاحب الدعوة الكويتي ....وهي تأكد لكم مدى عمق الأخوه والمحبه بيننا ........

صاحب الدعوه هذا هو لايقربنا ولاهو من أصدقاء زوجي ومن معارفه .....
بس احنا تعرفنا عليه في رمضان الماضي في مكه المكرمه لما كنت رايحه مع زوجي للعمره

استاجرنا شقه ....وطبعا تعرفون الفنادق والشقق في مكه في رمضان كلها زحمه ومشغوله

لما رجعنا انا وزوجي من الحرم دخلنا العماره وكان عند الاستقبال هذا الشاب الكويتي ومعاه امه المسنه واخواته البنات ثنتين .....وكانوا يدورون على شقه او غرفه في فندق ومالقوا .....

وكانت والدته تعبانه من السفر والعمره .....
فعرض عليهم زوجي انهم يباتون عندنا في الشقه .....خاصه انها واسعه علينا ....فيها غرفتين وصاله ومطبخ صغير ودورتي مياه

وفعلا باتوا عندنا ....وكنت سعيده جدا بالتعرف على أسرته خاصه ان اخواته في سني

وقام الشاب وقدم دعوه لزوجي لحضور زواجه وأمه اصرت علينا انا نحضر

وبعد فتره اتصل علينا أبوه من الكويت يشكر زوجي ويعزمه رسميا
وقبل الزواج بأسابيع قليله اتصلوا مرة ثانيه يأكدون على الدعوه

أما استقبالهم لنا في العرس .......فكان شي خيالي وماينوصف ماباقي الا يشيلونك عن الأرض

الله يذكرهم بالخير ويجزاهم كل خير .