سبحان الله والحمد لله و الله اكبرولا اله الا الله محمد رسول الله والحمد لله ولا حول ولا قوة الا بالله
النهارده إن شاء الله هقول لكو على طريقتى الخاصه لعمل الملوخيه الناشفه و هتبقى أحلى و أطعم من الملوخيه الخضرا كمان إن شاء الله.
فى الأول أنا بسلق الفراخ بالطريقه العاديه
وأخد جزء من شوربتها و أحطها على النار و أضيف لها ملعقتين أو تلاته من صلصة الطماطم
و أجيب فى طاسه تانيه نقطتين أو تلاته بس من زيت الزيتون و لما يسخنو أحط عليهم مقدار الملوخيه الناشفه اللى هستخدمها
و أفضل أشوح الملوخيه لحد ما تبقى كلها لون واحد
لما تغلى الشوربه بالطماطم
أضيف الملوخيه المتشوحه
و أقلبها كويس جدا و أهدى عليها النار علشان تستوى
فى نفس الطاسه اللى شوحت فيها الملوخيه أحط فصين توم مفرومين على نقطتين زيت زيتون أو زيت عادى و أشوحهم
لما يبدأ يتغير لونه أضيف للتوم ملعقه كزبره ناشفه
و أحطها على الملوخيه و أقفل الحله بسرعه علشان تحتفظ بريحتها الحلوه و أخليها تاخد غلوتين بس على النار و ده شكلها
و بعمل جنبها أرز بالشعريه و المكسرات
وده كمان طبق ملوخيه لخاطر عيونكم
و دى الفراخ بعد ما حمرتها فى الفرن
يا رب تكون الأكله عجبتكم
الروابط المفضلة