تجربتى فى فطم بناتى - تجربة ام ناجحة-
السلام عليكم ورحمة الله وبركاته
هذى اول مشاركة ليا فى قسم الامومة والطفوله و بارك الله فى كل من شارك فيه لانى حسيت انه ملئ بالنصائح والتجارب اللى تفيد كل ام تواجهها اى مشكلة فى تربية ابنائها او فى مرضهم وبارك الله فى مجهودكم وجعله فى ميزان حسناتكم
وحبيت انى نقوللكم على تجربتى فى فطم بناتى
اولا وقبل كل شي حبيت انى نقول انى ولله الحمد اقوم بارضاع اطفالى رضاعة طبيعية ولا عمرى استعملت الحليب الصناعى
وهذى تجربتى فى فطم بناتى
بنتى الاولى استغليت فترة زيارة اخوات زوجى لنا ومعهم اطفالهم وكانت زيارتهم لثلاثة ايام فحسيت انها افضل فرصة لفطم بنوتى
وصيت اخوات زوجى انهم ياخذوا بنتى مع بناتهم باش تلعب معاهم ولانى كنت نسكن فوق بيت اهل زوجى كنت الصبح نرضعها وبعدين انزلها تلعب مع البنات ووصيت عماتها بانهم مايركبوهاليش الا بعد الظهر باش نعطيها رضعه وبعدين ينزلوها يعنى انى كنت ننقص عليها فى الرضاعة لانى ماكنتش مقتنعه انى نحرمها مرة واحدة يعنى حبيت انى ننقص الرضاعة تدريجيا
والحمد لله ولان فى من تلعب معاه ماكانتش تدور فيا وفات اليوم الاول على خير وطبعا فى الليل كنت من الاول منقصتها ونطعى فيها فى رضعه واحدة بس
وجى اليوم الثانى ورضعتها رضعة الصبح ونزلتها ووصيتهم مايركبوهاليش الا فى الليل ولله الحمد لهت مع الصغار وطبعا عماتها كانوا مهتمين بيها من ناحية الاكل والشرب يعنى كل شويا يسقوها امية باش ماتعطشش وتفقدنى ورضعتها رضعة الليل بس يعنى خذت رضعتين بس وفات اليوم الثانى على خير
وفى اليوم الثالث نزلتها بدون رضعة الصبح وطبعا فطرتها ووصيتهم يزيدوا يوكلوها ومايركبوهاليش بكل الا فى الليل ولهت مع الصغار وبارك الله فى عماتها اهتموا بيها وركبوها فى الليل ورضعتها رضعة الليل بس
وبعدين رابع يوم كانو روحوا لبيوتهم ففضلتى رضعة الليل بس قعدت كل شويا نسقى فيها فى ميه وعصاير ونعطى فيها فى حاجة تاكلها وطبعا حاولت انها ترضع بس كانت شبه ناسيتها بمجرد منحسها تحاول تطلب الرضاعة نلهيها باى شي فتنسي وتلهى لين جى الليل سقيتها مية قبل ماترقد ووقت ماناضت تبى ترضع مابيتش نعطيها بكت شويا واستسلمت للنوم ونست ومافات الاسبوع الا وكانت نست الرضاعة نهائيا
والحمد لله ماتعبتش فى فطمها ابدا وكان الفضل طبعا لعماتها وجدتها اللى اهتموا بيها وهيا كانت فى نفس الوقت تحب بنات عماتها وتنسى كل شي لما يكونوا موجودين
وانى اصلا فكرة انى نبعد بنتى عندى لما نبى نفطمها كنت مستبعدتها نهائيا لانى حسيتها قسوة عليها اولا نحرمها من الرضاعة وثانيا تنحرم من امها
اما بنتى الثانية وقت ماقربت تسكر العامين كنا تركنا بلدنا وسافرنا وماكنش عندى حد تلهى معاه ففكرت انى ننقص عليها الرضاعة تدريجيا كل يوم شويا ونلهيها باى شي
وفعلا بديت معاها ومش كل ماتطلب ترضع نعطيها وفى نفس الوقت كنت كل شويا يا اما نعطيها عصائر يا ميه
وفعلا بدت تنسى تدريجيا وفى الليل حتى هوا كنت نقص تدريجيا وكنت نحاول انى نوكلها كويس
وكانت كل ماتصر انها ترضع وتبدى تبى تعيط نحطيعا شوكلاته قطعه صغيرة جدا نسيها بيها الرضاعة عارفة انكم حتقولوا غلط بس انى كنت مانبيش نقوللها لا مافيش رضاعة لانى مانبيش نقسى عليها ومانبيش نبينلها انى نبى نمنعها من الرضاعة كنت نقوللها حااااااااضر نعطيك تشوكليت وبعدين ترضعى وكانت تفرح بالشوكلاته وتنسى (وكنت نقول فى نفسي زى مانسيتها فى الرضاعة حنسيها الشوكلاته وفعلا توا معاش تاكل فيها الا مرة فى اليوم او كل يومين مرة وقطعه صغيرة بس) واستمريت هكى لين نست الرضاعة فى النهار وبعدين قعدتلى رضعة الليل بعد مانست الرضاعة فى النهار قررت انى معاش نرضعها فى الليل هيا ليلة بس بكت فيها وثانى يوم صبحت ناسية الرضاعة والحمد لله وحتى هيا خذت اسبوع بس فى فطمها
هذى تجربتى مع بناتى فى الفطام
بس انى عندى مشكلة ان بناتى مايحبوش الحليب
الكبيرة كانت ماتشربش فيه نهائيا لا هو ولا الزبادى مع انها كانت تاكل فيه وهيا صغيرة لكن كرهاته من اللى عمرها عام ونص وتوا بالمزاج يعنى وقت ماتطلب الحليب او الزبادى بس تشربهم يعنى مش كل يوم
واختها الصغيرة نفس الشي الحليب نهائيا ماتشرباش والزبادى بالمزاج
ياريت لو فى حد يقدر يساعدنى ويعطينى فكرة كيف نخليهم يحبوه مع العلم انى حاولت بشتى الطرق انهم يشربوه ومابوش الا بالمزاج وانى نبيهم يشربوه ديما وكل يوم
وبارك الله فيكم
وان شاء الله انكون قدرت نفيدكم ول بالقليل
رد مع الاستدلال
كتبت بواسطة ام سهيل
الروابط المفضلة