[center]بسم الله نبدأ الموضوع الجديد
اولا نتوكل على الله
رمضان قرب اللهم بلغنا رمضان
وكلنا عارفين ايه اللى بيحصل فيه اما عازمه او معزومه وطبعا لازم تاكلى مع ضيوفك او عند ضيوفك ولو معدتك لسه على حالها زى حالاتى يبقى قولى علينا عليه العوض يعنى حنمسح الترابيزه مسح
علشان كده فكرت انى افتح حمله جديده على مرحلتين
الاولى قبل رمضان نصغر معدتنا شويه ونكون عندنا قناعه بالاكل القليل ونكتفى بكده
المرحله التانيه فى شهر رمضان وده علشان نظامنا الاول ميضعش علينا فى عزومات رمضان
ندخل بقى فى المفيد
مرحلتى الاولى
ليها شروط وقواعد لو حابه تشتركى معايا اقريهم كويس جدا علشان الاحراج بعد كده[/center](يستحب يكون نظام صحى علشان تعرفى تستمرى معانا)
1 - عدد المشتركات 12 فقط لاغير ( علشان اقدر اتابعهم لان عندى زهايمر فظيع )
2 - نظامك براحتك يعنى سعرات يمشى نقاط ميقولش لا هرم غذائى الخ الخ براحتك المهم النتيجه فى الاخر
3 - الرياضه اقل حاجه 3 مرات فى الاسبوع مشى ساعه ( تعمليهم نصف ساعه كل يوم ساعتين مرتين فى الاسبوع براحتك المهم فى الاخر المجموع 3 ساعات وده مبدئيا )
ملحوظه
حسجل كل حاجه عندى واحاسب اخر الاسبوع وكمان مفيش حجج من الاول
4 - شرب الماء بحد ادنى 2كوب قبل كل وجبه
5- كتابة اليوميات كل يوم ( على الاقل 5 مرات فى الاسبوع )
5 - ليكى وجبه فرى فى الاسبوع بحدود ( وجبه ها مش يوم بحاله يوم الجمعه مع الاولاد وابو الشباب عدانى العيب)
6- الوزن يوم الجمعه صباحا وتصويره وتنزيل الصور فى نفس اليوم ( لازم التصوير شرط لدخول المجموعه ) ( لو متعرفيش ينزل ازاى الصور قولى ونشرحلك )
7 - اهم حاجه : الوزن امامك اختيارين اما النزول فى الوزن او الثبات اما الزياده يبقى باى باى ( طبعا كله بامر الله بس منعكش ونقول زدنا)
ملحوظه
حتقولى طيب البريود اعمل فيها ايه طبعا ده بتيجى مره فى الشهر يعنى ححسبهالك وبعدين عن تجربه مش بتزود الوزن لو التزمتى بشرب مااااااااااااء كتير ومشى خفيف نوصل لحد الثبات
ومن عندى ليكى مره واحده فى الشهر تزيدى فيها وده فى اسبوع الدوره غير كده مش حينفع
عارفه ان شروطى رزله حبتين بس انا عاوزه الملتزمات فقط لان التفاحه البايظه بتبوظ اللى حوليها لو فيه دلع الكل بيهرج من بعدها صح
اللى تلاقى نفسها قد الشروط الطويله ده اهلا بيها نساعدها وتساعدنا بالتزامها
بعد اكتمال العدد سوف تقسم لمجموعات نذكرها فيما بعد
المطلوب
الاسم ( اختارى اسم دلع حلو ندلعك بيه )
السن
الطول
الوزن
بس حنطلب منك وزن جديد يوم الجمعه بالصوره علشان نبدا مع بعض من يوم السبت 11 / 7 ان شاء الله
الروابط المفضلة