السلام عليكم يا جميلات
افتكاسه انهارده
كوكيز بالتمر تشييييييييبس
مغذى وتحفه للأطفال وطعمه بيدى ما بين الغريبه المصرى و البيتى فور
بس انما ايه سهل و مدته فى الفرن 12 دقيقه و بس على 180 درجه
نبدأ المقادير و المتوفره فى بيتك ان شاء الله
كوب ونصف زبده
ملعقه كبيره بيكنج بودر
3ملعقه صغيره لبن بودره
3 ونصف كوب دقيق ولو احتاج زياده معاكى نصف كوب احتياطى و انخلى الدقيق كويس
شعره ملح
كوب سكر بودره
2صفار بيض وشعره فانيليا
نصف كوب من العجوه (التمر) المفرومه وتكور الى كور صغيره مثل التشوكليت تشيبس
اقتراح للتقديم / صوص الشوكولا ومقاديره لأنه بيتى
المعيار فنجان القهوه (فنجان سكر بوده - فنجان كاكاو خام - فنجان زبده سايحه - نصف فنجان ماء )
الطريقه
نجيب الدقيق وننخله مع البيكنج بودر ونسيبه على جمب
نجيب صفار البيض والفانيليا و نضربهم مع الزبده اللى بدرجه حراره الغرفه
ونسيبهم ينعموا جدا جدا
بصراحه مضر ب البيض باظ و انا شغاله بس نعمته بإيدى على اد ما قدرت
وبعدين نقفل المضرب وفى طبق غويط نضيف الدقيق وجزء من التمر تشيبس
ونلم العجين على الرخامه
ونبتدى نشكله و نجيب من التمر تشيبس حبات ونضيفها بالغرز فوق كل واحده من الكوكيز
ونرصها فى صينيه الفرن
و ياريت تكون الصينيه من بتوع البسبوسه او البيتزا عشان مش بتكون مرتفعه
سخنى الفرن قبلها بعشر دقايق ودخليها فى الوسط على 180 درجه 12 دقيقه بإذن الله وخرجيها بما تجيش جمبها الا بعد اما تبرد شويه عشان بتبقى طريه و سيبيها على سلك تبرد تانى
وقدميها وزينيها كمان بصوص الشوكولا/
وبألف هنا وشفا عليكم يا رب
الروابط المفضلة