احب اقولكم تجربتى الاولى مع الريجيم لانها الحمد لله جابت نتيجة من اول اسبوع و خسرت 5 كيلو
اولا انا طولى 170 ووزنى كان 87 كيلو
الان صار 82 كيلو بعد اول اسبوع و الحمدلله
اولا:
انا مشيت على ريجيم الدكتور بهاء ناجى
و بحاول اتمشى كل يوم نص ساعة و علشان ماتحتاروش انا جوزى بيتوتى جدا و مش بيخرجنا الا مرة واحدة بس فى الاسبوع
انا حبيت اصرف نفسى بقيت كل يوم الصبح و العيال نايمة اروح امشى فى الكوليدور اللى فى العمارة عندنا بس اللى ساعدنى انة طويل جدا كل يوم امشى فية نص ساعة بخطوات سريعة و بلليل لما الوقت يكون فاضى و زوجى بيتفرج على التليفزيون اجرى فى الشقة زى المجنونة من الصالة للاوضة لمدة نص ساعة بردة لما اهلك علشان اخس علشان للاسف ماعنديش سير كهربائى فبحاول اصرف نفسى
ثانيا :
حولت اهتماماتى من هواية دخول المطبخ و الابداع فى الحلويات و الذى منى الى الاهتمام بنفسى و بجمالى
بمعنى
كل ما احس انى عاوزة ادخل المطبخ افتش عن اى حاجة اكولها اجرى جرى على اوضة النوم و اقفل عليا و اعمل ماسكات لوشى او اعمل ماكياج او البس هدوم و اغيرها و البس غيرها و ابص لنفسى فى المرايا و اقول الكرش دا لازم يختفى علشان ابقى اجمل فى اللبس
ثالثا:
كل ماحد يعزم عليا باى حلويات او اكل خارج الريجيم اجرى من وشة قبل ما افكر اصلا او اقولة يشيلة فورا علشان ما اضعفش
و على كدة طول الاسبوع و الحمد لله النتيجة بانت بالدايت و ببشرتى و بجمالى و مش هقولكم على كلمات الثناء من زوجى على اهتمامى بنفسى المتزايد و المكياج اللى بحطة اشكال و الوان كل يوم
و الله انا نفسى بقيت مش بحب الاكل زى الاول و بقيت احب المكياج و الحاجات دى اكتر
جربوا و ادعولى ياحلويييين
الروابط المفضلة