مرحبا أخواتي
كثير عجبتني حملة فلسطين نبض قلوبنا.. وحبيت أشارك ولو بأشياء بسيطة وذكرياتي في غزة..
تمنيت لو الوالدة لسه عايشة كنت خليتها تعمل وتصور بنفسها أكلات للأسف ما حاولت أتعلمها منها بالضبط كيف بتنعمل.. زي المفتول من الألف للياء والحماصيص وسلق وعدس والبصارة والفقاعية والرمانية والسماقية والكرش والفوارغ.. وغيرها وغيرها من أكلات بعضها كنا نحبه وبعضها نتبطر عليه ونعتبرها أكلات دقة قديمة وهلأ والله بعد ما تغربت وتزوجت وانقطعت عن أهلي وبلدي صرت أتمنى لو أمسك بكل لحظة فاتت وأرجعها وأبوس هالأيادي المباركة وأتعلم منها كل صغيرة وكبيرة..
أتذكر لما كانت واحدة من خواتي تتزوج أول مثل تقولها إياه أمي وهي بتضحك بس تزورها يوم الصباحية (والله يما صرتي مرة ومراية وطنجرة وقلاية) 
ولما كانت واحدة فيهم تجرب أكلة وما تزبط معها أو تكون نص نص تضحك أمي وتقول (يلا ايش ما طبخت العمشة زوجها بيتعشى ويتدشى) .. أو لما تحوس واحدة من خواتي في بيتها بعد إنجاب أول بيبي لها وتيجي تبكي وتشكي تقولها ( جابت بكرها وانهتك سترها) يعني من أول بيبي صار البيت مبهدل وفضيحة
ولما كانت واحدة فيهم تجرب أكلة وما تزبط معها أو تكون نص نص تضحك أمي وتقول (يلا ايش ما طبخت العمشة زوجها بيتعشى ويتدشى) .. أو لما تحوس واحدة من خواتي في بيتها بعد إنجاب أول بيبي لها وتيجي تبكي وتشكي تقولها ( جابت بكرها وانهتك سترها) يعني من أول بيبي صار البيت مبهدل وفضيحةيا الله شو مشتاقة لأمي وأكل أمي وحكي أمي وضحكة أمي وبهدلة أمي وكل شي بيخصها..
ويا الله شو مشتاقة لغزة اللي انولدت فيها واربيت فيها وكبرت فيها ودرست وتعلمت وتخرجت فيها..
شو مشتاقة لبيتنا وشارعنا وحارتنا ومدرستي وجامعتي
شو مشتاقة لخواتي واخواني والزيارات واللمات والتعليقات والروح الحلوة
ويا الله شو مشتاقة لغزة اللي انولدت فيها واربيت فيها وكبرت فيها ودرست وتعلمت وتخرجت فيها..
شو مشتاقة لبيتنا وشارعنا وحارتنا ومدرستي وجامعتي
شو مشتاقة لخواتي واخواني والزيارات واللمات والتعليقات والروح الحلوة
سامحوني طولت عليكم بس والله فتحتوا جروح ووجع الغربة على آخره.. غربة الوطن وغربة الأهل..
اليوم حأقدم طبق بسيط كتير وسهل كتير لكن ذكرياته عندي كتير قوية وفواحة..
طبق فت العدس من الأطباق الرئيسية على المائدة الغزاوية.. بالذات أيام الشتاء.. يدفي البدن والعروق ويعطي طاقة وقوة.. وحلوة فيه اللمة والجمعة حوالين الجاط الكبير..
في بيت أهلي كنا متعودين نعمل فت العدس في جاط كبير ونأكل منه جماعي يعني مش كل واحد ياخد له شوية في طبق.. لأ نلتم كلنا حوالين الجاط السخن والأبخرة تتصاعد منه ونأكل ونستمتع ونشبع مع التسامر والحكي والتعليقات..
كان من طقوسنا أنه أول يوم في رمضان نحب نستفتحه بطبق فت العدس.. من أد ما كنا نحبه وكنا نعتبره طبق لمة وجمعة..
أنا قبل هيك نزلت طريقتي لشوربة العدس على هذا الرابط http://www.lakii.com/vb/showthread.php?t=505342
وهذا شكل الشوربة بعد ما تجهز
بعد هيك بناخد ييجي مغرفتين أو ثلاثة من الشوربة ونحطهم في طنجرة ثانية ونضيف لهم كوب أو كوبين ماء ونضبط الملح ونتركهم على النار ليغلوا..
نكون جبنا الخبز البايت وفتتنا في الجاط ونغمره بالمغرفة شوية شوية بالمرقة اللي عملناها.. أنا هون عملت طبق صغير بس لأنه مافي عيلة كبيرة لأعمل جاط كبير زي زمان
نجيب غطا أو صينية مناسبة لحجم الجاط ونغطيه فيها ونتركه شوية لحد ما يتشرب الخبز المرقة..
بعدين نشيل الغطا ونجيب شوربة العدس ونصب منها بالراحة والتساوي على الجاط لحتى يغطي الخبز كله
ونزينه بالزيتون وأوراق النعنع.. ونعمل جنبه دقة فلفل أخضر وليمون ..ندق الفلفل الحار بشوية ملح ونضيف له الليمون.. ويقدم جنبه طبعا المخللات والزيتون..
وصحة وهنا على قلوبنا يارب طبقنا البسيط والسهل يكون عجبكم
دعواتكم لأمي وأبي وأخي بالرحمة والمغفرة وأن يجمعني وإياهم في الجنان
.
تعليق