هذه الحملة فتحت نفسنا على الأكل والله يستر من العواقب
وأنا أفكر شو أعمل لأشارك من جديد هون اجه على بالي الملفوف.. لأني من فترة طويييييييييييلة ما عملته..بتعرفوا غلبته كتيرة واكله بيخلص في ثواني واللي عندها بنوتة صغنونة حتحوس لأنه محتاج وقت في السلق والتقطيع واللف وهلم جرا..
المهم نبدأ على بركة الله..
الحشوة
عبارة عن رز مغسول ومنقوع ولحمة مفرومة بأقلبها ثواني على النار مع رشة قرفة لتضيع زناخة اللحم..وطبعا البهارات اللي هي ملح وهيل وكمون وبهار مشكل وفلفل أسمر. أنا ما بأحب أحط ثوم جوه حشوة الرز بس فيه ناس بيحطوا ثوم.
اللحمة بأحب أقلبها على خفيف مع أنه معظم الناس ما بيقلبوها بس هيك تعودت من أمي لأنها كانت تعمل كميات كبيرة لأنا ما شاء الله عيلة كبيرة فتقول أضمن نقلب اللحمة على خفيف حتى لو لفينا الملفوف قبل بيوم أو ضلت طنجرة لتاني يوم بدون ما نستويها نكون متطمنين أن اللحمة ما تخرب الطبخة.
هذا شكل اللحمة ساعة التقليب
وهذا شكل الحشوة
طبعا نيجي للست الملفوفة.. نشيل الجذع من النص وعلى فكرة الملفوفة ما بيترمي منها اي شي..كل شي فيها بيستفاد منه..الجذع بيتقشر وبيتاكل وطعمه طيب بس ممكن يعمل انتفاخ وغازات
نشيل ورقة ورقة ونحطهم في طنجرة الماء المغلي..يادوب دقيقة أو اثنين ونشيلهم حتى لا يذبلوا كتير ويتمزعوا ويغلبونا في اللف..
لما يصغر راس الملفوف شوية ونقدر نحطه في الطنجرة نحطه وهو لحاله رح يفك بقية الورق ويسهل علينا المهمة بدل ما نعمله ورقة ورقة..
والزهرة الصغيرة اللي بتتبقى في الآخر بنتركها زي ماهي لأننا بنحشيها وكنا نسميها الجاجة ونتقاتل عليها واحنا صغار
نفرد كل ورقة ملفوف ونشيل القوالح البيضا اللي في النص ونحطها على جنب ونقطع الملفوف بشكل مناسب وهذه ملفوفتي بعد ما تقطعت أوصالها
نجيب الطنجرة ونفرد فيها القوالح البيضاء ونكون قشرنا رأس ثوم ونوزعه بين القوالح
ونبدأ على بركة الله نأخذ ورقة ورقة ونلفها.. من نصائح الوالدة الله يرحمها.. خطوط الورقة تكون عرضية موازية للي بيلف ..أصبع الملفوف لازم يكون انيق ومرتب وأطرافه متساوية وما يكون دب وتخين كتير ولا طويل كتير يعني يادوب طوله زي الأصبع أو أكبر بعقلة بس..
كنا لما نلف معها الملفوف كل ورقة نلاقيها صعبة نحطها قدامها وناخد الورق السهل وهي تضحك وتقول كلمة بعرفش بتريح..حاولوا بدل ما تستسهلوا وترموا الورق..
أول مرة طبخت الملفوف لحالي كل ورقة مجعلكة أحطها على جنب أقول بأفرمها للشوربة..اجيت على الآخر لقيت رأس الملفوف كله ما عمل لي سطر في الطنجرة! طبعا بعدها استحيت على حالي وصرت شوية شوية أتحايل على كل ورقة مجعلكة وألفها مزبوط
المهم طولت عليكوا.. نصف أول سطر في الطنجرة والأفضل نلف الورقات الخضراء في الأول لأنهم بيكونا بيتحملوا حرارة اكثر وبعدين بنجيب الجاجة وبنحشيها وبنقعدها زي الملكة في النص..
ونكمل لف بقية الورق ونحطه بشكل مرتب ومتلاصق في الطنجرة حتى يحافظ على لفته وما يتفلت..
طبعا أكيد اتبقت معنا شوية زوايد صغيرة من هون وهون..نفرمها بالسكين ونحطها على وجه الطنجرة..كتير بتطلع طيبة مع الليمون.
هلأ أنا بقي معي صحن صغنون من الحشوة وقلت مش مستاهل أتركه لوقت تاني..قام خطر ببالي نوع محشي تاني كانت تعمله رحمة الله عليها وهو محشي ورق الخس..
هلأ هذه هي الخسة عادة صح؟ عادة الجزء السفلي منها بيبقى أخضر كتير وبينرمي..
بنقطعة بشكل مرتب بالسكين.. وممكن ناخذ كام ورقة من فوق برضه .. بنغسله كويس كويس..
بنحطه لأقل من دقيقة في الماء المغلي لأنه رقيق وعلى طول بيذوب وبنشيله وبنقطعه وبنحشيه
يادوب طلعوا معي سطرين في الطنجرة الصغيرة
نرش ملح على وجه الملفوف والخس.. نضيف ماء مغلي لهم بحيث بس بغمرهم ونتركهم على نار عالية حتى يتشرب الماء ونكون عصرنا ليمون كتير لأنه زكاوته بحموضته ونضيفه للملفوف والخس ونتركهم على نار هادية لغاية ما يتشربوا وياخدوا الطعم..
وهذا شكل جاط الملفوف
وهذه صورة أقرب
وهذا الخس يادوب طلع صحن صغير وقضينا عليه من أولها من زكاوته
وهذه صورة أقرب
سامحوني رغيت كتير وطولت عليكم بس يارب طبختي تكون عجبتكم
الروابط المفضلة