>> مهلبية الرز<< من قبلها المهلبية ما إلها طعم >> صورة <<
هلا بكل أخواتي و حبيباتي
كيفكم يا أمورات ركن الحلويات
صحيح أنا ردودي قليلة و إلي أكتر من ألف سنة ما شاركت
بس و الله إني متابعة على قد ما يسمحلي فيه وقتي ..
شو بدكم بكترة الحكي .. المهم
رحت عند رفيقتي من فترة و ضيفتني مهلبية ..
قلتلها يسلموا حبيبتي بس أنا ما بحب المهلبية أبداً
قالتلي دوقيها لأن مهلبيتي أنا غير ..مهلبية الرز و مش النشاء
المهم إني أخذت صحن صغير و دقت
و يا لهوي شو كانت طيبة ..و الحقيقة إني ندمت ليه أخذت صحن صغير ..
و لما إجو الضيوف لعندنا في العيد ساويتها ...
و الله العظيم ( و أنا حلفت بالله ) إن في منهم أكل ثلاث صحون و أغلبهم أكل صحنين و منهم اكتفوا بصحن واحد ..يعني السبع ليتر حليب إلي عملته ما بقى منهم إلا صحنين
و حتى جدتي الله يخليلي ياها قالتلي هي أطيب مهلبية بدوقها بحياتها و أخذت الطريقة مني
المهم خلوني أدخل في الطريقة و يا ريت يا ريت تجربوها و بإذن الله مش رح تندموا أبدا
المقادير :
2 ليتر حليب
2 فنجان رز صغير مصري قصير
2 فنجان صغير سكر
علبة قشطة نستله << هي اضافة من عندي لحتى أزيد النكهة و ممكن تستغني عنها
ماء زهر << مهم كتبير تكون نوعيته فاخرة و إلا رح يأثر على كل النكهة
الطريقة :
تجيبي الحليب و تحطيه على النار لحتى يغلي ...
لما يغلى الحليب , تغسلي الرز و تصفيه و تحطيه فوق الحليب و تحركي حتى لا يعلق في قاع الطنجرة
و تتركيه يغلي لمدة ساعة أو أكثرأو أقل شوي المهم أن تستوي حبة الرز تماما تماما ,,
أضيفي علبة القشطة و بعدها اخفقي الحليب و الرز يا إما على خفاقة العصير أو بواسطة الخفاقة العمودية المهم أنه يتجانس و ما يبقى فيه أي كتل ...
رجعي الحليب المخفوق للنار و أضيفي السكر , رح تلاحظي أن الحليب سمك شوي ..
المهم في هذه المرحلة أن ما تخليه يغلي أكثر من عشر دقائق لحتى يذوب السكر و يأخذ المهلبية طعمة تشويط بسيطة ..
بعد ما تبعدي المهلبيية عن النار أضيفي ماء الزهر و اسكبي المهلبية في صحون صغيرة و مناسبة للتقديم .
حطيها في البراد و قدميها باردة و استمتعي بطعمتها إلي تذوب تحت اللسان ,,
و هي صورة الطبق :
رد مع الاستدلال
الروابط المفضلة