شوفي يا ست دودي فى طريقتين وحده طبق رئيسي واللي هي ورق العنب بالرز واللحمة وواحدة تعتبر مقبلات واللي هي ورق عنب بالزيت وتفضلي الطريقتين
أ- ورق عنب باللحم
ة:
المقادير:
كيلو ورق عنب
كاستين ونص رز سنوايت (بعد التجربه هذا احسن واحد) والكاسه هي كاسة الماء
نص كيلو لحمة مفرومه ويفضل فيها شوية دهن
نص كيلو ريش او شرحات
نص كيلو بندور حمراء وطريه
ملح، بهارات مشكله، هيل مطحون، فلفل اسود، ربع كاسة صغيرة زيت ذره، عصير ليمونتين، مكعبين ماجي
الطريقة:
1- بتغسلي الرز مرتين ثلاثة وبتنقعيه لمدة ساعة وبعدين بتكبي الماء وبتحطي على الرز اللحمة المفرومة والبهارات كلها والملح والزيت وتخلطيهم مع بعض بدون ما تكسري الرز يعني شوي شوي
2- اقطعي العرق الصغير اللي بورقة العنب واذا كانت كبيرة كتير اقسميها لنصين او ثلاثه واذا كان حجمها وسط فما عليك غير انك تبدأي بلف الورق وبس تخلص بتعملي التالي.
3- تقطع البندورة شرحات وتوضع فى قاع الطنجرة اللي رح تطبخي فيها ورق العنب وبتبلي الريش وبتحطيهم فوق البندورة وبعدين صفي ورق العنب فوقيهم. أنا عادة بصفهم بطريقة دائرية فلما بقلب الطنجرة بطلع شكلها زي الكيكة رهيبة.
4- فتفتي مكعبين الماجي فوق الورق وديري عليهم عصير الليمون وبعدين حطي صحن زجاج فوقهم وحطي عليهم ماء بحيث تغمر الورقات ب 2 سم تقريبا.
5- لما تغلي الماء خففي النار عليها وبدها تقريبا 45 دقيقة لتستوي
وصحتين والف هنا وعافيه
[I]ب- ورق العنب بالزيت[/I]
المقادير:
كيلو ورق عنب
كاستين ونص رز سنوايت
نص كيلو بندورة حمراء وتقطع سغيرة جدا
نص كيلو بطاطا
ضمة بقدونس مفرومه ناعم بس مش ناعم كتير
عصير 3 حبات ليمون
ملح، ربع كاسة صغيرة زيت زيتون
الطريقة:
1- بتغسلي الرز مرتين تلاتث وبتنقعيه لمدة ساعة وبعدين بتكبي الماء وبتحطي على الرز البندورة والبقدونس والملح والزيت وعصير الليمون وتخلطيهم مع بعض بدون ما تكسري الرز يعني شوي شوي
2- اقطعي العرق الصغير اللي بورقة العنب واذا كانت كبيرة كتير اقسميها لنصين واذا كان حجمها وسط فما عليك غير انك تبدأي بلف الورق وبس تخلص بتعملي التالي.
3- تقطع البطاطا شرحات تخينه (طبعا لاتنسي تملحيها) وتوضع فى قاع الطنجرة اللي رح تطبخي فيها ورق العنب وبعدين صفي ورق العنب فوقيهم.
4- رح يبقى عندك شوية ماء من الخطة الرز ديريهم على الورقات وبعدين حطي صحن زجاج فوقهم وحطي عليهم ماء بحيث تغمر الورقات ب 2 سم تقريبا.
5- لما تغلي الماء خففي النار عليها وبدها تقريبا 45 دقيقة لتستوي
وصحتين والف هنا وعافيه
وان شاء الله اكون كفيت ووفيت
الروابط المفضلة