احمدك يا رب بعد عناء 4 سنين الكبه زبطت معي وكل الفضل لكم يا احلى ناس

[هنلي]

بسم الله الرحمن الرحيم
كيف الحال يا احلى ناس
والله اني مبسوطه كثير






يعني احكيلكم معاناتي الي من اول ما تزوجت كل مره اعمل فيها كبه الا تفتح معي والا تتفتفت والا الحشوه تطلع
على راي زوجي بس يسمع اني بدي اعمل كبه بقول لي لليش تعبه هالبال هذه بدها ناسها ويصير يضحك عليي
ويتمسخر لما اعملها وتطلع عجايب اشكال والوان
يعني ما خليت طريقه الا وسويتها مع انه امي بتعملها كثير مزبوط بس احمدك يا رب عمرها ما زبطت معي حتى طريقه امي
جربت البرغل اكثر من اللحم واقل ونفس الكميه هاتي تزبط ابدا
والا جوزي لما بده يجاكرني بجيب لي عجين كبه جاهز وبقول لي ورينا شطارتك ومره جاب لي كبه مكببه وجاهزه
الله لا يحط حدا محلي اتفتفتت معي وحالتي صارت حاله

بس ظليت ورا هالموضوع لحد هديك المره رحت مع زوجي عند اللحام وقلت له بدي لحم مطحون كثير من دون بصل او بقدونس قلت خليني اجرب حظي

واخيرا زبطت معي احمدك يا رب طلعن متماسكين وحلوين ولا فيهن اي تشققات والفضل كله لبنات المنتدى
انا خلطت عده طرق مع بعض يعني اخذت طريقه الاخت منى الله يرضى عليها والحشوه من الاخت وعود الخير الله يرضى عليها كمان

وهي خلاصه تجاربي -- برمت كثير من كثر الفرحه
نص كيلو لحم مطحون مليح زي الكفته بس خلي اللحام يطحنها 3-4 مرات
كوبين ونص برغل تطحنيهن على تبعت البهارات مليح مليح لحد ما يصيروا زي البودره
ملح وبهار
فنجاء ماء مع م ص نشا علشان تدهني يدك فيهن علشان الالتصاق
الحشوه
لحم قطع --لسان العصفور
بصله متوسطه
لوز وصنوبر محمصين
ورشه سماق هذه الها نكهه مميزه

بتطحني البرغل مليح مليح وبتحطيه في جاط بيكون ناعم كثير انعم من السميد وتصبي عليهن ماء بارد
وتتركيهن لحد ما ينفشن وبعدها تضعي عليهن اللحم المطحون ناعم مع البهارات والملح وتعجني مليح مليح
وتعملي اللحم المقطع مع البصل وملح وبهار ورشه سماق وتضيفي اللوز والصنوبر
بعدها تعملي كرات من اللحم وتحشيها بالحشوه وتكوني قد غمستي يدك بالماء والنشا علشان ما تتشقق
وبعد الانتهاء من الكميه تضعيها في الثلاجه علشان تتماسك
وعند القلي تقليها في زيت حامي شويه وغزير
ومع شويه تبوله وبطاطا مقليه
على راي بنتي بتقول ماما اكلها زاكي زي المطعم
بس اهم شي اعجبت زوجي
وحبيت افيدكم

[احاسيس مرهفة]

الف هنا وعافية هنووول

انا اللي شكلي مارح اعملها ممشيتها من المطاعم ومن الجاهز اللي ينقلي وبس

لكن يجيني يوم واعملها زي ما عملت القطايف

تسلم ايدك حبيبتي

[dudi]

عاشت ايديك الحلوة
كل شيء من ايديك طيب ولذيذ وناجح

[رابعه]

بصرا حه شكلها يشهي ويجنن
سلمت ايديك يارب
بصراحة انا من رابع المستحيلات اعمل كبه البرغل
وناويه هالأيام اجرب كبة الرز انشالله تضبط معاي

[لنوشه]

تسلم ايدك يا هنلي
الكبة طالعة معك حلوة
بس بيني و بينك و بلا ما تسمعنا بنت من بنات المنتدى ( فيه وحدة من الكبة متشققة من طرفها بس مو باينة كتير )
انا كمان احيانا تضيط معي و بتكون عين الله عليها و احيانا مدري شو بيصيرلي و بتتشقق

[ياسيه]

مبروك يا هنلي و الله حاسه فيج يا حبيبتي ....حتى انا عقدت حياتي البلاليط سهل موووووووووت بس عمره ما ضبط معايه و الادهى و الامر انه ابو العيال شيف من الدرجة الاولى في البلاليط شفتي الورطه

يالله مبروك عليج و عقبالي

[الجمان]

ماشاء الله..

عقبال ماأسويها وتضبط معي<<عمري ماسويتها لأني استصعب عملها وأخاف افشل..
بس شجعتيني ياهنلي..

كوبين ونص برغل تطحنيهن على تبعت البهارات مليح مليح لحد ما يصيروا زي البودره

معليش شو هي تبعت البهارات؟!

تسلم يدينك ..
الله يعطيك العاااافيه..

واخيرا زبطت معي احمدك يا رب طلعن متماسكين وحلوين ولا فيهن اي تشققات والفضل كله لبنات المنتدى

الفضل لله ثم لبنات المنتدى الله لايحرمنا منهم..

[HABOOBA]

اهلين هنلي
الكبة زابطة معك و الصورة شكلها بيشهي
اقولك على سر انا صرلي خمسة اشهر متجوزة بس يعني -- يعني-- اكتمي السر ها (هنلي اتق فيكي لا تقولي لحد) جديدة بي المطبخ ووووووووووووووووووووووووووووووووو
كمان ما بعرف اسوي الكبة لكن اذا طلبها زوجي" على طول الى طريقتك"
تسلم ايدك هنلى والله ابدعتي فيها

[وعود الخير]

مبروك هنلي...
ويا رب تزبط الكنافة النابلسية معي.. (فضحت حالي)

[هنلي]

اهلين بالغاليه احاسيس بس اخرتك رح تجربيها وتقولي مافي بعد شغل البيت

اهلين دودي ولو انتي ست المعدلات

اهلين ربوعه بتعرفي انا كنت اخاف زيك بس كنت اجرب وتخرب وضليت وراها لحد ما زبطت معي

اهلين لنوشه بس الصور هدول مش صوري ههههه شفتي اخذهتن من موقع يعني بس مش الكبه تبعتي لو تشوفي كبتي ما رح تصدقي اش ششهي كثير

اهلين اختي ياسيه انتي قصدك البلاليط الشعيريه يعني المعكرونه الرفيعه كثير بس بتكون حلو شوفي مش انتي بتحمريهن قبل ما تحطي ماء عليهن لما تحمريهن ما تخليهن يتلونن كثير يكونن غامقات خليهن شقر يعني بني فاتح وشوفي رح يزبطن مليح

اهلين اختي الجمان اختي شفتي المولينكس في وعاء كبير خلاط للفواكه والعصير وفي زغير للهيل والبهار والسكر
اطحني البرغل على الزغير وطولي شويه لحد ما يصيرن ناعمات زي السميد

اهلين اختي حبوبه انتي بس اول الزواج بتكوني تحرقي وتنسي طبخات ومقادير مش عيب كلنا في البدايه هيك بس في الاخر اتعلمنا مع مرور الوقت ورح تصيري معلمه بس انتي خليكي متابعه في الموقع ورح تصيري فنانه


اعترفي يا وعود ما زبطت الكنافه ليش انتي ولا تغلبي حالك ببعتلك اياها سخنه وبتمط لانه المحل جنب الدار بس ولا تتعب يا جميل

[ريتاج]

تسلم ايدك حبيبتى والله انا كمان لا اعرف أظبط الكبه ان شاء الله أجرب طريقتك

[الاميره الصاعده]

حبيبتى وانا ابد ماتزبط معاي لكن انشاء الله
بجرب طريقتك 00لكن ايش هوه لسان العصفور

[هنلي]

اهلين اختي ريتاج والله زي ما حكيت الي سنوات مش عارفه ازبطها بس هسه زبطت معي

اهلين اختي الاميره الصاعده انتي جربيها ورح تشوفي ولسان العصفور هو لحم مقطع زغير لحشو الكبه

[طيـــف]

اوووووووووووووووووو واخيرااااااااااااااااااااااااااااااااا

يسلمو اديك هنووووووووووووله

انا لو منك هلاء انتي جااااااااااااكري جوزك ووورييييييييييه الكبه

[(راما)]

مبروك هنلي ،،
دايمًا بسأل على طريقة الكبة و دابحة خالي بالمنتدى أسأل عنها و بالاخر ما بعملها ....
لسة خايفة و هايبة ما عملتها من يوم ما تزوجت...
بس رح يجي يوم و اجربها...
و ادعي للكل

بس ما قلتي هنلي قديش وزن البرغل و هل هو ناشف و لا منقوع يعني بتوزنيه قبل النقع و لا بعده و قديش بتنقعيه بالميه... يعني من الاخر التفاصيل