هديه لزوجي [الأرشيف]

هيونه

26-10-2002, 01:38 AM

مرحبا
بناااات انا كل عيد اشتري هديه لزوجي كم مره شرتله زرار حق الثوب او نعاله (كرمكم الله )
وابي اشترله شي جديد هالعيد والصراحه انا فكرت اشترله ساعه
بس اذا كانت عندكم افكار او اقتراحات ممكن تساعدوني فجزاكم الله خير W:

أم غانم

26-10-2002, 08:46 AM

ممكن اختى تشترين له حافظة للنقود اوميدالية وتكتبين عليهم اسمه او كنيته ...او تكتبين بيت شعر ..

بنت بلدها

26-10-2002, 09:18 AM

ساعه .................مره يستفيد مها ويذكرك كمان

عطر .............يكون راقي وريحته تفوح من بعد كيلو

أخلي الغيري مجال

تسلمممممممممممين

وردة الربيع

26-10-2002, 09:18 AM

هلا اختي هيونهW:
ممكن تشترين له طقم كامل عطر وكريم ومزيل عرق ومعطر للحلاقه
او ممكن طقم ميدالية وكبك وقلم ومسبحه

فراشه

26-10-2002, 11:31 AM

هلا اخت هيونه , ممكن تشترين لها قميص مع نكتاى حلووو يناسب لون القميص .

مصباح

26-10-2002, 03:54 PM

اخت هيونه دعوه على العشاء فى مطعم راقى بدون اولاد

إيمان علي

26-10-2002, 06:16 PM

هذه معاناتي دائماً.
زوجي لديه حساسية من العطر، نضع على هذا الخيار ×
أشتري له الملابس والأحذية دائماً، نضع على هذا الخيار ×
أشتري له ساعات كثيرة، يضيعها كل مرة، وهنا أيضاً ×
كل الأشياء الالكترونية المخترعة على وجه الأرض اشتراها، وهنا ×
والآن أنا تائهة، لا أدري ماذا أشتري له...؟؟؟

هيونه

27-10-2002, 12:59 AM

عزيزتي ام غانم العيد اللي طاف اخذت له حافظه نقود
بنت بلدها على فكره هو يحب عطر من اجمل ودايما يستخدمه اشترله واحد نفسه ؟؟
يعطيج العافيه ياورده ا لربيع وفكرتج حلوه
عزيزتي فراشه هو ما يلبس قميص يلبس ثوب
اختي مصباح الحمدلله دايما يعزمني على مطاعم وبدون الاولاد
عزيزتي ايمان زوجي تراه بعد ما يحب العطورات الاجنبيه اللهم عطر من اجمل ودهن العود فقط
انتظر افكار الاخوات فهل من مزيد :)

*كـراميل*

27-10-2002, 01:09 AM

شو رايج بسلسه لمفتاح السياره
ويكون مميز وانيق وحبذا يكون ماركه
حتى يتفخر فيه امام اصدقاءه واهله
:) الرجال يحبون السياره جدا
والرجال يحبون الاسترخاء كثيرا
شو رايك تضيفي كمان
رغوه للحمام وتكون عطريه وماء دافء :)
ممكن تضيفى للمجموعه
سلسله تتعلق على المرآه الاماميه للسياره
وانتى وذوقك ((فاجئيه بحركه لافته للنظر))

:) تحياتى

بريتي

27-10-2002, 08:25 AM

هلا بنات الله يعطيك العافيه اختي هيونه بصراحه موضوع كنت ابحث عنه
انا مابقيت هديه مافكرت فيها اوشريتها واحس بعضها هدايا قديمه ياليت في افكار جديده واخر مره شريتله شماغ اخر موديل مع ثوب تفصيل بمساعدة اخوي+قلم باركر
وبعدها خلصت افكاري ياليت يابنات تساعدونا الله لا يهينكم
وشكرا هيونهW:

- نواعس دامعة -

27-10-2002, 08:51 AM

اختي في العيد السنه الي فاتت

كنت معها في بي اتش اس برياض واشترت لزوجها من قسم الملابس الرجاليه في الدور الفوق لبس نوم قطني حلووو مع روب حمام وعطر منعش بعد الحمام

وغلفتها وكتبت كرت رائع فيه كم بيت شعر من تاليفها < الله يخلف علي ماصرت شاعره مثلها :D

كتبت برضو ابي اشوفه عليك :)

المهم ورتبت بيتها ونظفته ولليله العيد حطت هالهديه فوق مخدته والما جاء تفاجا بالهديه وبالمفرش الجديد عالسرير والشموع والعصير ودخلت عليه باكامل روعتها

عاد تخيلي كيف كان شكلهم صباح العيد تقولين عرايس لانها كان لليله حالمه وحلوه :)

الله يسعدهم ويسعد كل زوجين ان شاء الله :)

اتمنى اكون عطيتكم فكره اوسع عن لليله العيد يالليله العيد وهديه بسيطه وتسعد اي رجل :)

تحياتي

هيونه

27-10-2002, 03:50 PM

عزيزني كراميل المشكله ان مفتاح سياره زوجي ما يبيلها ميداليه لانها تشتغل بالليزر
وحلو فكره السلسله بس ماعرف وين احصلها ؟؟
بريتي اعجبتني فكره الشمااااغ وااااااايد
نواعس دامعه زوجي ما يلبس قميص نوووووم اذكر هالصيف يوم رحنا سوريا بايع المحل يقنع في زوجي يقوله خذللك قميص نوم حق البيت تراه مريح وحلووو قاله لا احنا ما نلبس هالاشياء كفايه الجلابيه

- نواعس دامعة -

27-10-2002, 06:52 PM

هلا عيني

مو قميص نوم :D

روحي الدور الثاني في محل بي اتش اس وشوفي قسم ملابس الرجال وبتفهمي علي

ملابس قطنيه للنوم وانيقه قدام الزوجه

مو الزوجه بس الي تلبس ملابس نوم علشان تسعد زوجها صح

اتمنى فهمتي علي :)

تحياتي لا الك

*كـراميل*

27-10-2002, 07:40 PM

نواعس الرجال ما يحبوا هالشغلات
الله الله بالوزار والفانيله او الجلابيه لؤؤؤؤؤؤل
:)
بس السلسه عيزتى هيونه من محلات السوع
واذا ما نفعتك الفكره لا تنسي سياره زوجك
ترى اكيد تحتاج لاكسسوارات وتنظيف وتعطير
والمدوسات ((قطع الزوليات تحت الاقدام )) كلها
اشياء جديده ومتوفره خلى حد من اخوانك يشترى
لك ياها لزوجك بما يناسب لون سيارته مع سلسله
لمرايه السياره :)

ما فكرتى تشترى له نعال ((من محلات فخمه المندوس او فارس؟؟))
واذا كان يلبس جوتى معين مثلا اشترى له

الريال تهمه كشخته وايد وسيارته
بتكون هدايا نافعه :) وبتفرحــه
:)

وعلى العموم طلبك هذا بيخليني ادور
بالماركات وبفتح موضوع قريبا
عن اهم افكار الهدايا :) ترقبي

ام وديمه

27-10-2002, 07:48 PM

مرحبا.....انا عندي فكره واتمنى انها تعجبك
اشتري سلسله فضه يكون فيها حلقه تفتحينها وتضعين صور اولادك فيها وتقدميها في علبه مبتكره .....عارفه شو قصدي قصدي القلب اللي يكون مخصوص لوضع صورتين ؟؟في داخله....وهو يخليه مفتوح ويعلقه بالسياره علشان يشوف اولاده على طووووووووووووووول
وما يتهور ويسرع هههههههههههههه ويفتكرهم على طوووووووووووووول ؟؟؟؟؟؟؟
:D :D :D

البشائر16

27-10-2002, 08:12 PM

انا ذوق زوجي بالمرة صعب حتى أنني أجرب أخذ رأيه , ايش رأيك بهذا وهذا حتى اعرف ذوقه و لكن لم أصل لذوقه .

الشعاع

27-10-2002, 08:25 PM

انا عندي فكره اله حاسب يحتجها كل رجال او دفتر انيق يناسب عمله او نوته انيقه للارقام الهواتف او جاكيت للبرد خاصه البرد علئ الابواب هاه ويشريكم

kwaiteyah

27-10-2002, 10:02 PM

انا صراحة اشتريت له مرة تليفون نقال بس على ذوقه....مرة اشتريت قطعتين خام دشداشة على ذوقه......وكل مرة اشتري له شي آخذه معاي لأنه ذوقه صعب اشوي والناس يقولون في احد يشتري هدية وياخذ صاحب الهدية معاه اقولهم ايه لأنه يمكن ذوقي ما يعجبه ....وكم مرة يسوي فيني هالحركة(ادري ماعنده ذوق .... بس يالله تقزر).....فكري بهالطريقة يمكن تنفع

باااااااااااااااااااااااااااااااااااي

هيونه

28-10-2002, 12:04 AM

نواعس دامعه انا فاهمه قصدك بس زوجي ما يحب هالحركات
كراميل اكثر الهدايا اللي عطيتها هي نعاله من تميمه وحبيت اغير هالمره
ام وديمه فكرتج حلووه بس ابي شي كشششششششخه
يعني يوم شرتله نعال قال حق بيت ابووه شوفوه زوجتي جابتلي هديه وكان الموقف حلو
لاني عرفت انه الهديه عجبته

هيونه

28-10-2002, 12:08 AM

عزيزتي الشعاع زوجي يحب الاشياء الكشخه
كويتيه صحيح ذكرتيني امس كان بقولي انه يبي يغير جواله بس الجواااال غالي وانا حدي 200ريال او 250 بس :)
بشاير الله يعننا على اذواق الريايل والله اني كل سنه قبل رمضان افكر في الهديه

الشعاع

28-10-2002, 02:56 AM

اريد الصفحه التاليه

بريتي

28-10-2002, 09:20 AM

الحمد لله ان فكرتي اعجبتك وايضا من بعض الهدايا اكسسوارات لجواله مثل الكرسي اللي يوضع عليه بدال ماهو مرمي وايضا اكسسوار يثبت في السياره يوضع فيه الجوال قريب منه بدال مايقعد يدوره وينشغل ولا يالله يطلعه من جيبه

ايضا تحفه فخمه مكتوب عليها شعر او كلام معبر

ومره اهديتله سلسله تعلق على المرايه الاماميه في السياره من الكروم (مايصدا ابدا) ومكتوب عليها اسمه وحرفي

وطبعا كل هذا بمساعدة اخوي حتى الثوب التفصيل سرقتله ثوب زوجي اللي يحبه ومقاسه صح وخليت اخوي يفصله من الاقمشه الجديده عاد هم رجال ويعرفون لبعض والله مايلبس الا هالثوبين اللي فصلتها له اعجبته مرررررررره

واسفه طولت عليك وشكرا

شهلاء

28-10-2002, 01:17 PM

يابنات ايش رايكم في النظارة الشمسية ,انا مفكرة اخذ له نظارة شمسية او جوال والله العالم اني ابختار النظارة لانها ارخص,مين منكم تعرف ماركات جديدة وحلوة.

ايمان علي :فيه تشابه بين زوجي وزوجك بشكل غريب ,العطورات تسبب له حساسية الساعات نفس المشكلة,الاجهزة الالكترونية متوفرة .
جتني فكرة في هذي اللحظة الطابعة قديمة وابيض واسود لو اشتري له وحدة جديدة ملونة,وبكون انا المستفيدة ,اذا طبعت الكيكات بالصور تفتح نفسي (كيد النساء)

- نواعس دامعة -

28-10-2002, 03:34 PM

نعال هههههههههههه والله شي كيف ضبطي مقاسه

الله يسعدكم مدري ازواجكم شايلن هم الهدايا مثلكم ولا في اسبع نومه :D

بالتوفيق ياحلى حبوبات :)

هيونه

29-10-2002, 04:05 PM

بريتي اشكرج عزيزتي عالافكار الحلوه
شهلاء فكررررررتج رووووووووووووعه والله ما جات في بالي النظاره الشمسيه حتى هو ما غير نظارته من سنه صج انج خطيررررره ويلادورلي على ماركه بس رخيصه:D
نواعس دامعه مسكين كل عيد يعطيني 500 ريال ودايما يوقلي ابي اخذ لج هديه بس اخاف ما تعجبج ومره بس جابلي طقم ذهب :p
تدرين كل ما اشوف نعالته (كرمكم الله ) عشان اشوف المقاس ما يبين
بس مره قلتله اخوي شرا نعاله ويبدي يرجعها تبيها قالي كم مقاسه قلتله 9 ونص قالي لا انا مقاسي 10 وما صدقت ثاني يوم رحت واخذت له النعاله ( قصه اخوي تاليف من عندي عشان يقولي كم مقاس رجله:D :D )

فوفو العسل

29-10-2002, 06:23 PM

اهدي له قبله ساخنه من قلب محب ويحمد ربه وخلاص طالما كل شي عنده

هيونه

30-10-2002, 12:29 AM

فوفو العسل الهديه لها معنى ومكانه ثانيه و الريال يفرح يوم زوجته تهديله الهديه
والهديه مب كل يوم تعطينه الا في المناسبات اما القبل فعادي كل يوم :)

قطوطتي

30-10-2002, 04:37 AM

اشتريله عطر هديه مميزه مرررررررررررررررررررره:cool: :cool: :cool:

دانةالكويت

30-10-2002, 12:25 PM

انا بعد ابي هدية فكرولي بس انا ماقصرت الافكار اللي قلتوها كلها خذيتها له من قبل والحين فلست افكار :(

مرة اخذتله قلم ..... وكريستالة تتعلق بسيارته من شواروفسكي (ترى حلللللوة الفكرة ...... جربوها) .... ومرة اخذت له غترة وعطر ..... وساعة غالية اخذتله بعد ..... شنو بقى ؟؟؟ الملابس اخذتله اكثر من مرة ومقاسه صعب مو دايمن القاه ...... شنو بقى ؟؟ موبايل ماينفع لأن موبايله يديد احدث موديل ماينفع يغيره الحين ....

الافكار اللي في بالي الحين يمكن اخذله بوك وميداليته او يمكن افصل له دشداشة بمساعدة الوالد اهوه اللي يعرف حق هالاشياء .. والنظارة الشمسية ماقدر اخذله اخاف ماتطلع حلوة عليه لازم يجربها اول وجذي ماتصير مفاجأة .... والنعال تكرمون مقاس ريلي صعبببببببببب ما اييبون منه Big size والله مرة قعدت ادورله نعال حفيت ولا لقيت :( افكر بشي ثاني احسن ....

هيونه

31-10-2002, 12:17 AM

عزيزتي قطوطتي هو ما يحب العطورات وااايد
دانه الكويت ترا فكره النظاره الشمسيه عجبتني وايد شرايج تاخذينله

دانةالكويت

31-10-2002, 08:43 AM

فكرة النظارة حلوة بس اخاف اختارها وماتناسب ويهه لازم اهوه يجربها قبل :(

الموقعة أدناه

31-10-2002, 09:24 AM

انا صراحة مب متزوجة بس عندي أفكار مخزنتنها في راسي علشان بعدين :)
و يا ريت تستفيدون منها مثل ما استفيد منكم؟
لاحظت ان كل هدايا الرجال مكررة و ما فيها تنوع مثل هدايا الحريم
فهي يا عطر، دشداشة،ساعة و مثل هالاشياء
شو رايكم بهالافكار ، ممكن تهدينه كتاب أو مجموعة من الكتب
ممكن بدلة رياضية علشان تشجعينه عالرياضة ،
و ممكن معاها ووكمان مع شرايط علشان يستمع للشرايط و هو يمشي ..
و ممكن كرسي مساج يركبه في السيارة ،
ان عجبتكم عالافكار ممكن اعطيكم اكثر