©ˆ~*¤®§©]§]..... كلام نواعــم .....لدردشه سيدات المطابخ §]§[©§®¤*~ˆ© [الأرشيف] - صفحة 10

بنت ارض الحضارات

12-09-2005, 03:36 PM

السلام عليكم ورحمة الله وبركاته
مبروك عليكم وعلينا وعلى كل شريف وغيور التحرير والفال ان شاء الله لكل ارض مغتصبة. والله لا ادري ما اقول ولكن يكفي ان الفرحة تخترق كل حد وتهز كل غصن زيتون وتميل لها كل سعفة نخيل.
اتم الله الفرحة للجميع وجمعنا وياكم وامة المسلمين في مستقر رحمته..
ادعو لاهلنا في العراق...

momamybaby

12-09-2005, 04:36 PM

مساء الخير على كل الحلوين

الف الف الف الف الف مبروك على النصر والتحرير وعقبال تحرير كل اراضى فلسطين

انا كتير مبسوطه على التحرير ومبروك لك يا وعود ويا رندوش هاى احلى عيد بالنسبة لنا . انا من امبارح عم تابع بالتلفزيون انسحاب هالجبناء وبشوف الفرحة بعيون كل فلسطينى

ذكرتونى بتحرير جنوب لبنان كانت فرحة ما بتوصف

حبيت امبارك واهنئ كيف اخباركم اشتقتلك يا وعود واشتقت لرندوش

وكيفها طيف حبيبتى اشتقتلك كتيير وكيفك ام سمية وبنت ارض الحضارات والله غبت عنكم كتير شو بدى اعمل ما توقعت انو المدارس متعبه هيك

بالنسبة لبنتى اول يوم مدرسة كانت تمام ما بكيت مع انها اول سنة ليها بالمدرسه اول روضة
بس المشكله تانى يوم بكاء وصريخ الله يساعدنى وما بدا تروح المدرسة هاى بقالها اسبوع بكاء وصريخ يوم انا اوديها يوم ابوها

Em zaid

12-09-2005, 06:31 PM

الله اكبر الله اكبر
مبروك للشعب الفلسطيني
مبروك لاهل غزة
مبروك لامهات الشهداء
مبروك للشعب المناضل المجاهد
وعقبال ما تتحرر باقي الاراضي الفلسطينية
كل شبر بفلسطين ان شاء الله

الخنســـــاء

13-09-2005, 08:23 AM

السلام عليكم ورحمة الله وبركاته

نواعم اشتقت لكم مرّه..

((وعود الخير،طيف،جبل النور،سوسو فو، الفتاة الطويلة، رندوش،كريس..))

بصراحة لا ادري ماذااكتب.. في هالاجواء..

اجواء فرح.. ولكنها خالطت الدموع ..

لعلّها دموع فرحة بتحرير جزء من ارضنا الغالية وقد تكون دموع حزن.. لمابقي من اراضينا بقبضة القردة والخنازير..

هنيئاً لكم الأجر.. يا اهل فلسطيـــــــــــــــــن

وفقكم الله ونصركم نصراً مؤزراً

نور لك

13-09-2005, 08:35 AM

الى امهات واباء شهداء فلسطين

الى كل ابناء شعب فلسطين

الى كل ابناء الوطن العربي الكبير

الى كل ابناء العالم الاسلامى

ابعث اليكم بتهناة حب وفرحة

بمناسبة تحرير غزة الحرة العربية

والبرقية القادمة ان شاء الله تعالى

ستكون يوم تحرير الضفة الغربية

يوم ان تدعوننى للصلاة فى القدس

الحمد لله الحمد لله الحمد لله
الله اكبر الله اكبر الله اكبر

الخنســـــاء

13-09-2005, 08:39 AM

والبرقية القادمة ان شاء الله تعالى

ستكون يوم تحرير الضفة الغربية

يوم ان تدعوننى للصلاة فى القدس

الحمد لله الحمد لله الحمد لله

الله اكبر الله اكبر الله اكبر

ان شاء الله

نسال الله ان ينصر المجاهدين في كل مكان النصر المؤزر .. وان يرد كيد الكفار الى نحورهم

رندوش

13-09-2005, 08:49 AM

صباح الخير للجميع
شكرا كتير للمشاعر الجياشه للجميع
لا يسعني الفرح وانا اقرأ ردودكم كم انتم متعاطفين معنا
اللهم فرج هم المسلمين ولا تجعل مصيبتنا في ديننا
وعود نيالهم شافو الارض المحرومين منها ولم ندخلها طيلة38 سنه
بلادنا بلاد خير و مباركه الله يتمم علينا الفرح بالنصر الاكبر

بنت ارض الحضارات شكرا كتير ان شاء الله ربنا يرد الاعداء عن

العراق الحبيب و ينصر شعبها اعانهم الله
momamybaby كان الله في العون
شكرا لك على التهنئه والله عليك وحشه كبيره
المدارس متعبه بس احسن من الاجازه فيها نظام اكثر وترتيب
ام زيد مبروك لينا كلنا ويا رب لم شمل الفلسطينيه على ارض فلسطين المباركه
الخنساء شكرا كتير و بارك الله فيك
كريس شكرا كلامك معسول زيك و انتي اول المدعوين حضري حالك الباص جاي ياخدك تصلي
الفرج قريب ان شاء الله
الخنساء النصر للامه الاسلاميه و العربيه
وكان الله في عون المجاهدين وحماهم الله

رندوش

13-09-2005, 08:50 AM

كيفكم صبايا اكلتم كلكم شوكلاته ولا فيه حد ما اتحلى
وينكم مش شايفه حد
وعود ما تكوني رحتي الاراضي المصريه من وراي و ما اخدتيني هناك

ام سمية

13-09-2005, 08:57 AM

الله يسعدكم يا حبيباتي
اليوم ان شاء الله ستأتي امي وابي لزيارتنا لم ارهما من سنتين
ادعوا لهما يصلوا بالسلامة
اختكم

رندوش

13-09-2005, 09:14 AM

صباح الخير ام سميه
الله يلم شملكم على خير ويسعدكم ويبعد عنكم الحاسدين

ام مودي

13-09-2005, 09:14 AM

الله اكبر الله اكبر
الف الف الف مبروك حبيباتي والله فرحت من قلبي الكم عقبال ما تتحرر فلسطين كلها ياااااااه ما اجمل النصر و التحرير شعور لا يوصف اكيد
الحمدلله رب العالمين والله مش عارفة شو احكي بس جد فرحت من قلبي

رندوش..شوكولا لذيذة تسلم ايديكي

رندوش

13-09-2005, 09:27 AM

ام مودي شكرا وصحتين عليك
اتفضلي زورينا صرنا محررين هههههههههههه
ما في خوف من اليهود

وعود الخير

13-09-2005, 09:46 AM

ام سمية ربي يهينك خلاص هاليومين باحكي معك ومع الوالدة... ربي يسعدك .. انبسطي اخذت اجازة من المطبخ.

ام مودي.......... هلا والله .. شفت صارت غزة محررة يالله شدي الهمة وقولي لزوجك مابدك تشوف بلدك الاصلي..

بنت الحضارات .. عن قريب ان شاء الله تعالى نبارك لكم بتحرير العراق... تسلمي يا غالية يا بنت الاصول

الخنساء.... واحلى تحية من غزة المحررة للعربية السعودية... وقريبا ان شاء الله في القدس ..

رندوش.... يسعد لي هالصباح... يا قمر ..
ما رحت زوجي ما رضي .. قال بس اروح انا بتروحي انت..
ابني وصل بعد صلاة العشا.. مهدود.....بس مبسوط وطول الليل يقاهرني لانه شاف الارض وانا لأ.

رندوش

13-09-2005, 10:17 AM

وعود عاشت فلسطين حره ابيه
خلاص حضري حالك بمر عليك وباخدك بس للاسف ما بعرف اسوق
ممكن على البسكليت اجييييييييييييييييييييييييييي

وعود الخير

13-09-2005, 11:11 AM

مش اشكال رندوش جيبي السيارة وانا باسوقها .
محسوبتك معلمة سواقة خبرة اكثر من عشرين سنة..

والا اقول لك بنستلف سيارة جبل النور اللي راح تشتريها...

رندوش

13-09-2005, 04:26 PM

خلاص حضري نفسك انتي وجبل النور
وما تنسي خدي المايوه معك بس اوعي طيف تسمعنا ههههههههههههههه

fantasy

14-09-2005, 05:50 AM

مني لكم اقدم احر التهاني بمناسبة تحرير غزة واهل غزة وعقبال كل البلدان
العربية المحتلة ومليون زغروتة لكم عزيزاتي في هذة الفرحة الكبرى التي اغمرت
قلوب الناس بلفرحة والسعادة واللأطمئنان مبروووووك
http://www.lakii.com/img/all/Sep05/BITlO209132100.jpg

اخواتي حبيت ادخل كلام نواعم واهنيكم فردا فردا
عموما انا ما بدخل كتير هون بس من فرحتي دخلت وهنيت وسلام لجميع بنات كلام نواعم :-D :D

رندوش

14-09-2005, 09:11 AM

فنتاسيا صباح الخير
شرفتينا بردك الجميل وحضورك على الدردشه
ما تقطعينا حياك الله

momamybaby

14-09-2005, 09:20 AM

صباح الخير على اهل التحرير والنصر والعروبه حبيت اصبح عليكم

اشتقتلكم كتير

كيفك حبيبتى رندوش

وكيفك مع التحرير

رندوش

14-09-2005, 09:23 AM

momamybaby صباح الورد على الحلوين يا رب
التحرير عامل عمايله ما النا شغله غير فلان طلع العريش
فلان راح البحر مش ملحقين حكي نساويننننننننننننن
بس الفرحه ما بتكلم الا بخروج الاسرى وتحرير القدس
ان شاء الله

momamybaby

14-09-2005, 09:29 AM

آمين يارب العالمين

وكيفها وعود الخير كيفها مع التحرير

وما فى اخبار عن طيف

وعود الخير

14-09-2005, 09:53 AM

السلام عليكم ورحمة الله وبركاته

احلى يوم لما فانتي تنضم لكلام نواعم .. نورت وشكرا لك الفرحة واحدة بس ناقصة
فرحتنا لما تتحر الضفة والقدس وتفضى السجون من اسرانا البواسل..

مامي.. ربي يسعدك حاسة بفرحتك لان فرحتنا كانت كبيرة بتحرير الجنوب وتمنينا اليوم اللي نتحرر فيه والحمد لله
وان شاء الله تتحرر بقية اراضينا..

رندوش.... رحت نتساريم و3 ساعات وانا الف فيها ياسلام ...بس سي السيد ما رضي نروح العريش
قال راح ياخذنا على دوغيت وايلي سيناي

يا قلبي على ام نضال فرحات باتخيل شعورها لما تزور مكان استشهاد البطل محمد .. رحمة الله عليه وعلى جميع شهداءنا..

وعود الخير

14-09-2005, 09:58 AM

أحلى تحية وأحلى باقة ورد من ضرتي الغالية طيف
قبل شوية كانت معي على التلفون وبتهني نفسها وبتهنيكم يا بنات غزة بالتحرير
وسلام خاص لرندوش الغالية..
وبتعتذر عن عدم تواجدها بسبب انشغالها في العمل

في انتظار رجعتك يا احلى درة.

رندوش

14-09-2005, 02:28 PM

وعود سلامي لطيف زعلانه منها لا حس ولا خبر
طيب بس علبة شوكلاته او طبق سلطه انملح فيه بعد الشوكلاته
كيف وعود المناطق المحرره شي حلو وكتير كبيره
بس لو في وقت لرحنا العريش وشربنا عصير قصب ممممممممم
يلا خيرها في غيرها
وين جبل النور ما تكون راحت العريش و مش قادره ترجعععععععععع
سلامي لاحلى بنوتات

وعود الخير

14-09-2005, 02:41 PM

شفت يا رندوش الصبايا اكلوا الشوكلاته ولا حس ولا خبر
خلينا نروح نشوفهم في العريش...
على الاقل بنكسب اكلة سمك مشوي.

وَطَن

14-09-2005, 02:57 PM

اخيرا ،،،،،،
كيفكم وحشتونى والله بس المشكلة الجهازما بيكتب عربى، بس أخيرا مشى الحال ،،،
صدقوا بدى أروح أتفرج مالى قلب،،،،،،
بس يوم مافتح المعبر أخويا اتصل يسألنى جاى على بالك شئ من العريش قلتله باكيتين شيبس من الكبير لو سمحت
والرجال ما صدق خبر وأنابفكر بيمزح معى وإلا امبارح باعتلى إياهم،،،
طيب يا وعودة,,, بس السيارة حتيجى يعنى حتيجى :D
رندوش يا قمر منورة والله، يا سلام عن حاسة الدنيا شوى حلوة الحمدلله، الله يرحم شهداءنا يارب فكركم بيحسوا
فينا وانه غزة خلاص اتحررت ،،،
شكرا لكل الصبايا اللى هنونا والله يكمل حرينا وحرية أسرانا يارب ،،

وعود الخير

14-09-2005, 03:06 PM

ارواحهم بتحس يا جبل النور .,... الله يرحم اخوك .. دمه ما راح ببلاش..

وبعدين يا مفترية اكلت كيسين الشيبس لوحدك؟؟؟؟؟؟

nadabibi1

14-09-2005, 07:37 PM

:K) :K) :K) momkine acharike ana jadida hone machokorine wellahi

وعود الخير

14-09-2005, 07:37 PM

السلام عليكم يا احلى صبايا
:-D
بشرى سارة ازفها لكم ws:-)
اختنا الغالية kris - كريس
غيرت اسمها واصبح نور
وكي تتعود على اسمها الجديد فسوف ندعوها اسم نور

ونسأل الله تعالى ان يجعل لها نورا يهديها الصراط المستقيم

والآن فلنهنئها على اسمها الجديد ...::L::

الف مبروك يا نور.... في ميزان حسناتك ان شاء الله تعالى

وعود الخير

14-09-2005, 07:39 PM

الآخت ندا بيبي
اهلا وسهلا بك اختا معنا
تفضلي مشاركتنا دردشتنا واطباقنا

Em zaid

14-09-2005, 07:44 PM

مبروك لكريس تغيير الاسم
بس انا مو فاهمة الصراحة
غيرت اسمها في المنتدى ولا اسمها كريس اصلا
وغيرته فهموني

وَطَن

14-09-2005, 10:59 PM

السلام عليكم ورحمة الله وبركاته
مرحبا
وعود لأ معئولة اكلها لحالى برضه،،، رنا كانت معايا :D
أهلاً بالضيفة الجديدة نورتينا،، ونورتى النواعم :-D
كريس الحبيبة حمدا لله على سلامتك يا قمر وزين :-s ما إخترتى يا أحلى نور والله بيجنن هالإسم وأنا بحبه جدا جدا جدا
أم زيد أنا اللى بعرفه إنه كريس اسمها كريستين الحقيقى (بس ما يكونش حلم :D ) وكانت لو بتتذكرى مرة بدها تغير الإسم وسألتنا نرشح لها أسماء،،
بس فى انتظار كريس إن شاء الله بتوضح أكتر
سلام

رندوش

15-09-2005, 09:02 AM

جبل النور صباح الخير
مش تقولي فيه حد اكل شكلاته وعايز يملح بشوية شبس كده الصداقه والاخوه
بس صحتين على قلبك
نور مبوك عليك الاسم كتير حلو و الله ينور طريقك للايمان
صبايا كيفكم
ام زيد كيفك اشتقنالك
طيففففففففففففففففففففففففففففففففففففففففففف
زعلانين منك ما جبتي شوكلاته تحلينا

وعود الخير

15-09-2005, 09:26 AM

اسلام عيكم ورحمة الله وبركاته،،
ايوا هيك يا صبايا رجعت اللمة الحلوة من جديد

ام زيد مثل ما قالت جبل النور.. كريس اسمها كريستين واخيرا والحمد لله غيرته رسميا لنور لهيك بندنا نناديها نور علشانت تتعود عليه..

تحياتي للجميع ... جبل النور اكلتيه انت ورنا !!!!!!! صحتين وعافية .. والبقية والا يا حرام كانوا ملهيين بالشوكلاتة وبس.
فضي الرسائل اللي عندك شوية بدي ابعث لك رسالة.

وَطَن

15-09-2005, 11:26 AM

صباحكم سكر يا نواعم
شكولاتة مين والله ما حدا داقها يا اختى ،، إلا يمكن الباشا من ورايا ،،
بعدين يا دوب يكفونى هالكم باكيت وين ولاوين بدهم يروحوا،،، :D
بعدين أنا معنديش رسايل علشان أفضيها

وعود الخير

15-09-2005, 12:32 PM

جبل النور .. حاولت ارسل لك على الخاص ما قدرت لانك تجاوزت الحد الأقصى ...
حاولي تلغي كم رسالة لو كنت أون لاين.

نور لك

15-09-2005, 06:18 PM

يسعد صباحكم احلا صباح يا وردات لك ...

كيفكم كيف اصبحتو ؟؟

تسلمولي والله يبارك بعمركم واشكركم على تشجيعكم المستمر بكل نواحي حياتي المطبخيه والخاصه .. الله يسعدكم وما يحرمني منكم قولوا اميننننن..

وعود والله ما في مثلك يا عمري انتي احرجتيني بكلامك الحلو ويا رب اقدر اردلك ياها بالافراح يا رب ..

ام زيد يا سكره وينك مختفيه اشتقتلك والله .. ومضبوط كلام جبل النور بالنسبه لاسمي .. عم جرب اتعود عليه ..

جبل النور يا كل النور بس انا اخذت شوي من نورك ههههه كيفك يا البي الله يسلمك يا رب ..

رندوش السكره كيفك حبيبتي .. اشكرك على تشجيعك ..

بس تعالو هون شوكلاته شو هاي من وراي مش عارفين انه نور موت قلبها الشوكلاته . وانتو نازلين اكل .. حرام عليكم ..

طيف يا حبيبت قلب منجتك طلي علينا بنورك والله الك وحشه ..عم استناكي تقولي للصبايا على قصتي مع الغريق..
يلا تعالي ..

شو طبختو اليوم او شو طابخين والله محتاره حيره ما الها زي...........ز

تحياتي يا قمرات

وعود الخير

15-09-2005, 09:46 PM

هلا نور.... قبل شوية خلصت عمل العرايس
تفضلي انت والصبايا ..
طبعا في تبولة ولبن اب ...
شرفونا

طيـــف

16-09-2005, 06:24 PM

السلام عليكم ورحمه الله

كييييييييفك حالهم

ياعليييييييييييييييييييييييييكم شو اشتقت لكم وحده وحده

بس خليني اراضي الزعلان اول؟

رندوش تؤؤؤبري قلبي لاتزعلي والله مامنعي عنكم الا الشديد القوي
واسالي وعود ونور لانه كنت مشغوله كتير بمقر تاني غير مقر دوامي

المهم الف الف الف الف الف مليون تيلون مبروك
عقبال باقي الاراضي يارب
جد قلبي معكم وفرحنا لكم من كل بد

نور شو هالاسم الحلو يامنجتي؟
الف الف الف مبروك الاسم الله ينور ايامك وقلبك يارب
حبيبتي منجتي هلاء بعضك:) طولي بالك ورح احكي لهم قصتك صوت وصوره:D

وعود
يعني جد مافي كلمه توفي حقك
الا الله يخلي لي ياكِ يارب
اصيله والله وكل يوم مكانك بقلبي بعششششششششعشششششششششششش:D

جبل النور
مبروك حبيبتي:) شو القصه فيها سيارات وميوهات وسباحه
من وراي:D

ام عمر
حمدلله على سلامة ماما وبابا
الغايب الك والهديه النا:D
الله يخليهم الك يارب ويطول لك بعمرهم حبيبتي
ديري بالك عليهم وابسطيهم مضبوط
ترى دعوتهم والله بالدنيا كلها

ماماي
كيفك ياحلوه؟
ولك اشتقت لك واشتقت لقصصصصصصصصصص بنتك بالمدرسه
اول يوم المدارس رحت مع ابن اختي الروضه
ييييييييييييييي انوجع قلبي وطلعت ماقدرت اتحمل صوت البكي والصراخ

مين كمان
خنووووووووس
خنساء حبيبتي هلا وغلا فيكِ ياقلبي
وشكرا على السوال
طمنينيا عليكِ؟

يلا صبايا احكو لي شخباركم
مشان اقولكم خبريه حلوه عن التنحيف
:)

وَطَن

16-09-2005, 07:59 PM

وعليكم السلام ورحمة الله وبركاته
هلا بطيف حمدالله على السلامة ليكى وحشة يا قمراية،،
الله يبارك فيكى يا طيف ، أما السباحة هادى من رندوش أنا بخاف ولا عمرى سبحت يااختى
يمه أنا اسبح.......مستحيل

وَطَن

16-09-2005, 08:04 PM

نور ياأحلى نور تسلمى يا قمر،و حمدالله على سلامك منورة ومبارك الإسم الحلووووووووو :-s

وعود الخير

16-09-2005, 08:07 PM

يوم الجمعة يوم مبارك
ويوم الجمعة يوم فرحتنا برجوع الغالية اللي نورت الدردشة

احلى طيف والله ..
جبل النور انت تعي بس وانا باسبح عنك ولا يهمك ..

وعود الخير

16-09-2005, 08:14 PM

رندوش.....:-X

شو وصلت العريش والا بعدك؟؟؟؟؟؟؟؟؟؟؟؟؟؟؟:[MM

طيـــف

17-09-2005, 12:33 AM

هههههههههههه ضحكتيني ياجبل نور

جد مابتعرفي تسبحي؟

!!!!!!! معقول مابتبحبي السباحه!

ييييي تعي شوفي احنا مغامرات عنا بالسباحه

ولاواقولكم البطله العالميه بالسباحه نوووووووو والانقاذ

:D:D:D:D:D: تشويق

طيـــف

17-09-2005, 12:35 AM

وعود ياحبيبتي

الله يبارك فيكِ وفي طلتك البهيه

طبعا المباركه مابتكمل الا بحضورك ياقمرنا

fantasy

17-09-2005, 07:07 AM

السلام عليكم ورحمة الله وبركاته
صباح الخير يا صبايا نواعم هيني كلحت وفوت الدردشة بس مش عشان ادردش نوووو
بدي اشكر اول شي الغاليات على قلبي الي رحبو في احلى ترحيب سمعتة بحياتي حبيبتي ومشرفتنا الغالية وعود واللأخت الغالية رندوش ويا رب يخليكم حبيباتي
وكمان بدي اهني نور بتغير اسمها بس انا بدي حقي من نور باختصار بدي جاجة وكماجة ويلا هلاء بزعل منها وبدي اياهم يوصلو فريش او علبة شوكولاتة من النوع المليح وعود او اي وحدة من بنات نواعم معلش لو بدي اغلبكم معي وصلو
طلبي لنور مع الشكر طبعا وطبعا معروف هيك شي يوم ما بترجعلنا طفطوف احلى يوم منورة بطلتها اليوم يا 100هلا برجعتك الينا وسلام حار كل النواعم فردا
فرداi love you all :-r

momamybaby

17-09-2005, 09:56 AM

صباح الخير على الحلوين

كيفم يا فانتسى اشتقنالك كيف احوالك

الف الف مبروك يا كريس على الاسم الجديد نور انشالله ايامك كلها نور بنور

صباح الخير وعود الخير اشتقتلك

كيفك طيوف شو هالغيبة اشتقنالك

رندوش كيفك اشتقتلك كتير

واشتقت لأم مودى وام سمية كيف اخباركم

شو عاملين

وعود الخير

17-09-2005, 09:31 PM

السلام عليكم للجميع
معلش تأخرت عليكم كثير اليوم
بس اعذروني والله مشغوووووولة
ضغط الشغل وكمان في مفاجأة حلوة ان شاء الله تعالى راح تعجبكم ..
المفاجأة في طريقها اليكم .. فقط انتظرونا.:(*):

tufee

18-09-2005, 10:32 AM

تحية حارة لكم
مامي صباح الخير
فانتزي صباح الخير والياسمين
جبل النور صباح الفل
رندوش صباح المسك والعنبر
طيف صحصح صحصح يا جميل
صباح الخير لوعود القاردينيا والزهور المعطرة
صباح الخير يا نور الشمس
يصبحكم بلخير يا احلى نواعم

وعود الخير

18-09-2005, 11:56 AM

السلام عليكم ورحمة الله وبركاته،
كل المراحب الاخت التي انضمت لنا الاخت توفي
واو شو اسمك لذيذ...

نورت يا اختي واهلا وسهلا بك في دردشة نواعم..

صباح الخير....

رندوش.... شو وينك.. صار لازمك ألوووووووووووووووووووووووووو

نور لك

18-09-2005, 10:43 PM

السلام عليكم ورحمة الله وبركاته

يسعد صباحكم ومساكم يا حلوين يا احلى امامير نواعم .

اشكركم كل الشكر والله يبارك فيكم يا رب والله يقدر عائلتي على التعود على الاسم ..
بنتي كانت عم تقترح نورين علشان يكون على وزن اسمي .. شو قولكم وهل له معني بالعربي؟؟؟

طيف يا قمر طلتك بتجنن دخيلك ما تحرمينا منها.. بانتظار قصه نور مع البحر ههههه .

جبل التور يا كل النور انتي كيفك ..

فانتسي حبيبتي ولك كلك ذوق وواجب يخليلي ياكي يا رب . بس تعالي هون قوليلي مين اسمه نور عندك حتى بدك مني الجاجه والكماجه ؟؟؟؟؟؟؟؟

momamybaby هلا عيوني تسلمي يا قمر الله يسعدك

وعود حبيبتي يعطيكي الصحه والعافيه يا رب بدك مساعده شي؟؟؟

توفي يا توفي عن جد اسمك لذيذ يعني ممكن شي يوم تيجي تلاقينا اكلناكي ههههههه حبيبيتي 100 اهلا والله نورتي يا قمر

رندوش وينك حبيبيي طلي علينا بطلتك البهيه ..

بنات اليوم ليله نصف شعبان .... شو بتعملو بهذه الليله ؟؟؟ افيدونا افادكم الله ..

بدي اقوم اعمل كنافه الفقراء اصلي معزومه على بط ووز وعلي انا اعمل الحلو .. تفضلو حبيباتي .

تحياتي لكم اشوفكم على خير .

رندوش

19-09-2005, 08:34 AM

صباح الفل والخير والخيرات
شو مالكم نايمين
انا رجعت بالسلامه يلا هنونييييييييي
رحت زرت رفح (بس الفلسطينيه مش المصريه) بس انبسطنا طول الطريق
من زمان ما رحنا رفح من قبل الانتفاضه كنا خايفين
الاولاد لعبو في المطار و قالو امتى ترجع ايام الطيرانننننننننننننننن الله يحرمهم اليهود نور عنيهم
المهم كنت مشغوله جاييني ضيوف مهمين و عملتلهم شوية حلويات بس الصحيح طلعت خطيره
و طبعا الفضل لبنات المنتدى من تعليمهم وذوقهم
دوشتكم باخباري لاني اشتقتلكم
اليوم صايمه انا والعيله كلها الله يعينى ويتقبل منا
بدي اطبخلهم ملخيه و دجاج
شو عاملين انتم

أم الأفكار

19-09-2005, 08:55 AM

صباح الخير عالجميع صدقوني قعدتكم حلوه وباتندم اني من اول ما دخلت في هالدردشه

مو مشكله ملحوقه ان شاء الله

كيف اخباركم طيف شو اخبار اختك انا اسفه كتير رقمها انمسح من جوالي في الاردن لما غيرت البطاقه

هي لسه ما ولدت ؟

ابعتيلي رقمها لو سمحت

وعود شو عامله يا رب السنه نشوفك بغزه صدقيني ذكرياتي في غزه ما بتخلص 5 سنين بالجامعه الاسلاميه

بس الحلو انه احنا الرعيل الاول اللي تخرجنا منها كانت لسه مباني جديده وقليله كتير

وصاحباتي من غزه كتير ومن خانيونس احلى ايام ياريت يرجع نص يوم بس منها

اتفضلوا معي عامله اسبوع نظافه بالبيت بمناسبة رمضان الثلاجات والفريزر والبلاوي كلها عملية فرز

انا عندي طاوله صغيره في زاوية المطبخ عارفين شو باسوي في رمضان

باحط كل اغراض الشوربه في مرتبانات عالطاوله (فريكه _عدس _جريش _لسان عصفور .....الخ ) وباخليهم بره

للاستعمال السريع شو رايكم بهالفكره

بعدين في فكره اخطر ياعيني عارفين اشتروا صحون بلاستيك وكاسات للاكل طول رمضان انا لسه ما طبقت الفكره

بس ان شاء الله حاطبقها بتريح من الجلي بعد الافطار والصحون والكاسات مش غاليه بس الشوربه صحون زجاج

زالملاعق طبعا عاديه بلاش بلاستيك يعني صحون اكل وكاسات عصير صدقوني بيخف الجلي كتير

تحياتي للجميع

أم الأفكار

19-09-2005, 09:00 AM

هلا برندوش الظاهر كل الناس راحوا العريش

اخوتي واخواتي كلهم راحوا بس بعد هيك خلص سكروا الثغرات

صوما مقبولا يا ستي ويارب السنه نروح عالمطار عارفه ابن اختي شغال في المطار وابن عمي كمان يعني النا عزوه

هناك ما صدقنا سنتين بس روحنا عليه بعدين خلص يارب السنه يرجع

صحه وعافيه لضيوفك الحلويات ولا تقولي تبعتيلنا قطعه يا وحشه ما احنا برضو حبايب

وين جبل النور شو اخبارها ؟

رندوش

19-09-2005, 09:02 AM

صباحك فل يا ام الافكار
شو انتي من سكان غزه ولا من الزائرين والدارسين في جامعاتها
الجامعه الاسلاميه صارت كتير حلوه وكبيره والله عن جد عريقه بعلمها و مبانيها ممتازه
افكارك حلوه بس مين يقبل ياكل بصحون بلاستك لازم الطقم كله ينزل آآآآآآآآآآآآآآه
و طول الليل جلي
بفكر بفكره حلوه اشتري جلايه
مين بتنصحني و شو الماركه او النوعيه
كل سنه على رمضان بقول بدي اشتري وبيمضى رمضان وانا مش شاريه
ان شاء الله بتحقق الحلم مثل ما زال الاحتلال

رندوش

19-09-2005, 09:05 AM

اهلا وسهلا ام الافكار بعرفك ما بتحبيي الحلوياتتتتتتتتتتتت
انتي من اصحاب الموالح هههههههههه
ولو كل الحلو الك
انتي تعي وشوفي الاستقبال بالفدعوسس و لا يكون لك فكره
ما بعرف شو اخبار جبل النور بتغطس ما يكون راحت العريش و تركتنا نتحسر

وعود الخير

19-09-2005, 09:30 AM

يا صباح الرود . مين ام الافكار في حيينا يا ميت مرحبا
والله لتييجي غزة لاوصلك طيران للدير.. .. خلاص طريق صلاح الدين رجع يشتغل عن قريب ان شاء الله ، كلها خمس دقائق وانا عندك.. واشوف الشعنونة اللي مجنناني.....وفتفوتة.. النعومة...

رندوش .. بركة اللي طليت .. شفت العرض البارحة .. بيجنن صح..

ام الافكار لو تشوفي الجامعة اليوم ما بتعرفيها ما شاء الله صرح ولا جامعات اوروبا... فشر.. مين أروبا هيا .... جامعة الياسين احلى مليون مرة..

صباح الخير للجميع .. واعذروني ما راح اكون متواجدة كتير معكم اليوم...
وصوم مقبول للجميع
انا بكرة راح اعيد بعد صيام نص شعبان شو محضرين لي .. وعند مين انا معزومة..

وعلى فكرة يا ام الافكار .ز في رمضان لازم يطلع الصيني اللي متخبي ..
يعني طقم جديد .. ملاعق جديدة.. كاسات جديدة .. ليش مابعرف صار طبع فيني ..
صحون رمضان شكل تاني .. ولهيك ما فيني استعمل الورق .. ولا الميلامين.. no way

وعود الخير

19-09-2005, 09:45 AM

نسيت اخبركم
ان ام سمية بتسلم عليكم وحدة واحدة
وهي حاليا مبسوطة بوجود امها وابوها معها... نيالها... ربي يهنيها ويسعدها.

رندوش

19-09-2005, 11:46 AM

هلا احلا وعود عندي اكيد مش حتنازل عنك ابدا مهما يكون
سلمي كتير على ام سميه الله يهنيها يا رب ارتاحت من الطبيخ نيالها
سلام

أناغيـم

19-09-2005, 11:59 AM

يسعد نهاركم وحدة وحدة...
كيفكم
رندوش كيف شفت البلد انا لهلأ ما تزحزحت من مكاني... مرابطة.
جبل النور كيفك والله زمان ..

رندوش

19-09-2005, 01:04 PM

اهلا كاتيوشيا كيفك زمان عن هالطله يسعد صباحك
ولو انا يوم الجمعه زرت المناطق صدقيني كنت سعيده
لاني من يوم ما نولدت وفيه مستوطنات واحتلال الحمد لله ارتحنا عقبال القدس والضفه

أناغيـم

19-09-2005, 01:06 PM

بنات يا حلوات يا امامير

مضطرة اترككم واشوفكم على خير في رمضان
سمعت انه في مفاجأة خليني اشوفها معكم..

تحياتي لكن جميعا
طيف .. يا وحشة زعلانة منك ..
رندوش... انا عازمة حالي .. تطفل

جبل النور، دعاء فلسطين.... ام سمية، ام زيد، الخنساء، هنلي..
وكل الصبايا .. اللي ما بيعرفوني.. اقول لكم
رمضان كريم وعساكم من عواده..
وان شاء الله نلتقي على خير .

طيـــف

19-09-2005, 11:21 PM

السلام عليكم ورحمه الله وبركاته

مشاءالله عليكم

اغيب يومين القي كل هالردود من وراي:D

فانتا حبيبتي انا هون معكم بقلبي وروحي بس بتعرفي مشاغل الدوام..... الله يعين الجميع

بس جد انتي يافنتا عسسسسسسسسسسسسسسسسسسسسسسسسسسسسسسل الروح والله:)

مامي ... حبيبتي انا بخير والله واشتقت لكم اكتر واكتر انتي؟ كيفك؟

tufee اهلين وسهلين منوره النواعم
خلاص صحصحنيا

طيـــف

19-09-2005, 11:22 PM

نور

نور عيوني انا منجتي:) بدنا نشوووووووووووق حبيبتي نشوق المستعمين لقصه نور والغريق

نسرين بتسلم عليكِ:) دايما بتعبت لي مسجات

يلا مش ناويه تطوري موبايلك؟

رندوش
حمدلله على السلامه
قلنا وصلت العريش والسمك بالطريق:) تاريكِ برفح بس؟!

ام الافكار حبيبتي
الله يسلم روحك وعمرك يارب
اختي بخير نشكرالله وولدت من زمااااااااااان اسم الله ابنها بدا يخطي:) ببعت لك رقمها ولا يهمك:)

طيـــف

19-09-2005, 11:26 PM

ضرتي حبيبتي كيفك؟
الله يعطيكِ الصحه والعافيه

ويسلم عمرها يارب ام عمر

ضرتي بالله تتوسطي لي عندي كاتيوشا
واحكي لها لاتزعل مني
انتي ادري بالحال ياوعود
! وعارفه مشاغلي ؟!!
تتوسطي لي؟

طيـــف

20-09-2005, 02:02 AM

كتكوته

اوعي تكوني عن جد زعلانه؟!
حبيبتي والله مابقدر على زعلك ياقمر؟

fantasy

20-09-2005, 05:54 AM

السلام عليكم ورحمة الله وبركاته
شو هلحلاوة كلها كل الحلوين متجمعين وبدردشو من ورى ضهري مش عيب ما تنادوني وتعزموني على فنجان قهوة على الهوا ويلا انا مش محسوب انا خلص صرت بليدة بهلمنتدى وبدي ادردش دردشة شو اسويلكم انتو السبب اة انتو بتخلو الواحد مدمن عليكم وما بتخلى عنكم فردا فردا والى الغالية نور بس شي واحد
بدي اشوفوة مكتوب هنا شو صار بلجاجة والكماجة وعلبة الشوكولاتة الجنس المليح ما بحكي حتى تهديني اياهم وانا وياكي والزمن طوييييييل
اختي مامي مشكورة على سؤالك انا بخير دورك هلاء شو اخبارك وين مش مبينة
طمنينا عليك وسلام لكم جميعا يا ورمضان كريم على الجميع

رندوش

20-09-2005, 09:20 AM

صباح الخير بنوتات
اهلا طيف سلامتك روح قلبي السمك وصلك شو ما أكلتي منه اكيد اختك اكلته وما قالتلك ؟؟؟؟؟؟؟؟؟؟

فانتاسيا هلا الجاجه عليه روحي قسم الاطباق الرئيسيه و انتي تاكيها اما لكماجه فعلى نور مش عليه

وعود الخير

20-09-2005, 10:30 AM

صباح الفل والياسمين

واخيرا طل القمر... طيف...
واهلا وسهلا بفانتي.. نورت

هالة البدر

20-09-2005, 10:57 AM

بسم الله الرحمن الرحيم ،،

أحلى صباح على عيونكم حبيباتي .... وصلتي دعوة حلوة كثير من صاحبتها الأحلى وعود ... قلت لازم أدخل وأشوف حاولت أقرأ كل الصفحات ومش ممكن أخلص إلا بعد سنة قلت خلص من هلأ بشارك وأمري لله .. شو بتقبلوني والا لأ .... على العموم معاكم معاكم .... وكل عام وإنتوا بألف خير ورمضان كريم إنشاء الله .....

وعود الخير

20-09-2005, 11:14 AM

واهلا وسهلا بالضيفة الدائمة هالة البدر..
الدخول للدردشة سهل جدا ولكن الخروج منها صعب بتصير تعود وادمان...

يا ميت هلا...

طيـــف

20-09-2005, 02:10 PM

حبيبتي ياوعود

نورك والله ياقمري انتي

كيف كاتي طيب؟

رندوش

عررررررررررررفت وين السماكات
اكلتهم القطـــــــــــــه

بس عين يابابا رح اجيب يعني رح اجيب خصوصا ادام السمك انا ! بسخسخ

رندوش

20-09-2005, 06:46 PM

طيوف صحتين وعافيه على قلبك السمك
اليوم اشتريت ليمون عرايشي شو باقي علينا من العريش
بس والله اللموناضه كانت تحفه فيه زمان عن الليمون البعلي

نور لك

20-09-2005, 07:28 PM

صباحو يا حلوين .. مع انكم ما عبرتوني مبارح مريت وسلمت وما حد رد علي :K) :K) :K) :K) :K) :K) :K) :K) بسيطه الله يسامحكم ..

خلص سامحتكم .. :ss: :ss:

المهم كيفكم ..

فانتسي عيوني هاي الجاجه وصلتك من رندوش السكره .
والكماجه والشوكلاته عم جهزهم ابعتيلي صندوق البريدي حتي ابعثهم ..مع انك ما قلتيلي مييييين عندك اسمه نور؟؟؟؟؟؟؟؟؟؟؟؟
حبيتي انتي غاليه والطلب رخيص..

طيف يا قمري انتي كيفك يا قلبي .. لكن عم تقهريني اههههههههههه ...عم تتراسلي انتي واختي بسيطه ..
لو حد غيرك قهرني هالقهره كان عضيتو هههههه بس طيوف ما بقدر..

وعود كيفك البي شو اخبارك . .يعطيكي العافيه حيبيت البي . شكلك ما شجعتي طيف على بيتزا تاعتي لهيك لسه ما مرت على ... :[MM

هاله البدر نورتي عيوني .. اسفرت وانورت صفحات كلام نواعم بطلتك ..

لازم بلش اعمل سمبوستي لرمضان .. صارلي عمر بعمل السمبوسه البرازيليه وما بغيرها قد ما هي لذيذه وخفيفه بعملها قبل رمضان وبفرزهم وبس قبل الفطور بطلعهم وبقليهيم يمممممممممممممممم . بس اعملهم بصورلكم الخطوات لاني كنت منزله الطريقه من غير صور.
قومو تعالو ساعدوني .... ما تخافو كل وحده بتاخذ حصتها معها .. يلالالالالالالالالالالالالالالا..

بنات في شخص قريب علي قالي انه اسم جنين بيلبقلي اكتر قلتله ما بقدر ارد عليك قبل ما اخذ راي الصبايا . .
ما صدقت تنادوني باسم اجي يغير علي شو قولكم ردو علي بليززززززززززززززززززز..

سلام يا قمرات .. بحبكم حتي لو طنشتوني بس ما تسوؤا فيها .. انشغلتو بالسمكات ونسيتوني ..

نور / جنين؟؟؟؟؟؟؟؟؟

وَطَن

21-09-2005, 12:10 AM

السلام عليكم ورحمة الله وبركاته
كيف النواعم اليوم إنشاء الله بخير وصحة تمام، كل عام وإنتم بخير إن شاءالله تعالى
رندوش كيفك قولتك االليمونادة طلعت غير شكل بالليمون العرايشى :ss:
كيفك يا كاتى كل عام وانتى بخير وسلامة وتوفيق إن شاء الله
طيف الحمد لله على السلامة والله يهون عليكى كل صعب ويوفقك يا رب يا كريم
فانتا وعليكم السلام ورحمة الله وبركاته ،ا منورانا يا قمراية :) ومنورة النواعم والدردشة
هالةالبدر يا هلا ومرحبا وأحلى مسا منى كمان، أكيد راح تنبسطى هون إن شاء الله
وعود والدعوة اللى حيرتنى :[MM كيفك يا وعودة كل وإنتى بخير وسلامة

وَطَن

21-09-2005, 12:22 AM

نور مسا الخير يا أحلى نور،، :)
كيفك يا أمر يا أطيب قلب إنتى ، على فكرة عم فكر بلش من هلأ أعمل السمبوسة أنا كمان لأن الأولاد بيحبوها،
بس شجعتينى كدة جرب البرازيلية، وهلأ راح أبحث عنها شوف راح أعمل،،
أما إسم جنين أنا شخصياً كتيييييييير بحبو وسميت بنت خالى جنين على إسم مدينة جنين وبدلعها حصار
لأنها إنولدت أيام الحصار :) ، ونور كمان كله أمل وتفاؤل
بس أنا من رأييي الإسم اللى ترتاحى معاه أكتر هواللى تختاريه
اختبار للإسم :)

كيفك نور وكيف السمبوسة شكلها كتير طيبة يسلموا دياتك :[MM

كيفك جنين وكيف السمبوسة شكلها كتير طيبة يسلموا دياتك :[MM

تحياتى يا قمر

وعود الخير

21-09-2005, 09:20 AM

صباح الورد
سمعت اسم جنين جيت ركض
نور.. متل ما قالت جبل النور
الاسم يللي بترتاحيله اختاريه

طبعا مش راح اقول لك ان جنين جرح نازف في قلبي...
صباحكم يا احلى صبايا
جبل النور لو في شي صعب عليك في الدعوة ابعتثي على الخاص
معلش اليوم كمان راح اكون مشغولة
يعني راح اطل عليكم بالقطارة..
بحبكم كلكم .. وراح اشتاق لكم كثيييييييير كثييييييييييييير

شو رايكم بكوب لموناضدة عرايشي.. يميي شو طيب.

رندوش

21-09-2005, 09:26 AM

نور الله ينور عليك كيفك كيف الاسم معاك
يختي ما صدقنا تعودنا على نور وبعتنا الجاجه بدك نبعت لجبل النور كمان جاجه
خلاص المره الجايه مش عليهههههههههههه (وحده بخيله)
هلا جبل النور كيفك اشتقنالك
السمبوسك بفكراعمل مقاطعه
كل سنه كنت اخس 2 كيلو في رمضان بس اتعودة على السمبوسك صرت ازيد 3 كيلو هههههههه
بس عن جد بتعمل مشكله كلهم عايزين سمبوسك
شو البرازيليه ما تكون بنزيد عليها 4 كيلو كمان احنا ناقصنا تخن ارحمينا يا نور

رندوش

21-09-2005, 09:27 AM

وعود صباح الخير
يعطيكي العافيه كيفك وكيف الفميليه كلها
تفضلي كوب ليموناضه لذيذ مممممممم مع قطع ليمون

وعود الخير

21-09-2005, 09:38 AM

صحتين وعافية على قلبكم
يادوب خلصت الكاسة اللي معي..

كيفك انت وشو اخبار الشباب في المدارس..

رندوش

21-09-2005, 10:06 AM

اهلا وعو والصبايا كلهم
الاولاد الحمد لله تمام بس مغلبيني بدهم يلعبو زي الاجازه والدراسه مش مهم الله يهديهم

fantasy

21-09-2005, 10:09 AM

صباح الخير يا حلوين ما تستغربو لسة صاحية بتوقيتنا ومش عارف انام زوجي سافر اليوم على لندن وخلاني من حالي تفضلو جيبو البجامة والفرشات والحرامات
بس ما تفيقو اولادي عليهم مدرسة بكرة لما يسافر زوجي بلاقي حالي قلقان
وما بعرف انام بصراحة بخاف حرامي يفوت علينا يما عشان هيك قلت خليني اتسلي
مع البنات شوي يمكن نعست
وعودة طبحك بلخير وكيفم يا حلوين جبل النور ورندوش على فكرة قولي لنور الجاجة وصلت وصباح الفل لنور رح احكيلك مين عندنا اسمة نور بنت اخوي عندة بنت عمرها تقريبا سنة شو حلاوة يا عيني انتي لو تشوفي احوي يا عيني كأنة عارض
ازياء ومرتة كتير حلوةوامورة وبتعجبك مين كمان ما صبحت عليها طبعا هالة البدر صباح الخير عزيزتي
نور ابعتيلي الشوكولاتة هاي email
عفوا يمنع وضع الايملات في المواضيع حسب قوانين المنتدى .. فعذرا

رندوش

21-09-2005, 03:30 PM

اهلا فنتاسيا صباحك فل
كل ما ودعتي تلاقي ما تخافي انتي بس نادي عليه وهم الحراميه يخافووووووووو
بس على فكره انا بخاف من خيالييييييييييييي

وَطَن

21-09-2005, 04:14 PM

وعود الله معك ويقدرك ، بعدين طلى علينا بالقطارة بالقطارة المهم تطلى
كيفك يا رندوش ،، يا ستى اعملى سمبوسة خلى الأولاد يكيفوا،، أنا دورت على طريقة نور بس ما لقيتها ،، بلكى بجربها
قبل رمضان وخبركم،، والله منورة الدردشة بيكى يا شيخة

فانتا متل ما ودعتى تلاقى ،، آه مجربة يا اختى السفر وهمه ما أصعبها من أيام بتكون وأنا خووووويفة كتير ساعات بكون
لكن الواحد لما يستعين بالله بيقوى،،

طيـــف

21-09-2005, 04:25 PM

فهموني شي مهم
الليمون البعلي يل هو بن زهير؟؟ الصغير ولا الاضاليا الكبير؟

لانه مش معقول مش متوفر عنكم هاليموووونين

صح يارندوش؟

وصحتين وعوافي على الليموناده اشربي ياقلبي وروقي دمك:)

طيـــف

21-09-2005, 04:26 PM

منجتي حبيبتي

خليكِ على اسم نور احلى والبق لك;) انا شفت صورك وبعرف شكلك بلبق له نور اكتر:)

بعدي عضي ياعمري عضي وخدي رحتك ههههههههههههههههههههه

المشكله حياتي موبايلك انتي مابستقبل عربي ولا كان ضمنياكِ للمسجات انا ونسرين:D

طيـــف

21-09-2005, 04:32 PM

فانتا حبيبتي

زي ماودعتي تلاااااااقي يارب

لو بعرف هيك رح اجيب عزالي واجي اقضي الويك اند معك:)

طيـــف

21-09-2005, 04:33 PM

جبل النور
الله يسعدك يارب ويحيمكِ من كل مكروه يارب

شو رندوش بلشت الدراسه وبلش وجع القلب

:) وعوده صحتييييييييييييييييييييييييييييييييييييييين وهنا ريته يااااااااااااارب على البك

نور لك

21-09-2005, 06:32 PM

يسعد صباحكم يا حلوين يا عسل بقشطه انتو (مصبحه جوعانه معلش)

كيفكم شو اخباركم

جبل النور يا نوارتي انتي الله يسعدك شو لذيذه بتتاكلي اكل ...
اشكرك على التجربه باسمي بس شكلي خلص راح اتكل على الله وابقى على نور
مبارح عم اقول اسم جنين وبنتي قاعده ولا بتقولي ماله الجنين بفتح الجيم قلتلها جنين بعينك ال جنين اخخخخخخ
جبل النور يا قلبي قلتي مش لاقيه الطريقه .. تفضلي واذا عندك اي سؤال اسالي ....ز
http://www.lakii.com/vb/showthread.php?t=114002

وعوده يا البي ما عاش اللي يجرحك ولا يقرب صوبك يا البي .
انا ارتحت لنور لحبكم اله هههه حبيباتي والله
وعود ثاني كاسه لموناضه ابعثيلي وحده الله يسعدك اروق اعصابي ..
يعطيكي الصحه والعافيه حبيبتي الله يكون بعونك ..

طيوف يا قمر انتي الله يسعدك .. هذا الكلام اللي بدي اسمعه الاسم لابقلك صوت وصوره ههههه
الله يخليلي ياكي ..بتعرفي انه لسه ما صحلي خبرت نسرين على الاسم ..هبوله صح. بعدين تعالي هون طيوف متى راح تطلعي على الماسنجر اشتقتلكككككك ...

رندوش خلاص يا بخيله ما تقلقي خلينا نور يا ست الكل يا عسل انتي .
سمبوستي بتشهي والله يا رندوش بشهاده كل من ذاقها ما بعود يعمل غيرها وما بتنصح لانها ما بتمتص كتير زيت .. بس بتضل انها عجينه صح ..
حرام تحرمي اولادك يا رندوش بالعكس لازم تكافئيهم صححححححححححح..

فانتسيييييييييييييييييييي حبيبيتي الله يكون بعونك من هلا عم اعد الايام جوزي تاركني كمان كم يوم ومحسوبتك ما بتنام طول ما هو غايب بجي من المطار بسلمو الاولاد وبقلو تصبح على خير والله القلق بقتلني الله يكون بعونك وعوني ...
الله يخليلكم البنوته بس انا مش قمر زي ما عم توصفي لازم فكر بالموضوع ...
اذا بدك شي بليز ما يردك الا لسانك .. خذي رقمي من طيف واتصلي فيني او اعطيها رقمك حتي احكيك ....

سلام لكل الصبايا العسل اللي ما سميتهم بالاسم الله يصبحكم بالخير .

نور لك

21-09-2005, 06:43 PM

صبايا كان عندي طلب ... ومساعده والمشرفات الكرام لو بتوجهو سؤالي للمكان المضبوط بكون ممنونه الكم ..

واحده من صحبات بنتي عمرها 15 سنه اهلها منفصلين عن بعض لما كان عمرها 3 سنين ..
المهم ابوها مسلم وامها مخلوطه شي مسيحي على هندوسي..
الاهم انو البنت لا تؤمن بشي لانه كانت عايشه عند امها وللاسف لم تعلمها شي .. ومن سنه اجت عند ابوها لانه امها تزوجت ..
خلاصه الكلام حكيت مع البنت وحسيت انه عندها ميول تسمع عن الاسلام خصوصي بعد حادثه صارت لابوها (طيف بس اللي بتعرف الحادثه) .. قوت رغبتها بالمعرفه عن دينا قد ما شافتني بصلي وبدعي .. والبنت متعلقه فيني كتير يعني ما بهون عليها زعلي ولا باي شكل ..
بدي مساعدتكم من وين ابلش ؟؟؟؟؟؟؟؟؟؟؟ ساعدوني حتي تكسبو اجر معي ...
ما بتحكي عربي البنت انجليزي بس ........

بانتظاركم بلكي قدرت اعمل شي قبل رمضان ..

سلام حبيباتي وما تبخلو علي بالنصائح .. وقلبي مفتوح لتقبل اي نصيحه ..

نور لك

21-09-2005, 11:52 PM

طيف الك رساله

أوميجا

نداء عاجل: حد منكم شاف طيف اللي شافها يخبرني

--------------------------------------------------------------------------------

السلام عليكم ورحمة الله وبركاته ،،،

المكتوب مبين من عنوانه يابنات اللي شاف طيف يخبرها أنها مطلوبة حالاً في ركن الجمال والأناقة

رندوش

22-09-2005, 09:26 AM

صباح الخير على الحلوين
مين ضايع اليوم
طيف وين بتغطسي ما تكوني بتتسبحييييييييي
يسعدكم الله
كيفك نور كيف شعورك اكيد شعور نست هههههههه
صباح الخير صبايا مالكم نايمين آه اليوم الخميس عندكم اجازه نيالكم
وعود انتي ما عندك اجازه وينك
طيف الله يسامحك كلامك على قلبي زي العسللللللللللللللل مش رايحه ازعل

وعود الخير

22-09-2005, 10:24 AM

صباح الفل يا نواعم
آه يا رندوش حطيت ايدك على الوجع ... بلشت الدراسة وبلش وجع القلب..
بتعرفي انا عملت نظام لاستخدام الكمبيوتر.. بس خميس وجمعة علشان الدراسة
استغلوا عدم وجودي في البيت وصاروا يتفرجوا على الرسوم المتحركة .. شفت العز اللي انا فيه
لا والمشكلة انه في واحد توجيهي والتاني اول تانوي ولليوم ماقرر علمي او ادبي يعني الاثنين بدهم دراسة بجد
شو اعمل اشد شعري قصدي اللي باقي من شعري

معلش صبايا طلعت عن الموضوع ..
كريس.. لو في مركز اسلامي قريب خلي البنت تنضم له وبعدين في مواقع كثيرة لتعليم الدين الاسلامي اكسبي في البنت ثواب
وخليها مع بناتك دائما وشهر رمضان قرب فرصة حلوة للعبادة والتعليم وشجعوها على الصيام
وهاي نتيجة الزواج ممن لا دين واضح لها الاسم نصرانية والحقيقة كافرة هندوسية..
لا حول ولا قوة الا بالله العلي العظيم

جبل النور... فانتا... خلوني اقرأ الردود وارجع لكم ...

وان تأخرت ما تقلقوا باكون غطسانة بين الاوراق .. بجد ضغط شغل مش طبيعي ..

وعود الخير

22-09-2005, 10:28 AM

طيف شو قصة البخل هالايام
مو مشكلتي هذة مسج من كاتي وما على الرسول الا التبليغ

طيـــف

22-09-2005, 12:03 PM

صباح الخير ياحلوين

اليوم اجازه
وقاعده لكم بالبيت:D
اكل ومرعي:D

اول شي اصبح عليكم وحده وحده

ضرتي حبيبتي وعود الله يسعدك يارب ويخليكِ لك كاتي
بعت لها مسجات مبارح قبل مانام وصلو لها؟؟؟؟
والله مابهون علي زعلها بس الله شاهد حتى خواتي ماعم افضي ارد ع مسجاتهم
لو تشوفي شو عنا ضغط بالدوام هلاء :( تقولي فيضيان!
بس ادعو الله يزيد ويبارك لانه كله بصااااااااالحنا:D

رندوش
والله بسبح صح بس بسبح بالوراق والشغل يل رح يقضي علي:D
اصلا انا مستعده اعمل اي شي بس لحتى ماتزعلي مني ياقمر
رندوش والله لمااقول انا بحبك والك مكانه بقلبي مابجامل!
مابعرف لي بس احكي معك روحك بتذكرني ببنت خالتي يل زماااااااااااااااااااااان ماشفتها ونفسي اشوفها وادردش معها
الله يسعدها يارب ويصبحها بالخير كتير طيوبه واموره وحنونه بتجننننننننننننن >>>>>>>>> طالعين على خالتي:D

كروره ياكروره وين كنتي محبوسه
محبوسه بقلب طيوفه
ولك نور الله ينور دنياكِ واخرتك يارب
لاتردي خلص انتي نور وبس
بتذكري من قلتي لي على تغير الاسم من قبل لاتسافري الدوحه؟!
بعدين لي ماخبرتي نسرين؟
انا ماراح اخبرها خليها منك احلى
بعدين تعالي احكي لي بتحكي مع سيما؟
شو اخبارها؟ متي مسافره؟
ولاتنسي تخلي نسرين تكلم سيما اوووووووووول ماتوصل الدوحه
جد نور مابدي اوصيكِ على سيمااا يالله شو حبيبه واموره هالبنت

بالنسبه لرساله حبيبتي اوميجا ام عيسى شفتها ياقلبي عليها هلاء بروح اطمنها والله اشتقت لها
واشتقت لايام الدردشه وفش الخلق

والضحك والكرررررررررررررررركره يل بين السطور:D انتي فاهمه ياوعود
وعود صح وينها؟؟ ولك بتذكري لما كنا نفقع من الضحك! كل مره بطلع على راسي بالاخير
هههههههههههههههههههههههههههه يلا فداكِ ياحلوه

المهم يلا صحصحينا ياحلوين

وعود الخير

22-09-2005, 12:22 PM

واحلى صباح وفنجان قهوة لطيوفتي الغالية

طيـــف

22-09-2005, 12:33 PM

صباح الشهد والورد ياوردتي النديه

وعود هلاء بشرب قشر القهوه بعدين بشرب القهوه:D

وعود عنجد انا غاليه؟

طيب بدي مربي:D:D:D:D:D:D:D:

وعود الخير

22-09-2005, 12:47 PM

ولو .. كل ملبيات الكون كرمالك يا درتي...

وعود الخير

22-09-2005, 12:56 PM

يا طيف .. نيالك عندك قشر قهوة
شوفي شو صار معي
بعتت ابني يدور لي على قشر قهوة
الولد رجع مبسوط .. ماما جبت لك طلبك
اتاريه شو .. بتعرفي لما نحمص البن في قشرة رقيقة بتكون مفصولة عن الحبة
هذا اللي جابه..
يعني قشر قهوة في غزة.. مش موجود .. اشربي عني وعنك

طيـــف

22-09-2005, 01:02 PM

هههههههههههههههههههههههههههههههههههههههههههههههههه ه
هههههههههههههههههههههههههههههههههههههه

ملبي قال

ههههههههههههههههههههههههههههههههههه

الخنســـــاء

22-09-2005, 01:03 PM

السلام عليكم ورحمة الله وبركاته

أخباركم نوااااااااااااااااااااااااعم

شفتوا سوسو فو ........ انا قبل شوي شفتها جيت بارسل لها رساله.. طلع عندها زحمة ببريدها

اخبارك... طيف..

وعوووود الخير...

لكم وحشششششششششششة

وعود الخير

22-09-2005, 01:06 PM

لأ مش معقول كل الحبايب هون
انا بحلم
الخنساء ومن قبلها طيف
يا رب تطل سوسو فو .. ويبشرك بالخير يا الخنساء...
والله اشتقنا لطلتها ...

طيف استري علينا .. غلطة مطبيعة مش اكثر !!!!!!!

طيـــف

22-09-2005, 01:07 PM

بتصير مع الكل وعود
انا رحت اشريتها من بن العميد
ولا الاهبل البياع بقول لي هي نفسها القهوه العربيه بس مطحونه مضبوط!
وصدقته بس بعدين روينه وام الافكار صححو لي المعلومه

المهم رحت لمطاحن سمراء عدن اكيد بتعرفيها
وهناك لقيتها
سالت البياع عنها كيف ممكن تلاقوها

قال لي هي متوفره في المحماص الكبرى يل بتبيع القهوه وتحمصها بالجمله
:) يعني لاتفقدي الامل ياقلبي بس روحي لمراكز الجمله

طيـــف

22-09-2005, 01:08 PM

هلاوغلا خنوس
وينها الوحشه سوسو بدي اعضها عضها ابديه:D
ياربي شو اشتقت للصبايا

وعود الخير

22-09-2005, 01:09 PM

شو قصتك نازلة بالكل عض..
تا اهرب قبل ما يجيني الدووووووووووووووور

الخنساء .. الحقيني بسرعة.. العضاضة فايقة ورايقة اليوم.

طيـــف

22-09-2005, 01:14 PM

مبعرف لي بس اكون رايقه ومبسوطه بنزل عض وقرص
هههههههههههه لو تشوفي ولاد اختي ياقلبي عليهم هريتهم عض وانا صغيره

بس لما كبرت عقلت شوي
صرت اقرررررررررص
:D:D:D:

وعود الخير

22-09-2005, 01:31 PM

خذي راحتك .. اقرصي زي ما بدك.

طيـــف

22-09-2005, 01:55 PM

تنننننننننننننننننننننننن:D هيك بعمل بس اقرص وبكزززززززز بسناني

وعود الخير

22-09-2005, 02:23 PM

على فكرة كاتي بتقول ثانكس على الماسج بس ما عندها رنة ....

طيـــف

22-09-2005, 02:32 PM

وصلو;)

وعود الخير

22-09-2005, 02:35 PM

قبل شوية اتصلت فيني وسألتها قالت وصلت رسالة قبل شوية وتنتين في الليل..
وما معها رنة
يعني افهمي يا وعود بدي تمويل..

طيـــف

22-09-2005, 02:43 PM

احكي لها بدون حججججججججج فاضيه
طيف مابدها لارنه ولا مسج
مابدي الا سلامتكم
لاتخليها حجه مشان تعبىئه الكرت:D:D:D: حصار على كاتي

وعود الخير

22-09-2005, 02:58 PM

ما انا حكيت لها هيك برضه ..
هي تفوتني .... بس هيك حتقول اتفقوا الضراير ..

شو صار معك بموضوع السفر..

طيـــف

22-09-2005, 03:06 PM

؟!
هلاء ببعت لك رساله لاني محتاره

وعود الخير

22-09-2005, 03:08 PM

سلامتك من الحيرة

نور لك

22-09-2005, 07:19 PM

صباحو للناس الفايقه الرايقه اللي شغاله عض وقرص يا سلام من الذ هواياتي .. هههههههههه

كيفكم شو اخباركم ..

انا بخير كل شي تمام ..
وعود اشكرك عيوني على ردك..
نحنا للاسف ما عنا حتي جامع .. البلد كتير صغيره الجاليه قليله يعنو بصلو الجمعه ببيت واحد...
المهم اذا عندك اي علم باي موقع ممكن يساعدني الله يخليكي بس تفضي تبعثيلي ياه ...
اشكرك مره ثانيه ..

رندوش الله يسعد صباحك من الله يا سكر ..

طيف يا طيف والله مشتاقه اسمع اخبارك حاسه انو فيه اشياء كتير عم تصير وانا مش على علم فيها راح اكلك ..
سيما والله صارلي مده مش حاكيه بلكي اليوم بحكيها .. واكيد ما بدها توصاي كل صبايا المنتدي اخوات عزيزات .. فما بالك سيما العسل ..
قلتلها امبارح لنسرين عجبها كتير وعم تتدرب عليه هههههه .
بس زعلت منك لانك :mad:
1-طلبت مساعده مبارح وما عبرتيني برائيك ..
2 ما قلتيلي شو رائيك بالبيتزا اللي عملتها وانتظرت رائيك وكمان ما عبرتيني ؟
3 مش عم تلاقيني زي اول .... وانا مشتاقه لك .. بكفيكي تغلي على حرام عليك ..

الخنساء كيفك يا البي .. شو اخبارك .. ابقي طمنينا على سوسو وقوليلها تطل علينا ..

جبل النور وينك يا عمري..

فانتيسي .... شو صار معك طمنينيا عليك ..

سلام يا امامير

نور

رندوش

22-09-2005, 08:23 PM

مساء الخير
كيفكم صبايا ونواعم
نور كيفك
طيف كيفك
وعود كيفك
دعاء كيفك
جبل النور كيفك
فانتسيا كيفك
الخنساء كيفك
شو ناسيه حد فكروني
على العموم كيفكممممممممممممممممم كلكمممممممممممممممم
الليله الخميس جيت اشوف شو في حلويات جديده
يوم السبت عندي لمه شلة المشاغبين من ايام الدراسه
عازمين حالهم وجايين يفطرو فتة حمص أخخخخخخخخخ
و قال بدهم شي حلو من موقع اللي مشتركه فيه صرتم مشهورين كتير في غزه
يلا كل حلا بقلهم من لك بيضو وجهي الله يبيض وحهكم

طيـــف

23-09-2005, 03:07 AM

حبيبتي نور

الله يسعدك لاتزعلي مني

والله العظيم مش قصدي اطنشك ياقلبي؟:(:(:(

البيتزا كتير عجبتني بس بتعرفي انا مش صحبه كتير مع المعجنات
وهالايام والله العظيم بقاوم مقاومه الحلويات والاكل الطيب
لو تلاحظي مش عم بتنقل بالاركان كتير ماسكه حالي للرجيم:(

وبالنسبه بخصوص البنت قرات كلامك وببالي والله بدي ارد عليكِ
بس قلت بدي اتصل بمركز التعريف بالاسلام اول
واسال لك على كتب ومنشورات بالانجليزي لانه فيه بكل اللغات وابعتهم الك

يعني والله بالي ياقلبي
وهالمسنجر بدي اكسره! مش عارفه امتى اشوفك فيه؟

بنت ارض الحضارات

23-09-2005, 12:37 PM

السلام عليكم ورحمة الله وبركاته
كيف احوالكن يا احلى نواعم؟؟؟؟
احلى سلام للحلوات النواعم.. جعلكن الله من المتنعمات برحمته ورضاه في الدنيا والاخرة ولامة المسلمين بالمثل..
الاخت كرس اسم نور جميل جدا جدا (ولا ادري هل نناديك نور ان نستمر مع كرس :[MM ) البيتزا كانت خطيرة جدا سلمت يداك. اما بخصوص البنت التي تحدثت عن مشكلتها في البداية اجعليها دائمة قريبة منك خصوصا وان رمضان على الابواب وهذه فرصة لان ترى وتحس بروح الدين الحنيف وخصوصية ايام رمضان وحاولي ان تعلميها العربية والصلاة ولانها متعلقة بك فسيكون هذا التعلق وسيلتك لايصال كل ما تودين ولكني انصحك بالا تتعجلي في تلقينها وتعليمها فكلما كانت العملية ببطء وتؤدة كانت النتائج ان شاء الله اثبت وارسخ. بارك الله بك وجعلها وسيلتك للجنة باذن الله.
سلامي وتحياتي للجميع واتاكن من كل ما سالتموه ولامة المسلمين بالمثل..
اسالكم بالله ان تدعو لاهلنا في العراق...

نور لك

23-09-2005, 06:16 PM

السلام عليكم ورحمة الله وبركاته

كيفكم يا امامير كلام نواعم حبيباتي والله ..

رندوش الله يسعدك حبيبتي.. ركن الحلويات مليان ما شاء الله ومعضمهم ببيضو الوجه ..
بس لازم تقوليلنا شو ناويه تعملي حتي نعمل وناكل معاكم كانا معكم خخخ..
شوفي الموس اللي نزلته يا رندوش سهل ولذيذ ..

طيف يا بعد طوايفي انتي .. لك معقوله صدقتي اكون زعلانه منك ..
لك ازعل من نفسي ولا ازعل منك.. انتي البلسم يا قلبي..
الله يجزاكي كل خير يا طوفه .. انا بانتظار اي مساعده الله يسعدكم ..

بنت ارض الحضارات اختي الله يصبحك بالخير ..
ان كان على الاسم خليه نور .. انا طلبت من الاداره يغيرولي اسمي بس لسه ما اجاني رد.. خلينا على نور الله يسعدك..
صحه وهنا على البتزا اختي.
اشكرك على نصائحك .. وسوف اتبعها بالفعل انا صارلي شهر وانا كل يوم بقولها شي .. ما بدي اضغط عليها وتزهق وتمل .. الله يكون بالعون وتكون سهله ومتجاوبه يا رب .
جزاك الله خيرا حبيبتي ..
الله يكون مع اخواننا بالعراق يا رب .. ويفرج كربهم يا الله .......

سلام لباقي صبايا نواعم يا نعومات .. طلو علينا ..

نور

وعود الخير

23-09-2005, 08:12 PM

مساء النور يا احلى نور
ونور على طول
معلش ما عندي وقت باشوفكم بعدين ان شاء الله

رندوش نصيحة اعملي السمبوسة البرازيلية وما راح تندمي .. وعندك في ركن الحلويات تمرية..
اركضي لهناك وشوفيها سلام.

وعود الخير

25-09-2005, 09:36 AM

السلام عليكم ورحمةالله وبركاته

بنات غزة رجاء ادخلوا وطمنوني عنكم
خاصة جبل النور..... القصف كان قريبا من بيتها بالامس.....

أم الأفكار

25-09-2005, 10:39 AM

صباح الخير لكل الاخوات

والله ما انا عارفه شو بدي احكي صايبني حالة اكتئاب جاد للي بيحصل في غزه

الظاهر والله اعلم انا شعب ما بلبق النا نفرح زي العالم

ربنا يصلح الحال ويهدي النفوس شو بدنا نقول غير هيك

وعود طمنينا على جبل النور وكل الاخوات يا رب السلامه للجميع

هذه هي الفتنه اللي بيصير فيها الحليم حيران مش عارف الصح من الغلط

نسأل الله العفو والعافيه

وَطَن

25-09-2005, 10:42 AM

السلام عليكم ورحمة الله وبركاته
كيفكم ،، الله المستعان يا وعود
الحمد لله على كل حال، أنا هنا لسة

وَطَن

25-09-2005, 10:45 AM

رندوش وينك،، دعاء، كيفكم

وعود الخير

25-09-2005, 11:49 AM

الحمد لله .. بجد قلقت عليك ..

ام الافكار.. فعلا يبدو ان الفرح فعلا مش من حقنا..

وَطَن

25-09-2005, 12:35 PM

يارك الله فيكى يا وعود،،
أم الأفكار تحياتى،، معلش الحق راجع إن شاء الله

رندوش

25-09-2005, 01:57 PM

السلام عليكم و رحمة الله وبركاته
اللهم ازل الغمه عنا يا رب
يا فرحة ما تمت
كيفكم بنات كيفك جبل النور ووعود ودعاء قلبي معكم والله
اولادي بيقولو رجعت ريما لعدتها القديمه يعني رجع الخوف
حرام نعيش يوم بدون قلق حرام النوم واحنا مرتاحين
كيف القصف البيت تضرر عندنا من القصف بعض الزجاج تكسر ناهيكم عن الخوف لبنوتي و الخناشير الاولاد
و انا متت من الخوف اول مره وصابني صداع من كتر ما انا شاده اعصابي
الله يهد اليهود آمين يا رب العالمين

وعود الخير

25-09-2005, 02:03 PM

الحمد لله على سلامتكم رندوش
الصغيرة البارحة نامت بحضني وكل شوية تشدني من الخوف

والصبح ما رضيت تروح المدرسة الا لما قلت لها مافي قصف اليوم قالت لي بخاف من المنطاد..
شفت زمان ما كانت تخاف بس فترة الهدوء اللي عشناها يبدوا انا راح نودعها..

رندوش

25-09-2005, 02:10 PM

وعود انا والاولاد نمنا كلنا في غرفه وحده لان صوت الزجاج بيتكسر عند الجيران خفت عليهم
الله يسلمك يا رب ويحمينا امين يا رب العالمين
ششفتي الخساره الكبيره بالارواح الله يرحمهم جميعا
تأثرت كتير عليهم حسبيه الله ونعم الوكيل فيهم

وعود الخير

25-09-2005, 02:12 PM

لا نملك غيرها
حسبنا الله ونعم الوكيل..

رندوش

25-09-2005, 02:17 PM

وعود كيف الوضع عندكم اليوم

وَطَن

25-09-2005, 02:19 PM

الحمد لله انك بخير يا رندوش ،، مهم الصغار الله يعينهم على اللى شافوه والله راح يشوفوه لسة،، وكأنهم ما إلهم حق فى الحياة الهادئة المرحة السوية .. :(
حسبنا الله ونعم الوكيل

رندوش

25-09-2005, 02:31 PM

جبل النور الحمد لله على سلامتك
كيف الاخبار اليوم ان شاء الله هدوء على طول يا رب

وعود الخير

25-09-2005, 02:35 PM

الحال عنا وعنك واحد يا رندوش
لنشوف الوضع اليوم ميف بيصير .. لسانا الظهر
ربنا يستر مع الليل.... عم باشتغل وانا نص نايمة...

فكركم بنقدر ننام اليوم.

وَطَن

25-09-2005, 02:35 PM

أنا خايفة إنه الهدوء الذى يسبق العاصفة،،
بنتى الصغيرة بالعافية راحت المدرسة اليوم خصوصاً بعد ما عرفت إنهم قصفوا مدرسة الأرقم،، خايفة يقصفوا مدرستها
الله يعديها على خير يارب

وعود الخير

25-09-2005, 02:37 PM

والله الخوف لينقصف عندي يا جبل النور ما انت عارفة المصلحة واحدة ...
اصلهم قبل هيك قتلوا شباب اتنين برصاصة واحدة ... قبل سنتين.. فاكرة..

وَطَن

25-09-2005, 03:00 PM

اللى فى الجمعية..
فاكرهم جداً رحمة الله عليهم كنت أيامها نايمة بابنى فى مشتشفى الدرة،، خلى بالكم والله قلقانة أنا كمان كتير..
الله يستر

وعود الخير

25-09-2005, 03:17 PM

لهيك بنتي خايفة خاصة وان مدرستها قريبة كثير يادوب كم متر..

ربنا بيستر ..

وعود الخير

25-09-2005, 08:21 PM

بنات غزة..
الف حمدا لله على سلامتكم
من اختكم في الله ام سمية التي بقيت ليلة امس قلقة علينا

القصف حدث قبل قليل... الظاهر انهم بدأوا بالتسلية..
حسبنا الله ونعم الوكيل

نور لك

26-09-2005, 01:36 AM

السلام عليكم ورحمة الله وبركاته

ما النا نقول غير حسبنا الله ونعم الوكيل..
صبايا غزه الله يسعدكم ضلكم طمنونا عنكم .. قلوبنا معكم والله الروح تفداكم يا غالين ..

وَطَن

26-09-2005, 07:59 AM

وعليكم السلام ورحمة الله وبركاته
نور أهلين الله يخليكى على سؤالك،، طول الليل وهم بيقصفوا وبيعملوا غارات وهمية،، اللهم ادحرهم وفرقهم وشتتهم
يا كريم،، هادى الغارات الوهمية قوية جداً جداً بيعين الله
مبارك تغيير الإسم يا نور
أم سمية الله يسلمك من كل شر يارب،
بيعين الله يا وعود سلمي عليها أم عمر كتير إذا حكيتى معاها..

طيـــف

26-09-2005, 08:44 AM

لاحول ولا قوة الا بالله

الله يحميييكم يارب ويفرجها عليهم

الله يهدهم ويحرقهم حرررررق يارب

كنه فعلا مالكم حق بالحياه المستقره:(:(:(

رندوش

26-09-2005, 09:15 AM

صباح الخير
ان شاء الله يعم الخير علينا جميعا
شو هالغارات الوهميه اول ما بنتي راحت المدرسه لسه يدوب بالطريق صوت هز البلد هز
حسبيه الله ونعم الوكيل هي بتترعش من الصوت لما اكون جنبها كيف لما تكون رايحه المدرسه
حسبي الله ونعم الوكيل
شكرا لكم جميعا على السؤال ودعائكم لنا بالهدايه

رندوش

26-09-2005, 09:16 AM

وعود انا لسه نص نايمه مش صاحيه و ايدي وجعاني وانا بكتب
بس قلت اطمنكم وبرجع انام شوي اذا خلونا نعرف انام

وعود الخير

26-09-2005, 09:29 AM

السلام عليكم
وصباح القصف المتجدد
انا كنت عم باجهز بكباية النسكافيه وقعت من ايدي
حسبنا الله ونعم الوكيل..
ربنا يعينهم الصغار..
رندوش صحصحي بدي اياك .. ارحاتصل عليك بعد شي ساعتين..

نور لك .. يانور على نور.. مبارك تبديل الاسم

جبل النور.. اصمدي يا جبل ما هزك غارة وهمية.. بكفي غارات الليلة الماضية منهم لله..
طبعا وقود الطائرات مجاني على حساب الدول العربية .. والسلام على حساب الدول الاسلامية..
وعش رجبا ترى وتسمع عجبا..
اللهم انتقم منهم وممن والاهم.

سلامكم للغالية ام عمر يوصل ان شاء الله تعالى..

pink_cat

26-09-2005, 09:51 AM

أخواتي في الله :رندوش وعود الخير وجبل النور...
السلام عليكم ورحمة الله وبركاته ..الله يعينكم يارب وهذه كلمات مواساة وتطمين مني أتمنى أن تلقى استشعارا من قلوبكم المؤمنه الصادقه ...
لنفتش في أنفسنا عند وقوعنا في الشدائد والمحن ..ولنا في رسولنا الحبيب المصطفى صلى الله عليه وسلم أسوه حسنه ...أوذي أشد الأذى وكذب أشد التكذيب ..أتـهم بعرضه وخدشت كرامته وطرد من بلده ..عاش يتيما وافتقر ومن شدة الجوع ربط على بطنه الحجر .. قيل عنه كذاب وساحر ومجنون وشاعر يشج رأسه وتكسر ثنيته ..يقتل عمه وجمعوا عليه الاحزاب وحاصره المشركون والمنافقون واليهود ..يذهب الى الطائف فيقابل بالتكذيب والسب والشتم ويطرد ويلاحق ويرمى بالحجاره من قبل الاطفال فماذا فعل عليه أفضل الصلاة والسلام ...
أين ذهب من سأل ..الى من شكى ..الى ذي الجبروت والملكوت الى القوي العزيز فاعلن عليه الصلاة الشكوىورفع يديه بالنجوى ..دعا وألح وبكى وتظلم وتألم فاسمعي لفن الشكوى واظهار الضعف والعجز والافتقار منه صلى الله عليه وسلم فهو لايظهر ضعفه وفقره الا لله سبحانه..
قال:
(اللهم اليك أشكو ضعف قوتي وقلة حيلتي وهواني على الناس ياأرحم الراحمين ..الى من تكلني الى عدو يتجهمني ام الى قريب ملكته أمري ان لم تكن ساخطا علي فلا أبالي ..غير ان عافيتك أوسع لي ..أعوذ بك بنور وجهك الكريم الذي أضاءت له السموات وأشرقت له الظلمات وصلح عليه أمر الدنيا والآخره أن تحل علي غضبك اوتنزل علي سخطك ..لك العتبى حتى ترضى ولاحول ولا قوة الا بك..) هكذا كان صلى الله عليه وسلم..لايمل بالدعاء ولاييأس ولا يقنط..
سامحوني على الاطاله ..وقلبى والله معكم ..فكوني مع الله يكن معك ..والله يحفظكم من كل شر..آمين رب العلمين ...

وعود الخير

26-09-2005, 10:35 AM

اختنا في الله
القطة الوردية اهلا وسهلا بك معنا
ونشكر لك كلماتك الرقيقة .. ولنا في رسول الله صلى الله عليه وسلم قدوة حسنة ,.
يا أختي
نحن هنا لا نملك الا سلاحين ولله الحمد .. الصبر ... والدعاء..

ودعائنا بان يفرج الله كربتنا وكربة اخواننا المسلمين اينما كانوا..
كل الشكر..

رندوش

26-09-2005, 11:28 AM

صباح الخيييييييييييييييير
كيفك يا وعود صحصحت وشربت فنجان النسكافيه
الحمد لله بدون قصف ولا خوف بس على صوت الزنانه حسبي الله ونعم الوكيل
نور الله ينور عليك مبروك بس شفت الاسم فرحت كتير

رندوش

26-09-2005, 11:29 AM

pink_cat شكرا للمواساه والدعاء
ربي ما يوريها لحد
ما النا غير الدعاء والصبر

وعود الخير

26-09-2005, 11:34 AM

صحتين وعافية رندوش....
ذكرتيني اقوم اعمل فنجان نسكافيه

بنت ارض الحضارات

26-09-2005, 11:40 AM

السلام عليكم ورحمة الله وبركاته
اخواتي واهلنا في فلسطين
ماذا اقول وجرحنا واحد ومصابنا واحد حسبنا الله ونعم الوكيل هو مولانا عليه توكلنا واليه المصير.. اعانكم الله واعاننا واعان امة المسلمين على مصائبها ندعو لكم ونرجو الله ان يزيح عنكم وعنا وعن امة المسلمين، اللهم ارنا في الصهاينة والامريكان واعوانهم واذيالهم وكلابهم اياما اسوأ من ايام عاد وثمود، اللهم اجعل كيدهم في نحرهم ونحرهم في كيدهم حتى يدمروا انفسهم بانفسهم واخرجنا من بينهم سالمين غانمين، اللهم عليك بهم فانهم لا يعجزونك، اللهم انهم طغوا فارونا فينا قوتهم فارنا فيهم قوتك يا ذا القوة والجبروت..
ادعو لاهلنا في العراق ولكل امة المسلمين...

الخنســـــاء

26-09-2005, 11:47 AM

وعليكم السلام ورحمة الله وبركاته

طيـــف

26-09-2005, 12:00 PM

خنساء هلا والله حبيبتي

ضرتي حبيبتي لاتنسي تسلميلي كتير على ام عمر

ودعاء فلسطنين طمنونا عليها

الخنســـــاء

26-09-2005, 12:09 PM

اهلين طيف ..بس وين رد السلام؟؟ :)

وعووووود تكفين سلمي لي على .. الخنسااااااااااااااااء

وعود الخير

26-09-2005, 01:04 PM

يا الخنساء
سلامك يوصل لها ان شاء الله تعالى... ولا يهمك

بنت الحضارات... ربنا يفرجها على المسلمين وين ما كانوا...

طيوف.. ام عمر والله المسكينة كانت قلقانة بشكل .... يوصل سلامك يا قمر..

الخنســـــاء

26-09-2005, 01:09 PM

وعوووود

وش رايك بالدوووره اللي حطيتهااا

لكم .. بالركن

طيـــف

26-09-2005, 01:12 PM

وعلييييييييييييييكم السلام والرحمه حبيبتي خنساء :)

وعود امانه طمنيها وسلملي عليها حبيبتي

رندوش

26-09-2005, 01:17 PM

السلام عليكم
انتبهي يا وعود واخواتي الطيارات تحلق
اذا كنتي حامله كباية النس كافيه اتركيها لتوقعععععععععععععع هههههه
شر البلية ما يضحك
كيف ام عمر سلمي عليها
شكرا اختي بنت الحضارات اللهم انصرنا على اعداء الاسلام آمين يا رب العالمين
الخنساء وعليك السلام ورحمة الله وبركاته واللي في جيبك هاتيه ههههههههه

طيف فينك اشتقنالك واشتقنا لحكياتك يلا شو القصه

رندوش

26-09-2005, 01:19 PM

وعود قلتلك حاسبي ما سمعتي كلامي شفتي عملو غاره وهميه حسبي الله ونعم الوكيل

وعود الخير

26-09-2005, 02:07 PM

اسكتي رندوش المرة هذه قلبي انخلع ليه ما بعرف..
وعود كانت عندي ويادوب طلعت .. والا بممممم
المسكينة رجعت تركض لعندي فاتصلت على اخوها ليروحها..

على فكرة في طيران بيحوم في الجو.. خلي بالك وابتعدي عن الشبابيك..

الخنساء... اي دورة معلش حبيبتي من كثر القصف مش قادرة اركز.

الخنســـــاء

26-09-2005, 02:24 PM

وعووووووووود قلبي .. الله يعينكم .. يارب

خلاص .. من زين وجهي بعد جايه اخذ رايك بموضوع .. وانتم بهالحاله

انا اسفه

عموما انا طالعه

رندوش

26-09-2005, 02:42 PM

سلامتها من الخوف شربيها شوية مي وهي تروق ان شاء الله
الطيارة كتير حايمه في الجو الله يستر

وعود الخير

26-09-2005, 02:52 PM

الخنساء .. تعالى وين رحت
اي موضوع ..

رندوش خلاص البيت وصلت البيت.. واكيد شربت لقالت بس..
بتعرفي من الضربة الأخيرة السقف الاصطناعي عندي وقع اجزاء منه..

وَطَن

26-09-2005, 03:02 PM

وعليكم السلام ورحمة الله وبركاته
شكراً لكل الأخوات اللى بيسألوا علينا وبارك الله فيكن،،
اخر غارة هادى انا فرطت منها يا لهوى على قد ما أنا خويفة بتيجى قوية،،
ديرى بالك على البنت يا وعود والله قلقانة على بنتى الصغيرة بتخاف كتير هالوقت بتبكى بالصف الله يستر،،
تعالى يا خنوسة يا قمر وين رحتى
طيف منورة يا حلوة كيفها سندريلا سلميلى عليها
أختى بنت أرض الحضارات الله معكم انتوا كمان ،، كل عام وإنتى بخير إن شاء الله
كيفك رندوش مع الغارات

وعود الخير

26-09-2005, 03:16 PM

رندوش ما بينخاف عليها يا ام النور
اكيد عم تشرب نسكافيه.. علشان تخوف الطيارات

جبل النور شو عملت وقت ضربات قبل الفجر..

سندريللا

26-09-2005, 03:27 PM

الله يسعدلي مساكم وحده وحده في المنتدي

اشتقتلكم كثيييييييييير

وبدي اشكركم كلكم الله يسعدكم على الدعوات اللى قدمتولي اياها

الله يسعدكم يا رب ويعطيكم كل اللى بتتمنوه

واحده واحدة

وَطَن

26-09-2005, 03:28 PM

شو بدى أعمل ،، لملمت أولادى عندى بالغرفة وقعدت أرجف من الخوف وأقولهم متخافوش يا ماما هذا رعد الدنيا بدها تشتى يمكن، بس وين هذا ابنى أبو ثلاث سنين بيوشوشنى وبيقوللى بتضحكى عليهم هذا قصف صح؟http://www.balhakm.net/vb/images/smilies/011.gif
بعدين قعدت أذكر الله وأدعى لحد ما طلع نهار، كل شئ عندى بيهون فى النهار الليل بالنسبة إلى يا لطيف ما بحبه

وَطَن

26-09-2005, 03:31 PM

سندريلا يا ميت مرحبا حمدا لله على السلامة :-D ، بنت حلال يا شيخة لسة بسأل عليكى والله العظيم ، اتطلعى على الرد اللى قبل رد وعود حتى ... فجأة إجيتى على بالى وبسأل طيف لقيتك قدامى يمة خوفتينى

سندريللا

26-09-2005, 03:32 PM

طيـــف

26-09-2005, 04:22 PM

ساندريلا

بديييييي اعضك

لسه ماسكه الموبايل اتصل فيكِ واتاريك هووووووووووووووووون بتدووري

ولك وين الايميل لسه ماوصل

والله حرام اعضك انتي نواعم مابتتتساهلي:D

طيـــف

26-09-2005, 04:23 PM

جبل النور ورندوش ووعود
حبيباتي انتو طمنونا عليكم اول باول
رندوش خلينا نطمن عليكم ووعد مني لاهريكِ قصصصصصصصصصصصصصصص

نور لك

26-09-2005, 06:00 PM

حبيبات قلبي والله ..
الله يكون معكم يا رب . ما صدقنا فرحنا شوي .. لا حول ولا قوة الا بالله

الله يفرجها يا رب .. زكرتوني يايام القصف بس كنت بلبنان يا ويلي الله بعين .
مش عارفه شو اكتب ولا اقول والواحد مش قادر يعمل شي . بس ما لكم الا الدعاء الصادق .. يا رب .

بتواجدي معكم ونقلكم الاخبار احسن من الجزيره .. يخليلي ياكم يا رب ويطمن قلبكم يا رب..

تحياتي للجميع ... حبيباتي ..

نور لك اليوم مش رايقه معها تعبانه شوي برجعلكم بس اروق .. واطمن عليكم الله يسعدكم ما تقطعوا الاخبار عنا ..

طيف عيوني كيفك يا قلبي والله مشتاقه كتير .

سندريلا حمد لله على سلامتك .. نور المنتدي بوجودك....

وعود الخير
جبل النور
رندوش
ام سميه
اصمدو اخواتي ودعوادتنا وقلوبنا معكم .. بحبكم في الله يا غالين

نور

طيـــف

27-09-2005, 08:56 AM

نور الف سلامه عليكِ حبيبتي

انا ولاانتي يارب
ان شاءالله رح اشوفك قريب واحكي معك متل اول
بس خلييني احس حالي شوي احسن ونفسيتي اوكي
مشان مازود عليكِ:D

وعود الخير

27-09-2005, 09:26 AM

السلام عليكم ورحمة الله وبركاته
سندريلا.. تسلم لي هالطلة
والف حمدا لله على سلامتك..

يا بنات نحنا هون ناقصنا شوية نووووم وبس
يبدو ان السفاح بدو ايانا نكسب اجر بقيام الليل لهيك بيحب يصحينا في الليل ولانه ماعنده ذوق
بيبلش القصف بعد منتصف الليل يوميا..
والله تعبنا.. نفسيتنا تعبت بسبب خوف الاطفال
هاي جبل النور ابنها اللي عمرة 3 سنوات.. كشف اللعبة..

نور يا احلى نور.. سلامتك روقي وارجعي .. بدي اقول لك شغلة عن السمبوسة البرازيلية..

طيـــف

27-09-2005, 09:35 AM

ضرتي مافي صباح لطيف؟

اي لعبه يل اكتشفها؟

وعود الخير

27-09-2005, 09:45 AM

ولو .. أحلى صباح لأحلى ضرة
وهاي اللعبة اللي اكشتفها ابن جبل النور
((لملمت أولادى عندى بالغرفة وقعدت أرجف من الخوف وأقولهم متخافوش يا ماما هذا رعد الدنيا بدها تشتى يمكن، بس وين هذا ابنى أبو ثلاث سنين بيوشوشنى وبيقوللى بتضحكى عليهم هذا قصف صح؟))
شفت الذكاء اسم الله عليه..

طيـــف

27-09-2005, 10:26 AM

لاحول ولاقوة الا بالله

ياربي مش من حقهم هالاطفال يحسو بالامان والعيشه المريحه

وعود الخير

27-09-2005, 11:40 AM

وين بقية الصبايا مختفيين
تعالوا ما تخافوا ما في طيران ولا قصف
خلاص قصفوا من ساعة وانصرفوا...

بنت ارض الحضارات

27-09-2005, 12:00 PM

السلام عليكم ورحمة الله وبركاته
صباح النور يا نواعم يا حلوين
من ذا الذي يخاف الغربان يا وعود؟؟ لن نخاف هؤلاء الصعاليك باذن الله (واستعينوا بالصبر والصلاة وانها لكبيرة الا على الخاشعين) يظنون انهم عندما يهاجمون من بعيد فان لا يد تستطيع ان تنال منهم ولكنهم قوم لا يبصرون وكاترينا وريتا شاهد حاضر على قدرة الله التي تطال كل شي وبدون طائرات ولا صواريخ ولا قنابل ولعذاب الاخرة اشد وابقى لهم ولكل ظالم باذن الله..
حمدا لله على سلامتكم جميعا..
ادعو الله لاهلنا في العراق ولكل المسلمين والمظلومين في العالم...

رندوش

27-09-2005, 01:12 PM

مساء الخيرات معلش شو اساوي نمت شوي وما صحيت الا التليفون بيرن
قلت الله يستر افتكرة الدنيا نص الليل
لان الليل صار نهار والنهار صار ليل عندي
كيفكم بنوتات زي العسل كلكم

اليوم طابخه مقلوبه طبقتها وجيت اشوفكم
اشتقتلكم

وعود الخير

27-09-2005, 01:16 PM

الحمد لله .. المرة هذه مش انا اللي ازعجتك
روحي ركن الحلويات في طبق تمرية راح يعجبك اكيد بتتحلوا فيه بعدالمقلوبة

اليوم عملت ملوخية خضرا ..

بنت الحضارات... ربنا كريم . بس هم لانهم جبناء بيفكروا كل الناس جبنا مثلهم
والحمد لله جنود ربنا لا يعلمها الا هو .. بس هم بيقولوا غضب الطبيعة وهو غضب ربنا عليهم ..

كيف البقية..

وعود الخير

27-09-2005, 08:03 PM

بنات غزة وين تخبيتوا الانفجار كان قوي جدا
الله يستر ... وبعدين مع حفدة القردة والخنازير...

fantasy

28-09-2005, 07:01 AM

سى المانع خير بنات غزة النواعم رندوش جبل النور وعود الخير وغيرهم اسمعت اجاكم تفجرات قوية هليومين طمنونا عنكم قلقانين عليكم كتير خلينا نسمع عنكم شي :confused:

رندوش

28-09-2005, 09:05 AM

السلام عليكم ورحمة الله وبركاته
كيف الحال
بنات غزه كيفكم اكيد صاحيين لان المنبه الصاروخي صحا الميتين من قبورهم :K)
الله يهدهم اليهود آمين يا رب العالمين

رندوش

28-09-2005, 09:15 AM

بنات انتم بخير طمنوني عنكم انا ضحكت عليك يا وعود لما انكب النس كافيه
شر البلية ما يضحك انا صار معي نفس الشي بس على رجلي ربك ستر
الله يحمينا ويحمي اطفالنا

وعود الخير

28-09-2005, 09:32 AM

سلامتك يا احلى رندوش
بتعرفي النوم ما عرف طريقه لعيوني قال شو قلت لبنتي نامي ماما الليلة ما في قصف طلعت الليلة اسوأ ليلة

بانتظار جبل النور الله يحميهم القصف كان في منطقتها ..
وقبل شوية كانت الطابعة عندي فيها عطل قمت سحب الورق والا بومممممممممممم
فكرت ان الطابعة انفجرت عندي..

بتعرفي بدي مطربان قهوة لاصحصح والمشكلة ان عندي تدقيق حسابات اليوم
وبدي اجهز ومش قادرة اركز,,,
شو الحل غير اني اتصل على المدققين واحدد موعد تاني..

رندوش

28-09-2005, 09:40 AM

وعود كان الله في العون يعطيكي العافيه
احسن شي خدي اليوم اجازه وريحي نفسك ونامي
كل ما بقول بدي نام الا صاروخ ينزل
بنام بدري اليوم ان شاء الله من المغرب
والعشا بصليه لما يقصفوناهههههههههههه
بروح اطبخ فاصوليا خضرا
برجع ان شاء الله

وعود الخير

28-09-2005, 11:17 AM

رندوش القصف هالمرة كان قوي قبل ثواني اكسد سمعتيه..
وين آخذ اجازة انت عارفة شغلنا قبل رمضان بيكون مكثف ..
وعندي تقارير نهائية لازم انهيها قبل نهاية الشهر
بلاوي والله ماني قادرة اركز .. الخوف على بنتي في المدرسة بيقطع قلبي.. والا اللي في الجامعة
فكرك اولاد الكلب بيقصفوا الجامعة الاسلامية .. والا الازهر .. بعد قصفهم لدار الارقم شو وجمعية الشهيدش السبعاوي شو فضل..

حسبنا الله ونعم الوكيل

وعود الخير

28-09-2005, 11:21 AM

رندوش شو قلت بدك تطبخي فاصوليا خضرا
خضرا يا رندوش مش خايفة يقصفوك .. اللون الاخضر ارهابي..

رندوش

28-09-2005, 12:14 PM

وعود اظن اني ما حقدر اخلف بعد هيك هههههههههههههههه
انا متت من الخوف وبنتي صرخت من اخر صروخ مدرستها مغلقه اليوم
لان القصف بجوارها وزجاجها تكسر
ما اعتقد بيقصفو خلال النهار اكيد بعد الدوام
خلاص بغير بلونها بلون ابيض وبرفع الرايا

وعود الخير

28-09-2005, 12:45 PM

مني منك باتوقع القصف بكل لحظة خليني اتصل على بنتي اشوف شو عملت
هلأ بتكون في البيت
خلي بالك من سوسو.. احن الكبار ارتعبنا.. كيف هم
بدي اطمن على جبل النور ومش عارفة كيف اوصل لها
يارب تدخل تطمنا عليها
دعاء بخير وهي اون لاين...

وعود الخير

28-09-2005, 01:06 PM

قصف تاني زي هالمرة وانا خلاص ,,
بجد ارتعبت غير شكل ..

اعصابي فلتت مني..
اقول لكم احسن شيء.. راحاترك المكتب وانزل لتحت ..
سلام يا صبايا ولو ما رجعت ما تقلقوا علي باكون نمت.

رندوش

28-09-2005, 01:16 PM

قصف تاني انا خلاص لازم اخد تروفن اي نوع مسكن لان راسي بجد وجعني مش متحمله
اضحكي عليه رحت غير امبوبة الغاز وصار البم تركتها وهربت ربك ستر ما كنت فتحاها
كان صار مجزره في البيت
وعود الله يطمنا على جبل النور
نوم العواف اذا تركك القصف اتنامي

عرنوش

28-09-2005, 01:38 PM

جبل النور ، وعود الخير ، رندوش ، الله يسترنا يارب من اللي جاي
عن جد الواحد قاعد وزي اللي ماخد ضربة على راسه والله حاسة حالي فاقدة توازني بالمرة ، وهلأ أنا حامل ثلاث شهور وكل ما يصير قصف بحس بطني وظهري انفتح مش عارفة شو صار في اللي في بطني الله يستر .
انا كتير بحب اشوف مواضيعكم بحس حالي بحكي مع خواتي .
على فكرة انتو من وين بالزبط من غزة.
بلكي تعرفنا على بعض
يالله باي ديروا بالكو على حالكو وعلى اولادكو

وعود الخير

28-09-2005, 02:11 PM

عرنوش اهلا وسهلا بك معنا في دردشتنا وان شاء الله تتواصلين معنا
توكلي على الله وارمي الخوف جانبا .. علشان النونو..

الرباعي اللي معك في مدينة غزة.. كل وحدة في منطقة ولهيك بنتبادل الاخبار..

نورت ويا ميت هلا

رندوش الف سلامة خلي بالك ..
انا وقعت شاشة الكمبيوتر في حضني ..

رندوش

28-09-2005, 06:59 PM

عرنوش اهلا وسهلا فيك تشرفنا
وينك من زمان ما شفناك
انا من غزه المحرره مؤقتا ههههههههههههه
بنصحك كوني كولللللللللللللللل وحطي رجليك في ماء متلج يمكن تروق اعصابك
الله يسترنا و يصدهم ويردهم
سلامتك وعود اكيد اخدتيها بالاحضانننننننننننننن

نور لك

28-09-2005, 07:28 PM

صباح الخير حبيباتي الله يكون بعونكم ..
لا حول ولا قوة الا بالله
عن جد الله يعينمكم ويهدهم وما يردهم ا مين .
وعود بالي على طول رايق الك حبيبتي .. قوليلي شو بدك تقولي على السمبوسه .. اذا فيكي اعصاب ..
الله يطمن قلبك وبالك يا رب.

الله يطمنا على جبل النور . والله خوفتوني .. الله يستر

مش معقول رندوش ووعود اخباركم الحيه فظيعه عن جد بتهبط قلب الواحد .. يا رب يخلصكم منهم باقرب وقت ..
طولتو بالكم كتير .. ان شاء الله الباقي اقصر..

عرنوش اهلا وسهلا اختي .. ابقي طمنينا عنك باستمرار

طيف يا البي يا سكره انتي يسعد صباحك

يسعد صباح الجميع نفر نفر

صبايا غزه الله يسعدكم ما تتاخرو علينا باخباركم .

نور

رندوش

28-09-2005, 07:51 PM

صباح الفل نور الله ينور عليك
اخبارنا ننفع مراسلين للاخبار صح
كل شي 2 ساعه بيعملو فرقعه في الجو بنكوني نايمه بتصحي
او بدرسي الاولاد بتنصرعي شر البليه ما يضحك
المهم طمنينا عنك وعن اخبارك

وعود الخير

28-09-2005, 08:13 PM

خلاص صار عادي التوقيت كل ساعتين بووووووووووم
صرع يصرعهم ان شاء الله...
بس على مين انا عم باكتب وجيرانا صوت الفرح عندهم واصل الحدود بيرقصوا وبيغنوا ولا كانه في شيء

شوفي يا ست نور .. بصراحة لما عبت من اللف والحشي
خلصت الحشوة فكسلت اعمل غيرها قمت رقيت العجينة شوية سميكة وقطعتها أصابع
وقليتها صارت منفوخة وشكلها كثير حلو
فجبت كيس الكريمة وحطيت فيه فيتا مع بابركيا ورشة نعناع ناشف وحشيت عن طريق البنش يعني صرت اضغط بالانبوب الرفيع وطلعت روعة .. ومريحة
وبس حبيت اقول لك تسلمي على هيك سمبوسة طيبة وهشة والاهم بتقرش وما بتشرب زيت كثير..

ام سمية

28-09-2005, 08:49 PM

حبيباتي في غزة وعود رندوش جبل النور عرنوش ..الله معاكم وكفى بالله حسيبا ووليا ونصيرا
قلبي تقطع وانا اقرأ ...الله ينتقم من الظلمة
حبيت اسلم عليكم (عندي استراحة كلهم طلعوا مشوار وانا ما صدقت ركضت على لك اشوف الاحبة)
واخبركم اني ادعو لكم كل يوم كل يوم وفي معظم الصلوات ..ودائما بالي مشغول عليكم وعلى الاسرى الله يفك اسرهم آمين
الله يحميكم ويعوضكم بقصور في الجنة فيها شاشة عرض كبيرة تعرض شارون وموفاز وجنودهما وكل الخونة وهم عم ينشوا في جهنم وما يلاقوا شربة المي وانتو تضحكوا عليهم (وطبعا انا اكون معكم :) اتفرج عليهم واضحك ) ونقول لهم ذوقوا هذه برعبة ابنائي وهذه بأسر شبابنا وهذه بقتل احبائنا ..ذوقوا الجحيم خالدين فيها

وعود الخير

29-09-2005, 09:31 AM

السلام عليكم ورحمة الله وبركاته

ربي يسعدك يا ام سمية ..
وليش الشاشة بنشوفهم باذن الله تعالى في بث حي مباشر..

الحمد لله الليلة عدت بدون قصف.. والاطفال ناموا كويس
بس انا ما عرفت انام كل ما سمعت صوت الاف 16 توقعت قصف بس خيبوا ظني..

منهم لله..

المهم انت كيف اليوم... وكيف الاستعدادات لرمضان ..

طيـــف

29-09-2005, 02:07 PM

صباح الخير يانواعم الهنا

حبيبتي ام سميه منوره
الله يسعدك ويسعد قلبك كلامك شو ببببببببببببببفش القلب

نور نور قلبي:) وصباحك ورد يارب

رندوش

30-09-2005, 09:20 AM

صباح الخير يا احبابي بنوتات المنتدى وكلام نواعم بالاخص
ام سميه آمين يا رب العالمين نفسي بس اشوف فيهم يوم ما شافو قوم قبل هيك
وعود صدقي مش عارفه انام كل شوي اشوف الساعه عدهم ضربو عدهم قصفو بس
و لله الحمد هديو وركزو عرفو ان الله حق
حسبي الله و نعم الوكيل
طيوف فينك من زمان اشتقنالك ما طولي الغيبه علينا

وَطَن

30-09-2005, 09:43 AM

صباح الخير وزهر الليمون يا رندوشة كيفك،، شكلهم ماخدين إجازة اليوم الله لا يوفقهم
أم سمية أهلين يا قمر كيفك؟؟؟ آمين يارب العالمين هم وكل أعداء الإسلام
نور لك كيفك منورة،،، بدى أشكرك على السمبوسك الرائع معلش متأخر بس لأنى ما كنت شايفاه سامحينى :-s
طيف كيف الحال صباحك سكر يا سكر
وعود سلامات هاو آر يو :-D
بنت أرض الحضارات الله يسلمك يارب
فانتاسى احنا بخير وموجودين تسلمى
عرنوش كل ما يصير غارة تعالى بتلاقينا متخبيات فى النواعم هون :-r
أم نادر كل عام وإنتى بخير ليه ما بتطلى علينا
أم يوسف كل عام وإنتى بخير
كل النواعم صباحكم فل

رندوش

30-09-2005, 06:47 PM

اهلا جبل النور كيفك الحمد لله اتطمئنينا عليك انك بخير
وين البنوتات راحو ما يكونو بحضرو لرمضان واحنا مش عارفين
كل عام وانتم بخير

نور لك

30-09-2005, 07:11 PM

يسعد صباحكم يا حلوين يجعله يوم جميل على الجميع يا رب بعيد عن القصف والقلق.

رندوش مراسلين 10/10 . مبارح جوزي بشوف الاخبار قلتله خلص اقلب فال بدي اشوف .. قلتله النواعم مش مقصرين انا بعرف اخبارهم تكه بتكه .. الله يطمن البكم يا رب.

وعود الخير يا اطيب قلب حبيبتي كيف اصبحتي .. فكرتك رائعه بالسمبوسه بلكي جربتها بس اعمل تاعوني . مش عارفه لبش متاخره السنه بالعاده بكون مجهزه السمبوسه بالفريزر من قبل . لازم اعملهم هاليومين .. بس يطمن قلبي ..في شي شاغل بالي ادعولي..

طيف يا سكر يا قمر النواعم كيفك حبيبتي طمنيني عنك . كل ما بحكي معك بشتقتلك اكتر..ابقي طمنيني.

جبل النور حبيبتي انتي لا شكر على واجب ولو نحنا اخوات .. طمنينا عنكم ؟؟

ام سميه شو هالنور الله يسعدك زمان على طلتك البهيه ما تحرمينا منها .

تحياتي لباقي صبايا نواعم صبيه صبيه ..

نور

ما تنسوني بدعواتكم الله يخليكم محتاجه الدعاء اخواتي .

وعود الخير

30-09-2005, 09:29 PM

مساء الفل يا حلوين
بتعرفوا نمت لعد الظهر وما صحيت لقرب المغرب

مسطولة...
جبل النور.. الحمد لله انك بخير .. والله قلبي كان مشغول عليك كثير .. الحمد لله

نور لك... يا ارق واحن قلب.. ان شاء الله تعالى الفرج قريب من عنده
ومن قلب بادعيلك ربنا يفرج همك وكربتك ....
نسأل الله العظيم رب العرش العظيم ان يفرج كربة اختنا نور كما فرج كربة سيدنا يونس عليه السلام
نسأل الله العلي العظيم رب العرش العظيم ان يطمن قلبك كما اطمأن قلب ام سيدنا موسى عليه السلام...

طيف حقك علي لسه ما رديت على رسالتك بس الرد في الطريق ، شوية حواجز مش اكثر

وَطَن

30-09-2005, 10:05 PM

ميرسيه يا وعود ما تشوفى إلا الخير إن شاء الله،، بس من كتر الضرب صار عندى وش بأذنى وكنت كتير متضايقة من قلة السمع،، واليوم الحمد لله رب العالمين خفيت شوى،، أو يمكن اتعودت
تحياتى لكل النواعم الأمرات وكل عام وأنتن سالمات

وَطَن

01-10-2005, 12:01 AM

نـــــــــــــــــــــــــــور الله يهدى بالك يارب..

نسأل الله العظيم رب العرش العظيم ان يفرج كربة اختنا نور كما فرج كربة سيدنا يونس عليه السلام
نسأل الله العلي العظيم رب العرش العظيم ان يطمن قلبك كما اطمأن قلب ام سيدنا موسى عليه السلام...

رندوش

01-10-2005, 09:13 AM

صباح الخير والخيرات الحمد لله ان ما فيه قصف ورجعنا نسينا النكد وتفرغنا لرمضان

كيفكم صبايا طمنوني عنكم يلا
نور سلامتك من الفكر الله يهدي بالك
نسأل الله العلي العظيم رب العرش العظيم ان يطمن قلبك كما اطمأن قلب ام سيدنا موسى عليه السلام...
نسأل الله العلي العظيم رب العرش العظيم ان يطمن قلبك كما اطمأن قلب ام سيدنا موسى عليه السلام...
نسأل الله العلي العظيم رب العرش العظيم ان يطمن قلبك كما اطمأن قلب ام سيدنا موسى عليه السلام...

وعود تعي هون عملت سمبوسك يلا هاتي المقادير وبدون غشششششششششششششششش

جبل النور سلامت ودانك ان شاء الله شارون ولا انت
ام سميه كيفك اليوم
طيف اتعودنا على غيابك على راي عادل امام متعوده دايما
طمنينا عنك وعن اخبارك ولو بكلمة السلام عليكم بنعرف انك بخير ::L::

وعود الخير

01-10-2005, 09:18 AM

السلام عليكم يا احلى صبايا
صباح الروقان
وربي يطمنا على نور ويطمن بالها

شوفي يا ستي هاي السنة ناوية اقاطع الجوجو
ليش علشان السمبوسة من نور لك وام الافكار
روعة ..
والمقادير
تكرم عينك راح احط لك الروابط من عيوني ياقمر الرمال المتحركة.

وعود الخير

01-10-2005, 09:19 AM

جبل النور..
عيوني انت انا البارحة كتبت لك رد وقلت لك تصبحي على خير
بس شكلي فصلت النت قبل ما يتم الارسال كامل
يبقى صباح الورد يا وردة ال...... اح...

رندوش

01-10-2005, 09:19 AM

تسلم عيونك
كيف صبحتي اليوم مع الشغل مصحصحة ولا ما في تدقيق اليوم

وعود الخير

01-10-2005, 09:22 AM

صباحك سكر يا عسل
اليوم لازم اصحصح مندوب سابا بعد ساعة راح يكون عندي..
لهيك باكتب من بكير
وهذه وصفة ام الافكار على ما احصل رابط نور لك
((الان بدي اكتب لكم طريق عجينة البف رائعه وكتير جربوها بهالطريقه وزبطت معهم ميه ميه

طبعا العجينه بدون خميره وبنقليها بالزيت انا باعجنها بالليل متاخر وباحطها في كيس بادهنه زيت خفيف كتير

باحطها بالثلاجه وقبل ما اشتغل بساعه باطلعها بره وباقطعها كور صغيره كتير اصغر من البيضه وغطيها في صينيه

اتركيها ترتاح وقت طويل ساعتين ممكن بعدين تحشيها زي القطايف تماما بعد فردها بالشوبك (النشابه )

المهم انا طولت عليكم بس عشان تزبط معكم وتدعولي

المقادير

كاستين كبار طحين

معلقتين كبار حليب بودره (اللي ما بيحبوا الحليب البودره )ممكن يحطوا مع ماء العجن حليب سائل او حتى كلها يعجنوها بحليب سائل

معلقه كبيره نشاء عادي علشان تهش

رشة ملح وملعفتين كبار زيت

حطي الطحين والملح والنشاء والحليب الناشف افركيهم بالزيت بعدين اعجنيهم بالماء حسب الحاجه العجينه ما بتكون ناشفه ولا رخوه

عجينه عاديه يعني

ماشي سكروها كويس لما تحشوها بس هاي لحشوة اللحمه مفضله اكتر ))

رندوش

01-10-2005, 09:26 AM

شكرا غلبتك

وعود الخير

01-10-2005, 09:34 AM

انت عارفة ردي بس ما فيني ابثه على الهواء..

وعود الخير

01-10-2005, 09:39 AM

وهذا رابط السمبوسة البرازيلية للغالية نور لك
واترككم في رعاية الله ..
ادعولي .. عندي تدقيق حسابات .. ولازم اشرب سطل قهوة ونسكافيه علشان اصحصح
http://www.lakii.com/vb/showthread.php?t=114002

رندوش

01-10-2005, 10:05 AM

شكرا كان الله في عونك دعائي لك الله يكون في عونك ويوقفلك جنود من عنده
طمنينا
عارفه ان غلبتي راحححححححححححححه

وَطَن

01-10-2005, 11:33 AM

السلام عليكم ورحمة الله وبركاته
صباحكم سكر يا نواعم ،،
يعطيكى العافية يا وعود والله يعينك،، بس سطل قهوة حرام عليكى ، أنا لما بشرب القهوة بكل أنواعها بنسطل وبنام مش عارفة ليه،، ولما أقلق وما اعرف أنام على طووووووووول فنجان نسكافيه وبروح فى غيبوبة :D
شو يا وعود وردة مين :confused:

تفضلى أحلى سطل قهوة من أختك جبل النور

http://www.greatbigstuff.com/prodpics/cupsaucer.jpg
رندوش صباح الخير يا وردة الرمال المتحركة :D بعدين لما تجربى السمبوسك خبرينى ضرورى،، لأنى السنة
عندى إن شاء الله ثلاثة صايمين من الأولاد وكتير بيحبوها،،و اللى راكنة عليها (ماما) مسافرة لآخر السنة :K)
يعنى فيه اعتماد على النفس أوووووووووكى؟
وكل سنة وإنتوا طيبين

وَطَن

01-10-2005, 11:59 AM

اه تذكرت يا وعود ورندوش اللى بتعرف دكتور أذن منيح تعملوا دعايا بسرعة يعنى تخبرنى عنه لأنى عن جد
متضايقة :K) ، وإذا بيصير لى شئ راح أرفع عليه قضية هذا المجرم شارون
يعنى لما خلص قفلت اودانى بطل يضرب شكلى أنا اللى كنت مستهدفة من الغارات الله لا يوفقه

أناغيـم

01-10-2005, 12:02 PM

سلام..
انا جيت ليش هربتوا
كويس ان وعود مشغولة علشان آخذ راحتي
عندي بريك ساعتين .. بين المحاضرات.. شفتوا العز ..
المهم اشقت لكم قلت اسلم عليكم واقول لكم رمضان كريم...
جبل النور.. قلبي معك الماما كانت قلقانة عليك انت بالذات

طيف .. يا ضرة وعود.. ولو انت في البال دوم.. بس عذري معي واكيد وعود شرحت لك السبب..

رندوش... شو قصة السمبوسة.. انا دخلت عالخط ,..
راح اسلم واشوف شو القصص يللي صارت من ورى ضهري

تحية للجميع ..

طيـــف

01-10-2005, 12:11 PM

صباح الخير يااحلى صباح
نور ياحبيبتي ماتشكي للحظه لك اصدق الدعوات وارق المشاعر الله يسعدك يارب ويشيل عنك كل مكروه ياسميع يارب

طمنيني انتي خير شو مضايقك"
نسأل الله العظيم رب العرش العظيم ان يفرج كربة اختنا نور كما فرج كربة سيدنا يونس عليه السلام
نسأل الله العظيم رب العرش العظيم ان يفرج كربة اختنا نور كما فرج كربة سيدنا يونس عليه السلام
نسأل الله العظيم رب العرش العظيم ان يفرج كربة اختنا نور كما فرج كربة سيدنا يونس عليه السلام

طيـــف

01-10-2005, 12:12 PM

جبل النور الف سلامه عليكِ حبيبتي وعلى سمعك

ليكون بس بتهىء لك يابنت من شدة الاعصاب يل انتو فيها؟

وعود صباحك ورد حبيبتي
بنتظار رسالتك وبراحتك ياقلبي

طيـــف

01-10-2005, 12:13 PM

كتكووووووووووش

نوووووور النت ياحلوه

عرفت السبب بسيطه
بس المهم طمنيني خلص وعود بطلت الحجه:) وجابت كرت:D

طيـــف

01-10-2005, 12:15 PM

رندوش
ياوحشه تعودتي على غيابي:(:( الله يسامحك
وانا كل يوم بدخل اصبح واسلم عليكم

اصلا انتي لو تعرفي شو قلت لوعود عنك كان عمرك مافكرتي تتعودي على غيابي :(
:(:(:(
الله يسامحك شفتي ياوعود شو بقول عن رندوش انا
وهي بتقول لي تعودنا على غيابك:(

أناغيـم

01-10-2005, 12:19 PM

يعني خلاص خالتو طيف سامحتيني ..
حلوة خالتو، والله يا خوفي تضربيني باللي قدامك
شو قلت لوعود عن رندوش عندي فضول اعرف

طيـــف

01-10-2005, 12:51 PM

:D اسال امك ياعيون خالتو
:) لهدرجه انا بخوف! ولا صار عندك الخوف عقده:D

أناغيـم

01-10-2005, 01:00 PM

النت بطيء وكل شوية موقع لك بيفصل على حظي علشان عندي وقت فاضي
المهم انا ما فيني اسألها علشان بعرف الجواب...
شي مالك فيه ما تسألي عنه..
على فكرة وعود بتمثل الديمقراطية العربية بحذافيها وشعارها
من حقك تعترضي ومن حقي ارفض

أناغيـم

01-10-2005, 01:30 PM

سلام يا احلى نواعم
البريك شارف على الانتهاء
وصار لازم اقول استودعكم الله
ونتلاقي عن قريب ان شاء الله تعالى..

رمضان كريم .. وربنا اكرم.

وَطَن

01-10-2005, 01:45 PM

مرحبا وهلا ...
معلش كاتيوشا وطيف دخلت بيناتكم بس بدى أسلم عليكى وأفل...
طيف صدقينى من غيرك مختلف الوضع خصوصاً بالركن يعنى بيكون ناقصه شئ حلو وأكيد هو طيف
بعدين هادى تانى مرة تحصل معى من ورا اللى ما يتسمى شرشر (شارون)

كاتيوشا هنا ،، منورة والله يا نوارة لكِ إنتى كيف الأدب العنجليزى معك
والله كتير خجلتنى الماما بقلقها عليه الله يوفقها يارب ويرزقها بكل خير وصلاح
كل عام وأنتم بخير يا أمرات

رندوش

01-10-2005, 06:42 PM

مرحبا صبايا شو القصه كاتيوشا عندنا يا مرحبا يا مرحبا
جبل النور سلامتك فيه دكتور ممتاز بس في الرمال المتحركههههههههه
اسمه شعبان مرتجى كتير ممتاز انا شخصيا بروح عنده وهو عيادته عند عيادة الرمال فوق

هدايانا عرفتيه ولا ارسملك الخريطه

رندوش

01-10-2005, 06:55 PM

عزيزتي طيوف ما تكوني زعلتي انا ما بقدر على فراقك
كيف اقدر على زعلكhttp://www.lakii.com/img/all/Oct05/MuWxgm10010952.jpg

احلى 3 وردات في الحديقه صورتهم و اهديك اياهم

وعود الخير

01-10-2005, 09:08 PM

طيب رندوش انا كمان زعلت.....

رندوش

02-10-2005, 09:07 AM

السلام عليكم ورحمة الله وبركاته

:K) :K) :K) :K) :K)
شو القصه الكل صبح زعلان مني حتى انتي يا وعود
طيب ابو العيال وزعلان و مقدور عليه ws:-)
و طيف وانتي لالالالالالالالالالالالالالالالالالالا
شو اساوي خلاص انا كمان زعلانه من نفسي :confused:
شوفي يا ستي احلى كب كيك علشان خاطرك
بس ما حد تاني يزعل مني سمعين ::L::
حضرتي النس كافيه ولا لسه لان بعتلك كب كيك على المكتب
http://www.lakii.com/img/all/Oct05/nmscqF10020002.jpg
عجبك ولا بدك تاني بس مش اي اي ولا كل كب كيك يتقله كب كيك

وعود الخير

02-10-2005, 09:14 AM

السلام عليكم ورحمة الله وبركاته

ممكن اتنازل وما ازعل لو قلت من وين اشتريت اوراق الكب كيك ..
انا زعلت علشان الوردات حلوين وكان نفسي في وردة واحدة بس..

بس خلاص مش ممكن ازعل من رندوش حبيبتي .. وبعدين نحنا داخلين على رمضان ولازم نصفي النفوس صح والا...

صباح الورد للورد ومساء الفل للفل..

نور لك

02-10-2005, 09:21 AM

الله يسعد صباحكم من الله ما اطيبكم ..والله والله ما في زيكم يا احلى نواعم.

اشكركم كلكم على دعواتكم الصادقه يا اغلى اخوات .. حبيباتي والله .

شو القصه في ورد وكب كيك وما بدك نزعل.. لالالالالالالالا انا زعلانه وماخده موقف كمان لحفي راضيني قبل ما افوت انام ...... وبيني وبينك جوعانه فبلاش ورد اه خليها اشي زاكي زيك .. ههههههههههههه

يخليلي ياكم يا رب وما يحرمني منكم .

الامور الحمد لله ان شاء الله خير لسه ما اطمنت منيح بس عله خير ان شاء الله .

البرد بلش عنا يا صبايا ايدي عم ترجف وانا عم اكتب .. ال شو ال جيت اطفي الكمبيوتر قبل ما انام خخخخ ..

ما قدرت انام قبل ما اطل واصبح ..

بلاقيكم بكره حبيباتي ..

تصبحو على خير .. ويسعد صباح اللي صبحوا ..

نور لك

02-10-2005, 09:25 AM

اسفه لاحظت انه وعود قالت ما في زعل ولازم نصفي النفوس :-D

خلص مش زعلانه بس لو تبعتيلي سندويشه بكون مبسوطه ws:-)

خلاص تصبحو على خير

ما الي قلب اترك وانا شايفتكم اون لاين . :K) :K) :K)

وعود الخير

02-10-2005, 09:25 AM

نوم العوافي يا نور...
وبس تفيقي احلى كب كيك من رندوش لعيونك..

وَطَن

02-10-2005, 09:56 AM

صباح الخير نواعم..
شو كب كيك وررق للكب كيك ،، وزعل وعض ونور لك وندوش ووعود كمان كل الحاجات الحلوة مجمعة بشوف
خير,,
كبفكم النهاردة عاملين إيه على الصوبح غير النسكافيه.. :K)
بعرفه والله الدكتور شعبان رحت له قبل هيك أيام ما قصفوا حى الدرج قبل ثلاث سنين وشهرين تقريباً ،،
ما أنا انطرشت إيامها يا إختى، خلاص إن شاء الله خير
بعدين خلى الكب كيكاية هادى إلى خلينا نعمل عليها حفلة http://www.asmilies.com/smiliespic/love/030.gif

وعود كيف الصحصحة اليوم http://www.asmilies.com/smiliespic/sleep/034.gif
نور النوارة هنا هلا ،، مبارك اللون الأزرق يا قمر http://www.asmilies.com/smiliespic/love/003.gif

رندوش

02-10-2005, 10:31 AM

صافي يا لبن حليب ياقشطه انتي يا احلى وعود :-D
نور ما تزعلي ببعتلك احلى ساندويشه بس ما تزعلي لاني اكلتهههههههههههههههه في الطريق

وعود انا كنت شارياه من ابو الكاس او من القيشاوي بس الصحيح رحت اشتر ي لاني استخدمة اخر شي
قالولي مقطوع :K) انا ما بستغني عنه بس ينزل السوق ببلغك لانه قالي هيك القيشاوي
بس تفتح المعابر الله يفتحها علينا امين يا رب العالمين
جبل النور سلامتك زوريه تاني ما فيها شي ولا تتركي نفسك للطرش سلامتك

وعود الخير

02-10-2005, 10:33 AM

شفت يا جبل النور كيف رندوش بتجمعنا وبعدين بتختفي
كيفك والف سلامة ...
على فكرة الدكتور شعبان كثير شاطر...
سلامتك ان شاء الله البطةالعرجا (شارون) ولا انت يا ام النور

رندوش

02-10-2005, 10:39 AM

لا ما اختفيت بس بشتغل شوي و برجعلكم مش قادره
لازم اشتغل في البيت لان الغبره مش ملاحقه عليها في عماره بتتبني و غبره كتير
اعذروني سلام

وَطَن

02-10-2005, 11:15 AM

منيح الحل يا وعود أنا فكرت هيك برضه،
رندوش الله معك وما تقلقى مش حسيب نفسى للطرش يااختى ولو إنه أريح ws:-)

بعدين تعالوا هنا لو سمحتوا مين بتعرف تعمل كنافة عربية فى البيت ماما كانت تعملها لنا بس مش قادرة أكلمها :K)
لأسألها الله يخليكوا ،، بعدين فيه إلها اسم تانى ولالأ الكنافة العربية؟؟؟
تشكراتى مقدماً

وعود الخير

02-10-2005, 11:32 AM

اللي تعرف ياريت بس المشكلة ان الكنافة العربية بس في غزة
في بلاد تانية ما شفتها مثل الكويت والاردن وسوريا
بس عندي حل خليني افضى وارجع لك .
واذا نسيت ذكريني..

بنت ارض الحضارات

02-10-2005, 11:56 AM

السلام عليكم ورحمة الله وبركاته
صباح الفل حبيباتي نواعم لك يا احلى نواعم
اعذرنني لتغيبي فانا وابنتي مرضى عافاكم الله جميعا (كح كح اتشو اتشو)
صباح الخير وعود كيف اصبحت وهل انتهى التدقيق عندكم ؟؟ اعانك الله ورزقك سعادة الدارين ولامة المسلمين بالمثل..
صباح الخير نور لك فرج الله كربك وازال همك وغمك واتاك من كل ما سالته ولامة المسلمين بالمثل.. على فكرة السمبوسك جربتها وكانت خطيييييييييييييييرة وفعلا كانت لا تتشرب بالزيت عند قليها.. بارك الله بك وباناملك المبدعة..
طيوف حياتي اشتقت لك كثييييييييييييييييييييرا اين انت يا بنت الحلال ادعو لك دائما بالستر والعافية والمعافاة ولامة المسلمين بالمثل..
جبل النور صباح الخير طهور ان شاء الله حياتي ادعو الله لك بالشفاء العاجل (يروحولج فدوة شارون وكل الصهاينة والامريكان والانكليز)..
رندوش صباح الخير اعانك الله على ازالة الغبار الذي لن ينتهي حتى ينتهي بناء العمارة.. وعندي سؤال هل كل من يزعل له سندويش وكب كيك؟؟ اذا كان الجواب بنعم فانا في طريقي الى الزعل (عندما امرض يفتح الله علي بالاكل والنوم ولذلك انا في هذه الايام مفجوووووووووووووووووعة على الاكل)
كاتيوشا حبيبتي ذكرتني بالذي مضى ايام الدراسة والجامعة كانت ايام جميلة اعانك الله على الدرس والتحصيل وبارك بك واتاك سعادة الدارين..
بنااااااااااااااااااااااااااات كل عام وانتم بخير شهر رمضان قادم ان شاء الله بالخير والبركة عليكن جميعا بلغنا الله واياكم هذا الشهر الكريم واعاننا جميعا على صيام نهاره وقيام ليله وتقبل منا جميعا وانعم على كل المسلمين بكل الخير والسرور فيه ومن بعده وازاح الله همومنا جميعا واكرمنا بحرية اوطاننا وزوال دولة الظلم والظالمين امين امين امين..
ولا ننسى ان ندعو لاهلنا في العراق وفي كل بلاد المسلمين...