ّ^&* %%قهوتنا الملكية%% تفضلي وخذي اسرارهاّ*&^

بسم الله الرحمن الرحيم
والصلاة والسلام على اشرف الانبياء واتم المرسلين
***
بصراحه (من غير مدح) كثير من يذوق قهوتنا يحبها وينهبل عليها لدرجة ان ترمسنا يسالون عنه من بين الترامس من هنا قررت اكتب عن طريقتنا وعن اسرار قد تخفى على البعض وقد يعرفها البعض الاخر لكن يعتقد عدم اهميتها
والسر الرئيسي هنا مو في طريقة تحضير القهوة انما في اساسيات قبلها
واللي تتفرع من عدة جهات
واللي هي:
القهوة
الهيل
الزعفران
**********
اولا: القهوة

نوع القهوة له دور كبير في طعم القهوة
وافضل نوع القهوة البرية
ثم القهوة الخولانية
ثم البن الهرري
***
من اسباب رداءة القهوة هو شراؤها جاهزة محموسه ومطحونه من العطارة او المحامص والمطاحن والسبب انه ممكن تكون قديمة عنده فبالتالي ماتطلع تمام
والشي الثاني المطاحن اللي يستعملونها يطحنون فيها كللل شي وهذا يأثر طبعا على جودة القهوة
<<< طيب والمطلوب؟
المطلوب انك تشترينها نية وانت تنظفينها و تحمسينها في البيت وتطحنينها
ولازم تراعين مساله مهمة في الطحن وهي انك ماتطحنين كمية كبيرة
اطحني كمية تكفيك من 4 ايام الى اسبوع بالكثير
لان طعم القهوة اللي مطحونة اليوم يختلف عن طعم القهوة اللي مطحونة من شهر
(وهذا شي معروف وراح تلاحظينه)
اضافة الى ان المحلات ماتراعي نظافة القهوة وهذا الشي اللي انت راح تراعينه
في تنظيف القهوة
*****

،
،
،
يتبع

الهيل:

ايضا نوع الهيل له دور كبير لكن اهم شي في الهيل هو الطحن زي القهوة
الهيل مطحون اليوم غير عن الهيل مطحون من شهر ونفس الشي ماتطحنين كمية كبيرة
سر ثاني بعد كثير من النساء في الفترة الأخيرة صارو يطبخون الهيل مع القهوة بغيه في السرعة وظنا انه مايأثر
وهذا من الاخطاء اللي يغفل عنها البعض والسبب ان الهيل يفثل (وهذا مصطلح معروف عند الحريم) ومعنى يفثل ان طعم الهيل المطلوب يختفي ومايبان الا شي
بسيط
<<< طيب والحل؟
الحين اغلبيتنا يستخدم الترمس (الزمزميه) اذن تحطين الهيل في الترمس وبعد ماتنتهي القهوة طبخ تزلينها عليه في الترمس وتخلينها تركد
وجربي وراح تشوفين الفرق
موقف حصلي بخصوص هالسالفة:
(كنا مره بمجلس حريم وكل وحده وترمسها معها وكنا نتناقش بالسالفة هذي وحده تقول انه مايأثر ونفس الطعم وانا اقول ابدا ياثر المهم ذاقت قهوتنا وقهوة وحده ثانيه وقالت على قهوتنا ان هيلها باين اكثر من القهوة الثانية وطبعا قهوتنا مستخدم معها الطريقة اعلاه اما الثانية فكان الهيل مطبوخ مع القهوة!!!)
المهم في الموضوع انك ماتطبخين القهوة مع الهيل وللعلم بامكانك طبخ القهوة مع الهيل بحالة وحده وهي بعد زل القهوة (شخلها)

********

،
،
،
يتبع

ثالثا:الزعفران

الزعفران سر كبير من اسرار القهوة ومعروف انه دليل على حسن الضيافة

وهنا ماعندي كلام كثير لانه معروف عندنا كلنا ان الزعفران الممتاز غالي

واللي نستخدمه بكثره نوعية نقدر نقول عنها من جيد الى جيد جدا

مثل ابو شيبه وغيره واللي تعرف زعفران افضل تدلنا مشكورة
*****
،
،
،
يتبع

تسلم ايدك انا بعتمد هذه الطريقه بالافراح بس

هذا بالنسبة لاساسيات القهوة ماقبل التحضير
الحين نشوف التحضير
التحضير بناء على الاساسيات فوق مسالة سهلة جدا لانك متاكدة من قهوتك وش راح تصير

بالنسبة لنا بعد ماتغلي المويه نضيف القهوة فاذا كانت ثقيلة نضيف شي بسيط مبيض (كوفي ميت) واذا كانت خفيفة نحمس لها قهوة ثقيلة ونخلطها معها عشان يصير متوازن لانه الخفيفة لحالها راح تستمرين تحطين وماكانك حطيتي
والاصل ان تصير القهوة وسط لا ثقيلة ولا خفيفة لكن هذا اذا واجهتك مشاكل معاها
نتركها تغلي من من 10 الى 15 دقيقة وبعد ماتخلص تسكرين عليها وتخلينها شوي (مو على طول تشخلينها)
واذكر هنا وحده من العضوات حطت موضوع بخصوص هالسالفة الله يجزاها خير
ونعرف بعض الحريم من زود مايتركونها تركد مايستعملون المشخالة
اذن النقطة ذي مهمة
طبعا نكون محضرين الترمس اللي فيه الهيل والزعفران نزلها عليه ونتركها تركد
ملاحظة: القهوة هنا ماتقدم بسرعه لازم تترك على الاقل عشر دقايق عشان يمدي الهيل تشرب القهوة ونزل تحت
لانك اذا قدمتيها بسرعه راح يطلع معك الهيل ويزعج اثناء الشرب
واعرف وحده قالتلي اذا زليتيها في الترمس حطي عليها مقدار فنجان القهوة مويه مغلية عشان بسرعة الهيل يركد
وانواع السنع لاحصر لها
ملاحظة 2: قد مره قريت لوحده طريقة حلوه بالزعفران جربتها (خصوصا اذا كان الزعفران مو ذاك الزود) وهي انك بعد ما تغلي موية القهوة ناخذ منها شوي (مقدار فنجان القهوة تقريبا) ونحط عليها الزعفران وتترك على بال مانحضر القهوة ونحطها بالترمس وشوفي القهوة كيف راح يبان لون الزعفران فيها0
***
هذا بالنسبة للقهوة في الترمس اما القهوة في الدلة

بعد ماتحطين الهيل والزعفران في الدلة وبانتهاء غليان القهوة نزلها في الدلة
ثم نفوح الدلة (يعني نخليها تغلي غليه وحده) ولازم تكونين جنبها عشان ماتطيش وتحوس الدنيا
ولاحظي هنا غلينا القهوة مع الهيل بعد شخلها وهذا اللي وضحناه سابقا
وماننسى الليفه طبعا عشان الهيل
(وفي الغالب هذي قهوة الرجال اللي مايحبون الترامس وطبعا هذا دليل على حسن الضيافة)
***
طبعا الهيل والزعفران هما الاساسيات وفيه الاشياء الثانية اللي يحبها البعض ومايحبها البعض الاخر مثل القرنفل (المسمار=العويدي) والزنجبيل والنونخة
واشياء راجعة لرغبتكم واللي تحبونه
بكذا وصلنا لنهاية مشوارنا مع القهوة الملكية اللي تشربين منها ماتملين
وطعمها في الراس مثل مايقولون
*****
ارجو اني افدتكم حبيباتي واي سؤال انا حاضرة

*****
همسة: امي ضحكت علي يوم قلت لها اني برتب هالموضوع تقول قهوتنا عادية مافيها شي !!!
لكن هذا مايمنع تبادل الخبرات

ام هنود الحلو
حياك الله وبياك
نور متصفحي بتواجدك
وفعلا هالطريقة دقيقة
الله يعطيك العافية على المرور ماقصرتي

تسلمي انا اسوي كل شي زيك ما عدا اني احمصها في البيت شغلانه ولو اني ذقتها وهي محمسه في البيت ريحتها روعه وطعمها اروع

ماشاءاللـه عليـج
طريقتـج لايعلى عليهـا
بس بغيت اعرف طريقة حمس القهوه في البيت انتظر منج الرد

يسلمو ايديكِ حبيبتي على السرر الخطير

omroro-4
حياك الله منورة
مشكووووووووورة على المرور الله لايحرمك الاجر عزيزتي
*********
ام بـدوري.
منورة يالغلا
وطريقة تحميص القهوة بالنسبة لنا نحمصها بالفرن الكهربائي نشغل عليها من فوق ونحط القهوة في صينية فرن وطبعا نخليها اخر درجة بالفرن(لازم تصير بعيدة عشان ماتحترق) وبس خليك جنبها هالفترة وكل شوي حركيها الى ماتصير لونها يعجبك
وبعد فيه محمصة كهربائية جاهزة اسهل واسرع (لونها اسود وتصلح الفشار الابيض)
ارجو اني افدتك عزيزتي واي سؤال انا بالخدمة
ومشكووووووووورة على المرور الله لايحرمك الاجر
********
طيـــف
حيالله طيف منورة متصفحي يالغلا
ومشكوووووووورة على المرور الله لايحرمك الاجر
*******