السلام عليكم ورحمة الله وبركاتة
اخباركم حبيباتى
معلش انا مشغولة عنكم ... بس البيت والعيال انتوا اكيد عارفين
انا هدخل فى الموضوع على طول
من اسبوعين سافرت علشان فرح ابن عمى وقعدنا فى البلد حوالى اسبوع او 10 ايام
والصراحة استمتعنا جدا جدا بجو البلد
لكن من بعد ما رجعنا وحنين مفترية عليا خاااالص
البنت عنيدة جدا جدا كأنها بتعاقبنى لأنى مرضيتش اسيبها هناك ( واحنا ماشيين كانت تبكى ومش عايزة ترجع معانا عايزة تقعد مع جدها فى البلد )
كل حاجة زن ونرفزة ولو قلت لها حاجة ترد عليا بنفس كلامى ... يعنى لو قلت لها انتى وحشة تقوللى انتى اللى وحشة وعندها استعداد تعيط ساعة بحالها متواصلة وكمان بقت تصرخ جامد علشان اسمع صوتها
واوقات وهى بتعيط وانا اوبخها تتنرفز والاقيها مدت ايديها وضربتنى
ابوها ضربها كذا مرة لكن المشكلة انها مش بتخاف بالعكس بتعند زيادة ...
من ساعة ما رجعنا وانا الاحظها تضرب اختها او تشدها بقوة
وكل ما آخد رغد على رجلى علشان ارضعها او اغير لها الاقيها تجرى عايزة تقعد على رجلى واوقات كتير مش بترضى تقوم علشان ارضع اختها
الغيرة بقت صعبة قوى مش عارفة لية ولا عارفة السبب اللى خلاها مرة واحدة كدة مع اننا لما كنا فى البلد كانت بتلعب ومرحة جدا ... كانت مقضياها طوول النهار لعب لدرجة انها كانت بتيجى عليها اذان العشاء تكون نايمة من غير ما تحس
انا قلت يمكن يومين كدة علشان كانت بتلعب طول النهار هناك وهنا رجعت للحبسة تانى
لكن احنا دخلنا فى اسبوع راجعيين ومفيش فايدة
امبارح آخر موقف عملتة انها بتاخد توك بتاعتها وترميها من الشباك ولما ابوها سألها لية قالت لة علشان هى وحشة (التوكة)
جيت بعدها بشوية لبست انا توكة زيها ولما قالتلى يا ماما دى بتاعتى انا قلت لها لأ دى زى بتاعتك بابا اشتراها ليا ...بصت لى وسكتت وبعدها بشوية تخيلوا عملت اية
؟؟؟!!!
دخلت اوضة النوم واخدت الساعة بتاعتى ولبستها ولما قلت لها دى بتاعة ماما يا نونا قالتلى لأ دى بتاعتى بابا اشتراهالى ( زى ما انا قلت على التوك بتاعتها )
وراحت لأبوها وقالت لة ماما اخدت التوكة بتاعتى وانا اخدت الساعة بتاعتها
شفتوا بنتى واللى بتعملة فيا ؟؟!!!!!
المشكلة اللى بجد قلقانى دلوقتى انها دلوقتى لما بقت تعيط الاقيها تحط اصابعها فى بقها من غير ما تشعر
مع العلم ان اختها الصغيره دلوقتى بتحط اصابعها فى بقها كأنها بترضع فيها وبحاول اخليها تبطل العادة دى ...
هل اللى عند حنين دة حالة نفسية ولا اية ؟؟؟!!!
الروابط المفضلة